TULUN-AN NGA ARTIKULO 47
Ang mga Leksion nga Matun-an Naton sa Libro sang Levitico
“Ang pagsulat sa bug-os nga Kasulatan gintuytuyan sang Dios kag mapuslanon.”—2 TIM. 3:16.
AMBAHANON 98 Ang Kasulatan—Gintuytuyan sang Dios
ANG BINAGBINAGON SA SINI NGA ARTIKULO *
1-2. Ngaa dapat mangin interesado sa libro sang Levitico ang mga Cristiano subong?
GINPAHANUMDOM ni apostol Pablo sa iya lamharon nga abyan nga si Timoteo nga “ang pagsulat sa bug-os nga Kasulatan gintuytuyan sang Dios kag mapuslanon” ini. (2 Tim. 3:16) Lakip sa sini ang libro sang Levitico. Ano ang masiling mo sa sini nga libro sang Biblia? Ang iban nagasiling nga isa lang ini ka libro nga nagaunod sang listahan sang mga pagsulundan nga indi na mapuslanon subong. Pero indi amo sini ang pagtamod sang matuod nga mga Cristiano.
2 Ginsulat ang Levitico mga 3,500 ka tuig na ang nagligad, pero gintipigan ini ni Jehova para “sa pagtudlo sa aton.” (Roma 15:4) Ginabuligan kita sang Levitico nga mahangpan ang panghunahuna kag balatyagon ni Jehova parte sa pila ka butang. Gani dapat interesado kita nga tun-an ini. May madamo nga leksion kita nga matun-an sa sining libro sang Biblia. Binagbinagon naton ang apat sa sini.
KON PAANO NATON MAPAHAMUT-AN SI JEHOVA
3. Ngaa may ginahalad nga mga sapat sa Adlaw sang Pagtumbas Para sa Sala kada tuig?
3 Una nga leksion: Dapat ginakahamut-an kita ni Jehova para batunon niya ang aton mga halad. Kada tuig sa Adlaw sang Pagtumbas Para sa Sala, nagatipon ang pungsod sang Israel kag nagahalad sang mga sapat ang mataas nga saserdote. Ini nga mga halad nagapahanumdom sa mga Israelinhon nga kinahanglan matinluan sila sa ila mga sala! Pero, antes dalhon sang mataas nga saserdote sa Labing Balaan ang dugo sang mga sapat nga ginhalad, kinahanglan niya anay himuon ang isa ka butang nga mas importante sangsa pagpatawad sa pungsod sang ila mga sala.
(Tan-awa ang parapo 4) *
4. Suno sa Levitico 16:12, 13, ano ang ginhimo sang mataas nga saserdote sa una niya nga pagsulod sa Labing Balaan sa Adlaw sang Pagtumbas Para sa Sala? (Tan-awa ang piktyur sa kober.)
4 Basaha ang Levitico 16:12, 13. Imadyina kon ano ang ginahimo sa Adlaw sang Pagtumbas Para sa Sala: Masulod ang mataas nga saserdote sa tabernakulo. Amo ini ang una sa tatlo ka beses nga kinahanglan niya magsulod sa Labing Balaan sa sina nga adlaw. Ginauyatan niya sa isa ka kamot ang suludlan nga puno sang mahamot nga incienso, kag sa isa naman ka kamot ang bulawan nga incensario nga puno sing baga. Nagpundo sia sing makadali sa atubangan sang kurtina nga nagatabon sa Labing Balaan. Dayon nagsulod sia sa Labing Balaan nga may tudok nga pagtahod kag nagtindog sa atubangan sang kaban sang katipan. Sa malaragwayon nga paagi, nagatindog sia sa atubangan ni Jehova nga Dios! Mahinalungon nga ginbubo sang mataas nga saserdote ang balaan nga incienso sa baga, kag napuno sang kahumot sang incienso ang Labing Balaan. * Sa ulihi, masulod sia liwat sa Labing Balaan dala ang dugo sang mga dulot para sa sala. Talupangda nga ginsunog niya ang incienso antes ihalad ang dugo sang mga dulot para sa sala.
