1. Ano ang ginsiling ni Jesus parte sa mga bahandi sa langit?

INDI tanan nga bahandi makita. Ang matuod, indi makita ang pinakahamili nga mga bahandi. Sa iya Sermon sa Bukid, ginsiling ni Jesus nga ang mga bahandi sa langit mas labaw sangsa materyal nga mga butang pareho sang kuarta. Nagsiling pa sia: “Kon diin ang inyo bahandi, didto man ang inyo tagipusuon.” (Mat. 6:19-21) Kon ginapabaloran gid naton ang isa ka butang, tinguhaan gid naton nga matigayon ini. Nagatipon kita sang ‘mga bahandi sa langit’ kon maayo ang aton reputasyon ukon kaangtanan sa Dios. Suno kay Jesus, ini nga mga bahandi indi maguba ukon makawat.

2. (a) Suno sa ginsiling ni Pablo sa 2 Corinto 4:17, 18, diin kita dapat magpokus? (b) Ano ang binagbinagon naton sa sini nga artikulo?

² Ginpalig-on kita ni apostol Pablo nga ‘ituon ang aton mga mata sa mga butang nga indi makita.’ (Basaha ang 2 Corinto 4:17, 18.) Nalakip sa sini ang mga pagpakamaayo nga mabaton naton sa bag-o nga kalibutan sang Dios. Pero bisan subong pa lang makabenepisyo na kita sa indi makita nga mga regalo sang Dios. Binagbinagon naton sa sini nga artikulo ang apat sa sini: ang pagpakig-abyan sa Dios; ang pribilehiyo nga makapangamuyo; ang bulig sang balaan nga espiritu sang Dios; kag ang pagsakdag ni Jehova, ni Jesus, kag sang mga anghel sa aton ministeryo. Binagbinagon man naton kon paano naton mapabaloran ini nga mga regalo.

3. Ano ang pinakahamili nga regalo nga indi makita, kag ngaa posible nga mabaton naton ini?

³ Ang pagpakig-abyan kay Jehova nga Dios amo ang pinakahamili nga regalo nga indi makita. (Sal. 25:14) Pero paano mangin abyan sang balaan nga Dios ang makasasala nga mga tawo? Posible ini bangod ang halad-gawad ni Jesus “nagakuha sang sala” sang  katawhan. (Juan 1:29) Para maluwas ang katawhan, dapat mangin matutom si Jesus asta sa iya kamatayon. Nabal-an ni Jehova nga himuon gid ini ni Jesus, gani puede Niya mangin abyan ang mga tawo nga nagkabuhi antes mapatay ang Cristo.—Roma 3:25.

4. Maghatag sing halimbawa sang mga tawo nga nangin abyan sang Dios antes nag-abot si Jesus sa duta.

⁴ Binagbinagon naton ang pila ka tawo nga nangin abyan sang Dios antes nag-abot si Jesus sa duta. Mabakod gid ang pagtuo ni Abraham. Sobra 1,000 ka tuig sa tapos mapatay si Abraham, gintawag sia ni Jehova nga “akon abyan.” (Isa. 41:8) Gani ginakabig gihapon ni Jehova nga suod niya nga abyan bisan ang mga napatay na. Ginadumdom gid pirme ni Jehova si Abraham. (Luc. 20:37, 38) Ang isa pa ka halimbawa amo si Job. Sang nagtipon ang tanan nga anghel sa langit, ginpabugal ni Jehova si Job. Nagsiling si Jehova nga “matarong sia kag may integridad nga tawo. Nagakahadlok sia sa Dios kag nagalikaw sa malain.” (Job 1:6-8) Ang isa pa amo si Daniel. Nag-alagad sia sa Dios sing matutom sing mga 80 ka tuig sa lugar nga ang mga tawo wala nagasimba kay Jehova. Paano sia gintamod ni Jehova? Sang tigulang na si Daniel, tatlo ka beses nga ginpasalig sia sang mga anghel nga “hamili gid” sia sa Dios. (Dan. 9:23; 10:11, 19) Makasigurado kita nga gusto gid ni Jehova nga banhawon ang iya pinalangga nga mga abyan.—Job 14:15.

5. Ano ang dapat himuon para mangin suod nga abyan ni Jehova?

⁵ Subong, minilyon na ka tawo ang suod nga mga abyan ni Jehova. Makita sa paggawi sang madamo nga lalaki, babayi, kag kabataan sa bilog nga kalibutan nga mga abyan gid sila sang Dios. “Nagapakig-abyan [si Jehova] sing suod sa mga matarong.” (Hulu. 3:32) Nangin posible ini nga pag-abyanay bangod sang ila pagtuo sa halad-gawad ni Jesus. Bangod sa halad-gawad mahimo kita mangin abyan ni Jehova, kag makadedikar kita sa iya kag magpabawtismo. Kon himuon ini sang isa ka tawo, mangin kaupod niya ang minilyon ka Cristiano nga nagdedikar sa Dios kag nagpabawtismo. Suod sila nga mga abyan sang pinakagamhanan nga Persona sa uniberso!

