1-2. Ano ang ginsiling sang isa ka manunulat, kag ano ang binagbinagon naton sa sini nga artikulo?

MINILYON ka tawo subong ang nagasiling nga nagapati sila kay Jesus, pero wala nila ginasunod ang iya mga gintudlo. (2 Tim. 4:3, 4) Ang isa ka manunulat nagsiling: “Ibutang ta nga may isa ka tawo subong nga pareho gid kay Jesus kag pareho man sa mga gintudlo ni Jesus ang iya ginatudlo . . . , isikway man bala naton sia pareho sa ginhimo kay Jesus mga duha ka libo ka tuig na ang nagligad? . . . Ginapakita sang ginahimo kag pamatasan sang kalabanan nga tawo subong nga huo ang sabat.”

² Sang ari si Jesus sa duta, madamo nga tawo ang nakabati sa mga gintudlo ni Jesus kag nakita nila ang mga milagro nga iya ginhimo, pero wala sila nagtuo sa iya. Ngaa? Sa nagligad nga artikulo, ginbinagbinag naton ang apat ka rason kon ngaa ginsikway sang mga tawo si Jesus. Binagbinagon naton ang apat pa ka rason. Hibaluon man naton kon ngaa ginasikway sang mga tawo ang mga sumulunod ni Jesus subong kag kon ano ang dapat naton himuon para indi kita mag-untat sa pag-alagad kay Jehova.

3. Ngaa ginsikway sang pila ka tawo si Jesus?

³ Sang ari si Jesus sa duta, nakig-upod sia sa tanan nga klase sang tawo. Nagkaon sia upod sa mga manggaranon kag kilala nga mga tawo, pero pirme man sia nagapakig-upod sa mga imol kag makaluluoy. Isa pa, naluoy gid sia sa mga tawo nga ginakabig sang iban nga “makasasala.” Bangod sini, ginsikway si Jesus sang bugalon nga mga tawo. Ginpamangkot nila ang mga disipulo ni Jesus: “Ngaa nagakaon kamo kag nagainom upod sa mga manugsukot  sing buhis kag mga makasasala?” Nagsabat si Jesus sa ila: “Ang mga mapagros wala nagakinahanglan sing manugbulong, kundi ang mga masakiton. Wala ako nagkari sa pagtawag sa mga matarong, kundi sa mga makasasala agod maghinulsol sila.”—Luc. 5:29-32.

4. Suno kay manalagna Isaias, ano ang himuon sang mga tawo sa Mesias?

⁴ Ano ang ginasiling sang Biblia? Antes pa mag-abot ang Mesias, madugay na nga gintagna ni Isaias nga indi sia pagbatunon sang mga tawo. Ini nga tagna nagasiling: “Gintamay sia kag ginlikawan sang mga tawo . . . Gintalikdan namon sia agod indi namon makita ang iya nawong. Gintamay sia, kag ginkabig namon nga wala sing kabilinggan.” (Isa. 53:3) Ang tagna nagsiling nga likawan “sang mga tawo” ang Mesias, gani wala na kuntani matingala ang mga Judiyo sang unang siglo kon ngaa ginsikway si Jesus.

5. Ano ang pagtan-aw sang madamo nga tawo subong sa mga sumulunod ni Jesus?

⁵ Nagakatabo man bala ini subong? Huo. Nalipay gid ang madamo nga lider sang relihion kon mag-entra sa ila relihion ang kilala nga mga tawo, mga manggaranon, kag ang mga maalam suno sa pagtan-aw sang mga tawo. Ginabaton nila ini nga mga tawo bisan pa ang ginahimo sining bag-o nila nga mga miembro nagapaakig kay Jehova. Pero, ginapakanubo sining mga lider sang relihion ang mapisan kag matinlo nga mga alagad ni Jehova kay para sa kalabanan nga tawo, indi sila importante. Suno sa ginsiling ni Pablo, ginpili sang Dios ang mga “talamayon.” (1 Cor. 1:26-29) Pero, ginapabaloran gid ni Jehova ang tanan niya nga matutom nga alagad.

