1-2. Ano ang dapat himuon sang isa ka tawo antes sia magpabawtismo?

 SA SULOD sang nagligad nga lima ka tuig, sobra isa ka milyon ang nagpabawtismo bilang mga Saksi ni Jehova. Madamo sa ila ang gintudluan sang kamatuoran ‘kutob sa ila pagkalapsag,’ pareho sa isa ka disipulo sang unang siglo nga si Timoteo. (2 Tim. 3:​14, 15) May iban naman nga daku na sila sang natun-an nila ang parte kay Jehova, kag may ara pa gani nga tigulang na sila sang natun-an nila ang kamatuoran. Halimbawa, mga pila ka tuig na ang nagligad, may isa ka babayi nga nagpa-Bible study sa mga Saksi ni Jehova kag nabawtismuhan sia sa edad nga 97.

² Naga-Bible study ka bala, ukon Saksi bala ang imo mga ginikanan? Gusto mo bala magpabawtismo? Kanami gid sang gusto mo himuon. Pero antes ka magpabawtismo, dapat mo anay idedikar ang imo kaugalingon kay Jehova. Ipaathag sini nga artikulo kon ano ang buot silingon sang dedikasyon. Buligan ka man sini nga mahangpan kon ngaa indi ka dapat mag-alang-alang sa pagdedikar kag sa pagpabawtismo kon handa ka na.

ANO ANG DEDIKASYON?

3. Maghatag sing halimbawa sang mga tawo sang panahon sang Biblia nga nadedikar kay Jehova.

³ Sa Biblia, ang dedikasyon nagakahulugan sing pagpain para sa sagrado nga katuyuan. Halimbawa, ang pungsod sang Israel nadedikar kay Jehova. Pero may pila ka Israelinhon nga nadedikar kay Jehova sa pinasahi nga paagi. Halimbawa, nagasuksok si Aaron sing mahining nga pidaso nga bulawan sa atubangan sang iya turbante. Ginatawag ini nga “balaan nga tanda sang pagdedikar.”  Ining pidaso nga bulawan nagapakita nga ginpain sia para mag-alagad sa pinasahi nga paagi bilang mataas nga saserdote sang Israel. (Lev. 8:9) Nadedikar man ang mga Nazareo kay Jehova sa pinasahi nga paagi. Ang tinaga nga “Nazareo” nga naghalin sa Hebreo nga tinaga nga nazirʹ nagakahulugan sing “Isa nga Ginpain,” ukon “Isa nga Gindedikar.” Suno sa Mosaikong Kasuguan, may mga dapat likawan kag may mga indi dapat himuon ang mga Nazareo. Dapat gid nila ini tumanon.​—Num. 6:​2-8.

4. (a) Kon nadedikar mo na ang imo kaugalingon kay Jehova, ano na ang imo sagrado nga katuyuan ukon gusto nga himuon? (b) Ano ang buot silingon sang “ipanghiwala” ang imo kaugalingon? (Tan-awa man ang piktyur.)

⁴ Kon ginadedikar mo ang imo kaugalingon kay Jehova, nagadesisyon ka nga gusto mo mangin disipulo ni Jesucristo kag mangin pinakaimportante na sa imo kabuhi ang paghimo sa kabubut-on sang Dios. Ano ang nalakip sa imo dedikasyon? Nagsiling si Jesus: “Kon ang bisan sin-o luyag magsunod sa akon, ipanghiwala niya ang iya kaugalingon.” (Mat. 16:24) Ang Griego nga ekspresyon nga gin-translate “ipanghiwala niya ang iya kaugalingon” puede man i-translate nga “pangindian niya ang iya kaugalingon.” Bilang isa ka alagad ni Jehova nga nadedikar sa iya, dapat mo pangindian ang bisan ano nga indi suno sa iya kabubut-on. (2 Cor. 5:​14, 15) Nalakip sa sini ang pagpangindi sa “mga buhat sang unod,” pareho sang seksuwal nga imoralidad. (Gal. 5:​19-21; 1 Cor. 6:18) Mabudlayan ka lang bala kon tumanon mo ang mga kasuguan sang Dios? Kon palangga mo si Jehova kag kon kumbinsido ka nga para sa imo kaayuhan ang iya mga kasuguan, indi mo gid paghunahunaon nga nagapabudlay ini sa imo. (Sal. 119:97; Isa. 48:​17, 18) Ang isa ka brother nga si Nicholas nagsiling, “Puede mo tamdon ang mga kasuguan ni Jehova nga daw mga rehas sang prisuhan nga nagapugong sa imo nga makapagusto sa imo kabuhi, ukon puede mo ini tamdon nga daw mga  rehas nga nagapugong sa mga leon para indi ka mahalitan.”

