“MADAMO ang alanyon, apang diutay lamang ang mangangani. Gani, pakiluoy kamo sa Agalon sang alanyon nga magpadala sia sang mga mangangani sa iya alanyon.” (Luc. 10:2) Ginsiling ini ni Jesus mga 2,000 ka libo ka tuig na ang nagligad, kag amo gid ini ang kahimtangan sa Myanmar subong. Ngaa? Kay man, mga 4,200 lang ka manugbantala ang nagapalapnag sang maayong balita sa 55 ka milyon nga pumuluyo.

Pero, paagi kay Jehova nga amo ang “Agalon sang alanyon,” madamo nga kauturan halin sa iban nga lugar ang nagkadto sa sini nga pungsod sa Southeast Asia para magbulig sa espirituwal nga pagpangani. Ngaa ginbayaan nila ang ila pungsod? Ano ang nakabulig sa ila nga magsaylo? Kag paano sila ginpakamaayo? Tan-awon naton.

Pila ka tuig na ang nagligad, si Kazuhiro, nga payunir sa Japan, ginkuyap kag nalipong, gani gindala sia sa ospital. Ginhambalan sia sang doktor nga indi sia anay magdrayb sing duha ka tuig. ‘Paano ako makapadayon sa pagpayunir?’ palibog ni Kazuhiro. Nangamuyo sia sing hanuot kay Jehova nga kuntani makapadayon sia sa pagpayunir.

Si Kazuhiro nagsaysay: “Pagligad sang isa ka bulan, nabalitaan sang akon abyan nga nagaalagad sa Myanmar ang natabo sa akon. Gintawgan niya ako kag nagsiling sia: ‘Diri sa Myanmar, bus ang kalabanan nga ginasakyan. Kon magsaylo ka diri, makapadayon ka sa pagpayunir kag indi mo kinahanglan ang awto!’ Ginpamangkot ko ang akon doktor kon puede ako makakadto sa Myanmar. Nakibot ako sang nagsiling sia: ‘May isa ka espesyalista sa utok nga halin sa Myanmar ang ari subong sa Japan. Ipakilala ko ikaw sa iya. Kon atakehon ka liwat sang kuyap, sia ang bahala sa imo.’ Para sa akon, ang ginsiling sang doktor amo ang sabat ni Jehova.”

Nagpadala dayon sang e-mail si Kazuhiro sa sanga talatapan sa Myanmar para ipahibalo nga gusto nila sang iya asawa nga mag-alagad didto bilang mga payunir. Pagligad lang sang lima ka adlaw, nagsabat ang sanga, “Kadto kamo, kinahanglan namon ang mga payunir!” Ginbaligya ni Kazuhiro kag sang iya asawa, nga si Mari, ang ila mga awto, dayon nagkuha sila sing visa, kag nagbakal sing tiket sa eroplano. Subong, malipayon sila nga nagaalagad sa sign-language group sa Mandalay. Si Kazuhiro nagsiling: “Bangod sang sini nga eksperiensia, nagbakod ang amon pagtuo sa promisa sang Dios nga makita sa  Salmo 37:5: ‘Itugyan kay Jehova ang imo dalanon; magsalig ka sa iya, kag buligan ka niya.’”

Sang 2014, ang mga Saksi ni Jehova sa Myanmar naghiwat sang espesyal nga kombension. Madamo ang nagtambong halin sa iban nga pungsod. Si Monique, nga 34 anyos kag taga-Estados Unidos, nagsiling: “Pagpauli ko halin sa kombension, nangamuyo ako kay Jehova kon ano ang dapat ko himuon sa akon kabuhi. Gin-istorya ko man sa akon mga ginikanan ang parte sa akon espirituwal nga mga tulumuron. Tanan kami nag-ugyon nga dapat ako magbalik sa Myanmar, pero nadugayan pa antes ako maglakat kag madamo anay nga pangamuyo ang ginhimo ko.” Ginpaathag ni Monique kon ngaa.

“Ginpalig-on ni Jesus ang iya mga sumulunod nga ‘sumahon ang gasto.’ Gani ginhunahuna ko: ‘Masarangan ko bala ang gasto sa pagsaylo? Masarangan ko bala nga mabuhi didto nga indi kinahanglan mag-obra sing madamo nga oras?’” Si Monique nagsiling: “Narealisar ko nga indi bastante ang akon kuarta para magsaylo.” Pero ngaa nakasaylo sia?—Luc. 14:28.

Si Monique nagsaysay: “Isa ka adlaw, ginpatawag ako sang akon amo. Ginkulbaan ako kay basi pahalinon ako sa obra. Pero, ginpasalamatan niya ako bangod sang akon maayo nga obra. Dayon nagsiling sia nga hatagan niya ako sing bonus, nga eksakto gid sa kantidad nga kinahanglan ko para mabayaran ko ang akon mga utang!”

