1. Ano ang isa ka posible nga rason kon ngaa ginkumparar ni Jesus ang iya mga sumulunod sa mga karnero?

GINKUMPARAR ni Jesus ang iya kaangtanan sa iya mga sumulunod sa suod nga kaangtanan sang manugbantay sa iya mga karnero. (Juan 10:14) Nagakaigo gid ini nga pagkumparar. Kilala sang mga karnero ang ila manugbantay kag ginatuman nila sia. Nakita sang isa ka turista nga husto gid ini. Nagsiling sia: “Gusto namon piktyuran ang pila ka karnero, gani gintestingan namon nga tawgon sila. Pero wala sila nagpalapit kay indi nila kilala ang amon tingog. Pero sang gintawag sila sang isa ka bata nga lalaki nga amo ang nagabantay sa ila, nagsunod sila dayon sa iya.”

2-3. (a) Paano mapakita sang mga sumulunod ni Jesus nga nagapamati sila sa iya tingog? (b) Ano ang binagbinagon naton sa sini nga artikulo kag sa masunod nga artikulo?

² Ang eksperiensia sang turista nagapahanumdom sa aton sang ginsiling ni Jesus parte sa iya mga karnero ukon mga disipulo. Nagsiling sia: “Magapamati sila sa akon tingog.” (Juan 10:16) Pero paano kita makapamati kay Jesus kay ara sia sa langit? Ang panguna nga paagi nga mapakita naton nga nagapamati kita sa tingog sang aton Agalon amo ang pag-aplikar sang iya mga gintudlo.—Mat. 7:24, 25.

³ Sa sini nga artikulo kag sa masunod nga artikulo, binagbinagon naton ang pila sa mga gintudlo ni Jesus. Matun-an naton nga gintudluan kita ni Jesus nga dapat naton untatan ang paghimo sang pila ka butang, kag dapat naton himuon ang pila ka butang. Binagbinagon anay naton ang duha ka butang nga dapat naton untatan suno sa aton maayo nga manugbantay.

4. Suno sa Lucas 12:29, ano ang posible nga rason sang “tuman nga pagkabalaka”?

⁴ Basaha ang Lucas 12:29. Ginpalig-on ni Jesus ang iya mga sumulunod nga ‘untatan na nila ang tuman nga pagkabalaka’ parte  sa ila materyal nga mga kinahanglanon. Kabalo kita nga pirme gid maayo kag husto ang mga laygay ni Jesus. Gusto naton ini iaplikar, pero posible nga nabudlayan kita nga himuon ini kon kaisa. Ngaa?

5. Ngaa madamo ang nabalaka parte sa ila materyal nga mga kinahanglanon?

 ⁵ Posible nga nabalaka ang iban parte sa ila pagkaon, bayo, kag ilistaran. Mahimo nga nagaistar sila sa pungsod nga madamo sang imol kag mabudlay makakita sang obra. Posible nga kulang ang ila ginakita para sa ila pamilya. Ukon basi wala na sila kuarta kay napatay ang miembro sang ila pamilya nga amo ang ginasaligan nila. Posible nga madamo man ang nadulaan sang obra bangod sang COVID-19 nga pandemic. (Man. 9:11) Kon naeksperiensiahan naton ini ukon ang iban pa nga kabudlayan, paano naton matuman ang ginsiling ni Jesus nga untatan naton ang pagkabalaka?

6. Ilaragway kon ano ang natabo kay apostol Pedro.

⁶ Isa ka bes, may unos sa Dagat sang Galilea samtang nagapanakayon si apostol Pedro kag ang iban pa nga apostoles. Dayon nakita nila si Jesus nga nagalakat sa ibabaw sang tubig. Nagsiling si Pedro: “Ginuo, kon ikaw ina, sugua ako sa pagpalapit sa imo sa ibabaw sang tubig.” Sang ginsilingan sia ni Jesus nga “Kari ka,” nagpanaug si Pedro sa sakayan kag “naglakat [sia] sa ibabaw sang tubig kag nagpalapit kay Jesus.” Talupangda ang masunod nga natabo kay Pedro. “Bangod sa unos hinadlukan sia, kag amat-amat nga naglugdang. Gani nagsinggit sia: ‘Ginuo, luwasa ako!’” Gin-uyatan ni Jesus ang iya kamot kag ginluwas sia. Sang nagpokus si Pedro kay Jesus, nakalakat sia sa mabalod nga tubig. Pero sang nagpokus sia sa unos, hinadlukan sia kag amat-amat sia nga naglugdang.—Mat. 14:24-31.