6. Ano ang ginsiling ni Jesus sa Mateo 11:25, 26, kag paano naton sia mailog?

⁶ Ano ang makabulig sa aton para indi magluya ang aton pagtuo? (Basaha ang Mateo 11:25, 26.) Indi pag-iluga ang pagtan-aw sang mga tawo parte sa katawhan sang Dios. Dapat ka mangin kumbinsido nga ginagamit ni Jehova ang mapainubuson nga mga tawo para himuon ang iya kabubut-on. (Sal. 138:6) Para sa kalabanan nga tawo sa kalibutan, indi maalam ang mga alagad ni Jehova. Pero pamalandungi ang madamo nga nahimo ni Jehova paagi sa iya mga alagad.

7. Ngaa gintawag ni Jesus nga mga salimpapaw ang mga Fariseo, kag ano ang ila reaksion?

⁷ Maisog nga ginpakamalaut ni Jesus ang mga lider sang relihion sadto bangod wala nila gintudluan ang mga tawo sang husto nga paagi sang pagsimba kay Jehova. Halimbawa, ginsilingan ni Jesus ang mga Fariseo nga mga salimpapaw kay mas importante pa sa ila ang pagpanghinaw sang ila mga kamot sangsa pag-atipan sa ila mga ginikanan. (Mat. 15:1-11) Mahimo nga nakibot ang mga disipulo ni Jesus sa iya mga ginsiling. Gani ginpamangkot nila sia: “Nakahibalo ka bala nga nasandad ang mga Fariseo sa imo ginsiling?” Nagsabat si Jesus: “Ang tanom nga wala gintanom sang akon langitnon nga Amay gabuton. Pabay-i ninyo sila. Mga bulag sila nga mga manugtuytoy. Kon ang bulag magtuytoy sa isa pa ka bulag, pareho sila nga mahulog sa buho.” (Mat. 15:12-14) Bisan pa naakig ang mga lider sang relihion bangod sa ginsiling ni Jesus, wala sia napunggan nga isugid ang kamatuoran.

8. Paano ginpakita ni Jesus nga indi tanan nga panudlo sang mga relihion ginabaton sang Dios?

⁸ Ginbuyagyag man ni Jesus ang sala nga mga panudlo sang mga relihion. Wala sia nagsiling nga ginabaton sang Dios ang tanan nga ginatudlo sang mga relihion. Sa baylo, ginpaathag niya nga madamo nga tawo ang nagalakat sa malapad nga dalan nga nagapadulong sa kalaglagan, kag diutay lang ang magalakat sa mabudlay nga dalan nga nagapadulong sa kabuhi. (Mat. 7:13, 14) Ginpakita ni Jesus nga ang pila ka tawo magasiling nga nagaalagad sila sa Dios, pero ang matuod wala sila nagaalagad sa iya. Nagpaandam sia: “Mag-andam kamo sa butig nga mga manalagna  nga nagapalapit sa inyo kag nagapakunokuno nga mga karnero, apang ang matuod mabangis gali sila nga mga lobo. Makilala ninyo sila sa ila mga bunga.”—Mat. 7:15-20.

9. Ano ang pila ka sala nga panudlo nga ginbuyagyag ni Jesus?

⁹ Ano ang ginasiling sang Biblia? Gintagna sang Biblia nga magadabdab sa sulod sang Mesias ang kakugi sa balay ni Jehova. (Sal. 69:9; Juan 2:14-17) Bangod sang kakugi ni Jesus, ginbuyagyag niya ang sala nga mga panudlo sang relihion kag ang ila mga ginahimo. Halimbawa, nagapati ang mga Fariseo nga ang kalag indi mapatay, pero gintudlo ni Jesus nga ang patay pareho lang sa isa ka tawo nga nagakatulog nga wala sing pangalibutan. (Juan 11:11) Ang mga Saduceo wala nagapati sa pagkabanhaw, pero ginbanhaw ni Jesus ang iya abyan nga si Lazaro. (Juan 11:43, 44; Binu. 23:8) Gintudlo sang mga Fariseo nga pagbuot sang Dios ang tanan nga nagakatabo sa aton, kag ginpat-od na niya kon ano ang matabo sa aton kabuhi kag indi na naton ini mabag-o. Pero gintudlo ni Jesus nga ang mga tawo makadesisyon kon bala maalagad sila sa Dios ukon indi.—Mat. 11:28.

