1. Pareho kay Hari David, ano ang mahimo nga ginapamangkot sang pila sa aton?

GUSTO naton tanan ang kabuhi nga wala sing problema. Indi naton gusto nga may ara kita ginakabalak-an. Pero mahimo nga nabalaka gid kita kon kaisa. Mahimo nga ginapamangkot man sang pila ka alagad ni Jehova ang ginpamangkot ni Hari David kay Jehova: “Tubtob san-o nga magakabalaka ako, kag magapangasubo ang akon tagipusuon sa kada adlaw?”—Sal. 13:2.

2. Ano ang binagbinagon naton sa sini nga artikulo?

² Indi naton malikawan nga mabalaka, pero may mahimo kita para mabuhinan ini. Sa sini nga artikulo, una naton nga binagbinagon ang pila ka rason kon ngaa nabalaka kita. Dayon binagbinagon naton ang anom ka paagi nga makabulig sa aton nga mangin kalmado kon may mga problema kita.

3. Ano ang pila ka rason kon ngaa nabalaka kita, kag may kontrol bala kita sa sini?

³ Madamo ang rason kon ngaa nabalaka kita, kag wala kita sing kontrol sa pila sini. Halimbawa, indi naton mapunggan ang pagmahal sang pagkaon, bayo, kag arkila sang balay kada tuig. Wala man kita sing kontrol kon san-o kita sulayon sang aton mga kaupod sa trabaho ukon sa eskwelahan nga maghimo sang malain. Kag indi man naton mapunggan ang mga tawo sa aton lugar nga maghimo sang krimen. Maeksperiensiahan naton ini nga mga problema bangod ang kalabanan nga tawo wala nagasunod sa mga prinsipio sa Biblia. Si Satanas  ang dios sini nga kalibutan, kag ginagamit niya “ang kabalaka sa sini nga sistema sang mga butang” para indi mag-alagad ang mga tawo kay Jehova. (Mat. 13:22; 1 Juan 5:19) Gani indi na kita matingala nga puno gid sang problema ang kalibutan nga nagapa-stress sa mga tawo.

4. Ano ang mahimo nga mabatyagan naton kon may mga problema kita?

⁴ Mahimo mabalaka kita sing sobra. Halimbawa, mahimo mabalaka kita nga wala kita sing kuarta nga ibakal sang aton mga kinahanglanon, ukon basi magmasakit kita kag indi na kita makatrabaho, ukon basi madulaan kita sang trabaho. Mahimo mabalaka man kita nga basi indi naton masarangan ang pagsulay kag malapas naton ang sugo sang Dios. Dali na lang salakayon sang mga nagasunod kay Satanas ang katawhan sang Dios, gani mahimo nga mabalaka kita kon ano ang aton himuon kon matabo ini. Mahimo mamangkot kita, ‘Sala bala nga mabalaka ako sa sini?’

5. Ano ang buot silingon ni Jesus sang nagsiling sia: “Untati ninyo ang pagkabalaka”?

⁵ Ginsilingan ni Jesus ang iya mga sumulunod: “Untati ninyo ang pagkabalaka.” (Mat. 6:25) Buot bala silingon ni Jesus nga indi gid kita dapat mabalaka? Indi. Dumdumon naton nga ang pila ka matutom nga alagad ni Jehova sang una nabalaka man, pero wala naakig si Jehova sa ila. * (1 Hari 19:4; Sal. 6:3) Ang matuod, ginapalig-on kita ni Jesus. Indi niya gusto nga maapektuhan ang aton pag-alagad sa Dios bangod sang sobra nga kabalaka. Gani ano ang aton himuon kon nabalaka kita?—Tan-awa ang kahon nga “ Kon Paano Ini Himuon.”

6. Suno sa Filipos 4:6, 7, ano ang makabulig sa aton nga mangin kalmado?

⁶ (1) Mangamuyo pirme. Kon may ginakabalak-an ka nga problema, makapangayo ka sing bulig kay Jehova paagi sa pangamuyo. (1 Ped. 5:7) Mahimo sabton ni Jehova ang imo mga pangamuyo paagi sa paghatag sa imo sang “paghidait sang Dios nga labaw sa tanan nga paghangop” sang tawo. (Basaha ang Filipos 4:6, 7.) Buligan ka ni Jehova nga mangin kalmado paagi sa iya gamhanan nga balaan nga espiritu.—Gal. 5:22.