6. Paano naton mapakita nga ginapabaloran naton ang aton pagpakig-abyan sa Dios?

⁶ Paano naton mapakita nga ginapabaloran naton ang aton pagpakig-abyan sa Dios? Pareho kay Abraham kag kay Job nga nangin matutom sa Dios sa sobra isa ka gatos ka tuig, dapat man kita mangin matutom bisan madugay na kita nga nagaalagad kay Jehova. Pareho kay Daniel, dapat mas pabaloran naton ang aton pagpakig-abyan sa Dios sangsa aton kabuhi. (Dan. 6:7, 10, 16, 22) Buligan kita ni Jehova nga mabatas ang bisan ano nga pagtilaw para indi maguba ang aton pagpakig-abyan sa iya.—Fil. 4:13.

7. (a) Suno sa Hulubaton 15:8, ano ang ginabatyag ni Jehova kon nagapangamuyo kita sa iya? (b) Paano ginasabat ni Jehova ang aton mga pangamuyo?

⁷ Ang isa pa ka regalo nga indi makita amo ang pangamuyo. Nanamian mag-istoryahanay ang mga suod nga mag-abyanay parte sa ila ginahunahuna kag ginabatyag. Pareho man sa sini ang aton pagpakig-abyan kay Jehova! Nagaistorya si Jehova sa aton paagi sa iya Pulong, gani mabal-an naton ang iya ginahunahuna kag ginabatyag. Makaistorya naman kita sa iya paagi sa pangamuyo, kag masugid naton sa iya kon ano gid ang aton ginahunahuna kag ginabatyag. Nalipay si Jehova mamati sa aton mga pangamuyo. (Basaha ang Hulubaton 15:8.) Mahigugmaon gid nga Abyan si Jehova, kay ginapamatian niya kag ginasabat ang aton mga pangamuyo. Kon kaisa, ginasabat dayon ang aton mga pangamuyo. Kag kon kaisa naman, mahimo nga kinahanglan naton mangamuyo sing madamo nga beses. Pero makasalig kita nga ang iya sabat amo gid ang pinakamaayo para sa aton, kag sabton niya ini  sa husto gid nga tion. Gani mahimo nga ang sabat sang Dios lain sangsa aton ginapaabot. Halimbawa, sa baylo nga dulaon ang pagtilaw, mahimo hatagan niya kita sang kaalam kag kusog ‘agod mabatas naton ini.’—1 Cor. 10:13.

8. Paano naton mapakita nga ginapabaloran naton ang pribilehiyo nga makapangamuyo?

⁸ Paano naton mapakita nga ginapabaloran naton ang hamili nga pribilehiyo nga makapangamuyo? Ang isa ka paagi amo ang pagsunod sa laygay sang Biblia nga ‘padayon nga magpangamuyo.’ (1 Tes. 5:17) Wala kita ginapilit ni Jehova nga mangamuyo. Sa baylo, gusto niya nga himuon naton ini sing kinabubut-on, kag ginpalig-on niya kita nga ‘magpadayon sa pagpangamuyo.’ (Roma 12:12) Gani mapakita naton nga ginapabaloran naton ini paagi sa pagpangamuyo sing madamo nga beses kada adlaw. Dapat naton ilakip sa aton pangamuyo ang pagpasalamat kag pagdayaw kay Jehova.—Sal. 145:2, 3.

9. Ano ang ginsiling sang isa ka brother parte sa pangamuyo, kag ano ang masiling mo parte sa sini?

⁹ Kon madugay na kita nga nagaalagad kay Jehova kag naeksperiensiahan naton nga ginsabat niya ang aton madamo nga pangamuyo, mas pabaloran pa gid naton ini nga pribilehiyo. Amo ini ang nabatyagan ni Chris nga 47 ka tuig na nga nagaalagad sing bug-os tion. “Gusto ko gid magbugtaw sing aga pa para makapangamuyo ako dayon kay Jehova,” siling niya. “Kanami gid sang akon pamatyag nga makaistorya kay Jehova samtang nagabutlak ang adlaw kag makita ko ang matahom nga palibot! Bangod sini, gusto ko gid sia pasalamatan sa tanan niya nga regalo, pati na ang pribilehiyo nga makapangamuyo. Pagkagab-i, pagkatapos ko mangamuyo antes magtulog, matawhay gid ang akon hunahuna.”