10. Ngaa madamo subong ang wala nagapamati sa aton bangod sang aton mga panudlo?

¹⁰ Nagakatabo man bala ini subong? Huo. Madamo subong ang wala nagapamati sa aton bangod ginagamit naton ang Biblia para ipakita ang pila ka sala nga panudlo sang mga relihion. Ginatudluan sang mga lider sang relihion ang ila mga sumulunod nga ginasilutan sang Dios ang malain nga mga tawo sa impierno. Ginatudlo sang mga lider sang relihion ining sala nga panudlo para pahugon ang mga tawo nga magsunod sa ila. Pero ginasugid naton sa mga tawo nga sala ini nga panudlo bangod kabalo kita nga si Jehova isa ka mahigugmaon nga Dios. Ginatudlo man sang mga lider sang relihion nga ang kalag indi mapatay. Kon matuod ini nga panudlo, indi na kinahanglan ang pagkabanhaw. Pero ginpamatud-an naton nga ini nga panudlo wala nabase sa Biblia. Kag bisan pa ginatudlo sang madamo nga relihion nga nasulat na sang Dios ang aton kapalaran, ginatudlo naton nga ang mga tawo may kahilwayan sa pagdesisyon kon bala maalagad sila sa Dios ukon indi. Ano ang reaksion sang mga lider sang relihion? Sa masami, grabe gid ang ila kaakig.

11. Suno sa ginsiling ni Jesus sa Juan 8:45-47, ano ang gusto sang Dios nga himuon sang iya katawhan?

 ¹¹ Ano ang makabulig sa aton para indi magluya ang aton pagtuo? Kon ginahigugma naton ang kamatuoran, dapat naton patihan kag tumanon ang ginahambal sang Dios. (Basaha ang Juan 8:45-47.) Indi pareho kay Satanas nga Yawa, ginapabaloran naton ang kamatuoran. Wala naton ginahimo ang bisan ano nga wala nabase sa Biblia. (Juan 8:44) Ginsilingan sang Dios ang iya katawhan nga ‘kangil-aran nila ang malaut’ kag ‘magpanguyapot sing malig-on sa maayo,’ pareho sa ginhimo ni Jesus.—Roma 12:9; Heb. 1:9.

12. Ngaa ang paagi sa pagpatay kay Jesus nangin rason para isikway sia sang madamo nga Judiyo?

¹² Ano ang isa pa ka rason kon ngaa ginsikway sang pila ka Judiyo si Jesus? Si Pablo nagsiling: “Ginabantala naton ang Cristo nga ginpatay sa usok, nga para sa mga Judiyo kasandaran.” (1 Cor. 1:23) Ngaa ginsikway sang madamo nga Judiyo si Jesus sang ginpatay sia sa usok sang pag-antos? Para sa ila, isa sia ka kriminal kag makasasala, gani indi sia ang Mesias.—Deut. 21:22, 23.

13. Ano ang wala nahangpan sang mga nagsikway kay Jesus?

¹³ Wala nahangpan sang mga Judiyo nga nagsikway kay Jesus nga wala sia sing sala, nga ginhimuhimuan sia sing istorya, kag indi husto ang ginhimo sa iya. Sang gin-asikaso sang mga hukom ang akusasyon kay Jesus, wala sila nagpakita sang hustisya. Dalidali nga nagtipon ang mga hukom sang pinakamataas nga korte sang mga Judiyo para hukman si Jesus, kag wala nila ginsunod ang mga pagsulundan parte sa pagpamati sang kaso. (Luc. 22:54; Juan 18:24) Indi patas ang mga hukom sa pagpamati sang mga akusasyon kag mga ebidensia batok kay Jesus, kag gintinguhaan nila nga magpangita “sing butig nga panumbungon batok kay Jesus agod mapapatay sia.” Kag sang wala sila sing nakita, gintinguhaan sang mataas nga saserdote nga akusahan si Jesus base sa iya ihambal. Suno sa kasuguan, indi gid ini dapat himuon. (Mat. 26:59; Mar. 14:55-64) Kag pagkatapos mabanhaw si Jesus, ginbayaran sining indi matarong nga mga hukom “sing madamo nga pilak” ang mga soldado sang  Roma nga nagabantay sang iya lulubngan para magpalapta sang butig nga istorya kon ngaa wala na sing unod ang lulubngan.—Mat. 28:11-15.

