1. Ano ang ginalaygay sang Filipos 2:3, kag ano ang benepisyo kon sundon naton ini?

MAPAINUBUSON kita nga nagatuman kay Jehova bangod nahangpan naton nga nabal-an gid niya kon ano ang pinakamaayo para sa aton. (Efe. 4:22-24) Kon mapainubuson kita, mas importante sa aton ang gusto ni Jehova sangsa gusto naton kag ginakabig naton ang iban nga labaw sa aton. Gani may maayo kita nga kaangtanan kay Jehova kag sa aton mga kauturan.—Basaha ang Filipos 2:3.

2. Ano ang ginsiling ni apostol Pablo, kag ano ang binagbinagon naton sa sini nga artikulo?

² Kon indi kita maghalong, mahimo kita maimpluwensiahan sang mga tawo nga bugalon kag nagapensar lang sang ila kaugalingon. * Posible nga amo sini ang natabo sa pila ka Cristiano sang unang siglo, kay ginsulatan ni apostol Pablo ang mga kauturan sa Roma: “Ginasilingan ko ang tagsatagsa sa inyo nga indi kamo magpakataas sa inyo kaugalingon, kundi ipakita ninyo nga may maligdong kamo nga panghunahuna.” (Roma 12:3) Kabalo si Pablo nga dapat naton pabaloran ang aton kaugalingon. Pero dapat kita mangin mapainubuson para mangin husto ang aton pagtan-aw sa aton kaugalingon. Binagbinagon naton sa sini nga artikulo ang tatlo ka sitwasyon nga kinahanglan naton ang pagkamapainubuson para malikawan naton nga magpabugal: (1) sa pag-asawahay, (2) sa mga pribilehiyo sa pag-alagad, kag (3) sa paggamit sang social media.

3. Ngaa may mga problema sa pag-asawahay, kag ano ang ginapensar sang iban para masolbar ini?

³ Gusto ni Jehova nga mangin malipayon ang mga mag-asawa. Pero bangod wala sing perpekto nga bana kag asawa, posible gid matabo ang indi pag-intiendihanay. Ang matuod, nagsulat si Pablo nga indi malikawan ang mga problema sa pag-asawahay. (1 Cor. 7:28) May mga mag-asawa nga pirme lang nagakamog, kag mahimo maghunahuna sila nga indi sila para sa isa kag isa. Kon naimpluwensiahan sila sang panghunahuna sang kalibutan, pensaron dayon nila nga magbulagay ukon magdiborsio. Ang ila lang kaugalingon ang ila ginapensar kag para sa ila mangin malipayon sila kon magbulagay sila.

4. Ano ang indi gid naton paghunahunaon?

⁴ Indi gid naton paghunahunaon nga indi na gid masolbar ang mga problema sang mag-asawa. Kabalo kita nga suno sa Biblia, ang seksuwal nga imoralidad lang ang rason nga puede makadiborsio. (Mat. 5:32) Gani kon may mga problema ang mag-asawa, indi sila dapat mangin bugalon kag likawan nila ang pagsiling: ‘Dapat palanggaon niya ako, pero daw wala sia sing labot sa akon. Maayo guro nga mangita na lang ’ko sang iban, basi mangin malipayon pa ako.’ Kon amo ini ang aton panghunahuna, ang kaugalingon lang naton ang aton ginapensar. Ang mga tawo sa kalibutan magalaygay sa imo nga magbulag kon amo ini ang ginasiling sang imo tagipusuon kag kon amo ini ang makapahalipay sa imo. Pero ang Dios nagasiling nga dapat mo ‘pangitaon indi lamang ang imo personal nga kaayuhan, kundi ang iya man sang iban.’ (Fil. 2:4) Gusto ni Jehova nga indi kamo magbulagay. (Mat. 19:6) Gusto niya nga sundon mo ang iya mga prinsipio kon nagadesisyon ka, indi ang imo kaugalingon nga panghunahuna.

