1. Ano ang benepisyo kon ginaistoryahan naton ang rason kon paano naton natun-an ang “kamatuoran”?

 “PAANO mo natun-an ang kamatuoran, ukon paano ka nangin Saksi ni Jehova?” Sigurado gid nga madamo na nga beses nga ginpamangkot ini sa imo. Isa ini sa una naton nga ginapamangkot kon gusto naton nga makilala sing maayo ang isa ka utod. Nanamian kita mamati sa aton mga kauturan kon ginaistorya nila kon paano sila nangin Saksi ni Jehova, kag nanamian man kita mag-istorya kon ngaa ginapabaloran gid naton ang kamatuoran. (Roma 1:11) Paagi sa sini nga mga pag-istoryahanay, madumduman naton ang mga rason kon ngaa nalipay gid kita nga mangin Saksi ni Jehova. Nagapalig-on man ini sa aton nga ‘padayon nga maglakat sa kamatuoran,’ ukon padayon nga tumanon si Jehova sa aton kabuhi para pakamaayuhon niya kita kag para malipay sia sa aton.—3 Juan 3, 4.

2. Ano ang binagbinagon naton sa sini nga artikulo?

² Sa sini nga artikulo, repasuhon naton ang pila ka rason kon ngaa ginapabaloran naton ang kamatuoran. Dayon binagbinagon naton kon paano naton padayon nga mapakita nga ginapabaloran naton ining hamili nga regalo. Paagi sa sini nga pagrepaso, sigurado gid nga magapasalamat pa gid kita kay Jehova kay ginbuyok niya kita sa kamatuoran. (Juan 6:44) Magapalig-on man ini sa aton nga panikasugan pa gid nga isugid sa iban ang kamatuoran.

3. Ano ang pinakaimportante nga rason kon ngaa ginapabaloran naton ang kamatuoran?

³ Madamo ang rason kon ngaa ginapabaloran naton ang kamatuoran. Ang pinakaimportante nga rason amo ang aton gugma kay Jehova nga Dios, nga amo ang ginahalinan sang kamatuoran. Paagi sa iya Pulong, ang Biblia, nakilala naton sia bilang labing gamhanan nga Manunuga sang langit kag duta kag bilang aton mahigugmaon nga Amay sa langit nga nagaulikid gid sa aton. (1 Ped.  5:7) Kabalo kita nga ang aton Dios “maluluy-on kag mainawaon, indi dali maakig kag bugana sa mainunungon nga gugma kag kamatuoran.” (Ex. 34:6) Ginapabaloran ni Jehova ang katarungan. (Isa. 61:8) Nasakitan sia kon nagaantos kita, kag gusto na gid niya nga dulaon ang tanan naton nga pag-antos sa iya gintalana nga tion. (Jer. 29:11) Excited na gid kita sa sina nga tion. Isa ini sa mga rason kon ngaa palangga gid naton si Jehova.

4-5. Ngaa ginkumparar ni apostol Pablo sa angkla ang aton paglaum?

⁴ Ano pa ang isa ka rason kon ngaa ginapabaloran naton ang kamatuoran? Daku gid ang nabulig sa aton sang kamatuoran. Binagbinaga ini nga halimbawa. Nalakip sa mga kamatuoran sa Biblia ang aton paglaum sa palaabuton. Para ilaragway ang importansia sini nga paglaum, si apostol Pablo nagsulat: “Ini nga paglaum nga yara sa aton daw kaangay sang angkla para sa kalag, pat-od kag malig-on.” (Heb. 6:19) Ang angkla amo ang nagabulig para indi maanod ang sakayan. Gani daw pareho sa angkla ang aton paglaum nga nabase sa Biblia kay nagabulig ini sa aton nga mangin malig-on kag kalmado kon may mga problema kita.

⁵ Sang ginsiling ini ni Pablo, ginabinagbinag niya ang parte sa ginapabaloran nga paglaum sang hinaplas nga mga Cristiano nga magkabuhi sa langit. Pero maaplikar man ini sa mga Cristiano nga nagalaum nga magkabuhi sing wala sing katapusan sa paraiso sa duta. (Juan 3:16) Huo, sang natun-an naton ang parte sa paglaum nga kabuhi nga wala sing katapusan, may katuyuan na ang aton kabuhi.