10. Ngaa dapat naton pabaloran ang balaan nga espiritu sang Dios?

¹⁰ Ang isa pa ka regalo nga indi makita nga dapat naton pabaloran amo ang balaan nga espiritu sang Dios. Ginpalig-on kita ni Jesus nga padayon nga magpangamuyo sang balaan nga espiritu. (Luc. 11:9, 13) Ginagamit ni Jehova ang iya balaan nga espiritu para hatagan kita sang “gahom nga labaw sa kinaandan.” (2 Cor.  4:7; Binu. 1:8) Buligan kita sang balaan nga espiritu sang Dios nga mabatas ang bisan ano nga pagtilaw.

11. Paano kita ginabuligan sang balaan nga espiritu?

¹¹ Mapauswag sang balaan nga espiritu ang aton mga talento kag mga ikasarang para mahimo naton ang aton mga asaynment kag mga responsibilidad sa pag-alagad sa Dios. Ang bulig sang balaan nga espiritu amo ang nagpaposible nga mangin maayo ang resulta sang aton pag-alagad, indi ang aton ikasarang.

12. Suno sa Salmo 139:23, 24, ano nga sahi sang bulig sang balaan nga espiritu ang ipangamuyo naton?

¹² Mapakita naton nga ginapabaloran naton ang balaan nga espiritu sang Dios paagi sa pagpangamuyo nga buligan kita sini nga mabal-an ang aton indi husto nga mga panghunahuna ukon mga handum. (Basaha ang Salmo 139:23, 24.) Kon ipangamuyo naton ini, gamiton ni Jehova ang iya balaan nga espiritu para mabal-an naton ang aton indi husto nga mga panghunahuna ukon mga handum. Kag kon mabal-an na naton ini, mangamuyo kita nga hatagan kita sang balaan nga espiritu sang kusog para madula ini nga mga panghunahuna ukon mga handum. Kon himuon naton ini, makita ni Jehova nga gusto naton himuon ang aton bug-os nga masarangan, gani indi sia mag-untat sa pagbulig sa aton paagi sa iya balaan nga espiritu.—Efe. 4:30.

13. Ano ang himuon naton para mas pabaloran pa gid naton ang balaan nga espiritu?

¹³ Mas pabaloran pa gid naton ang balaan nga espiritu kon hunahunaon naton kon ano ang ginahimo sini sa aton tion subong. Antes nagpalangit si Jesus, ginsilingan niya ang iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo . . . tubtob sa pinakamalayo nga bahin sang duta.” (Binu. 1:8) Amo gid sini ang nagakatabo subong. Paagi sa bulig sang balaan nga espiritu, mga walo ka milyon kag tunga na ang nagasimba kay Jehova sa bilog nga kalibutan. Bilang katawhan sang Dios, nahiusa man kita kay ginabuligan kita sang balaan nga espiritu nga mapakita ang matahom nga mga kinaiya pareho sang gugma, kalipay, paghidait, pagkamapinasensiahon, maayo nga kabubut-on,  kaayo, pagtuo, kalulo, kag pagpugong sa kaugalingon. Ini nga mga kinaiya “ginapatubas sang espiritu.” (Gal. 5:22, 23) Hamili gid nga regalo ang balaan nga espiritu!

14. Sin-o ang nagabulig sa aton kon nagabantala kita kag nagatudlo sa iban?

¹⁴ Ang ‘pagpangabudlay’ upod kay Jehova, kay Jesus, kag sa mga anghel isa ka hamili nga regalo nga indi makita. (2 Cor. 6:1) Ginahimo naton ini sa kada tion nga nagabantala kita kag nagatudlo sa iban. Gintawag ni Pablo ang iya kaugalingon kag ang mga nagahimo sini nga hilikuton nga “masigkamanugpangabudlay sang Dios.” (1 Cor. 3:9) Kon nagabantala kita kag nagatudlo sa iban, nagapangabudlay man kita upod kay Jesus. Kay man, pagkatapos niya ginsugo ang iya mga sumulunod nga ‘tudluan ang mga tawo sa tanan nga pungsod agod mangin disipulo,’ nagsiling sia: “Kaupod ninyo ako.” (Mat. 28:19, 20) Paano naman kita nagapangabudlay upod sa mga anghel? Nagapasalamat kita nga ginatuytuyan kita sang mga anghel sa aton pagbantala sang “wala sing katapusan nga maayong balita sa mga nagaistar sa duta”!—Bug. 14:6.

