1-2. (a) Ano ang ginaselebrar sang pila ka pungsod? (Tan-awa ang kahon nga “ Ano ang Tuig sang Kahilwayan?”) (b) Parte sa ano ang ginhambal ni Jesus sa Lucas 4:16-18?

ANG pila ka pungsod nagahiwat sang espesyal nga okasyon para iselebrar ang ika-50 nga tuig nga paggahom sang hari ukon sang rayna. Ang selebrasyon mahimo maglawig sing isa ka adlaw, isa ka semana, ukon mas malawig pa, pero matapos man ini nga selebrasyon, kag nagakalipatan man dayon ini sang mga tawo.

² Binagbinagon naton ang isa ka selebrasyon nga mas maayo sangsa ginaselebrar sa Israel sang una kada 50 ka tuig. Ang selebrasyon sang Tuig sang Kahilwayan sa Israel nagalawig sing isa ka tuig, kag nagahatag ini sing kahilwayan sa katawhan. Ngaa dapat naton ini tun-an? Bangod ang Tuig sang Kahilwayan sa Israel nagapahanumdom sa aton sang dalayawon nga aman ni Jehova. Ini nga aman magahatag sa aton sang wala sing katapusan nga kahilwayan, kag makabenepisyo kita sa sini bisan subong pa lang. May ginhambal si Jesus parte sa sini nga kahilwayan.—Basaha ang Lucas 4:16-18.

3. Suno sa Levitico 25:8-12, paano nakabenepisyo ang mga Israelinhon sa Tuig sang Kahilwayan?

³ Mas mahangpan naton sing maayo ang parte sa kahilwayan nga ginsambit ni Jesus kon binagbinagon naton ang Tuig sang Kahilwayan nga ginpatuman sang Dios sa iya katawhan sang una. Ginsilingan ni Jehova ang mga Israelinhon: “Dapat ninyo pakabalaanon ang ika-50 nga tuig kag iproklamar ang kahilwayan sa tanan nga pumuluyo sini nga duta. Mangin Tuig sang Kahilwayan ini para sa inyo. Magbalik ang kada isa sa inyo sa iya duta kag magbalik ang kada isa sa inyo sa iya pamilya.” (Basaha ang  Levitico 25:8-12.) Sa nagligad nga artikulo, ginbinagbinag naton kon paano nakabenepisyo ang mga Israelinhon sa Adlaw nga Inugpahuway kada semana. Paano naman nakabenepisyo ang mga Israelinhon sa Tuig sang Kahilwayan? Halimbawa, may utang ang isa ka Israelinhon kag napilitan sia nga ibaligya ang iya duta para mabayaran niya ang iya utang. Sa Tuig sang Kahilwayan, ibalik sa iya ang iya duta. Gani, ‘makabalik sia sa iya duta,’ kag indi madula ang palanublion sang iya kabataan. Ukon basi daku gid ang utang sang isa ka Israelinhon gani napilitan sia nga ibaligya bilang ulipon ang iya kaugalingon ukon ang isa sa iya mga anak para mabayaran niya ang iya utang. Sa Tuig sang Kahilwayan, ang ulipon dapat ‘magbalik sa iya pamilya.’ Gani may paglaum ang tanan nga ulipon kay wala sing isa nga magapabilin nga ulipon sa bilog niya nga kabuhi. Mainulikdon gid si Jehova!

4-5. Ngaa importante nga tun-an naton ang parte sa Tuig sang Kahilwayan nga ginaselebrar sang una?

⁴ Ano ang isa pa ka benepisyo sang Tuig sang Kahilwayan? Nagsiling si Jehova: “Wala sing isa sa inyo nga mangin imol, kay pakamaayuhon kamo ni Jehova sa duta nga ginahatag sa inyo ni Jehova nga inyo Dios bilang palanublion.” (Deut. 15:4) Tuhay gid ini sa nagakatabo subong, kay ang mga manggaranon masami nga nagamanggaranon pa gid, kag ang mga imol nagaimol pa gid!

