1. Ano ang pagtamod sang madamo nga tawo parte sa pag-obra?

PAANO ginatamod sang kalabanan nga tawo sa inyo lugar ang parte sa pag-obra? Sa madamo nga pungsod, nagabakabaka gid obra ang mga tawo kag nagaobra sila sing mas malawig nga oras. Ang mga tawo nga nagapataypatay gid sa pag-obra masami nga wala na sing tion sa ila pamilya, sa pagtuon parte sa Dios, kag bisan sa pagpahuway. (Man. 2:23) Pero may pila naman ka tawo nga indi gid luyag mag-obra kag pirme lang sila may rason para indi sila makaobra.—Hulu. 26:13, 14.

2-3. Ano ang pagtamod ni Jehova kag ni Jesus parte sa pag-obra?

² Indi husto ang pagtamod sang madamo nga tawo sa kalibutan parte sa pag-obra. Pero binagbinaga ang pagtamod ni Jehova kag ni Jesus parte sa sini. Kabalo kita nga nanamian si Jehova sa pag-obra. Maathag ini sa ginsiling ni Jesus: “Ang akon Amay padayon nga nagapangabudlay tubtob karon, kag ako man padayon nga nagapangabudlay.” (Juan 5:17) Hunahunaa ang tanan nga ginhimo sang Dios sang gintuga niya ang indi maisip nga mga anghel kag ang malapad nga uniberso. Madamo man sing gintuga ang Dios sa aton matahom nga duta. Ang salmista nagsiling: “Tuman kadamo sang imo binuhatan, O Jehova! Ginhimo mo ini tanan sa imo kaalam. Ang duta puno sang imo mga tinuga.”—Sal. 104:24.

³ Gin-ilog ni Jesus ang iya Amay. Ginlaragway sia bilang kaalam, kag nagbulig sia sang “ginhimo [sang Dios] ang kalangitan.” Kaupod sia ni Jehova “subong batid nga manugpangabudlay.” (Hulu. 8:27-31) Sang ulihi, sang ari si Jesus sa duta, dalayawon gid ang iya mga ginhimo. Ginkabig niya nga pagkaon ang buluhaton nga ginpahimo sa iya ni Jehova, kag ang iya mga ginhimo nagpamatuod nga ginpadala sia sang Dios—Juan 4:34; 5:36; 14:10.

4. Ano ang matun-an naton kay Jehova kag kay Jesus parte sa pagpahuway?

 ⁴ Bangod nagpangabudlay si Jehova kag si Jesus, buot silingon bala sini nga indi naton kinahanglan ang pahuway? Indi. Wala ginakapoy si Jehova, gani indi niya kinahanglan magpahuway. Pero, nagsiling ang Biblia nga pagkatapos matuga ni Jehova ang langit kag ang duta, “nag-untat sia sa pagpangabudlay kag nagpahuway.” (Ex. 31:17) Ginapahangop sini nga nag-untat si Jehova sa pagpanuga sang mga butang para apresyahon ang iya mga ginhimo. Kag bisan pa nagpangabudlay si Jesus sang ari sia sa duta, ginsigurado niya nga may tion sia sa pagpahuway kag sa pagkaon upod ang iya mga abyan.—Mat. 14:13; Luc. 7:34.

5. Ano nga kabudlayan ang ginaatubang sang madamo nga katawhan sang Dios?

⁵ Ang Biblia nagapalig-on sa katawhan sang Dios nga dapat nanamian sila sa pag-obra. Ang iya mga alagad dapat mapisan, indi matamad. (Hulu. 15:19) Mahimo nagatrabaho ka para maamanan ang imo pamilya. Kag ang tanan nga disipulo sang Cristo may responsibilidad nga ibantala ang maayong balita. Pero, kinahanglan mo man magpahuway. Nabudlayan ka bala kon kaisa sa pagtunga sang imo tion para sa trabaho, ministeryo, kag pagpahuway? Paano naton mabal-an kon ano kadamo nga oras kita dapat magpangabudlay kag magpahuway?