14. Ano ang gintagna sang Kasulatan parte sa kamatayon sang Mesias?

¹⁴ Ano ang ginasiling sang Biblia? Wala ginapaabot sang madamo nga Judiyo sang panahon ni Jesus nga kinahanglan mapatay ang Mesias, pero talupangda ang gintagna sang Kasulatan: “Ginhatag niya ang iya kabuhi tubtob sa kamatayon kag ginkabig sia nga isa ka makasasala; gindala niya ang sala sang madamo nga tawo, kag nangin manugpatunga sia para sa mga makasasala.” (Isa. 53:12) Gani bisan pa gin-akusahan si Jesus kag ginpatay, indi sia dapat pag-isikway sang mga Judiyo.

15. Ano ang mga panumbungon batok sa mga Saksi ni Jehova?

¹⁵ Nagakatabo man bala ini subong? Huo. Ginhimuhimuan si Jesus sing istorya kag ginsentensiahan nga nakasala, kag amo man sini subong ang ginahimo sa mga Saksi ni Jehova. Talupangda ang pila ka halimbawa. Sa United States, sugod sang 1930 asta sang 1950, madamo nga beses nga ginpangapinan naton sa korte ang aton kahilwayan sa pagsimba sa Dios. Ang pila ka huwes indi patas sa aton. Sa Quebec, Canada, ang mga Katoliko kag ang Gobierno nagbuligay para pauntaton ang aton hilikuton. Madamo nga manugbantala ang napriso bangod lang ginsugid nila sa mga tawo ang parte sa Ginharian sang Dios. Sa Germany, madamo nga matutom nga pamatan-on nga kauturan ang ginpatay sang gobierno sang Nazi. Kag sining nagligad lang nga mga tinuig, madamo nga kauturan sa Russia ang ginsentensiahan nga nakasala kag ginpriso. Suno sa mga awtoridad, “kontra sa gobierno” ang ila pag-istorya sa iban parte sa Biblia. Bisan ang New World Translation of the Holy Scriptures sa Russian nga lenguahe gindumilian man. Nagaunod kuno ini sang mga impormasyon nga “kontra sa gobierno” bangod mabasa sa sini ang ngalan nga Jehova.

16. Suno sa 1 Juan 4:1, ngaa indi naton dapat pagpatihan ang indi matuod nga mga istorya parte sa katawhan ni Jehova?

¹⁶ Ano ang makabulig sa aton para indi magluya ang aton pagtuo? Hibalua kon ano gid ang matuod. Sa iya Sermon sa Bukid, ginpaandaman ni Jesus ang iya mga tagpalamati nga ‘butangbutangan sila sang iban sang tanan nga sahi sang kalautan.’ (Mat. 5:11) Ini nga mga kabutigan naghalin kay Satanas. Ginaimpluwensiahan niya ang mga nagapamatok sa aton. Gusto niya nga magpalapta sila sing mga kabutigan parte sa mga nagapabalor sang kamatuoran. (Bug. 12:9, 10) Indi naton dapat pagpatihan ang mga kabutigan nga ginapalapta sang aton mga kaaway. Indi ini dapat magpauntat sa aton sa pag-alagad sa Dios ukon magpaluya sang aton pagtuo.—Basaha ang 1 Juan 4:1.