⁵ Bilang mga Cristiano, wala na ginapatuman sa aton ang Mosaikong Kasuguan. Buot silingon, wala naton ginasunod ang kasuguan sa Tuig sang Kahilwayan parte sa paghilway sang mga ulipon, pagkanselar sang mga utang, kag pagbalik sang mga duta. (Roma 7:4; 10:4; Efe. 2:15) Pero, importante nga tun-an naton ang parte sa Tuig sang Kahilwayan. Ngaa? Bangod ginapahanumdom kita sini sang ginhimo ni Jehova para sa aton para mahilway kita sa sala.

6. Sa ano nga sahi sang pagkaulipon dapat mahilway ang katawhan?

⁶ Tanan kita dapat mahilway bangod ulipon kita sang sala, nga isa ka mapintas nga sahi sang pagkaulipon. Nagatigulang kita, nagamasakit, kag nagakapatay bangod makasasala kita. Madamo ang makasiling nga matuod gid ini  kon magpang-espiho sila ukon magpakonsulta sa doktor. Nagaluya man ang aton buot kon makasala kita. Gin-aku ni apostol Pablo nga ‘ginakontrol sia sang kasuguan nga amo ang sala nga yara sa iya lawas.’ Nagsiling pa sia: “Makaluluoy gid ako! Sin-o ang makaluwas sa akon sa lawas nga nagadul-ong sa sini nga kamatayon?”—Roma 7:23, 24.

7. Ano ang gintagna ni Isaias parte sa kahilwayan?

⁷ Nalipay gid kita kay may ginhimo ang Dios para maluwas kita, ukon mahilway sa sala. Nangin posible ini nga kahilwayan bangod kay Jesus. Sobra 700 ka tuig antes magkadto si Jesus sa duta, may gintagna si manalagna Isaias parte sa isa ka dalayawon nga kahilwayan sa palaabuton, nga mas maayo sangsa kahilwayan nga ginabaton sang mga Israelinhon kon Tuig sang Kahilwayan. Nagsulat sia: “Ang espiritu sang Soberanong Ginuong Jehova yara sa akon, kay si Jehova naghaplas sa akon sa pagbantala sing maayong balita sa mga mahagop. Ginpadala niya ako sa pagbugkos sa pilas sang mga nagakalisod, sa pagbantala sing kahilwayan sa mga bihag.” (Isa. 61:1) Sin-o ang ginapatuhuyan sa sini nga tagna?

8. Sin-o ang ginapatuhuyan sa tagna ni Isaias parte sa kahilwayan?

⁸ Ining importante nga tagna parte sa kahilwayan nagsugod nga matuman sang gin-umpisahan ni Jesus ang iya ministeryo. Sang nagkadto sia sa sinagoga sa ila lugar sa Nazaret, ginbasa ni Jesus sa atubangan sang mga Judiyo nga nagatipon didto ini nga tagna ni Isaias: “Ang espiritu ni Jehova yara sa akon, kay ginhaplas niya ako sa pagpahayag sing maayong balita sa mga imol. Ginpadala niya ako sa pagbantala sing kahilwayan sa mga bihag kag sa pagpasag-uli sing panan-aw sa mga bulag, sa paghilway sa mga ginapigos, sa pagbantala sing tuig nga nahamut-an ni Jehova.” Dayon ginpatuhuyan ni Jesus ang iya kaugalingon sa sini nga tagna. (Luc. 4:16-19) Paano gintuman ni Jesus ini nga tagna?