15. Maghatag sing halimbawa sa Biblia nga nagapakita nga importante ang ginahimo ni Jehova sa aton ministeryo.

¹⁵ Ano ang nahimo naton bangod ginbuligan kita ni Jehova, ni Jesus, kag sang mga anghel? Samtang nagasab-ug kita sang mensahe sang Ginharian, ang pila ka binhi nagtupa sa maayo nga duta ukon tagipusuon kag nagtubo ini. (Mat. 13:18, 23) Sin-o ang nagapatubo sini nga mga binhi sang kamatuoran para magpamunga sa ulihi? Nagsiling si Jesus nga kon indi “pagbuyukon sang Amay” ang isa ka tawo, indi niya mangin disipulo ini nga tawo. (Juan 6:44) Mabasa sa Biblia ang isa ka halimbawa. Sang nagbantala si Pablo sa mga babayi sa gua sang siudad sang Filipos, amo ini ang ginsiling sang Biblia parte kay Lidia nga isa sa ila: “Ginbuksan ni Jehova ang iya tagipusuon agod batunon niya ang mga ginahambal ni Pablo.” (Binu. 16:13-15) Pareho kay Lidia, minilyon pa ka tawo ang ginbuyok ni Jehova.

16. Sin-o gid ang dapat padunggan sa maayo nga resulta sang aton pagministeryo?

¹⁶ Sin-o gid ang dapat padunggan sa maayo nga resulta sang aton pagministeryo? Ginsabat ini ni Pablo. Sang nagsulat sia sa kongregasyon sa Corinto, nagsiling sia: “Ako ang nagtanom, si Apolos ang nagbunyag, apang ang Dios amo ang nagapatubo sini. Gani indi ang nagatanom ukon ang nagabunyag ang padunggan, kundi ang Dios nga nagapatubo sini.” (1 Cor. 3:6, 7) Pareho kay Pablo, dapat pirme naton padunggan si Jehova sa tanan nga maayo nga resulta sang aton pagministeryo.

17. Paano naton mapakita nga ginapabaloran naton ang pribilehiyo nga ‘makapangabudlay’ upod sa Dios, sa Cristo, kag sa mga anghel?

¹⁷ Paano naton mapakita nga ginapabaloran naton ang pribilehiyo nga ‘makapangabudlay’ upod sa Dios, sa Cristo, kag sa mga anghel? Mahimo naton ini paagi sa mapisan nga pagbantala sang maayong balita sa iban. Madamo sing paagi nga mahimo naton ini, pareho sang pagpanaksi “sing dayag kag sa mga balay.” (Binu. 20:20) Madamo man ang nanamian nga magpanaksi sing indi pormal. Ginahimo nila ini paagi sa mainabyanon nga pagtamyaw sa indi nila kilala para makasugod sang pag-istoryahanay. Kon mag-istorya ang tawo, nagapangita sila sang paagi para masugid ang mensahe sang Ginharian.

18-19. (a) Paano naton ginabunyagan ang binhi sang kamatuoran? (b) Magsugid sing eksperiensia kon paano ginbuligan ni Jehova ang isa nga nagatuon sing Biblia.

¹⁸ Bilang “mga masigkamanugpangabudlay sang Dios,” indi lang pagtanom sang binhi sang kamatuoran ang dapat naton himuon. Dapat man naton ini bunyagan. Kon interesado ang  aton naistorya, tinguhaan naton nga balikan sia para masugdan ang pagtuon sing Biblia, ukon pangabayon ang iban nga himuon ini. Nalipay kita nga makita nga ginabuligan ni Jehova ang mga nagatuon sing Biblia nga magbag-o.

¹⁹ Binagbinaga ang halimbawa ni Raphalalani nga isa ka siruhano sa South Africa. Nanamian gid sia sa iya mga natun-an sa Biblia. Pero nabudlayan gid sia nga sundon ang ginasiling sang Pulong sang Dios nga indi dapat makig-istorya sa napatay na nga mga katigulangan. (Deut. 18:10-12) Nagpabulig sia sa Dios nga amat-amat nga bag-uhon ang iya hunahuna. Sang ulihi, gin-untatan niya ang iya ginahimo bilang siruhano, bisan pa amo lang ini ang iya palangabuhian. Subong, 60 anyos na si Raphalalani. Nagsiling sia: “Daku gid ang akon pasalamatan sa mga Saksi ni Jehova. Madamo sila sing ginbulig sa akon, pareho sang pagbulig nila sa akon nga makakita sang obra. Labaw sa tanan, nagapasalamat ako kay Jehova kay ginbuligan niya ako nga bag-uhon ang akon kabuhi. Subong, isa na ako ka bawtismado nga Saksi kag nalipay gid ako magbantala.”

20. Ano ang dapat mo himuon?

²⁰ Ginbinagbinag naton sa sini nga artikulo ang apat ka regalo nga indi makita. Ang pinakahamili sa sini amo ang pribilehiyo nga mangin suod nga Abyan si Jehova. Kon suod naton nga Abyan si Jehova, makapalapit kita sa iya paagi sa pangamuyo, maeksperiensiahan naton ang bulig sang balaan nga espiritu, kag sakdagon niya kita, ni Jesus, kag sang mga anghel sa aton ministeryo. Kabay pa nga pirme naton pabaloran ini nga mga regalo. Kag kabay pa nga pirme naton pasalamatan si Jehova kay maayo gid sia nga Abyan.