17. Ano ang natabo antes napatay si Jesus nga nangin rason nga ginsikway sia sang pila ka tawo?

¹⁷ Antes napatay si Jesus, ginluiban sia sang isa sa iya 12 ka apostoles. Ginpanghiwala man sia sang isa pa niya ka apostol sing tatlo ka beses. Kag sang gab-i antes sia napatay, ginbiyaan sia sang tanan niya nga apostoles. (Mat. 26:14-16, 47, 56, 75) Wala na natingala si Jesus sa sini kay gintagna pa gani niya nga matabo ini sa iya. (Juan 6:64; 13:21, 26, 38; 16:32) Sang natabo ini, ang iban mahimo nga nagdesisyon nga indi nila luyag nga mangin disipulo niya. Mahimo nagpamensar sila, ‘Kon amo ina ang ginahimo sang mga apostoles ni Jesus, indi ko gusto mag-upod sa ila.’

18. Ano nga mga tagna ang natuman antes napatay si Jesus?

¹⁸ Ano ang ginasiling sang Biblia? Ginatos ka tuig antes nag-abot si Jesus sa duta, gintagna ni Jehova sa iya Pulong nga ang Mesias luiban kabaylo sang 30 ka bilog nga pilak. (Zac. 11:12, 13) Isa sa suod nga mga abyan ni Jesus amo ang magaluib sa iya. (Sal. 41:9) Si manalagna Zacarias nagsulat man: “Patya ang manugbantay, kag paalaplaaga  ang panong.” (Zac. 13:7) Sang natuman ini nga mga tagna kay Jesus, wala ginsikway sang sinsero nga mga tawo si Jesus. Sa baylo, napalig-on ang ila pagtuo.

19. Ano ang nahangpan sang sinsero nga mga tawo?

¹⁹ Nagakatabo man bala ini subong? Huo. Sa aton tion subong, may pila ka kilala nga mga Saksi nga nag-untat sa pag-alagad kay Jehova kag nangin apostata, kag ginaimpluwensiahan nila ang iban nga mag-upod sa ila. Nagapalapta sila sang indi maayo nga mga report, indi matuod nga mga istorya, kag mga kabutigan parte sa mga Saksi ni Jehova sa newspaper, sa radyo, sa TV, kag sa Internet. Pero wala nila napapati ang sinsero nga mga tawo. Sa baylo, nahangpan nila nga gintagna sang Biblia nga matabo ini.—Mat. 24:24; 2 Ped. 2:18-22.

20. Ano ang himuon naton para indi kita magpati sa mga nag-untat sa pag-alagad kay Jehova? (2 Timoteo 4:4, 5)

²⁰ Ano ang makabulig sa aton para indi magluya ang aton pagtuo? Dapat naton pabakuron ang aton pagtuo paagi sa regular nga pagtuon, pagpangamuyo pirme, kag paghimo sang aton bug-os nga masarangan sa hilikuton nga ginsugo ni Jehova. (Basaha ang 2 Timoteo 4:4, 5.) Kon may pagtuo kita, indi gid kita mabalaka kon may mabatian kita nga indi maayo nga mga report parte sa mga Saksi ni Jehova. (Isa. 28:16) Kon ginahigugma naton si Jehova kag ang aton mga kauturan kag ginapabaloran naton ang iya Pulong, indi gid kita magpati sa mga nag-untat sa pag-alagad kay Jehova.

21. Bisan pa ang kalabanan nga tawo subong wala nagapamati sa aton mensahe, sa ano kita makasigurado?

²¹ Sang unang siglo, madamo ang nagsikway kay Jesus. Pero madamo man ang nagbaton sa iya. Nalakip sa ila ang isa ka miembro sang Sanhedrin sang mga Judiyo kag ang ‘madamo nga saserdote.’ (Binu. 6:7; Mat. 27:57-60; Mar. 15:43) Subong, minilyon ka tawo ang nagsunod kay Jesus. Ngaa? Bangod nabal-an nila ang mga kamatuoran sa Kasulatan kag ginapabaloran gid nila ini. Ang Pulong sang Dios nagasiling: “May daku nga paghidait ang mga tawo nga nagahigugma sang imo kasuguan; wala sing makapasandad sa ila.”—Sal. 119:165.