1. Ano ang isa sa pinakadalayawon nga kinaiya ni Jesus? Ipaathag.

ANG isa sa pinakadalayawon nga kinaiya ni Jesus amo nga mahangpan niya ang mga kabudlayan nga nagakatabo sa indi perpekto nga mga tawo. Sang ari si Jesus sa duta, ‘nagkasadya sia upod sa mga tawo nga nagakasadya kag naghibi upod sa mga tawo nga nagahibi.’ (Roma 12:15) Halimbawa, sang nagbalik nga malipayon ang iya 70 ka disipulo pagkatapos sang ila madinalag-on nga pagbantala, “napuno [si Jesus] sang kalipay kag balaan nga espiritu.” (Luc. 10:17-21) Sang nakita naman niya ang kasubo sang mga nagapalangga kay Lazaro bangod sang pagkapatay niya, “natandog gid ang tagipusuon ni Jesus kag natublag sia.”—Juan 11:33.

2. Ano ang nagbulig kay Jesus nga mapakita ang simpatiya sa mga tawo?

² Ano ang nagbulig sa sining perpekto nga tawo nga mangin maluluy-on kag mainawaon sa pagpakig-angot sa indi perpekto nga mga tawo? Una, ginahigugma ni Jesus ang mga tawo. Ginsambit sa nagligad nga artikulo nga “mas nalipay [sia] sa mga anak sang mga tawo.” (Hulu. 8:31) Ini nga gugma nagbulig sa iya nga hibaluon sing maayo kon paano nagahunahuna ang mga tawo. Si apostol Juan nagsiling: “Nakahibalo gid sia kon ano ang yara sa tagipusuon sang tawo.” (Juan 2:25) Naluoy gid si Jesus sa iban. Nabatyagan sang mga tawo ang iya gugma sa ila amo nga ginpamatian nila ang mensahe sang Ginharian. Kon ginatinguhaan naton nga ipakita ini nga kaluoy sa mga tawo, mangin epektibo pa gid kita sa aton pagministeryo.—2 Tim. 4:5.

3-4. (a) Kon may simpatiya kita, paano naton tamdon ang aton pagministeryo? (b) Ano ang binagbinagon naton sa sini nga artikulo?

³ Nahibaluan ni apostol Pablo nga may obligasyon sia sa pagbantala, kag amo man kita. (1 Cor. 9:16) Pero, kon may simpatiya kita, tamdon naton nga indi lang isa ka obligasyon ang aton  pagministeryo. Gusto naton ipakita nga nagaulikid kita sa mga tawo kag gusto naton sila buligan. Nahibaluan naton nga “mas malipayon ang nagahatag sangsa nagabaton.” (Binu. 20:35) Kon amo sini ang aton panghunahuna, mangin malipayon pa gid kita sa aton pagministeryo.

⁴ Sa sini nga artikulo, binagbinagon naton kon paano naton mapakita ang simpatiya sa aton pagministeryo. Una, hibaluon naton kon ano ang matun-an naton sa ginpakita ni Jesus nga simpatiya sa mga tawo. Dayon binagbinagon naton ang apat ka paagi nga mailog naton sia.—1 Ped. 2:21.

5-6. (a) Sin-o ang ginpakitaan ni Jesus sang simpatiya? (b) Suno sa gintagna sa Isaias 61:1, 2, ngaa naluoy si Jesus sa mga tawo nga iya ginbantalaan?

⁵ Binagbinaga kon paano ginpakita ni Jesus ang simpatiya. Isa ka bes, kapoy gid si Jesus kag ang iya mga disipulo bangod sang ila pagbantala sang maayong balita. “Wala [na] sila sing tion bisan sa pagkaon.” Gani gindala ni Jesus ang iya mga disipulo sa “isa ka baw-ing nga lugar nga silahanon lang” para “magpahuway sing makadali.” Pero nagdalagan ang madamo gid nga tawo amo nga nauna pa sila abot sa kadtuan ni Jesus kag sang iya mga disipulo. Pag-abot ni Jesus didto kag sang nakita niya ang mga tawo, ano ang iya reaksion? “Naluoy * sia sa ila bangod kaangay sila sang mga karnero nga wala sing manugbantay. Kag gintudluan niya sila sing madamo nga butang.”—Mar. 6:30-34.