7. Ano ang dapat naton dumdumon kon nagapangamuyo kita sa Dios?

⁷ Kon nagapangamuyo ka kay Jehova, isugid sa iya ang tanan mo nga ginabatyag. Isugid sa iya kon ano gid ang imo problema kag kon ano ang imo ginabatyag parte sa sini. Pangabaya sia nga hatagan ka sing kaalam nga mabal-an ang solusyon sa imo problema kag sing kusog para masolbar ini. Kon wala ka na sang mahimo sa imo problema, pangabaya si Jehova nga buligan ka nga indi mabalaka sing sobra. Kon ginasugid mo kay Jehova kon ano gid ang imo problema, mas madali mo makita ang iya sabat sa imo mga pangamuyo. Kon wala dayon ginsabat ang imo pangamuyo, magpadayon gihapon sa pagpangamuyo. Gusto ni Jehova nga isugid mo sa iya kon ano gid ang imo problema, kag gusto man niya nga padayon mo ini nga ipangamuyo.—Luc. 11:8-10.

8. Ano ang indi naton pagkalipatan kon nagapangamuyo kita?

⁸ Kon nagapangamuyo kita kay Jehova parte sa aton mga problema, indi naton pagkalipatan nga magpasalamat sa iya. Dapat naton hunahunaon ang tanan nga pagpakamaayo nga aton nabaton, bisan pa madamo kita sing problema. Pero ano abi kon indi  ka kabalo kon paano isugid kay Jehova ang imo ginabatyag? Tandai nga sabton ni Jehova ang imo pangamuyo bisan pa ang mahambal mo lang sa iya, ‘Palihug buligi ako!’—2 Cron. 18:31; Roma 8:26.

9. Ano ang dapat naton himuon kon nahadlok kita?

⁹ (2) Magsalig sa kaalam nga halin kay Jehova, kag indi sa imo kaugalingon. Sang panahon ni manalagna Isaias, nahadlok ang katawhan sang Juda sa pagsalakay sang mga Asirianhon. Indi nila gusto nga maggahom sa ila ang mga Asirianhon, gani nangayo sila sing bulig sa Egipto. (Isa. 30:1, 2) Ginpaandaman sila ni Jehova nga indi gid maayo ang mangin resulta sang ila pagpangayo sing bulig sa Egipto. (Isa. 30:7, 12, 13) Paagi kay Isaias, ginsilingan ni Jehova ang katawhan kon ano ang dapat nila himuon para indi sila mahadlok sa mga Asirianhon. Nagsiling sia: “Mangin mabakod kamo kon magpakalinong kamo kag magsalig” kay Jehova.—Isa. 30:15b.

10. Sa ano nga mga sitwasyon nga mapakita naton nga nagasalig kita kay Jehova?

¹⁰ Sa ano nga mga sitwasyon nga mapakita naton nga nagasalig kita kay Jehova? Binagbinaga ang pila ka halimbawa. Ano abi kon ginhatagan ka sing trabaho nga mas daku ang sueldo, pero dapat mo dugangan ang imo oras sa pagtrabaho kag buhinan ang imo oras sa pag-alagad kay Jehova? Ukon ano abi kon naluyag sa imo ang imo kaupod sa trabaho nga indi Saksi? Ukon ano abi kon silingan ka sang imo pamilya nga sikwayon ka nila kon padayon ka nga mag-alagad kay Jehova? Sa sini nga mga sitwasyon, mabudlay gid magdesisyon. Pero may ginahatag si Jehova nga laygay sa kada sitwasyon nga makabulig sa imo. (Mat. 6:33; 10:37; 1 Cor. 7:39) Pero ang pamangkot, Magasalig ka bala kay Jehova kag sundon ang iya laygay?