5. Ano ang matun-an naton sa paggamit sang incienso sa Adlaw sang Pagtumbas Para sa Sala?
5 Ano ang matun-an naton sa paggamit sang incienso sa Adlaw sang Pagtumbas Para sa Sala? Ginapakita sang Biblia nga ang mga pangamuyo sang matutom nga mga sumilimba ni Jehova daw kaangay sang incienso. (Sal. 141:2; Bug. 5:8) Dumduma nga tudok gid ang pagtahod sang mataas nga saserdote sang gindala niya ang incienso sa presensia ni Jehova. Sing kaanggid, kon nagapangamuyo kita kay Jehova, dapat may tudok kita nga pagtahod sa iya. Nagadayaw gid kita sa iya. Nagapasalamat gid kita nga ginatugutan kita sang Manunuga sang uniberso nga magpalapit kag mangin suod sa iya, pareho sang isa ka bata sa iya amay. (Sant. 4:8) Ginabaton niya kita bilang iya mga abyan! (Sal. 25:14) Nagapasalamat gid kita sa sining pribilehiyo kag indi gid naton gusto maghimo sang bisan ano nga makapasubo sa iya.
6. Ano ang matun-an naton kay ginsunog anay sang mataas nga saserdote ang incienso antes sia maghalad?
6 Dumduma nga kinahanglan sunugon anay sang mataas nga saserdote ang incienso antes sia maghalad. Ginsigurado niya nga kahamut-an sia sang Dios kon maghalad na sia. Ano ang matun-an naton sa sini? Sang ari si Jesus sa duta, antes niya ginhalad ang iya kabuhi para luwason ang katawhan, may ginhimo anay sia nga mas importante sangsa sini. Ano ini? Dapat mangin matinumanon kag matutom si Jesus kay Jehova para batunon Niya ang iya halad. Sa paghimo sini, mapamatud-an ni Jesus nga ang pagsunod kay Jehova amo ang husto nga paagi sang pagkabuhi. Mabindikar ni Jesus ang pagkasoberano sang iya Amay, ukon mapamatud-an niya nga husto kag makatarunganon ang paagi sang paggahom ni Jehova.
7. Ngaa ang paagi sang pagkabuhi ni Jesus sa duta nagpahamuot sa iya Amay?
7 Sang nagkabuhi si Jesus sa duta, gintuman niya sing bug-os si Jehova. Determinado sia nga mapamatud-an nga ang paagi sang paggahom sang iya Amay amo ang pinakamaayo, bisan may mga pagsulay kag kabudlayan, kag bisan kabalo sia nga mangin masakit gid ang iya kamatayon. (Fil. 2:8) Kon ara sia sa mabudlay nga mga kahimtangan, nagapangamuyo si Jesus “nga may mabaskog nga paghibi kag mga luha.” (Heb. 5:7) Ang iya sinsero nga mga pangamuyo nagapakita nga matutom sia kay Jehova kag nagbulig ini sa iya nga mangin matinumanon pa gid sa iya Amay. Para kay Jehova, ang mga pangamuyo ni Jesus daw kaangay sang kahumot sang incienso. Ang paagi sang pagkabuhi ni Jesus nagpahamuot gid sa iya Amay kag nagbindikar sang Iya pagkasoberano.
8. Paano naton mailog si Jesus?
8 Mailog naton si Jesus kon himuon naton ang aton bug-os nga masarangan nga tumanon si Jehova kag mangin matutom sa iya. Kon may mga pagtilaw, sinsero kita nga nagapangamuyo sang bulig ni Jehova bangod gusto naton nga mapahamut-an sia. Kon ginahimo naton ini, ginapakita naton nga nagasuporta kita sa paagi sang paggahom ni Jehova. Narealisar naton nga indi pagpamatian ni Jehova ang aton mga pangamuyo kon nagahimo kita sang mga butang nga ginadumtan niya. Pero, kon nagakabuhi kita sa paagi nga ginakahamut-an niya, makasalig kita nga mangin pareho sang mahamot nga incienso ang aton tinagipusuon nga mga pangamuyo kay Jehova. Kon matinumanon kag matutom kita sa aton Amay sa langit, sigurado nga mahamuot gid sia sa aton.—Hulu. 27:11.