9. Ano nga kahilwayan ang ginalauman sang madamo nga tawo sang panahon ni Jesus?

⁹ Sang unang siglo, nakabaton ang katawhan sing kahilwayan nga gintagna ni Isaias kag ginbasa ni Jesus. Ginpamatud-an ini ni Jesus sang nagsiling sia: “Karon ining kasulatan nga bag-o lang ninyo nabatian natuman.” (Luc. 4:21) Sang ginbasa ni Jesus ang tagna, madamo sa mga nagapamati ang mahimo naglaum nga mahilway sila sa paggahom sang Roma. Mahimo nga ginhunahuna man ini sang mga disipulo ni Jesus. Kay man, duha sa ila ang nagsiling sang ulihi: “Naglaum kami nga sia amo na ang magaluwas  sang Israel.” (Luc. 24:13, 21) Pero kabalo kita nga wala ginpalig-on ni Jesus ang iya mga sumulunod nga magrebelde sa mapintas nga paggahom sang Roma. Sa baylo, ginsilingan niya sila nga ‘ihatag sa Cesar ang mga butang nga iya sang Cesar.’ (Mat. 22:21) Ti, paano ginhilway ni Jesus ang katawhan sadto?

10. Sa ano ginhilway ni Jesus ang katawhan?

¹⁰ Ginbuligan sang Anak sang Dios ang katawhan nga mahilway sa duha ka paagi. Una, ginbuligan sila ni Jesus nga mahilway sa nagapabug-at nga mga doktrina sang mga lider sang relihion. Madamo nga Judiyo sadto ang ginapilit nga tumanon ang mga tradisyon sang tawo kag ang butig nga mga panudlo. (Mat. 5:31-37; 15:1-11) May mga tawo nga nagasiling nga ginabuligan nila ang iban nga maalagad ang Dios, pero sila mismo wala nagaalagad sa Dios sa husto nga paagi. Gani daw mga bulag sila. Bangod ginsikway nila ang Mesias kag ang kamatuoran nga iya gintudlo, ara sila gihapon sa kadudulman kag ulipon sila gihapon sang sala. (Juan 9:1, 14-16, 35-41) Paagi sa pagtudlo ni Jesus sang kamatuoran kag paagi sa iya maayo nga halimbawa, ginpakita niya sa mga mapainubuson kon paano sila mahilway sa butig nga mga panudlo.—Mar. 1:22; 2:23–3:5.

11. Ano ang ikaduha nga paagi nga ginhilway ni Jesus ang katawhan?

¹¹ Ang ikaduha nga paagi amo ang paghilway ni Jesus sa katawhan sa pagkaulipon sa napanubli nga sala. Bangod ginhatag ni Jesus ang iya kabuhi bilang gawad, mapatawad sang Dios ang mga sala sang mga nagabaton sang gawad kag nagapakita sang pagtuo sa sini. (Heb. 10:12-18) Nagsiling si Jesus: “Kon hilwayon kamo sang Anak, mangin hilway gid kamo.” (Juan 8:36) Ini nga kahilwayan mas maayo sangsa kahilwayan nga ginabaton sang mga Israelinhon kon Tuig sang Kahilwayan! Halimbawa, ang isa ka tawo nga ginhilway sa Tuig sang Kahilwayan posible mangin ulipon liwat, kag sa ulihi mapatay.

12. Sin-o ang una nga nakabenepisyo sa kahilwayan nga ginpahibalo ni Jesus?

¹² Sang adlaw sang Pentecostes 33 C.E., ginhaplasan ni Jehova sang balaan nga espiritu ang mga apostoles kag ang iban pa nga matutom nga mga lalaki kag babayi. Gin-adoptar niya sila bilang iya mga anak para sa ulihi banhawon sila sa langit para maggahom kaupod ni Jesus. (Roma 8:2, 15-17) Sila ang una nga nakabenepisyo sa kahilwayan nga ginpahibalo ni Jesus sa sinagoga sa Nazaret. Indi na sila ulipon sang butig nga mga panudlo kag mga kustombre sang Judiyo nga mga lider sang relihion nga wala nabase sa Kasulatan. Ginkabig man sila sang Dios nga hilway na sila sa sala kag kamatayon. Ining malaragwayon nga Tuig sang Kahilwayan  nga nagsugod sang ginhaplasan ang mga sumulunod sang Cristo sang 33 C.E. matapos sa katapusan sang Isa ka Libo ka Tuig nga Paggahom ni Jesus. Ano ang matabo antes matapos ang Isa ka Libo ka Tuig?