6-7. Paano nakabenepisyo si Yvonne sang natun-an niya ang kamatuoran parte sa palaabuton?

⁶ Binagbinaga ang eksperiensia sang isa ka sister nga si Yvonne. Wala sia nagdaku sa Saksi nga pamilya. Sang bata pa sia, nahadlok sia sa kamatayon bangod may nabasahan sia nga indi gid niya malipatan. Amo ini ang nabasahan niya: “Ang kamatayon ang katapusan sang tanan.” Nagsiling sia: “Bangod sini, indi ako makatulog kon gab-i sa pagpamensar parte sa palaabuton. ‘May katuyuan gid siguro ang aton kabuhi,’ nahunahuna ko. ‘Ti, ano ang katuyuan sang akon kabuhi?’ Indi ko gusto mapatay!”

⁷ Sang ulihi, sang tin-edyer na si Yvonne, may nakilala sia nga mga Saksi ni Jehova. Nagsiling sia: “Natun-an ko ang parte sa paglaum nga mabuhi sing wala sing katapusan sa Paraiso sa duta, kag nagapati ako nga matuod gid ini.” Paano nakabenepisyo ang aton sister sang natun-an niya ang kamatuoran? Nagsiling sia: “Makatulog na ako sing maayo kay wala na ako nabalaka parte sa palaabuton kag kamatayon.” Ginapabaloran gid ni Yvonne ang kamatuoran, kag nalipay gid sia nga isugid sa iban ang parte sa iya paglaum sa palaabuton.—1 Tim. 4:16.

8-9. (a) Sa isa ka ilustrasyon ni Jesus, paano ginpabaloran sang isa ka tawo ang bahandi nga iya nakita? (b) Daw ano ka hamili ang kamatuoran para sa imo?

⁸ Nalakip man sa mga kamatuoran sa Biblia ang maayong balita parte sa Ginharian sang Dios. Ginkumparar ni Jesus ang kamatuoran parte sa Ginharian sa isa ka bahandi nga natago. Sa Mateo 13:44, si Jesus nagsiling: “Ang Ginharian sang langit kaangay sang bahandi nga natago sa latagon, nga nakita sang isa ka tawo kag gintago; kag bangod sa kalipay, naglakat sia kag ginbaligya ang tanan niya nga pagkabutang kag ginbakal ang latagon.” Talupangda nga wala ginpangita sini nga tawo ang bahandi. Pero sang nakita niya ini, daku ang iya ginsakripisyo para mapanag-iyahan niya ini. Ginbaligya pa gani niya ang tanan niya nga pagkabutang. Ngaa? Bangod kabalo sia sang balor sini. Mas mahal pa ini sangsa tanan niya nga ginbaligya.

⁹ Amo man bala sini ang ginabatyag mo parte sa kamatuoran? Sigurado gid nga amo man sini ang ginabatyag mo. Nalipay gid kita sa aton pag-alagad kay Jehova subong, kag may paglaum kita nga mabuhi sing wala sing katapusan  sa palaabuton bilang mga sakop sang Ginharian sang Dios. Kabalo kita nga indi gid mahatag sini nga kalibutan ini nga kalipay. Balewala ang bisan ano nga ginsakripisyo naton kon ikumparar sa aton suod nga kaangtanan kay Jehova. Gusto naton nga “pahamut-an sia sing bug-os” bangod amo ini ang nagapahalipay gid sa aton.—Col. 1:10.

10-11. Ano ang nagpalig-on kay Michael nga maghimo sang daku nga mga pagbag-o sa iya kabuhi?