Nagaalagad si Monique sa Myanmar sugod pa sang Disiembre 2014. Ano ang masiling niya parte sa iya pag-alagad? “Nalipay gid ako,” siling niya. “Tatlo ang ginatudluan ko sa Biblia. Ang isa 67 anyos. Pirme niya ako ginatamyaw paagi sa pagyuhum kag paghakos sing hugot. Sang mabal-an niya nga Jehova ang ngalan sang Dios, naghibi sia. Nagsiling sia: ‘Subong ko lang nabal-an nga Jehova ang ngalan sang Dios. Doble ang edad ko sa imo, pero gintudluan mo ako sang pinakaimportante nga ihibalo.’ Naghibi man ako. Ang mga eksperiensia pareho sini amo ang rason kon ngaa makalilipay gid mag-alagad sa bululigan nga mga teritoryo.” Sining karon lang, nag-eskwela si Monique sa School for Kingdom Evangelizers.

Ang iban napalig-on nga magsaylo sa Myanmar bangod sang report sa 2013 Tuigan nga Libro sang mga Saksi ni Jehova parte sa sini nga pungsod. Halimbawa, ang isa ka sister nga si Li, nga mga treintahon kag nagaistar sa Southeast Asia, may maayo nga obra pero napalig-on sia sang Tuigan nga Libro nga mag-alagad sa Myanmar. “Sang 2014 sang nagtambong ako sa espesyal nga kombension sa Yangon, nakilala ko ang mag-asawa nga nagabulig sa pagbantala sa mga Chinese sa Myanmar. Bangod kabalo ako mag-Chinese, nagsaylo ako sa Myanmar para magbulig sa Chinese group. Nagpartner kami ni Monique, kag nagsaylo kami sa Mandalay. Ginpakamaayo kami ni Jehova nga makakita sing part-time nga obra nga amo ang pagtudlo sa isa lang ka eskwelahan, kag lapit man ang amon apartment. Bisan pa sang mainit nga tiempo kag pila ka kabudlayan, malipayon gid ako nga nagaalagad diri. Simple lang ang kabuhi sang mga taga-Myanmar, pero mabuot sila kag nagapamati sa maayong balita. Makapalig-on makita nga ginapadasig ni Jehova ang pagbantala nga hilikuton. Nagapati ako nga kabubut-on ni Jehova nga mag-alagad ako diri sa Mandalay.”

Madamo sa mga kauturan nga nagaalagad sa iban nga lugar ang makasugid nga makabulig gid ang pangamuyo. Binagbinaga ang eksperiensia ni Jumpei,  nga 37 anyos, kag sang iya asawa nga si Nao, nga 35 anyos. Nagaalagad sila sa sign-language nga kongregasyon sa Japan. Ngaa nagsaylo sila sa Myanmar? Si Jumpei nagsiling: “Gusto gid namon mag-alagad sa iban nga pungsod. Ang isa ka brother sa amon kongregasyon sa Japan nagsaylo sa Myanmar. Nagsaylo man kami sang Mayo 2010 bisan pa gamay lang ang amon sinuptan. Gin-abiabi gid kami sang mga kauturan sa Myanmar!” Ano ang masiling niya parte sa pag-alagad sa sign-language sa Myanmar? “Madamo sing interesado. Nanamian gid ang mga apa sa sign-language nga mga video. Nalipay gid kami nga diri kami nagaalagad kay Jehova!”

Paano ginsuportahan nanday Jumpei kag Nao ang ila kaugalingon? “Pagligad sang tatlo ka tuig, halos maubos na ang amon sinuptan kag kulang na ang amon kuarta para sa masunod nga tuig. Gani hanuot kami nga nangamuyo. Wala namon ginpaabot nga makabaton kami sing sulat halin sa sanga talatapan nga nagaasayn sa amon bilang temporaryo nga mga espesyal payunir! Nagsalig kami kay Jehova, kag wala gid niya kami ginpabay-an. Pirme niya kami ginaatipan.” Sining karon lang, nag-eskwela man sanday Jumpei kag Nao sa School for Kingdom Evangelizers.