13-14. Magluwas sa hinaplas nga mga Cristiano, sin-o pa ang makabaton sang kahilwayan nga ginpahibalo ni Jesus?

¹³ Subong, minilyon ka sinsero nga tawo halin sa tanan nga pungsod ang bahin sang “iban nga mga karnero.” (Juan 10:16) Wala sila ginpili sang Dios para maggahom sa langit kaupod ni Jesus. Sa baylo, ang Biblia nagasiling nga may paglaum sila nga mabuhi sing wala sing katapusan sa duta. Amo bala sini ang imo paglaum?

¹⁴ Bisan subong pa lang, mabaton mo man ang pila ka benepisyo nga nabaton sang mga hinaplas. Paagi sa imo pagtuo sa halad-gawad ni Jesus, makapangayo ka sing kapatawaran sa imo mga sala. Gani matigayon mo ang maayo nga kaangtanan sa Dios kag matinlo nga konsiensia. (Efe. 1:7; Bug. 7:14, 15) Hunahunaa man ang mga pagpakamaayo sa imo bangod nahilway ka na sa butig nga mga panudlo. Nagsiling si Jesus: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Nalipay gid kita sa sini nga kahilwayan!

15. Ano nga kahilwayan kag mga pagpakamaayo ang ginapaabot naton?

¹⁵ May ginapaabot kita nga mas maayo pa gid nga kahilwayan. Sa indi na lang madugay, laglagon  ni Jesus ang butig nga mga relihion kag korap nga mga gobierno. Amligan sang Dios “ang daku nga kadam-an” nga nagaalagad sa iya, kag pakamaayuhon niya sila sa paraiso nga duta. (Bug. 7:9, 14) Madamo nga tawo ang pagabanhawon kag may kahigayunan sila nga mahilway sa tanan nga malain nga epekto sang sala ni Adan.—Binu. 24:15.

16. Ano nga dalayawon nga kahilwayan ang mabaton sang katawhan sa palaabuton?

¹⁶ Sa tion sang Isa ka Libo ka Tuig nga Paggahom ni Jesus, sia kag ang iya kaupod nga mga manuggahom magabulig sa katawhan para mangin perpekto ang ila pisikal kag espirituwal nga kahimtangan. Ini nga tion sang pag-ayo kag paghilway mangin pareho sa Tuig sang Kahilwayan sa Israel. Gani ang tanan nga matutom nga nagaalagad kay Jehova sa duta mangin perpekto kag hilway na sa sala.

17. Ano ang gintagna sang Isaias 65:21-23 nga mangin kabuhi sang katawhan sang Dios? (Tan-awa ang piktyur sa kober.)

¹⁷ Ginalaragway sang Isaias 65:21-23 ang mangin kabuhi sa duta sa palaabuton. (Basaha.) Indi kita magapahimunong lang kag wala sing himuon. Sa baylo, ginapakita sang Biblia nga ang katawhan sang Dios magahimo sang mapuslanon kag makalilipay nga mga hilikuton. Pagkatapos sang Isa ka Libo ka Tuig, makasigurado kita nga “ang mga tinuga hilwayon man sa pagkaulipon sa lawas nga nagakadunot kag mabaton nila ang mahimayaon nga kahilwayan sang mga anak sang Dios.”—Roma 8:21.

18. Ngaa makasalig kita nga may makalilipay kita nga palaabuton?

¹⁸ Sang una, ginsigurado ni Jehova nga may tion ang mga Israelinhon sa pag-obra kag sa pagpahuway. Himuon man niya ini sa iya katawhan sa Isa ka Libo ka Tuig nga Paggahom sang Cristo. Sigurado gid nga may tion kita para sa espirituwal nga mga hilikuton. Ang pagsimba sa Dios importante gid para mangin malipayon kita subong, kag importante man ini sa bag-ong kalibutan. Ang tanan nga matutom nga tawo mangin malipayon sa tion sang Isa ka Libo ka Tuig nga Paggahom sang Cristo bangod tanan kita may makalilipay nga hilikuton kag tanan kita nagaalagad sa Dios.