1-2. Ano ang ginpromisa ni Jehova sa Isaias 65:16, 17 nga nagapalig-on sa aton nga padayon nga magbatas?

“INDI MANGAMPO!” Amo ini ang makapalig-on nga tema sang rehiyonal nga kombension sang 2017. Gintudluan kita sini kon paano naton mabatas ang aton mga problema. Apat na ka tuig ang nagligad sugod sadto, kag padayon naton nga ginabatas ang kahimtangan sa sining malain nga kalibutan.

² Ano nga mga problema ang naeksperiensiahan mo sining karon lang? May napatay bala sa inyo pamilya ukon sa imo suod nga mga abyan? May malala ka bala nga balatian? Madamo ka na bala sing ginabatyag bangod tigulang ka na? Nahalitan ka bala sang kalamidad, naapektuhan sang kagamo, ukon ginhingabot ka bala? Naapektuhan ka bala sang COVID-19 nga pandemic ukon sang iban pa nga balatian? Gusto na gid naton nga mag-abot ang tion nga madula na ini tanan nga problema. Sa sina nga tion, malipatan na naton ini kag indi na gid ini matabo liwat.—Basaha ang Isaias 65:16, 17.

3. Ano ang dapat naton himuon, kag ngaa?

³ Mabudlay ang kabuhi naton subong, pero magabudlay pa gid ini sa palaabuton. (Mat. 24:21) Gani dapat padayon kita nga magbatas. Ngaa? Bangod nagsiling si Jesus: “Paagi sa inyo pagbatas, matipigan ninyo ang inyo kabuhi.” (Luc. 21:19) Kon pamalandungan naton kon paano ginabatas sang iban ang mga problema nga pareho man sa aton mga problema, mapalig-on kita sini nga magbatas man.

4. Kon parte sa pagbatas, ngaa masiling naton nga si Jehova ang aton pinakamaayo nga halimbawa?

⁴ Kon parte sa pagbatas, sin-o ang aton pinakamaayo nga halimbawa? Si Jehova nga Dios. Posible nga indi sia ang ginahunahuna mo nga sabat. Pero kon pamensaran mo ini sing maayo, mahangpan mo kon ngaa. Ang Yawa ang nagagahom sa sini nga kalibutan,  gani puno ini sing problema. Masarangan ni Jehova nga dulaon gilayon ini nga mga problema, pero may gintalana sia nga tion nga himuon ini. (Roma 9:22) Gani padayon nga nagabatas ang aton Dios asta mag-abot ina nga tion. Binagbinagon naton ang siam ka butang nga ginabatas ni Jehova.

5. Paano ginapakahuy-an ang ngalan sang Dios, kag ano ang epekto sini sa imo?

⁵ Ginapakahuy-an ang iya ngalan. Importante gid kay Jehova ang iya ngalan, kag gusto niya nga padunggan ini sang tanan. (Isa. 42:8) Pero anom ka libo ka tuig na nga ginapakahuy-an ang iya ngalan. (Sal. 74:10, 18, 23) Nagsugod ini sa hardin sang Eden sang nagsiling ang Yawa (buot silingon, “Manugpasipala”) nga wala ginhatag sang Dios kanday Adan kag Eva ang kinahanglan nila para mangin malipayon sila. (Gen. 3:1-5) Sugod sadto, ginapakalain si Jehova kay wala niya kuno ginahatag sa mga tawo ang ila mga kinahanglanon. Nabalaka gid si Jesus kay ginpakahuy-an ang ngalan sang iya Amay. Gani gintudluan niya ang iya mga disipulo nga ipangamuyo ini: “Amay namon nga yara sa langit, pakabalaanon ang imo ngalan.”—Mat. 6:9.

6. Ngaa gintugutan ni Jehova nga magligad ang malawig nga tion para pamatud-an nga sia ang may kinamatarong sa paggahom sa langit kag sa duta?

⁶ Ginapamatukan ang iya kinamatarong sa paggahom. Si Jehova lang ang may kinamatarong sa paggahom sa langit kag sa duta, kag ang iya paggahom amo ang pinakamaayo. (Bug. 4:11) Pero ginapapati sang Yawa ang mga anghel kag ang mga tawo nga wala sing kinamatarong ang Dios. Kinahanglan ang tion para mapamatud-an nga si Jehova ang may kinamatarong sa paggahom kag sia ang pinakamaayo nga Manuggahom. Maalam gid ang Dios kay gintugutan niya ang mga tawo nga maggahom sa malawig nga tion. Gusto niya nga makita nila nga indi nila masarangan nga gamhan ang ila kaugalingon kon indi nila pagpamatian ang Manunuga. (Jer. 10:23) Bangod nangin mapinasensiahon ang Dios, wala na sing magakuestyon parte sa iya kinamatarong sa paggahom sa langit kag sa duta. Mabal-an sang tanan nga ang paggahom ni Jehova amo ang pinakamaayo, kag ang iya lang Ginharian ang makahatag sang matuod nga paghidait kag makadula sang tanan nga problema sa duta.