11. Kon ginapamatukan kita, kay sin-o mga halimbawa sa Biblia ang puede naton tun-an para mangin kalmado kita?

¹¹ (3) Magtuon sa maayo kag indi maayo nga mga halimbawa. Madamo kita sing mabasa sa Biblia nga nagatudlo sa aton nga importante gid nga mangin kalmado kag magsalig kay Jehova. Samtang ginatun-an mo ini, hunahunaa kon ano ang nakabulig sa mga alagad sang Dios nga mangin kalmado bisan pa ginpamatukan sila. Halimbawa, sang ginmanduan sang pinakamataas nga hukmanan sang mga Judiyo ang mga apostoles nga indi na magbantala, wala sila nahadlok. Sa baylo, maisog sila nga nagsiling: “Dapat namon tumanon ang Dios subong manuggahom sa baylo sang mga tawo.” (Binu. 5:29) Bisan pa ginbunal ang mga apostoles, kalmado man sila gihapon. Ngaa? Bangod kabalo sila nga buligan sila ni Jehova. Nahamuot sia sa ila. Gani padayon nila nga ginbantala ang maayong balita. (Binu. 5:40-42) Sang patyon na si disipulo Esteban, kalmado gid sia katama amo nga ang iya nawong daw nangin “pareho sa nawong sang anghel.” (Binu. 6:12-15) Ngaa? Bangod sigurado sia nga nahamuot si Jehova sa iya.

12. Suno sa 1 Pedro 3:14 kag 4:14, ngaa malipayon kita bisan pa ginahingabot kita?

¹² May mga pamatuod ang mga apostoles nga kaupod nila si Jehova. Ginhatagan niya sila sang gahom para makahimo sila sang mga milagro. (Binu. 5:12-16; 6:8) Wala na ini ginahimo ni Jehova subong. Pero ginasilingan kita ni Jehova paagi sa iya Pulong nga kon ginahingabot kita bangod sa aton katutom, dapat kita malipay, kay nahamuot sia sa aton kag ginabuligan niya kita paagi sa iya balaan nga espiritu. (Basaha ang 1 Pedro 3:14; 4:14.) Gani indi kita dapat mabalaka kon ano ang aton himuon kon hingabuton kita sa ulihi. Sa baylo, dapat naton himuon ang aton  bug-os nga masarangan nga pabakuron ang aton pagsalig nga buligan kita kag luwason ni Jehova. Pareho sa ginhimo sang mga disipulo sang una, dapat man kita magsalig sa sini nga promisa ni Jesus: “Hatagan ko kamo sing kaalam sa pagsabat nga indi mapamatukan ukon masuay sang tanan nga nagapamatok sa inyo.” Nagpasalig pa gid sia: “Paagi sa inyo pagbatas, matipigan ninyo ang inyo kabuhi.” (Luc. 21:12-19) Kag indi pagkalimti nga ginadumdom ni Jehova ang tanan nga detalye parte sa iya matutom nga mga alagad nga napatay kay banhawon gid niya sila.

13. Ano ang benepisyo sa aton kon tun-an naton ang natabo sa mga hinadlukan kag wala nagsalig kay Jehova?

¹³ May matun-an man kita sa natabo sa mga hinadlukan kag wala nagsalig kay Jehova. Makabulig ini sa aton nga indi pag-ilugon ang mga ginhimo nila nga indi maayo. Halimbawa, sang nangin hari sang Juda si Asa kag ginsalakay sia sang madamo gid nga soldado, nagsalig sia kay Jehova. Gani ginbuligan sia ni Jehova nga mapierde ang iya mga kaaway. (2 Cron. 14:9-12) Sang ulihi, ginsalakay sia ni Baasa nga hari sang Israel. Sa sini nga tion, mas diutay nga soldado ang magasalakay kay Asa. Pero sa baylo nga magsalig kay Jehova nga luwason sia pareho sang ginhimo niya sang una, nagbayad sia sa mga Sirianhon para buligan sia. (2 Cron. 16:1-3) Kag sang nagmasakit sia sang tigulang na sia, wala gid sia nagsalig kay Jehova nga buligan sia.—2 Cron. 16:12.