5. (a) Paano mo idedikar ang imo kaugalingon kay Jehova? (b) Ano ang kinalain sang dedikasyon kag sang bawtismo? (Tan-awa man ang piktyur.)

⁵ Paano mo idedikar ang imo kaugalingon kay Jehova? Mangamuyo ka sa iya para magpromisa sa iya nga sia lang ang imo simbahon kag unahon mo ang iya kabubut-on. Magapromisa ka kay Jehova nga padayon mo sia nga palanggaon “sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Ikaw lang kag si Jehova ang nakabalo kon magdedikar ka sa iya. Pero kon magpabawtismo ka, himuon ini sa atubangan sang mga tawo para mabal-an nila nga nakadedikar ka na. Isa ka serioso nga promisa ang imo pagdedikar kay Jehova. Gusto ni Jehova nga tumanon mo ang imo promisa, gani dapat mo gid ini tumanon.​—Man. 5:​4, 5.

NGAA DAPAT MO IDEDIKAR ANG IMO KAUGALINGON KAY JEHOVA?

6. Ano ang nagapalig-on sa isa ka tawo nga idedikar ang iya kaugalingon kay Jehova?

⁶ Ang panguna nga rason kon ngaa dapat mo idedikar ang imo kaugalingon kay Jehova amo ang imo gugma sa iya. Indi lang isa ka balatyagon ini nga gugma. Sa baylo, nabase ini sa “sibu nga ihibalo” kag sa “espirituwal nga paghangop,” ukon sa mga butang nga imo natun-an parte kay Jehova nga nagpabakod sang imo gugma sa iya. (Col. 1:9) Sa imo pagtuon sang Biblia, nakumbinsi ka nga (1) matuod si Jehova, (2) Pulong niya ang Biblia, kag (3) ginagamit niya ang iya organisasyon para tumanon ang iya kabubut-on.

7. Ano ang dapat ginahimo na naton antes naton idedikar ang aton kaugalingon sa Dios?

⁷ Antes magdedikar ang isa kay Jehova, dapat nabal-an na niya ang panguna nga mga panudlo sa Pulong sang Dios kag ginatuman na niya ang  Iya mga kasuguan. Dapat ginasugid na niya sa iban ang iya mga natun-an sa bug-os niya nga masarangan. (Mat. 28:​19, 20) Dapat mabakod na ang iya gugma kay Jehova, kag ginapakita niya nga si Jehova lang ang gusto niya simbahon. Amo bala sini ang imo sitwasyon kag ginahimo? Kon palangga mo si Jehova sa bug-os mo nga tagipusuon, indi mo paghunahunaon nga madedikar ka sa iya kag mapabawtismo bangod gusto mo lang nga malipay ang naga-Bible study sa imo ukon ang imo mga ginikanan, ukon bangod gusto mo lang nga ilugon ang imo mga abyan.

8. Kon nagapasalamat ka kay Jehova, paano ka mapalig-on sini nga idedikar ang imo kaugalingon sa iya? (Salmo 116:​12-14)

⁸ Kon hunahunaon mo ang tanan nga ginhimo ni Jehova para sa imo, magapasalamat ka sa iya kag mapalig-on ka nga idedikar ang imo kaugalingon sa iya. (Basaha ang Salmo 116:​12-14.) Suno sa Biblia, kay Jehova naghalin “ang tagsa ka maayo nga dulot kag tagsa ka himpit nga regalo.” (Sant. 1:17) Ang pinakadalayawon sa iya mga regalo amo ang halad-gawad sang iya Anak nga si Jesus. Ngaa? Bangod paagi sa halad-gawad, puede ka mangin suod kay Jehova. Kag ginhatagan ka niya sing paglaum nga mabuhi sing wala sing katapusan. (1 Juan 4:​9, 10, 19) Kon idedikar mo ang imo kaugalingon kay Jehova, mapakita mo nga ginapasalamatan mo sia sa pinakadaku nga ekspresyon sang gugma nga ginhimo niya kag sa tanan nga pagpakamaayo nga ginhatag niya sa imo. (Deut. 16:17; 2 Cor. 5:15) Ginabinagbinag ini sa leksion 46 punto 4, sang Magkabuhi sing Wala Katapusan! nga libro, nga may tatlo ka minuto nga video nga Ipresentar ang Imo mga Dulot sa Dios.

HANDA KA NA BALA NGA MAGDEDIKAR KAG MAGPABAWTISMO?