6. Paano ginapakita sang Marcos 6:30-34 nga husto ang pagtamod ni Jesus sa pag-obra kag sa pagpahuway?

⁶ Importante ang husto kag balanse nga pagtamod sa pag-obra. Si Hari Solomon nagsulat: “May tion para sa tagsa ka hilikuton.” Ginsambit niya ang pagtanom, pagpatindog, paghibi, pagkadlaw, pagsaot, kag iban pa nga hilikuton. (Man. 3:1-8) Maathag nga ang pag-obra kag ang pagpahuway duha ka importante nga bahin sang aton kabuhi. Husto ang pagtamod ni Jesus sa pag-obra kag sa pagpahuway. Isa ka bes, pagbalik sang mga apostoles halin sa pagbantala, nangin masako gid sila amo nga ‘wala na sila sing tion bisan sa pagkaon.’ Ginsilingan sila ni Jesus: “Dali kamo, makadto kita sa isa ka baw-ing nga lugar nga kitahanon lang kag magpahuway sing makadali.” (Basaha ang Marcos 6:30-34.) Bisan pa nga si Jesus kag ang iya mga disipulo indi pirme makapahuway sing maayo, kabalo sia nga kinahanglan nila tanan ang pahuway.

7. Ano ang mabulig sa aton kon binagbinagon naton ang kasuguan parte sa Adlaw nga Inugpahuway?

⁷ Kon kaisa, kinahanglan gid naton ang pahuway ukon ang pagbag-o sang aton rutina. Mahangpan naton ini sa isa ka sugo sang Dios sa iya katawhan sang una, nga amo ang pagtuman sang Adlaw nga Inugpahuway kada semana. Wala na ginapatuman sa aton ang Mosaikong Kasuguan, pero makabenepisyo kita kon binagbinagon naton ang parte sa Adlaw nga Inugpahuway. Ang matun-an naton makabulig sa aton nga mausisa ang aton pagtamod sa pag-obra kag sa pagpahuway.

8. Suno sa Exodo 31:12-15, ano ang katuyuan sang Adlaw nga Inugpahuway?

⁸ Ang Pulong sang Dios nagasiling nga pagkatapos sang anom ka “adlaw” nga pagpanuga, nag-untat ang Dios sa iya ginahimo nga pagpanuga sa duta. (Gen. 2:2) Pero, nanamian si Jehova sa pag-obra, kag “padayon [sia] nga nagapangabudlay” sa iban nga hilikuton. (Juan 5:17) Nagpangabudlay si Jehova sing anom ka “adlaw” kag nagpahuway sia sa ikapito nga “adlaw,” kag ginsilingan niya ang mga Israelinhon nga magpahuway kada ikapito nga adlaw. Nagsiling ang Dios nga ang Adlaw nga Inugpahuway isa ka tanda sa ulot niya kag sang Israel. Dapat “magpahuway gid” ang katawhan sa sina nga adlaw, kag “balaan ini kay Jehova.” (Basaha ang Exodo 31:12-15.) Ang tanan ginadumilian nga mag-obra, lakip ang mga kabataan, ulipon, kag bisan ang kasapatan sa uma. (Ex. 20:10) Bangod sini, mas nahatagan  sang katawhan sing tion ang ila espirituwal nga mga kinahanglanon.

9. Sang panahon ni Jesus, ano ang indi husto nga pagtamod sang pila ka tawo parte sa Adlaw nga Inugpahuway?

⁹ Nakabenepisyo ang katawhan sang Dios sa Adlaw nga Inugpahuway; pero, madamo nga lider sang relihion sang panahon ni Jesus ang naghimo sang estrikto nga mga pagsulundan parte sa sini. Nagsiling sila nga kon Adlaw nga Inugpahuway, sala bisan ang pagpangutol sang mga uhay sang trigo ukon ang pagpang-ayo sang mga masakiton. (Mar. 2:23-27; 3:2-5) Pero indi amo sini ang pagtamod sang Dios, kag gin-athag ini ni Jesus sa mga nagpamati sa iya.