⁶ Talupangda ang rason kon ngaa naluoy si Jesus, nga nagapakita sang simpatiya. Nakita niya nga ‘kaangay sang mga karnero nga wala sing manugbantay’ ang mga tawo. Mahimo nakita ni Jesus nga ang pila sa ila mga imol kag nagapangabudlay gid para maamanan ang ila mga pamilya. Ayhan nasubuan gid ang iban bangod sa pagkapatay sang ila pinalangga. Gani mahimo nahangpan gid ni Jesus  ang ila kahimtangan. Ginbinagbinag sa nagligad nga artikulo nga mahimo naeksperiensiahan ni Jesus ang pila sini nga mga kabudlayan. Nagaulikid si Jesus sa iban, kag gusto niya sila paumpawan.—Basaha ang Isaias 61:1, 2.

7. Paano naton mailog si Jesus?

⁷ Ano ang matun-an naton kay Jesus? Pareho kay Jesus, ginapalibutan kita sang mga tawo nga “kaangay . . . sang mga karnero nga wala sing manugbantay.” Nabudlayan sila bangod sa madamo nga problema. Ara sa aton ang kinahanglan nila, nga amo ang mensahe sang Ginharian. (Bug. 14:6) Bilang pag-ilog sa aton Agalon, nagabantala kita sang maayong balita bangod ‘naluoy kita sa kubos kag sa imol.’ (Sal. 72:13) Naluoy kita sa mga tawo, kag gusto naton sila buligan.

8. Ano ang isa ka paagi nga mapakita naton ang simpatiya sa pagministeryo? Iilustrar.

⁸ Paano naton mapakita ang simpatiya sa mga mabantalaan naton? Ibutang naton ang aton kaugalingon sa sitwasyon sang mga tawo nga mabantalaan naton, kag dapat naton sila pakig-angutan sa paagi nga gusto naton nga pakig-angutan kita. * (Mat. 7:12) Binagbinagon naton ang apat ka paagi nga mahimo naton ini. Una, hunahunaa ang kinahanglanon sang kada isa. Kon nagabantala kita sang maayong balita, daw kaangay kita sa doktor. Ginahunahuna sang maayo nga doktor ang kinahanglanon sang kada pasyente. Nagapamangkot sia kag nagapamati sing maayo samtang ginasugid sang iya pasyente ang iya ginabatyag ukon mga sintoma. Sa baylo nga resetahan dayon sing bulong ang pasyente, ginaobserbahan anay sang doktor ang sintoma sang pasyente kag dayon resetahan sang husto nga bulong. Sing kaanggid, indi kita dapat maggamit sang isa lang ka presentasyon sa tanan nga mabantalaan naton. Sa baylo, ginahunahuna naton sing maayo ang kahimtangan kag mga opinyon sang kada isa.

9. Ano ang indi dapat naton paghunahunaon? Ipaathag.

⁹ Kon may mabantalaan ka, indi paghunahunaa nga nahibaluan mo na kon ano ang iya kahimtangan ukon mga ginapatihan kag kon ngaa amo sini ang iya pagpati. (Hulu. 18:13) Sa baylo, mataktikanhon sia nga pamangkuta para mahibaluan mo ang iya kahimtangan kag mga ginapatihan. (Hulu. 20:5) Kon nagakaigo sa inyo kultura, pamangkuta sia parte sa iya obra, pamilya, mga opinyon, kag iban pa parte sa iya kabuhi. Kon ginapamangkot naton ang mga tawo, mahibaluan naton kon ano ang ila mga kinahanglanon. Kon mahibaluan naton ini, mapakita naton ang simpatiya sa ila espesipiko nga kinahanglanon kag mabuligan sila, pareho sang ginhimo ni Jesus.—Ipaanggid ang 1 Corinto 9:19-23.

10-11. Suno sa 2 Corinto 4:7, 8, ano ang ikaduha nga paagi nga mapakita naton ang simpatiya? Maghatag sing halimbawa.

