Nabasa mo na bala sing maayo ang bag-o nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Paano naton dapat tamdon ang mga hinaplas?

Ilugon naton ang ila pagtuo, pero indi naton sila paghatagan sang sobra nga atension. Ginalikawan naton ang ‘pagdayaw sa iban.’ (Jud. 16, footnote) Indi kita dapat mamangkot sa ila kon paano sila nangin hinaplas.—w20.01, p. 29.

Ngaa makasigurado ka nga natalupangdan ka ni Jehova?

Suno sa Biblia, natalupangdan ka niya antes ka pa nabun-ag. Kag ginapamatian niya ang imo mga pangamuyo. Kabalo sia sang imo mga ginahunahuna kag ginabatyag, kag ang imo mga ginahimo makapalipay kag makapasubo sa iya. (1 Cron. 28:9; Hulu. 27:11) Ginbuyok ka niya.—w20.02, p. 12.

San-o kita dapat maghambal kag san-o kita dapat maghipos?

Nagaistorya kita sa iban parte kay Jehova. Dapat kita maghambal kon may nakita kita nga may ginahimo ang isa nga posible magresulta sa serioso nga sala. Dapat maghambal ang mga gulang kon kinahanglan sila maglaygay. Indi kita dapat mamangkot kon ano ang ginahimo sang mga kauturan sa mga pungsod nga ginadumilian ang aton hilikuton, kag indi man ini dapat pag-isugid sang mga kauturan. Indi naton dapat pag-isugid ang kompidensial nga mga impormasyon.—w20.03, p. 20-21.

Ano ang kinatuhayan sang mga apan sa Joel kapitulo 2 sa mga apan sa Bugna kapitulo 9?

Ang Joel 2:20-29 nagasiling nga gintabog sang Dios ang mga apan kag nagpromisa sia nga ibalik niya ang nagkalapierde sa pagpanghalit sini. Pagkatapos sini, ibubo sang Dios ang iya espiritu. Natuman ini sang ginsalakay sang mga soldado sang Babilonia ang Israel. Ginalaragway sang Bugna 9:1-11 ang mga hinaplas nga daw pareho sa mga apan samtang ginabantala nila ang paghukom sang Dios sa sining malaut nga kalibutan, gani daw nagaantos ang mga nagasuportar sa sini.—w20.04, p. 3-6.

Sin-o ang hari sang aminhan subong?

Ang Russia kag ang mga kaalyado sini. Ginsalakay sini ang katawhan sang Dios, gindumilian sini ang pagbantala, kag akig ini sa mga Saksi. Nagapaindisanay ini sa hari sang bagatnan.—w20.05, p. 13.

Ang siam bala ka kinaiya nga mabasa sa Galacia 5:22, 23 amo lang “ang mga kinaiya nga ginapatubas sang espiritu”?

Indi. Ginabuligan kita sang balaan nga espiritu nga mapakita ang iban pa nga mga kinaiya, pareho sang pagkamatarong. (Efe. 5:8, 9)—w20.06, p. 17.

Ngaa makatalagam ang pag-post sa Internet parte sa imo kaugalingon?

Mahimo hunahunaon sang iban nga nagapadayawdayaw ka kag indi ka mapainubuson.—w20.07, p. 6-7.

Ano ang matun-an sang mga Cristiano sa maayo nga mga mangingisda?

Nagapangisda sila sa oras kag lugar nga madamo sang isda. Kabalo sila maggamit sang husto nga mga gamit. Maisog sila nga nagapangisda bisan pa malain ang tiempo. Mahimo man naton ini sa aton pagministeryo.—w20.09, p. 5.

Paano naton mabuligan ang aton ginatudluan sang Biblia nga magbakod ang iya gugma sa Dios?

Palig-unon naton sia nga basahon ang Biblia adlaw-adlaw kag pamalandungan ini. Kag tudluan naton sia kon paano mangamuyo.—w20.11, p. 4.

Sin-o ang nalakip sa ginsiling ni apostol Pablo: “Tungod man sa Cristo ang tanan mabanhaw”?—1 Cor. 15:22.

Indi buot silingon ni Pablo nga mabanhaw ang tanan nga tawo. Sang nagsiling sia nga “ang tanan mabanhaw,” nalakip sa sini ang hinaplas nga mga Cristiano nga “ginpakabalaan nga nahiusa kay Cristo Jesus.” (1 Cor. 1:2; 15:18)—w20.12, p. 5-6.

Ano ang himuon sang mga hinaplas pagkatapos sila ‘mabayluhan sa isa ka pisok sang mata, sa pagtunog sang katapusan nga trumpeta’?—1 Cor. 15:51-53.

Magaupod sila sa Cristo sa pagbantay sa katawhan paagi sa bilugon nga salsalon. (Bug. 2:26, 27)—w20.12, p. 12-13.