7. Sin-o ang mga nagrebelde kay Jehova, kag ano ang himuon niya sa ila?

⁷ Nagrebelde ang pila niya ka anak. Gintuga ni Jehova ang mga anghel kag ang mga tawo nga perpekto. Pero nagrebelde ang isa ka anghel kag nangin Satanas (buot silingon, “Manugpamatok”). Ginsulay ni Satanas ang perpekto nga mga tawo nga sanday Adan kag Eva nga magrebelde man kay Jehova. Nagrebelde man ang iban pa nga mga anghel kag mga tawo. (Jud. 6) Sang ulihi, ginpili sang Dios ang pungsod sang Israel nga mangin iya katawhan. Pero may pila ka Israelinhon nga nagsikway sa iya kag nagsimba sa indi matuod nga mga dios. (Isa. 63:8, 10) Para kay Jehova, ginluiban sia. Pero ginbatas niya ini, kag padayon sia nga magabatas asta mag-abot ang tion nga laglagon niya ang tanan nga nagrebelde sa iya. Kon mag-abot ina nga tion, malipay gid si Jehova kag ang mga matutom sa iya kay wala na sing malain nga sistema nga dapat batason.

8-9. Ano nga mga kabutigan ang ginapalapta parte kay Jehova, kag ano ang dapat naton himuon bangod sini?

⁸ Nagapalapta ang Yawa sang mga kabutigan. Sang ginkuestyon ni Satanas ang katutom sang alagad ni Jehova nga si Job, gusto niya paguaon nga ang tanan nga matutom nga mga alagad ni Jehova nagasimba lang sa Dios bangod sang mabaton nila nga kaayuhan. (Job 1:8-11; 2:3-5) Ginakuestyon gihapon sang Yawa ang katutom sang mga alagad sang Dios asta subong. (Bug. 12:10) Kon ginabatas naton ang mga pagtilaw kag nagapabilin kita nga matutom kay Jehova bangod palangga naton sia, mapamatud-an naton nga butigon si Satanas. Ginpakamaayo ni Jehova si Job,  kag pakamaayuhon man Niya kita kon magbatas kita.—Sant. 5:11.

⁹ Ginagamit ni Satanas ang mga lider sang butig nga relihion para tudluan ang mga tawo nga mapintas si Jehova kag sia ang balasulon sa ila mga pag-antos. Ginatudlo pa gani sang iban nga kon mapatay ang mga bata, ginakuha kuno sila sang Dios kay kinahanglan niya dugangan ang iya mga anghel sa langit. Grabe gid ini nga pagpasipala sa Dios. Pero kabalo kita nga si Jehova isa ka mahigugmaon nga Amay. Kon may malala kita nga balatian ukon napatay ang aton pinalangga, wala naton ginabasol ang aton Dios. Sa baylo, nagapati kita nga maabot ang tion nga ayuhon niya ang mga nagamasakit kag banhawon niya ang mga napatay. Gani ginasugiran naton ang tanan nga gusto mamati nga si Jehova mahigugmaon gid nga Dios. Bangod sini, masabat ni Jehova ang nagayaguta sa iya.—Hulu. 27:11.

10. Ano ang ginasugid sa aton sang Salmo 22:23, 24 parte kay Jehova?

¹⁰ Nagaantos ang iya pinalangga nga mga alagad. Si Jehova isa ka maluluy-on nga Dios. Nasubuan gid sia kon nagaantos kita bangod sang paghingabot, balatian, ukon sang aton mga kaluyahon. (Basaha ang Salmo 22:23, 24.) Nahangpan ni Jehova ang aton nabatyagan kon nagaantos kita. Gusto niya nga dulaon ang aton pag-antos, kag himuon gid niya ini. (Ipaanggid ang Exodo 3:7, 8; Isaias 63:9.) Maabot ang tion nga “pahiran niya ang tagsa ka luha sa [aton] mga mata, kag wala na sing kamatayon, ukon paglalaw ukon paghibi ukon kasakit pa.”—Bug. 21:4.