GUSTO NATON PASALAMATAN SI JEHOVA KAG PALANGGA NATON SIA
(Tan-awa ang parapo 9) *
9. Ngaa nagahalad ang mga Israelinhon sang halad sa pag-ambitanay?
9 Ikaduha nga leksion: Ginaalagad naton si Jehova bangod gusto naton pasalamatan sia. Matun-an naton ini nga leksion samtang ginabinagbinag naton ang parte sa halad sa pag-ambitanay nga ginahimo sang mga Israelinhon sang una. * Sa libro sang Levitico, matun-an naton nga makahalad ang isa ka Israelinhon sang halad sa pag-ambitanay “bilang pagpasalamat.” (Lev. 7:11-13, 16-18) Indi kinahanglan nga himuon niya ini, pero nagahalad sia bangod gusto niya ini himuon. Kinabubut-on ini nga ginahimo sang isa bangod palangga niya ang iya Dios, nga si Jehova. Ang karne sang ginhalad nga sapat kaunon sang isa nga naghalad, sang iya pamilya, kag sang mga saserdote. Pero may mga parte sang sapat nga para lang kay Jehova. Ano ini?
(Tan-awa ang parapo 10) *
10. Ano ang ginatudlo sang halad sa pag-ambitanay nga mabasa sa Levitico 3:6, 12, 14-16 parte sa motibo ni Jesus sa paghimo sang kabubut-on sang iya Amay?
10 Ikatlo nga leksion: Palangga naton si Jehova gani ginahatag naton ang aton pinakamaayo sa iya. Ginatamod ni Jehova nga pinakamaayo nga parte sang sapat ang sapay sini. Nagsiling man sia nga importante gid para sa iya ang iban pa nga mga parte sang sapat, lakip ang mga batobato. (Basaha ang Levitico 3:6, 12, 14-16.) Gani nalipay gid si Jehova kon ang isa ka Israelinhon kinabubut-on nga nagahalad sa iya sang sapay kag sang mga parte sang sapat nga importante gid para sa iya. Kon ginahimo ini sang isa ka Israelinhon, ginapakita niya nga gusto niya ihatag ang pinakamaayo sa Dios. Sing kaanggid, kinabubut-on nga ginhatag ni Jesus ang iya pinakamaayo kay Jehova paagi sa pag-alagad sa Iya sa bug-os niya nga masarangan bangod palangga niya Sia. (Juan 14:31) Malipayon si Jesus sa paghimo sang kabubut-on sang Dios kag may tudok sia nga gugma sa kasuguan sang Dios. (Sal. 40:8) Nalipay gid si Jehova nga makita ang kinabubut-on nga pag-alagad ni Jesus!
Ginahatag naton ang aton pinakamaayo kay Jehova bangod palangga naton sia (Tan-awa ang parapo 11-12) *
11. Paano ang aton pag-alagad pareho sa halad sa pag-ambitanay, kag paano ini makapalugpay sa aton?
11 Pareho sa halad sa pag-ambitanay, ang aton pag-alagad kay Jehova kinabubut-on naton nga ginahimo para mapakita naton ang aton ginabatyag sa iya. Ginahatag naton kay Jehova ang aton pinakamaayo, kag ginahimo naton ini bangod palangga naton sia sa bug-os naton nga tagipusuon. Nalipay gid si Jehova nga makita ang minilyon nga sumilimba niya nga nagaalagad sa iya sing kinabubut-on bangod sang ila tudok nga gugma sa iya kag sa iya mga talaksan! Makita kag ginapabaloran ni Jehova indi lang ang aton mga ginahimo, kundi pati man ang aton motibo. Makapalugpay gid ini sa aton. Halimbawa, kon tigulang ka na kag indi mo na mahimo ang mga gusto mo himuon, makasigurado ka nga nahangpan ni Jehova ang imo mga limitasyon. Siguro nagabatyag ka nga gamay lang ang imo mahimo para kay Jehova, pero makita niya nga ginahimo mo ang imo masarangan bangod sang imo gugma sa iya. Nalipay gid sia nga batunon ang pinakamaayo nga mahatag mo sa iya.