 ¹⁰ Ikaduha, imadyina kon ano ayhan ang ila kabuhi. Paagi sini, mahangpan naton ang ila kahimtangan. Indi kita perpekto kag may mga problema man kita. (1 Cor. 10:13) Nahibaluan naton nga mabudlay gid ang kabuhi subong. Makabatas lang kita paagi sa bulig ni Jehova. (Basaha ang 2 Corinto 4:7, 8.) Pero hunahunaa ang mga tawo nga wala sing suod nga pagpakig-abyan kay Jehova. Mabudlay gid ang ila kabuhi. Pareho kay Jesus, naluoy kita sa ila, kag gusto naton isugid sa ila ang “maayong balita tuhoy sa mas maayo nga butang.”—Isa. 52:7.

¹¹ Binagbinaga ang utod nga si Sergey. Antes natun-an ni Sergey ang kamatuoran, mahuluy-on gid sia kag hipuson. Nabudlayan gid sia makig-istorya sa iban. Sang ulihi, nagtuon sia sa Biblia. “Natun-an ko sa Biblia nga obligasyon sang mga Cristiano nga isugid sa iban ang ila ginapatihan,” siling niya. “Nagpensar ako nga indi ko gid ini mahimo.” Pero, ginhunahuna niya ang mga tawo nga wala pa nakabati sang kamatuoran, kag narealisar niya nga mabudlay gid ang ila kabuhi kay wala nila makilala si Jehova. “Ang mga butang nga akon natun-an naghatag sa akon sing daku nga kalipay kag kalinong,” siling niya. “Narealisar ko nga dapat man matun-an sang iban ini nga mga kamatuoran.” Samtang ginapakita ni Sergey ang simpatiya, nagadugang ang iya kaisog nga magbantala. “Daw indi ako makapati,” siling ni Sergey, “sang ginasugid ko sa iban ang parte sa Biblia, nagadugang ang akon kompiansa. Kag nagpabakod man ini sang akon pagtuo.” *

12-13. Ngaa dapat kita mangin mapinasensiahon sa mga ginatudluan naton sa ministeryo? Iilustrar.

¹² Ikatlo, mangin mapinasensiahon sa imo mga ginatudluan. Dumduma nga mahimo wala pa nila mahunahuna ang pila sa mga kamatuoran sa Biblia nga nahibaluan na naton sing maayo. Kag madamo ang kumbinsido gid sa ila mga ginapatihan. Mahimo nga para sa ila,  ang ila relihion nagapahiusa sa ila pamilya, nagapasanyog sang ila kultura, kag nagapasuod sa ila sa mga tawo sa ila lugar. Paano naton sila mabuligan?

¹³ Binagbinaga ini nga pagpaanggid: Ano ang ginahimo kon daan na ang taytay kag dapat na ini islan? Sa masami, ginagamit gihapon ang daan nga taytay samtang ginahimo ang bag-o nga taytay. Kon nahuman na ang bag-o nga taytay, ang daan nga taytay puede na gub-on. Sing kaanggid, antes naton hambalon ang mga tawo nga biyaan ang ila “daan” nga mga ginapatihan, buligan anay naton sila nga apresyahon ang “bag-o” nga mga kamatuoran nga ginatudlo sa Biblia. Dayon mangin handa na sila nga biyaan ang ila mga ginapatihan sang una. Mahimo kinahanglan ang tion para buligan ang mga tawo nga makahimo sang mga pagbag-o.—Roma 12:2.

14-15. Paano naton mabuligan ang mga tawo nga indi pamilyar sa paglaum nga kabuhi nga wala sing katapusan sa paraiso nga duta? Maghatag sing halimbawa.

¹⁴ Kon mapinasensiahon kita sa mga tawo sa ministeryo, wala kita nagapaabot nga mahangpan nila dayon ukon batunon ang kamatuoran sa Biblia nga bag-o pa lang nila nabatian. Bangod may simpatiya kita sa ila, ginabuligan naton sila sing amat-amat nga mahangpan sing maayo ang ginasiling sang Biblia. Halimbawa, hunahunaa kon paano naton mabuligan ang isa ka tawo nga mahangpan ang paglaum nga kabuhi nga wala sing katapusan sa paraiso nga duta. Madamo nga tawo ang indi pamilyar sa sini nga panudlo. Mahimo nagapati sila nga indi na mabuhi ang mga patay. Ukon nagahunahuna sila nga ang tanan nga maayo nga mga tawo mapalangit. Paano naton sila mabuligan?