7. Ano ang matun-an naton sa natabo kay Pedro?

⁷ May matun-an kita sa natabo kay Pedro.  Sang nagpanaug si Pedro sa sakayan kag nagtapak sia sa tubig, wala sia nahadlok sa unos ukon nabalaka nga basi maglugdang sia. Gusto gid niya nga maglakat sa ibabaw sang tubig asta nga makalab-ot sia sa iya Agalon. Pero imbes nga padayon nga magpokus kay Jesus, hinadlukan sia bangod sa unos. Kinahanglan ni Pedro ang pagtuo para makalakat sia sa tubig. Subong, kinahanglan man naton ang pagtuo para mabatas naton ang mga problema. Kon madula ang aton pagsalig kay Jehova kag sa iya mga promisa, magalugdang man kita ukon magaluya ang aton pagtuo. Gani kon makaeksperiensia kita sang dalagku nga mga problema nga daw pareho sa unos, dapat padayon kita nga magpokus kay Jehova kag sa iya ikasarang sa pagbulig sa aton. Paano naton ini mahimo?

8. Ano ang makabulig sa aton para indi kita sobra nga mabalaka parte sa aton materyal nga mga kinahanglanon?

⁸ Imbes nga magkabalaka parte sa aton mga problema, dapat kita magsalig kay Jehova. Tandaan naton nga nagapromisa ang aton mahigugmaon nga Amay, nga si Jehova, nga amanan niya kita sang aton materyal nga mga kinahanglanon kon unahon naton sia sa aton kabuhi. (Mat. 6:32, 33) Pirme gid niya ginatuman ini nga promisa. (Deut. 8:4, 15, 16; Sal. 37:25) Kon ginaatipan ni Jehova ang mga pispis kag ang mga bulak, may rason gid kita nga indi mabalaka parte sa aton kaunon ukon isuksok. (Mat. 6:26-30; Fil. 4:6, 7) Bangod ginahigugma sang aton Amay sa langit ang iya katawhan, ginaamanan niya sila sang ila materyal nga mga kinahanglanon. Daw pareho sia sa ginikanan nga nagaaman sa iya kabataan bangod palangga niya sila. Gani makasalig kita nga atipanon gid kita ni Jehova.

9. Ano ang matun-an mo sa eksperiensia sang isa ka mag-asawa?

⁹ Binagbinaga ang isa ka eksperiensia nga nagapakita nga amanan gid kita ni Jehova sang aton materyal nga mga kinahanglanon. Ginsugat sang isa ka mag-asawa nga payunir ang pila ka sister nga nagaistar sa refugee center para mag-attend sa miting sang kongregasyon. Daan na ang ila salakyan kag sobra isa ka oras ang ila biyahe. Ang brother nagsiling: “Pagkatapos sang miting, ginhagad namon ang mga sister nga magkaon sa balay. Pero narealisar namon nga wala gali kami sing pagkaon.” Ano dayon ang natabo? Ang brother nagsiling: “Pag-abot namon sa balay, nakita namon sa puertahan ang duha ka daku nga plastic nga may unod nga mga pagkaon. Wala kami kabalo kon sin-o ang nagbilin sini didto. Gin-atipan gid kami ni Jehova.” Sang ulihi, naguba ang salakyan sang mag-asawa. Ginagamit nila ini sa ila pag-alagad, pero wala sila sing kuarta para ipakay-o ini. Sang gindala nila ini sa mekaniko para mabal-an kon pila ang magasto nila sa pagpakay-o sini, may isa ka tawo nga nag-abot kag namangkot: “Kay sin-o ’na salakyan?” Nagsiling ang brother nga sia ang tag-iya sini kag kinahanglan ini kay-uhon. Ang tawo nagsiling: “Amo gid ’ni nga salakyan ang ginapangita sang asawa ko kag amo gid ’ni nga kolor. Ti kon baklon ko ’ni, pila baligya mo? OK lang sa akon bisan may guba.” Ginbaligya ini sang brother sa tawo, kag bastante ang ginbayad sa iya para makabakal sang lain nga salakyan. Nagsiling sia: “Grabe gid ang amon kalipay sadto nga adlaw. Kabalo kami nga wala lang ato natabuan, kundi ginbuligan gid kami ni Jehova.”