Ano ang nagpalig-on kay Simone, nga 43 anyos nga taga-Italy, kag sa iya asawa nga si Anna, nga 37 anyos nga taga-New Zealand, nga magsaylo sa Myanmar? “Ang report sa 2013 Tuigan nga Libro parte sa Myanmar!” sabat ni Anna. Si Simone nagsiling: “Nalipay gid ako diri sa Myanmar. Simple ang kabuhi diri, gani madamo ako sing tion para sa hilikuton ni Jehova. Makapalig-on maeksperiensiahan ang pag-atipan ni Jehova sa mga nagaalagad sa bululigan nga mga teritoryo.” (Sal. 121:5) Si Anna nagsiling: “Malipayon gid ako. Simple ang amon kabuhi. Madamo ako sing tion para sa akon bana, kag nagsuod pa gid kami. Madamo man kami sing bag-o nga abyan. Wala ginapakalain sang mga tawo diri ang mga Saksi, kag madamo sing interesado!” Ngaa nasiling niya ini?

Si Anna nagsaysay: “Isa ka adlaw, napanaksihan ko sa tiendahan ang isa ka estudyante sa unibersidad kag nagsugot sia nga makitaay kami liwat. Pagkitaay namon liwat, gin-upod niya ang isa niya ka amiga. Pagkasunod, madamo pa ang iya gin-upod. Sang ulihi, mas madamo pa gid ang iya gin-upod. Subong, lima sa ila ang ginatudluan ko sa Biblia.” Si Simone nagsiling: “Mainabyanon ang mga tawo kag palapamangkot. Madamo ang interesado. Kulang ang amon oras para sa tanan nga interesado.”

Ano ang ginhimo sang mga utod para makasaylo sila sa Myanmar? Si Mizuho, nga taga-Japan, nagsiling: “Gusto gid namon sang akon bana, nga si Sachio, nga mag-alagad kag magbulig sa iban nga pungsod. Pero diin? Sang mabasa namon ang  report sa 2013 Tuigan nga Libro parte sa Myanmar, napalig-on gid kami sa eksperiensia sang mga kauturan amo nga ginpamensaran namon ang pag-alagad sa Myanmar.” Si Sachio nagsiling: “Nagdesisyon kami nga bisitahon sing isa ka semana ang Yangon, nga isa ka daku nga siudad sa Myanmar. Ining malip-ot nga pagbisita nagkumbinsi sa amon nga dapat kami magsaylo diri.”

Si Rodney, kag ang iya asawa nga si Jane, nga taga-Australia, nga pareho nga singkwentahon, kag ang ila mga anak nga sanday Jordan kag Danica, nagaalagad sa Myanmar sugod pa sang 2010. Si Rodney nagsiling: “Gusto gid sang mga tawo diri nga makatuon parte sa Dios. Ginarekomendar ko gid sa iban nga pamilya nga tilawan nila ang pag-alagad sa lugar nga pareho sa Myanmar.” Ngaa? “Dalayawon gid ang nabulig sini sa espirituwalidad sang amon pamilya! Madamo nga pamatan-on ang masako sa ila cell phone, salakyan, obra, kag iban pa. Pero ang amon kabataan masako sa pagtuon sang bag-o nga mga tinaga nga magamit sa ministeryo. Nagatuon sila kon paano mangatarungan sa mga tawo nga indi pamilyar sa Biblia, magkomento sa mga miting sa kongregasyon, kag madamo sila sing ginahimo sa pag-alagad.”

Si Oliver, nga 37 anyos nga taga-Estados Unidos, nagpaathag kon ngaa ginarekomendar niya ang pag-alagad sa iban nga pungsod: “Ang pag-alagad kay Jehova nga may pagsakripisyo madamo sing pagpakamaayo. Bangod malayo ako sa akon pamilya, mas nagsalig ako kay Jehova. Ang pag-alagad upod sa mga bag-o ko lang nakilala pero pareho ang amon mga ginapatihan nagkumbinsi sa akon nga wala sing butang sa kalibutan nga mas importante pa sangsa Ginharian sang Dios.” Nagabulig subong si Oliver kag ang iya asawa, nga si Anna, sa pagbantala sa mga Chinese.

Si Trazel, isa ka sister nga 52 anyos kag taga-Australia, nagaalagad sa Myanmar sugod pa sang 2004. Nagsiling sia: “Para sa mga makasarang, ginarekomendar ko gid ang pag-alagad sa bululigan nga mga teritoryo. Naeksperiensiahan ko nga kon gusto mo gid mag-alagad, pakamaayuhon ni Jehova ang imo mga panikasog. Wala ko gid mahunahuna nga mangin amo sini ang akon kabuhi. Amo ini ang pinakamaayo kag pinakamalipayon nga kabuhi.”

Kabay pa nga ang mga eksperiensia sining mga nagbulig sa Myanmar magpalig-on sa inyo nga magsaylo man sa bululigan nga mga teritoryo nga madamo sing interesado. Nagapangabay ini nga mga kauturan, “Palihug, tabok kamo sa Myanmar kag buligi kami!”