¹⁰ Madamo sa aton ang nagsakripisyo sang daku para mangin suod kay Jehova. Ginbiyaan sang iban ang ila maayo nga propesyon. Gin-untatan naman sang iban ang pagtinguha nga magmanggaranon. Kag may iban nga naghimo sang daku nga pagbag-o sa ila pagkabuhi sang natun-an nila ang parte kay Jehova. Amo ini ang ginhimo ni Michael. Wala sia nagdaku sa Saksi nga pamilya. Sang pamatan-on sia, nagtuon sia sang karate. Nagsiling sia: “Importante gid sa akon nga mabakod ako kag maayo pirme ang kondisyon sang akon lawas. Kon kaisa, pamatyag ko wala sing makapierde sa akon.” Pero sang nag-Bible study si Michael, natun-an niya ang pagtamod ni Jehova sa kasingki. (Sal. 11:5) Amo ini ang ginsiling ni Michael parte sa mag-asawa nga Saksi nga nag-study sa iya: “Wala gid nila ako ginsilingan nga untatan ang karate. Padayon lang nila ako nga gintudluan parte sa mga kamatuoran sa Biblia.”

¹¹ Samtang nagadamo ang natun-an ni Michael parte kay Jehova, mas ginpalangga pa gid niya Sia. Natandog gid sia sa kaluoy ni Jehova sa Iya mga alagad. Sang ulihi, narealisar ni Michael nga dapat sia maghimo sang desisyon nga magapabag-o sang iya kabuhi. “Ang pag-untat sa karate amo ang pinakamabudlay nga desisyon nga dapat ko himuon,” siling niya. “Pero kabalo man ako nga malipay sa sini si Jehova, kag kumbinsido ako nga mas importante ang pag-alagad sa iya sangsa bisan ano nga akon isakripisyo.” Ginpabaloran gid ni Michael ang kamatuoran nga iya natun-an, gani naghimo sia sang daku nga mga pagbag-o sa iya kabuhi.—Sant. 1:25.

12-13. Paano nakabulig kay Mayli ang mga kamatuoran sa Biblia?

¹² Para ipakita ang balor sang kamatuoran, ginkumparar ini sang Biblia sa suga nga nagasiga sa madulom nga lugar. (Sal. 119:105; Efe. 5:8) Ginpabaloran gid ni Mayli, nga taga-Azerbaijan, ang kamatuoran nga natun-an niya sa Pulong sang Dios. Lainlain ang relihion sang iya mga ginikanan. Muslim ang iya amay, kag Judiyo naman ang iya iloy. Nagsiling sia: “Wala ako nagaduhaduha nga may Dios, pero may mga ginapaligban ako. Nagapalibog ako, ‘Ngaa gintuga pa sang Dios ang mga tawo kon magaantos man lang sila sa bilog nila nga kabuhi, kag dayon paantuson naman sila sing wala sing katapusan sa impierno?’ Nagasiling ang mga tawo nga pagbuot sang Dios ang tanan nga nagakatabo, gani nagapalibog ako, ‘Ginakontrol bala sang Dios ang nagakatabo sa mga tawo kay nalipay sia nga nagaantos sila?’”

¹³ Ginpangita ni Mayli ang mga sabat sa iya mga pamangkot. Sang ulihi, nagpasugot sia nga mag-Bible study kag nangin isa sia ka Saksi ni Jehova. “Nagbag-o ang akon pagtamod sa kabuhi bangod sang makapakumbinsi nga mga sabat sang Biblia,” siling niya. “Nangin matawhay ang akon hunahuna bangod sang makatarunganon nga mga paathag sang Pulong sang Dios.” Pareho kay Mayli, ginadayaw naton tanan si Jehova, ang “Isa nga nagtawag sa [aton] halin sa kadudulman pakadto sa iya makatilingala nga kapawa.”—1 Ped. 2:9.

14. Ano ang himuon naton para mas pabaloran pa gid naton ang kamatuoran? (Tan-awa man ang kahon nga “ Ginkumparar Man ang Kamatuoran sa Iban Pa nga mga Butang.”)

¹⁴ Pila lang ini sa mga halimbawa nga nagapakita sang balor sang kamatuoran. Sigurado gid nga may nadumduman ka pa nga iban nga mga halimbawa. Para mas pabaloran pa gid naton ang kamatuoran, ilakip naton sa aton personal  nga pagtuon ang pagpangita sang iban pa nga mga rason kon ngaa ginapabaloran naton ini. Kag kon ginapabaloran naton ang kamatuoran, magapanikasog pa gid kita nga ipakita ang aton pagpabalor sa sini.