10. Paano kita ginapalig-on sang Salmo 37:5 nga indi sobra nga mabalaka parte sa aton materyal nga mga kinahanglanon?

¹⁰ Kon pamatian naton ang aton maayo nga manugbantay kag untatan naton ang sobra nga pagkabalaka parte sa aton materyal nga mga kinahanglanon, makasalig kita nga amanan kita ni Jehova. (Basaha ang Salmo 37:5; 1 Ped. 5:7) Binagbinaga ang mga sitwasyon nga ginsambit sa  parapo 5. Posible nga ginagamit ni Jehova ang ulo sang aton pamilya ukon ang aton amo para amanan kita sang aton mga kinahanglanon  sa adlaw-adlaw. Kon indi na ini mahimo sang ulo sang aton pamilya ukon madulaan kita sang obra, buligan kita ni Jehova sa iban pa nga paagi. Makasalig gid kita sa sini. Binagbinagon naman naton ang isa pa ka butang nga dapat naton untatan suno sa aton maayo nga manugbantay.

11. Suno sa Mateo 7:1, 2, ano ang ginsiling ni Jesus nga dapat naton untatan, kag ngaa mabudlay ini himuon?

¹¹ Basaha ang Mateo 7:1, 2. Kabalo si Jesus nga indi perpekto ang mga tawo kag mas nagapokus sila sa sala sang iban. Gani nagsiling sia: “Untati ninyo ang paghukom.” Posible nga ginatinguhaan gid naton nga indi paghukman ang aton mga kauturan. Pero, indi kita tanan perpekto. Kon matalupangdan naton nga may mga tion nga ginahukman naton ang iban, ano ang dapat naton himuon? Pamatii si Jesus, kag panikasugi nga untatan ang paghukom sa iban.

12-13. Kon pamalandungan naton ang pagtamod ni Jehova kay Hari David, paano ini makabulig sa aton nga untatan ang paghukom sa iban?

¹² Makabulig sa aton ang pagpamalandong sa halimbawa ni Jehova. Nagapokus sia sa maayo nga kinaiya sang mga tawo. Binagbinaga ang ginhimo niya sang nakahimo sang serioso nga mga sala si Hari David. Nagpakighilahi si David kay Bat-seba, kag ginmaniobra pa gani niya nga mapatay ang bana ni Bat-seba. (2 Sam. 11:2-4, 14, 15, 24) Bangod sang ginhimo ni David, nag-antos sia kag ang iya pamilya, pati na ang iban niya nga asawa. (2 Sam. 12:10, 11) Isa pa ka bes, wala nagsalig si David kay Jehova. Nagmando sia nga isipon ang kadamuon sang mga soldado sang Israel bisan pa wala sia ginsugo ni Jehova nga himuon ini. Posible nga ginhimo ini ni David bangod ginapabugal niya ang kadamuon sang iya mga soldado kag nagasalig sia nga amo ini ang makaamlig sa iya. Ano ang resulta sang iya ginhimo? Napatay sa kalalat-an ang 70,000 ka Israelinhon.—2 Sam. 24:1-4, 10-15.

¹³ Kon ara ka sa Israel sadto nga tion, paano mo tamdon si David? Hukman mo bala sia nga indi sia dapat pagpatawaron ni Jehova? Indi amo sina ang ginhimo ni Jehova. Nagpokus sia sa katutom nga ginpakita ni David sa bilog niya nga kabuhi kag sa iya sinsero nga paghinulsol. Gani ginpatawad ni Jehova si David sa iya serioso nga mga sala. Kabalo si Jehova nga palangga gid sia ni David kag gusto niya nga himuon ang husto. Nagapasalamat gid kita kay nagapokus ang aton Dios sa aton maayo nga mga kinaiya kag ginahimo.—1 Hari 9:4; 1 Cron. 29:10, 17.

14. Paano dapat tamdon sang isa ka Cristiano ang iban para mauntatan niya ang paghukom sa ila?

¹⁴ Nahangpan ni Jehova nga makahimo kita sang sala bangod indi kita perpekto, gani dapat man naton hangpon ang mga kakulangan sang iban kag dapat kita magpokus sa ila maayo nga mga kinaiya. Sa masami, mas makita naton ang mga kakulangan sang iban kag ginahukman naton sila dayon. Pero kon ginailog naton si Jehova, maayo gihapon ang aton kaangtanan sa iban bisan pa kabalo kita sang ila mga kakulangan. Binagbinaga ang isa ka diamante. Kon wala pa ini makortehan kag mapahining, daw indi ini manami tan-awon. Pero kon nahangpan sang isa ka tawo ang balor sini, kabalo sia nga mangin matahom gid ini kon makortehan na ini kag mapahining. Pareho kay Jehova kag kay Jesus, dapat kita magpokus sa maayo nga mga kinaiya sang iban, indi sa ila mga kakulangan.