10. Ano ang matun-an naton sa Mateo 12:9-12 parte sa pagtamod ni Jesus sa Adlaw nga Inugpahuway?

¹⁰ Gintuman ni Jesus kag sang iya Judiyo nga mga sumulunod ang Adlaw nga Inugpahuway bangod ginsunod nila ang Mosaikong Kasuguan. * Pero ginpakita ni Jesus paagi sa iya mga ginsiling kag ginhimo nga indi sala ang pagbulig kag paghimo sing maayo sa iban sa Adlaw nga Inugpahuway. Nagsiling sia: “Ginatugot sang kasuguan ang paghimo sing maayo sa Adlaw nga Inugpahuway.” (Basaha ang Mateo 12:9-12.) Wala niya gintamod nga isa ka paglapas sa Adlaw nga Inugpahuway ang pagbulig kag paghimo sing maayo sa iban. Ang mga ginhimo ni Jesus nagapakita nga nahangpan niya ang importante nga katuyuan sang Adlaw nga Inugpahuway. Bangod makapahuway ang katawhan sang Dios sa ila adlaw-adlaw nga mga hilikuton, makapokus sila sa ila pagsimba sa Dios. Mahimo nga ginpanginpuslan sang  pamilya ni Jesus ang Adlaw nga Inugpahuway para sa ila espirituwal nga kaayuhan. Masiling naton ini kay sang ara si Jesus sa ila lugar nga Nazaret, amo ini ang mabasa naton parte sa iya: “Suno sa [kinabatasan ni Jesus] sa Adlaw nga Inugpahuway, nagsulod sia sa sinagoga, kag nagtindog sia agod magbasa sang Kasulatan.”—Luc. 4:15-19.

11. Sin-o ang nagpakita sang maayo nga halimbawa kay Jesus parte sa pag-obra?

¹¹ Sigurado gid nga gintudluan ni Jose ang iya gin-adoptar nga anak, nga si Jesus, sang pagtamod sang Dios parte sa pag-obra sang ginahanas niya sia nga mangin panday. (Mat. 13:55, 56) Kag mahimo gid nga nakita ni Jesus ang pagpangabudlay ni Jose kada adlaw para maamanan ang iya daku nga pamilya. Talalupangdon nga sang ulihi ginsilingan ni Jesus ang iya mga disipulo: “Ang mamumugon takus sa iya suhol.” (Luc. 10:7) Maathag nga kabalo si Jesus nga kinahanglan magpangabudlay.

12. Ano nga mga teksto ang nagapakita sang pagtamod ni Pablo parte sa pagpangabudlay?

¹² Kabalo man si apostol Pablo nga kinahanglan magpangabudlay. Ang iya panguna nga hilikuton amo ang pagpanaksi sa iban parte kay Jesus kag sa iya mga gintudlo. Pero, nagtrabaho man si Pablo para suportahan ang iya kaugalingon. Nabal-an sang mga taga-Tesalonica ang iya ‘pagpangabudlay kag pagpanikasog sa adlaw kag gab-i’ para indi sia “makapabug-at sa pinansial” sa kay bisan sin-o. (2 Tes. 3:8; Binu. 20:34, 35) Sang nagsulat si Pablo parte sa iya obra, mahimo nga ginapatuhuyan niya ang paghimo sing tolda. Sang ara sia sa Corinto, nagdayon sia kanday Aquila kag Priscila ‘bangod pareho sila sing palangitan-an, kag nag-updanay sila sa ila obra.’ Sang nagsiling si Pablo nga nag-obra sia “adlaw kag gab-i,” indi niya buot silingon nga wala sia nagapahuway. May mga tion nga wala sia nagahimo sing tolda, lakip na kon tion sang Adlaw nga Inugpahuway. Sa sina nga adlaw, nagapanaksi sia sa mga Judiyo, nga wala man nagaobra kon Adlaw nga Inugpahuway.—Binu. 13:14-16, 42-44; 16:13; 18:1-4.

13. Ano ang matun-an naton sa halimbawa ni Pablo?

¹³ Maayo gid nga halimbawa si apostol Pablo. Kinahanglan niya magtrabaho, pero ginsigurado niya nga regular sia nga makapakigbahin sa “balaan nga hilikuton” nga amo ang ‘pagbantala sang maayong balita sang Dios.’ (Roma 15:16; 2 Cor. 11:23) Ginpalig-on niya ang iban nga himuon man ini. Sanday Aquila kag Priscila nangin ‘kaupod niya nga nagpangabudlay sa hilikuton ni Cristo Jesus.’ (Roma 12:11; 16:3) Ginpalig-on ni Pablo ang mga taga-Corinto nga dapat “madamo [sila] pirme sing ginahimo sa hilikuton sang Ginuo.” (1 Cor. 15:58; 2 Cor. 9:8) Gintuytuyan pa gani ni Jehova si apostol Pablo nga isulat ini: “Ang bisan sin-o nga indi luyag mag-obra, indi pagpakan-a.”—2 Tes. 3:10.