5. Suno sa Efeso 5:33, ano ang dapat ipakita sang bana kag asawa sa isa kag isa?

⁵ Ang bana kag asawa dapat magpakita sang gugma kag pagtahod sa isa kag isa. (Basaha  ang Efeso 5:33.) Ginatudluan kita sang Biblia nga dapat mas hunahunaon naton ang paghatag sangsa pagbaton. (Binu. 20:35) Ano nga kinaiya ang makabulig sa mag-asawa nga mapakita ang gugma kag pagtahod? Ang pagkamapainubuson. Ang mapainubuson nga bana wala nagahunahuna sang iya kaugalingon nga kaayuhan, kundi sang kaayuhan sang iya asawa. Amo man sini ang ginahimo sang mapainubuson nga asawa.—1 Cor. 10:24.

6. Ano ang matun-an mo sa ginsiling ni Steven kag ni Stephanie?

⁶ Mas malipayon ang pag-asawahay sang mapainubuson nga bana kag asawa. Halimbawa, ang bana nga si Steven nagsiling: “Dapat magbuligay ang mag-asawa, ilabi na kon may mga problema. Imbes nga maghunahuna kon ‘ano ang pinakamaayo para sa akon?’ hunahunaon mo kon ‘ano ang pinakamaayo para sa amon?’” Nagakomporme man ang iya asawa nga si Stephanie. “Indi naton gusto nga kaupod naton ang aton kontra,” siling niya. “Kon wala kami nagaintiendihanay, ginatinguhaan namon nga mabal-an ang rason sang amon problema. Dayon nagapangamuyo kami, naga-research, kag ginaistoryahan namon kon paano masolbar ang problema. Ginapangitaan namon sang solusyon ang problema sa baylo nga mag-away kami nga duha.” Mangin mas malipayon ang mga mag-asawa kon indi nila paghunahunaon nga mas importante sila sangsa ila bana ukon asawa.

7. Ano nga kinaiya ang dapat ipakita sang brother kon makabaton sia sang pribilehiyo sa pag-alagad?

⁷ Para sa aton, isa gid ka kadungganan nga mag-alagad kay Jehova. (Sal. 27:4; 84:10) Maayo gid kon ang isa ka brother handa nga magbaton sang dugang nga mga pribilehiyo sa pag-alagad. Ang Biblia nagasiling: “Kon ang isa ka lalaki nagatinguha nga mangin manugtatap, nagahandum sia sang maayo nga buhat.” (1 Tim. 3:1) Pero kon makabaton sia sang pribilehiyo, indi sia dapat maghunahuna nga mas importante na gid sia sangsa iban. (Luc. 17:7-10) Dapat sia mangin mapainubuson sa pag-alagad sa iban.—2 Cor. 12:15.

8. Ano ang matun-an naton sa ginhimo ni Diotrefes, ni Uzias, kag ni Absalom?

⁸ May mga tawo nga ginsambit sa Biblia nga sobra ang pagtan-aw sa ila kaugalingon. Indi mapainubuson si Diotrefes kay luyag niya “magpulupangulo” sa kongregasyon. (3 Juan 9) Matinaastaason si Uzias kay gintinguhaan niya nga himuon ang wala ginapahimo sa iya ni Jehova. (2 Cron. 26:16-21) Gusto ni Absalom nga mangin hari, gani ginpapati niya ang mga tawo nga palangga niya sila para suportahan nila sia. (2 Sam. 15:2-6) Maathag nga ginapakita sini nga mga kasaysayan sa Biblia nga wala gid mahamuot si Jehova sa mga tawo nga gusto padunggan ang ila kaugalingon. (Hulu. 25:27) Sa ulihi, mahalitan gid ang mga tawo nga bugalon kag nagahandum gid nga dayawon sila sang iban.—Hulu. 16:18.