15. Paano makabulig ang pagbinagbinag sa kahimtangan sang mga tawo para indi naton sila paghukman?

¹⁵ Magluwas sa pagpokus sa maayo nga mga kinaiya sang iban, ano pa ang makabulig sa aton para indi naton paghukman ang iban? Imadyina ang ila kahimtangan. Binagbinaga ini nga halimbawa. Isa ka adlaw sang ara si Jesus sa templo, nakita niya ang isa ka imol nga balo nga babayi nga naghulog sing duha lang ka sensilyo sa bahandian. Wala ginhunahuna ni Jesus: “Ngaa amo lang ’to ang ginhulog niya?” Wala  nagpokus si Jesus sa kantidad sang ginhulog sang balo. Ginbinagbinag niya ang motibo kag kahimtangan sang balo, kag gindayaw niya ang balo kay ginhimo niya ang iya bug-os nga masarangan.—Luc. 21:1-4.

16. Ano ang matun-an mo sa eksperiensia ni Veronica?

¹⁶ Ginapakita sang eksperiensia sang isa ka sister nga si Veronica kon ngaa importante nga binagbinagon naton ang kahimtangan sang iban. Sa ila kongregasyon, may isa ka sister nga solo nga nagaatipan sa iya bata nga lalaki. Si Veronica nagsiling: “Indi sila regular sa pag-attend sa mga miting kag sa pagbantala. Para sa akon, indi sila matutom. Pero sang nakaupod ko sa pagbantala ang sister, ginsugid niya ang mga kabudlayan sa pag-atipan sa iya autistic nga bata. Ginahimo niya ang iya bug-os nga masarangan para maamanan niya ang ila materyal nga mga kinahanglanon, kag para mangin mabakod ang ila kaangtanan kay Jehova. Kon kaisa, bangod sang kondisyon sang iya bata, indi sia maka-attend sa miting. Gani sa iban sia nga kongregasyon naga-attend.” Bangod sini, nakasiling si Veronica: “Wala gid ako kabalo nga amo gali sini kabudlay ang iya kahimtangan. Subong, palangga kag ginarespeto ko gid ini nga sister bangod indi lahuglahog ang tanan niya nga ginahimo para maalagad niya si Jehova.”

17. Ano ang ginasugo sa aton sang Santiago 2:8, kag paano naton ini mahimo?

¹⁷ Ano ang dapat naton himuon kon matalupangdan naton nga ginahukman gali naton ang  aton utod? Dapat naton dumdumon nga kinahanglan naton higugmaon ang aton mga kauturan. (Basaha ang Santiago 2:8.) Dapat man kita mangamuyo sing hanuot kay Jehova, kag pangabayon naton sia nga buligan kita nga mauntatan ang paghukom sa iban. Dayon himuon naton kon ano ang aton ginpangamuyo paagi sa pagpain sang tion para maistorya ang utod nga ginahukman naton. Paagi sa sini, mas makilala pa gid naton sia. Puede naton sia hagaron nga updan kita sa pagbantala ukon sa pagkaon. Samtang ginakilala naton sing maayo ang aton utod, tinguhaan naton nga ilugon si Jehova kag si Jesus paagi sa pagpokus sa iya maayo nga mga kinaiya. Kon himuon naton ini, ginapakita naton nga ginapamatian naton ang sugo sang aton maayo nga manugbantay nga untatan ang paghukom sa iban.

18. Paano naton mapakita nga nagapamati kita sa tingog sang aton maayo nga manugbantay?

¹⁸ Pareho sa mga karnero nga nagapamati sa tingog sang ila manugbantay, nagapamati man ang mga sumulunod ni Jesus sa iya tingog. Kon panikasugan gid naton nga indi mabalaka parte sa aton materyal nga mga kinahanglanon kag kon untatan naton ang paghukom sa iban, pakamaayuhon ni Jehova kag ni Jesus ang aton mga pagpanikasog. Bahin man kita sang “diutay nga panong” ukon sang “iban nga mga karnero,” kabay pa nga padayon naton nga pamatian kag tumanon ang tingog sang aton maayo nga manugbantay. (Luc. 12:32; Juan 10:11, 14, 16) Sa masunod nga artikulo, binagbinagon naton ang duha ka butang nga ginsiling ni Jesus nga dapat himuon sang iya mga sumulunod.