15. Ano ang isa ka paagi para mapakita naton nga ginapabaloran naton ang kamatuoran?

¹⁵ Mapakita naton nga ginapabaloran naton ang kamatuoran paagi sa regular nga pagtuon sang Biblia kag sang mga publikasyon nga nabase sa Biblia. Bisan pa madugay na kita nga Saksi ni Jehova, madamo gihapon kita sang matun-an. Ang pinakauna nga isyu sini nga magasin nagsiling: “Ang kamatuoran napalibutan sang kabutigan kag halos matabunan ini, pareho sa isa ka gamay nga bulak sa kagulangan nga daw indi na makita bangod sang madabong nga hilamon. Dapat ka manikasog para makita ini. . . . Dapat ka magduko para makuha ini. Indi makontento sa isa lang ka bulak sang kamatuoran. . . . Magpadayon sa pagtipon, magpadayon sa pagpangita.” Gani kinahanglan mo magpanikasog para magtuon, pero malipay ka gid sa sini.

16. Ano nga paagi sang pagtuon ang nakabulig sa imo? (Hulubaton 2:4-6)

¹⁶ May pila sa aton nga wala nanamian magbasa  kag magtuon. Pero gusto ni Jehova nga ‘padayon kita nga mangita’ kag ‘padayon kita nga magkutkot’ para mas mahangpan naton sing maayo ang kamatuoran. (Basaha ang Hulubaton 2:4-6.) Kon himuon naton ini, para gid ini pirme sa aton kaayuhan. Parte sa personal nga pagbasa sang Biblia, nagsiling si Corey nga ginahatagan niya sang tion ang kada bersikulo. Nagsiling sia: “Ginabasa ko ang tanan nga footnote, ginabasa ko ang tanan nga cross-reference, kag naga-research pa gid ako. . . . Madamo gid ako sang natun-an sa sini nga paagi sang pagtuon.” Posible nga amo man sini ang aton paagi sang pagtuon ukon may iban pa kita nga paagi. Pero bisan ano man ang aton paagi, mapakita naton nga ginapabaloran naton ang kamatuoran kon hatagan naton sang tion ang pagtuon kag kon panikasugan gid naton ini.—Sal. 1:1-3.

17. Ano ang buot silingon sang pag-aplikar sang aton natun-an? (Santiago 1:25)

¹⁷ Kabalo kita nga indi bastante nga tun-an lang naton ang kamatuoran, kundi dapat gid naton iaplikar ang aton natun-an. Kon himuon naton ini, mangin matuod kita nga malipayon bangod sa kamatuoran. (Basaha ang Santiago 1:25.) Paano naton masigurado nga ginaaplikar naton ang kamatuoran? Ang isa ka brother nagpanugda nga dapat naton usisaon ang aton kabuhi para mabal-an naton kon ano na ang mga ginaaplikar naton sa aton mga natun-an, kag kon ano ang mga wala pa naton ginaaplikar. Si apostol Pablo nagsiling: “Bisan ano man nga pag-uswag ang aton nahimo sa sini, padayon kita nga maglakat sa husto nga paagi sa amo gihapon nga dalanon.”—Fil. 3:16.

18. Ngaa ginahimo naton ang aton bug-os nga masarangan para ‘padayon kita nga makalakat sa kamatuoran’?

¹⁸ Hunahunaa ang mga benepisyo kon ginahimo naton ang aton bug-os nga masarangan para ‘padayon kita nga makalakat sa kamatuoran.’ Magluwas nga mangin malipayon kita sa aton kabuhi, malipay man si Jehova kag ang aton mga kauturan bangod sa aton. (Hulu. 27:11; 3 Juan 3, 4) Amo ini ang pinakamaayo nga mga rason kon ngaa dapat naton pabaloran kag iaplikar ang kamatuoran.