9. Kon parte sa pagdedikar sa Dios, ngaa indi mo dapat pag-ikumparar ang imo kaugalingon sa iban?

⁹ Posible ginapamensar mo nga indi ka pa handa nga magdedikar kag magpabawtismo. Posible nga may dapat ka pa himuon nga mga pagbag-o para matuman mo ang tanan nga kasuguan ni Jehova, ukon posible nga kinahanglan mo pa ang dugang nga tion para mapabakod mo ang imo pagtuo. (Col. 2:​6, 7) Indi palareho ang kadasigon sang pag-uswag sang mga Bible study, kag indi tanan nga pamatan-on handa na magdedikar kag magpabawtismo sa pareho nga edad. Gani hibalua kon ano ang mga dapat mo pauswagon. Dayon panikasugi nga mag-uswag suno sa imo ikasarang, kag indi mo dapat pag-ikumparar ang imo kaugalingon sa iban.​—Gal. 6:​4, 5.

10. Kon narealisar mo nga indi ka pa handa nga magdedikar kag magpabawtismo, ano ang puede mo himuon? (Tan-awa man ang kahon nga “ Para sa mga Pamatan-on nga Saksi ang mga Ginikanan.”)

¹⁰ Kon narealisar mo nga indi ka pa handa nga idedikar ang imo kaugalingon kay Jehova, padayon nga himua ini nga tulumuron. Mangamuyo kay Jehova nga buligan ka nga bag-uhon ang mga dapat mo bag-uhon. (Fil. 2:13; 3:16) Makasalig ka nga pamatian niya ang imo pangamuyo kag buligan ka niya.​—1 Juan 5:14.

KON NGAA NAGAALANG-ALANG ANG IBAN

11. Paano kita buligan ni Jehova para makapabilin kita nga matutom sa iya?

¹¹ May iban nga handa na kuntani nga magdedikar kag magpabawtismo, pero nagaalang-alang sila nga himuon ini. Posible nahadlok sila kay basi makahimo sila sang serioso nga sala pagkatapos nila magpabawtismo kag ma-disfellowship sila. Kon amo sini ang imo ginabatyag, makasalig ka nga hatagan ka ni Jehova sang tanan nga kinahanglan mo para ‘makalakat ka sing takus sa iya sa tuyo nga pahamut-an sia sing bug-os.’ (Col. 1:10) Hatagan ka man niya sang kusog nga himuon ang husto. Napamatud-an na niya nga masarangan niya ini nga himuon kay madamo na ang nabuligan niya. (1 Cor. 10:13) Amo ini ang isa ka rason kon ngaa diutay lang ang kinahanglan i-disfellowship sa Cristianong kongregasyon. Ginabuligan gid ni Jehova ang iya katawhan para makapabilin sila nga matutom sa iya.

12. Ano ang makabulig sa aton para indi kita makahimo sang serioso nga sala?

 ¹² Bilang indi perpekto nga mga tawo, ginasulay kita nga maghimo sing malain. (Sant. 1:14) Pero, ikaw ang makadesisyon kon ano ang himuon mo kon ginasulay ka. Ikaw ang may kontrol sa imo kabuhi. Ang iban nagasiling nga wala kita sing kontrol sa aton ginabatyag kag ginahimo. Pero indi ina matuod. Kay man, masarangan mo nga kontrolon ang sala nga mga handum. Gani bisan pa ginasulay ka nga maghimo sing malain, masarangan mo nga indi magpadala sa sini. May makabulig man sa imo para indi ka makahimo sing sala. Halimbawa, mangamuyo kay Jehova adlaw-adlaw. Tun-i sing maayo ang Pulong sang Dios. Mag-attend sa mga miting sang kongregasyon. Kag isugid sa iban ang imo mga ginapatihan. Kon himuon mo sing regular ini nga mga hilikuton, mapabakod ka sini nga tumanon ang imo ginpromisa kay Jehova sang nagdedikar ka sa iya. Kag indi pagkalimti nga buligan ka ni Jehova para matuman mo ang imo promisa.​—Gal. 5:16.