11. Ano ang nabatyagan ni Jehova parte sa iya matutom nga mga alagad nga napatay?

¹¹ Nahidlaw sia sa iya mga abyan nga napatay. Gusto na gid ni Jehova nga makita liwat ang iya matutom nga mga alagad nga napatay. (Job 14:15) Sigurado nga nahidlaw na gid si Jehova sa iya abyan nga si Abraham. (Sant. 2:23) Kag nahidlaw man sia kay Moises. Sang una, “nagaatubang” si Jehova kay Moises kon nagapakighambal sa iya. (Ex. 33:11) Kag gusto na gid ni Jehova  nga mabatian liwat si David kag ang iban pa nga mga salmista nga mag-amba sing mga pagdayaw sa Iya. (Sal. 104:33) Bisan pa napatay na ining mga abyan ni Jehova, wala niya sila nalipatan. (Isa. 49:15) Ginadumdom niya ang tanan parte sa ila. Ang Biblia nagasiling nga “sa iya pagtamod buhi sila tanan.” (Luc. 20:38, footnote) Maabot ang tion nga banhawon niya sila, kag mabatian niya liwat ang ila hanuot nga mga pangamuyo kag batunon niya ang ila pagsimba. Makapaumpaw gid ini sa imo kon napatyan ka sing pinalangga.

12. Ano ang nagapasubo gid kay Jehova sa sining katapusan nga mga adlaw?

¹² Ginahalitan sang malain nga mga tawo ang iban. Sang may nagrebelde kay Jehova sa Eden, kabalo sia nga magalala pa gid ang sitwasyon. Wala gid nanamian si Jehova sa malain nga nagakatabo sa kalibutan subong, pati na sa inhustisya kag kagamo. Pirme gid ginaulikdan ni Jehova ang mga maluya kag ang mga indi makaamlig sa ila kaugalingon, pareho sang mga ilo kag mga balo. (Zac. 7:9, 10) Nasubuan gid si Jehova kon ginahingabot kag ginapriso ang iya matutom nga mga alagad. Palangga gid ni Jehova ang tanan nga nagabatas pareho sa iya. Makasalig ka gid sa sini.

13. Ano ang malain nga ginahimo sang mga tawo, kag ano ang himuon sang Dios sa sini?

¹³ Nangin malain na gid ang ginahimo sang mga tawo. Gintuga sang Dios ang mga tawo nga may mga kinaiya nga pareho sa iya. Pero gusto ni Satanas nga maghimo sila sang malain. Sang “nakita ni Jehova nga tuman gid ang kalautan sang tawo” sang panahon ni Noe, “nagkalisod [sia] tungod sa tawo nga ginhimo niya sa duta, kag nasakitan gid ang iya tagipusuon.” (Gen. 6:5, 6, footnote, 11) Nangin maayo bala ang kahimtangan naton subong? Wala gid. Sigurado nga nalipay gid ang Yawa nga madamo ang nagahimo sang seksuwal nga imoralidad. Nalakip sa sini ang imoral nga pagpakig-sex sang lalaki kag babayi, sang pareho nga lalaki, kag pareho nga babayi. (Efe. 4:18, 19) Kag mas nalipay si Satanas kon ang mga nagasimba kay Jehova amo ang makahimo sang serioso nga sala. Kon mag-abot na ang tion nga gintalana ni Jehova, mangin maathag nga wala gid sia nanamian sa imoral nga ginahimo sang mga tawo kay laglagon niya ang tanan nga nagahimo sini.

14. Ano ang ginahimo sang mga tawo sa mga gintuga sang Dios?

¹⁴ Ginaguba sang mga tawo ang duta nga iya gintuga. Magluwas nga “ginagamhan sang tawo ang iya isigkatawo sa iya kahalitan,” wala man niya ginaatipan ang duta kag ang mga sapat nga ginsugo ni Jehova nga himuon niya. (Man. 8:9; Gen. 1:28) Suno sa mga scientist, bangod sang ginahimo sang mga tawo, mahimo maubos ang isa ka milyon ka klase sang mga sapat kag mga tanom pagligad sang pila ka tuig. Gani nabalaka gid ang mga tawo sa posible nga matabo sa aton planeta nga duta. Nagapasalamat gid kita nga nagpromisa si Jehova nga ‘laglagon niya ang mga nagalaglag sang duta’ kag himuon niya nga paraiso ang bilog nga kalibutan.—Bug. 11:18; Isa. 35:1.