14. Ano ang buot silingon ni Jesus sa iya ginsiling sa Juan 14:12?

¹⁴ Ang pinakaimportante nga hilikuton sa sining katapusan nga mga adlaw amo ang pagbantala kag pagtudlo sa mga tawo. Ang matuod, gintagna ni Jesus nga ang iya mga disipulo magahimo sang mga buhat nga labaw pa sa ginhimo niya! (Basaha ang Juan 14:12.) Indi niya buot silingon nga magahimo man kita sang mga milagro. Sa baylo, ang iya mga sumulunod magabantala kag magatudlo sa mas malapad nga teritoryo, sa mas madamo nga tawo, kag sa mas malawig nga tion.

15. Ano ang mga dapat naton ipamangkot sa aton kaugalingon, kag ngaa?

¹⁵ Kon may trabaho ka, pamangkuta ang imo kaugalingon: ‘Kilala bala ako sa amon ulubrahan nga mapisan magtrabaho? Ginatapos ko bala ang akon trabaho suno sa iskedyul kag ginahimo ko bala ang akon bug-os nga masarangan?’ Kon huo ang imo sabat, posible gid nga saligan ka sang imo amo. Kag posible man nga mas mangin interesado mamati sa maayong balita ang mga kaupod mo sa trabaho. Parte naman sa pagbantala kag pagtudlo nga hilikuton, pamangkuta ang imo kaugalingon: ‘Kilala bala ako nga mapisan sa  ministeryo? Ginahandaan ko bala sing maayo ang akon introduksion? Ginabalikan ko bala dayon ang mga interesado? Kag regular bala ako nga nagapakigbahin sa sarisari nga mga paagi sang pagministeryo?’ Kon huo ang imo sabat, mangin malipayon ka sa imo pag-alagad.

16. Ano ang panimuot ni Jesus kag sang mga apostoles parte sa pagpahuway, kag ngaa tuhay ini sa panimuot sang kalabanan subong?

¹⁶ Kabalo si Jesus nga may mga tion nga kinahanglan man niya kag sang iya mga apostoles ang pahuway. Pero, madamo nga tawo sang una kag subong ang pareho sa manggaranon nga tawo sa ilustrasyon ni Jesus. Ini nga tawo nagsiling sa iya kaugalingon: “Magpatawhay ka, magkaon, mag-inom, kag magpangalipay.” (Luc. 12:19; 2 Tim. 3:4) Para sa iya, ang pagpahuway kag pagpangalipay amo ang pinakaimportante sa kabuhi. Pero para kay Jesus kag sa iya mga apostoles, indi amo ini ang pinakaimportante sa ila kabuhi.

17. Paano naton dapat gamiton ang mga adlaw nga wala kita sing trabaho?

¹⁷ Subong, ginailog naton si Jesus kon ginagamit naton ang mga adlaw nga wala kita sing trabaho, indi lang para magpahuway, kundi para maghimo man sing maayo paagi sa pagbantala kag pagtambong sa Cristianong mga miting. Ang matuod, importante gid para sa aton ang pagtudlo sa mga tawo kag ang pagtambong sa mga miting. Gani nagapanikasog gid kita nga makapakigbahin sing regular sa sining balaan nga mga hilikuton. (Heb. 10:24, 25) Bisan pa nagabakasyon kita sa iban nga lugar, ginasunod gid naton ang aton iskedyul sa pag-alagad pareho sang pagtambong sa mga miting, kag nagapangita kita sang kahigayunan nga makabantala sa mga tawo nga aton maistorya.—2 Tim. 4:2.

18. Ano ang gusto sang aton Hari, nga si Cristo Jesus, nga himuon naton?

¹⁸ Nagapasalamat gid kita nga makatarunganon ang aton Hari, nga si Cristo Jesus, kag ginabuligan niya kita nga mangin husto ang aton pagtamod parte sa pag-obra kag sa pagpahuway! (Heb. 4:15) Gusto niya nga may tion kita sa pagpahuway. Gusto man niya nga mangin mapisan kita sa pagtrabaho para sa aton mga kinahanglanon kag sa pagpakigbahin sa makalilipay nga hilikuton nga pagtudlo sa mga tawo. Sa masunod nga artikulo, binagbinagon naton ang ginhimo ni Jesus para luwason kita sa isa ka mapintas nga sahi sang pagkaulipon.