14. Ano ang matun-an naton sa mga ginhimo ni Asa nga indi maayo?

¹⁴ Sang primero, nagpabulig si Asa kay Jehova sa iya mga problema. Pero sang ulihi, wala na sia nagpabulig sa iya Dios kag nagmatumato sia nga solbaron ang iya mga problema. Sang primero, daw maayo man ang resulta sang pagpabulig ni Asa sa mga Sirianhon. Nangin malinong gid man ang ila pungsod, pero sa malip-ot lang nga tion. Paagi sa isa ka manalagna, ginsilingan ni Jehova si Asa: “Bangod nagsalig ka sa hari sang Siria kag wala ka magsalig kay Jehova nga imo Dios, nakapalagyo sa imo ang mga soldado sang hari sang Siria.” (2 Cron. 16:7) Indi naton dapat paghunahunaon nga masolbar naton ang aton mga problema bisan pa indi na kita magpagiya sa Pulong ni Jehova. Sa mga sitwasyon nga kinahanglan na naton dayon maghimo sing desisyon, dapat kita mangin kalmado kag magsalig kay Jehova, kag buligan niya kita.

15. Ano ang puede naton himuon kon nagabasa kita sang Biblia?

¹⁵ (4) Magsaulo sang mga teksto sa Biblia. Kon may mabasa ka nga mga teksto sa Biblia nga nagapalig-on sa imo nga mangin kalmado kag magsalig kay Jehova, sauluha ini. Puede mo ini basahon sing matunog ukon puede mo ini isulat para mabasa mo pirme. Ginsilingan ni Jehova si Josue nga para mangin maalamon sia, dapat niya pirme basahon sa mahinay nga tingog ang libro sang Kasuguan. Makabulig man ini sa iya nga mangin maisog sa pagpanguna sa katawhan sang Dios kag indi magkahadlok. (Jos. 1:8, 9, footnote) May mga sitwasyon nga mahimo makabatyag ka sing kabalaka ukon kahadlok. Pero madamo nga teksto sa Pulong sang Dios ang makabulig sa imo nga mangin kalmado sa sini nga mga sitwasyon.—Sal. 27:1-3; Hulu. 3:25, 26.

16. Paano ginagamit ni Jehova ang kongregasyon para buligan kita nga mangin kalmado kag magsalig sa iya?

¹⁶ (5) Magpakig-upod sa katawhan sang Dios. Ginagamit ni Jehova ang aton mga kauturan para buligan kita nga mangin kalmado kag magsalig sa iya. Sa aton mga miting, makabenepisyo kita sa mga bahin, sa mga komento sang mga kauturan, kag sa pag-istorya  sa ila. (Heb. 10:24, 25) Makabulig man nga maghaganhagan ang aton kabalaka kon isugid naton ini sa aton mga abyan sa kongregasyon. Ang maayo nga isiling sang aton abyan mahimo makabulig sa aton nga indi na masyado mabalaka.—Hulu. 12:25.

17. Suno sa Hebreo 6:19, paano ang aton paglaum sa Ginharian makabulig sa aton nga mangin kalmado kon makaeksperiensia kita sang mabudlay nga sitwasyon?

¹⁷ (6) Magsalig nga matabo gid ang imo ginalauman. Ang aton paglaum sa Ginharian daw pareho sa “angkla para sa kalag,” kay nagabulig ini sa aton nga mangin kalmado kon makaeksperiensia kita sang mabudlay nga sitwasyon ukon kon mabalaka kita. (Basaha ang Hebreo 6:19.) Hunahunaa ang promisa ni Jehova sa palaabuton. Sa sina nga tion, wala na kita sing kabalak-an. (Isa. 65:17) Imadyina nga ara ka na sa malinong nga bag-ong kalibutan kag wala na sang malain nga matabo. (Miq. 4:4) Mangin kumbinsido ka pa gid nga matabo ang imo ginalauman kon isugid mo ini sa iban. Himua ang bug-os mo nga masarangan sa pagbantala kag pagtudlo sa iban. Paagi sa sini, “matigayon [mo] ang bug-os nga kapat-uran sang paglaum tubtob sa katapusan.”—Heb. 6:11.

18. Ano ang mahimo matabo sa palaabuton, kag ano ang dapat naton himuon?

¹⁸ Bangod malapit na matapos ini nga sistema, makaeksperiensia pa gid kita sang madamo nga problema nga mahimo kita mabalaka. Buligan kita sang aton tuigan nga teksto sa 2021 nga mangin kalmado kag magsalig kay Jehova, indi sa aton kaugalingon. Sa bilog nga tuig, ipakita naton nga nagatuo kita sa promisa ni Jehova: “Mangin mabakod kamo kon magpakalinong kamo kag magsalig sa akon.”—Isa. 30:15.