9. Ngaa masiling naton nga maayo gid nga halimbawa si Jesus?

⁹ Indi gid pareho si Jesus sa bugalon nga mga tawo nga ginsambit kaina. Ang Biblia nagasiling nga “bisan pa kaangay sia sang Dios, wala sia maghunahuna nga mang-agaw, buot silingon, nga mangin tupong sia sa Dios.” (Fil. 2:6) Magluwas kay Jehova, wala na sang mas gamhanan sangsa kay Jesus, pero wala nagpakaimportante si Jesus. Ginsilingan niya ang iya mga disipulo: “Ang nagagawi nga kubos sa tunga ninyo amo ang mataas.” (Luc. 9:48) Pagpakamaayo gid nga mag-alagad kaupod ang mapainubuson nga mga payunir, mga ministeryal nga alagad, mga gulang, kag mga manugtatap sang sirkito, nga nagailog kay Jesus. Ang mapainubuson nga mga alagad ni Jehova nagahigugmaanay, kag paagi sa sini nga gugma makilala ang organisasyon sang Dios.—Juan 13:35.

10. Ano ang himuon mo kon may mga problema sa kongregasyon nga sa pamatyag mo indi husto ang pag-asikaso sang mga gulang?

 ¹⁰ Ano ang himuon mo kon may mga problema sa kongregasyon nga sa pamatyag mo indi husto ang pag-asikaso sang mga gulang? Indi magreklamo, kundi mangin mapainubuson kag magkooperar sa mga nagapanguna. (Heb. 13:17) Para mahimo ini, pamangkuta ang imo kaugalingon: ‘Serioso gid bala ini nga mga problema nga dapat tadlungon? Subong gid bala ang husto nga tion para tadlungon ini? Responsibilidad ko bala nga tadlungon ini nga problema? Sa tuod lang, ginatinguhaan ko gid bala nga mahiusa ang kongregasyon, ukon nagapakaimportante lang ako?’

11. Suno sa Efeso 4:2, 3, ano ang resulta kon mapainubuson kita nga nagaalagad kay Jehova?

¹¹ Mas importante kay Jehova ang aton pagkamapainubuson sangsa aton mga ikasarang kag ang aton paghiusa sangsa aton kadasigon sa pag-obra. Gani himua ang imo bug-os nga masarangan nga mangin mapainubuson sa pag-alagad kay Jehova. Paagi sa sini, makabulig ka nga mahiusa ang kongregasyon. (Basaha ang Efeso 4:2, 3.) Mangin mapisan sa pagbantala. Mangita sang paagi kon paano mo mabuligan ang iban. Abiabiha ang tanan, pati ang mga wala sing pribilehiyo sa kongregasyon. (Mat. 6:1-4; Luc. 14:12-14) Kon mapainubuson ka nga nagaalagad kaupod ang mga kauturan, indi lang ang imo mga ikasarang ang matalupangdan nila, makita man nila ang imo pagkamapainubuson.

12. Ginapalig-on bala kita sang Biblia nga magpakig-abyan? Ipaathag.

¹² Gusto ni Jehova nga may tion kita nga makig-upod sa aton mga abyan kag pamilya kay makahatag ini sa aton sing kalipay. (Sal. 133:1)  Si Jesus may maayo nga mga abyan. (Juan 15:15) Ang Biblia nagasiling nga makabulig gid sa aton ang matuod nga mga abyan. (Hulu. 17:17; 18:24) Nagasiling man ini nga indi maayo kon ginalikawan naton nga makig-upod sa iban. (Hulu. 18:1) Madamo ang nagasiling nga makabulig ang social media para magdamo ang imo abyan kag indi ka masubuan. Pero dapat kita maghalong kon nagagamit kita sini.

13. Ngaa nasubuan kag na-depress ang iban nga nagagamit sang social media?

¹³ Suno sa mga research, posible gid nga masubuan kag ma-depress ang mga tawo nga nagakaubos ang tion sa pagtan-aw sang mga gina-post sa social media. Ngaa? Ang isa ka rason amo nga kalabanan nga gina-post sang mga tawo sa social media amo ang masadya nila nga mga eksperiensia kag ginapili lang nila ang pinakanami nila nga mga piktyur, ang mga piktyur sang ila mga abyan, kag sang ila mga nakadtuan. Ang tawo nga makakita sini nga mga piktyur mahimo magbatyag nga makatalaka ukon boring ang iya kabuhi. “Nahisa ako sang nakita ko ang post sang iban nga nagasinadya sila sang Sabado kag Domingo kag ako iya ara lang sa balay nga nagapanimuko,” siling sang 19 anyos nga sister.