¹⁵ Amo ini ang ginahimo sang isa ka brother. Una, ginabasa niya ang Genesis 1:28. Dayon, pamangkuton niya ang tagbalay kon sa diin gusto sang Dios nga mag-istar ang mga tawo kag kon ano nga klase sang kabuhi ang gusto niya para sa ila. Ang kalabanan nagasabat nga “Sa duta, nga may malipayon nga kabuhi.” Dayon, ginabasa niya ang Isaias 55:11 kag nagapamangkot sia kon bala nagbag-o ang katuyuan sang Dios. Sa masami, ang tagbalay nagasabat nga wala. Dayon, ginabasa niya ang Salmo 37:10, 11 kag nagapamangkot sia kon ano nga klase sang kabuhi ang maeksperiensiahan sang mga tawo sa palaabuton. Paagi sa paggamit sing maayo sa Biblia, madamo sia sing nabuligan nga mahangpan nga katuyuan gihapon sang Dios nga mabuhi sing wala sing katapusan sa Paraiso nga duta ang maayo nga mga tawo.

16-17. Kon iaplikar naton ang Hulubaton 3:27, ano ang pila ka paagi nga mapakita naton ang simpatiya? Iilustrar.

¹⁶ Ikap-at, magpakita sing konsiderasyon. Halimbawa, natabuan bala nga masako ang tagbalay pagbisita naton? Mangayo kita sing pasaylo kag hambalon nga mabalik kita kon indi na sia masako. Ano abi kon may ginaobra ang tagbalay kag kinahanglan niya sing bulig? Ukon ano abi kon ang tagbalay nagamasakit  ukon tigulang na kag may dapat sia himuon pero wala sia sing may masugo? Sa sini nga mga sitwasyon, mahimo naton mabuligan ang tagbalay.—Basaha ang Hulubaton 3:27.

¹⁷ Maayo ang resulta sang kaayo nga ginpakita sang isa ka sister. Bangod sa iya simpatiya, nagsulat sia sa pamilya nga napatyan sang lapsag. Ang sulat nagalakip sang makapaumpaw nga mga teksto sa Biblia. Paano ini nakabulig sa pamilya? “Grabe gid ang akon kasubo kahapon,” sulat sang napatyan nga iloy. “Daku gid ang bulig sang imo sulat sa amon. Madamo gid nga salamat kay nagpaumpaw gid ini sa amon. Siguro sobra 20 ka beses ko ini nga ginbasa kahapon. Nabatyagan ko gid ang imo kaayo kag pag-ulikid. Madamo gid nga salamat.” Sigurado nga maayo ang resulta kon hunahunaon naton ang mga kabudlayan sang mga tawo kag buligan sila.

18. Suno sa 1 Corinto 3:6, 7, ano ang dumdumon naton sa aton pagministeryo, kag ngaa?

¹⁸ Dapat nabal-an naton ang aton papel sa aton pagministeryo. Ginabuligan naton ang iban nga makatuon parte sa Dios, pero indi kita ang nagahimo sang pinakaimportante nga bahin sang sini nga hilikuton. (Basaha ang 1 Corinto 3:6, 7.) Si Jehova ang nagabuyok sa mga tawo. (Juan 6:44) Nagadepende sa tagipusuon sang kada isa kon bala batunon niya ukon indi ang maayong balita. (Mat. 13:4-8) Dumduma nga ang kalabanan nga tawo wala magbaton sang mensahe ni Jesus, bisan pa nga sia ang pinakamaayo nga Manunudlo nga nagkabuhi. Gani, indi kita dapat maluyahan sing buot kon ang kalabanan nga tawo nga maistorya naton wala nagapamati sa aton mensahe.

19. Ano ang maayo nga resulta kon ipakita naton ang simpatiya sa aton pagministeryo?

¹⁹ Maayo ang resulta kon ipakita naton ang simpatiya sa aton pagministeryo. Mas manamian pa gid kita sa aton pagbantala. Mas mabatyagan naton ang kalipay sa paghatag. Kag mabuligan naton ang mga may “husto nga panimuot sa pagtigayon sing kabuhi nga wala sing katapusan” nga batunon ang maayong balita. (Binu. 13:48) Gani, “samtang may kahigayunan kita, himuon naton ang maayo sa tanan.” (Gal. 6:10) Kon himuon naton ini, mahimaya naton ang aton Amay sa langit.—Mat. 5:16.