15-16. Ano ang nagapalig-on sa aton nga magbatas man pareho kay Jehova? Maghatag sing ilustrasyon.

¹⁵ Hunahunaa ang tanan nga problema nga linibo ka tuig na nga ginabatas sang aton Amay sa langit. (Tan-awa ang kahon nga “ Ang mga Ginabatas ni Jehova.”) Kon gustuhon ni Jehova, puede niya dayon laglagon ining malain nga sistema. Pero nangin mapinasensiahon sia kag nakabulig gid ini sa aton. Binagbinaga ini nga ilustrasyon. Ibutang ta nga ginsilingan ang isa ka mag-asawa nga kon mabun-ag ang ila bata, may malala sia nga balatian kag indi magalawig ang iya kabuhi. Pero nalipay sila sang nabun-ag ang ila bata bisan pa kabalo sila nga mabudlayan sila sa pag-atipan sa iya. Bangod palangga nila ang ila bata, handa sila nga batason ang tanan nga kabudlayan para mahatagan sia sang pinakamaayo nga kabuhi.

¹⁶ Sing kaanggid, ang tanan nga anak nanday  Adan kag Eva nabun-ag nga indi perpekto. Pero palangga sila gihapon ni Jehova kag ginaatipan niya sila. (1 Juan 4:19) Sa ilustrasyon, indi masarangan sang mga ginikanan nga dulaon ang pag-antos sang ila bata. Pero masarangan ni Jehova nga dulaon ang tanan nga pag-antos sang mga tawo, kag may gintalana sia nga tion kon san-o niya ini himuon. (Mat. 24:36) Indi bala nga palangga gid kita ni Jehova? Dapat mapalig-on kita sini nga magbatas man pareho sa iya.

17. Base sa ginasiling sang Hebreo 12:2, 3 parte kay Jesus, paano kita sini mapalig-on nga padayon nga magbatas?

¹⁷ Kon parte sa pagbatas, si Jehova ang aton pinakamaayo nga halimbawa. Gin-ilog ni Jesus ang pagbatas sang iya Amay. Sang ari pa si Jesus sa duta, ginbatas niya ang pagpakalain, pagpakahuya, kag ang usok sang pag-antos para sa aton. (Basaha ang Hebreo 12:2, 3.) Sigurado gid nga bangod nagbatas si Jehova, napalig-on sini si Jesus nga magbatas man. Mapalig-on man kita sini.

18. Suno sa 2 Pedro 3:9, ano ang resulta bangod nangin mapinasensiahon si Jehova?

¹⁸ Basaha ang 2 Pedro 3:9. Kabalo si Jehova sang husto nga tion kon san-o niya tapuson ining malain nga kalibutan. Bangod nangin mapinasensiahon sia, nakilala sia sang madamo nga tawo. Subong, minilyon na ka tawo ang nagasimba kag nagadayaw sa iya. Nalipay gid sila tanan kay nagbatas si Jehova sa malawig nga tion. Sa sina nga tion, nabun-ag sila, natun-an nila ang parte sa iya, ginpalangga nila sia, kag nagdedikar sila sa iya. Kon mag-abot ang tion nga padyaan na ni Jehova ang minilyon ka tawo nga nagbatas asta sa katapusan, mapamatud-an gid nga husto ang iya desisyon nga magbatas.

19. Ano ang dapat naton himuon, kag ano ang mabaton naton nga padya?

¹⁹ Natun-an naton sa halimbawa ni Jehova nga puede kita mangin malipayon bisan pa may ginabatas kita. Nasakitan kag nasubuan gid si Jehova sa mga ginhimo ni Satanas. Pero ‘malipayon sia gihapon nga Dios.’ (1 Tim. 1:11) Makapabilin man kita nga malipayon samtang mapinasensiahon naton nga ginahulat ang tion nga pakabalaanon ni Jehova ang iya ngalan, mabindikar niya ang iya pagkasoberano, kag dulaon niya ang tanan nga kalainan kag mga problema naton subong. Kabay pa nga panikasugan gid naton nga magbatas kay kabalo kita nga nagabatas man ang aton Amay sa langit. Kon himuon naton ini, maeksperiensiahan naton ini nga promisa: “Malipayon ang tawo nga padayon nga nagabatas sang pagtilaw, kay kon mahamut-an sia, mabaton niya ang purongpurong sang kabuhi, nga ginsaad ni Jehova sa mga padayon nga nagahigugma sa Iya.”—Sant. 1:12.