14. Paano makabulig sa aton ang laygay sang Biblia sa 1 Pedro 3:8 kon nagagamit kita sang social media?

¹⁴ Matuod, makabulig man sa aton ang social media. Halimbawa, magamit naton ini sa pagkomunikar sa aton pamilya kag mga abyan. Pero natalupangdan mo bala nga naga-post ang iban sa social media para dayawon sila? Daw gusto nila nga sa ila lang ang atension sang mga tawo. Ginahikayan pa gani sang iban ang ila mismo piktyur ukon ang mga piktyur nga gin-post sang iban kag naga-comment sila sang binastos kag nagapang-insulto. Indi gid naton ini paghimuon kay ginapalig-on kita nga mangin mapainubuson kag magpakita sang simpatiya.—Basaha ang 1 Pedro 3:8.

15. Paano kita mabuligan sang Biblia nga indi magpakaimportante?

¹⁵ Kon nagagamit ka sang social media, pamangkuta ang imo kaugalingon: ‘Kon makita sang iban ang akon gina-post nga mga comment, piktyur, ukon video, posible ayhan nga maghunahuna sila nga nagapadayawdayaw ako? Posible ayhan nga mahisa sila?’ Ang Biblia nagasiling: “Ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian  sang isa—indi halin sa Amay, kundi halin sa kalibutan.” (1 Juan 2:16) Gin-translate sang isa ka bersion sang Biblia ang “pagpadayawdayaw sang palangabuhian sang isa” nga “paghandum nga mangin importante.” Ang mga Cristiano indi dapat maghandum nga mangin importante ukon dayawon sila sang iban. Ginasunod nila ang laygay sang Biblia: “Indi kita magpabugal sang aton kaugalingon, nga ginahalinan sang paindisanay kag paghinisaay.” (Gal. 5:26) Kon mapainubuson kita, indi kita mangin pareho sang mga tawo sa kalibutan nga mga bugalon kag gusto mangin mas importante sangsa iban.

16. Ngaa indi kita dapat mangin bugalon?

¹⁶ Dapat kita mangin mapainubuson bangod ang mga bugalon indi ‘maligdong ang panghunahuna’ ukon indi maayo ang panghunahuna. (Roma 12:3) Ang mga tawo nga bugalon palabais kag sobra nga nagapakaimportante sang ila kaugalingon. Ang ila mga ginahunahuna kag ginahimo masami nga nagahalit sa ila kag sa iban. Kon indi sila magbag-o, malimbungan ni Satanas ang ila panghunahuna kag daw bulag na sila nga nagasunod sa iya. (2 Cor. 4:4; 11:3) Pero kon ang isa ka tawo mapainubuson, may maayo sia nga panghunahuna. Husto ang pagtan-aw niya sa iya kaugalingon kag ginakabig niya ang iban nga labaw sa iya. (Fil. 2:3) Kag kabalo sia nga “ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.” (1 Ped. 5:5) Kon maayo ang aton panghunahuna, indi gid naton gusto nga mangin kaaway naton si Jehova.

17. Ano ang dapat naton himuon para padayon kita nga mangin mapainubuson?

¹⁷ Para padayon kita nga mangin mapainubuson, dapat naton sundon ang laygay sang Biblia nga ‘ubahon ang daan nga personalidad upod ang mga buhat sini, kag isuksok ang bag-o nga personalidad.’ Kinahanglan gid kita magpanikasog para mahimo ini. Dapat naton tun-an ang halimbawa ni Jesus kag tinguhaan gid naton nga ilugon sia sing maayo. (Col. 3:9, 10; 1 Ped. 2:21) Kon himuon naton ini, makabenepisyo gid kita. Kon mapainubuson kita, mangin mas malipayon ang aton pamilya, makabulig kita nga mahiusa ang kongregasyon, kag indi kita magpabugal kon nagagamit kita sang social media. Labaw sa tanan, pakamaayuhon gid kita ni Jehova.