13. Ano ang ginhimo ni Jose nga isa ka maayo nga halimbawa para sa aton?

¹³ Kon nakadesisyon ka na nga daan kon ano ang himuon mo kon sulayon ka, mangin mahapos para sa imo nga magpabilin nga matutom kay Jehova. Madamo kita sing mabasa sa Biblia parte sa mga tawo nga naghimo sini bisan pa indi man sila perpekto. Halimbawa, sulitsulit nga ginsulay sang asawa ni Potifar si Jose. Pero nakadesisyon na nga daan si Jose. Ginasugiran kita sang Biblia nga ‘nangindi si Jose,’ kag nagsiling sia: “Paano ko mahimo ining daku nga kalainan kag magpakasala batok sa Dios?” (Gen. 39:​8-10) Maathag nga kabalo na nga daan si Jose kon ano ang himuon niya antes pa sia ginsulay sang asawa ni Potifar. Gani nangin mahapos para sa iya nga himuon ang husto sang ginsulay sia.

14. Ano ang himuon naton para malikawan naton nga makahimo sing sala kon sulayon kita?

¹⁴ Paano mo mailog si Jose? Subong pa lang, magdesisyon ka na nga daan kon ano ang himuon mo kon sulayon ka. Isikway dayon ang mga butang nga ginadumtan ni Jehova, kag indi gid pagpamensara ini nga mga butang. (Sal. 97:10; 119:165) Paagi sa sini, malikawan mo nga makahimo sing sala kon sulayon ka. Kay man, kabalo ka na nga daan kon ano ang imo himuon.

15. Paano mapakita sang isa ka tawo nga ‘hanuot niya nga ginapangita’ si Jehova? (Hebreo 11:6)

¹⁵ Posible nga kumbinsido ka na nga nakita mo na ang kamatuoran kag gusto mo nga alagaron si Jehova sa bug-os mo nga tagipusuon, pero nagaalang-alang ka gihapon nga magdedikar kag magpabawtismo. Puede mo himuon ang  ginhimo ni Hari David. Makitluoy kay Jehova: “O Dios ko, usisaa ako kag hibalua ang akon tagipusuon. Usisaa ako, kag hibalua ang akon nagakabalaka nga mga panghunahuna. Tan-awa kon bala may malaut ako nga panimuot, kag tuytuyi ako sa dalan nga wala sing katapusan.” (Sal. 139:​23, 24) Kon ipangamuyo mo ini kay Jehova, ginapakita mo nga hanuot mo sia nga ginapangita kay gusto mo magpabulig sa iya. Ginapakita mo man nga gusto mo magdedikar sa iya kag magpabawtismo. Buligan ka gid ni Jehova kay ginapakamaayo niya ang “mga hanuot nga nagapangita sa iya.”​—Basaha ang Hebreo 11:6.

PADAYON NGA MAGPALAPIT KAY JEHOVA

16-17. Paano ginabuyok ni Jehova ang mga pamatan-on nga Saksi ang mga ginikanan? (Juan 6:44)

¹⁶ Nagsiling si Jesus nga ginbuyok ni Jehova ang iya mga disipulo. (Basaha ang Juan 6:44.) Dalayawon gid ini nga kamatuoran. Hunahunaa ini: May nakita si Jehova nga maayo sa kada tawo nga ginabuyok niya. Ginakabig niya ang kada isa sa ila bilang iya “hamili nga katawhan,” ukon “hamili nga ginapanag-iyahan.” (Deut. 7:6; footnote) Gani amo man sini ang pagkabig ni Jehova sa imo.

¹⁷ Ano abi kon isa ikaw ka pamatan-on kag Saksi ang imo mga ginikanan? Posible mahunahuna mo nga nagaalagad ka lang kay Jehova bangod sa imo mga ginikanan kag indi bangod ginbuyok ka ni Jehova. Pero, wala ka ginatamod ni Jehova nga daw bahin ka lang sang isa ka grupo. Kay man, ginabuyok niya ang kada isa. Gani ginabuyok man niya ang mga pamatan-on nga Saksi ang mga ginikanan. Kag ang Biblia nagasiling: “Magpalapit kamo sa Dios, kag magapalapit sia sa inyo.” (Sant. 4:8; 1 Cron. 28:9) Gani kon panikasugan mo nga magpalapit kay Jehova, magapalapit sia sa imo.​—Ipaanggid ang 2 Tesalonica 2:13.

18. Ano ang binagbinagon naton sa masunod nga artikulo? (Salmo 40:8)

¹⁸ Kon idedikar mo ang imo kaugalingon kay Jehova kag magpabawtismo ka, ginailog mo ang panimuot ni Jesus. Kinabubut-on niya nga ginpresentar ang iya kaugalingon sa iya Amay para himuon ang bisan ano nga ipahimo sa iya. (Basaha ang Salmo 40:8; Heb. 10:7) Sa masunod nga artikulo, binagbinagon naton kon ano ang makabulig sa imo para padayon mo nga maalagad sing matutom si Jehova pagkatapos mo magpabawtismo.