12. Ano ang ginabatyag ni Jehova sa halad sa pag-ambitanay, kag paano ini makapalig-on sa aton?
12 Ano ang matun-an naton sa halad sa pag-ambitanay? Samtang ginasunog ang pinakamaayo nga mga parte sang sapat, ang aso sini nagatub-ok kag nahamuot sa sini si Jehova. Gani makasigurado ka nga nahamuot man si Jehova sa imo kon kinabubut-on mo nga ginahimo ang imo pinakamaayo sa pag-alagad sa iya. (Col. 3:23) Hunahunaa kon daw ano sia ka malipayon sa imo. Gamay man ukon daku ang imo mahimo sa pag-alagad, ginapabaloran gid ni Jehova ang imo mga panikasog bangod ginapalangga mo sia, kag dumdumon niya ini asta san-o.—Mat. 6:20; Heb. 6:10.
GINAPAKAMAAYO NI JEHOVA ANG IYA ORGANISASYON
13. Suno sa Levitico 9:23, 24, paano ginpakita ni Jehova nga ginasakdag niya ang mga saserdote?
13 Ikap-at nga leksion: Ginapakamaayo ni Jehova ang dutan-on nga bahin sang iya organisasyon. Binagbinaga ang natabo sang ginpatindog ang tabernakulo sa tiilan sang Bukid Sinai sang 1512 B.C.E. (Ex. 40:17) Naghiwat si Moises sang seremonya sa pagtangdo kay Aaron kag sa iya mga anak nga lalaki bilang mga saserdote. Nagtipon ang pungsod sang Israel para makita nila ang mga saserdote nga maghimo sang ila pinakauna nga paghalad sang mga sapat. (Lev. 9:1-5) Paano ginpakita ni Jehova nga ginasakdag niya ang bag-o nga gintangdo nga mga saserdote? Samtang ginapakamaayo nanday Aaron kag Moises ang katawhan, ginsunog sing bug-os sang kalayo halin kay Jehova ang halad sa halaran.—Basaha ang Levitico 9:23, 24.
14. Ano ang importansia sa aton subong sang pagsakdag ni Jehova sa pagtangdo kay Aaron kag sa iya mga anak bilang mga saserdote?
14 Ano ang ginpahangop sang kalayo nga naghalin kay Jehova? Ginpakita ni Jehova nga ginasakdag niya si Aaron kag ang iya mga anak nga lalaki nga ginpili Niya nga mangin mga saserdote. Sang nakita sang mga Israelinhon ang klaro nga ebidensia sang pagsakdag ni Jehova sa mga saserdote, nahangpan nila nga dapat man nila sakdagon ang mga saserdote. Importante bala ini sa aton subong? Huo! Bangod ang pagkasaserdote sa Israel landong lang sang mas maayo nga pagkasaserdote. Si Jesus amo ang mas daku nga Mataas nga Saserdote, kag may 144,000 nga mga saserdote kag mga hari nga magaalagad upod kay Jesus sa langit.—Heb. 4:14; 8:3-5; 10:1.
Ginapakamaayo kag ginagiyahan ni Jehova ang iya organisasyon. Ginasakdag naton ini sa aton bug-os nga masarangan (Tan-awa ang parapo 15-17) *
15-16. Paano ginapakita ni Jehova nga ginasakdag niya “ang matutom kag mainandamon nga ulipon”?
15 Sang 1919, gintangdo ni Jesus ang gamay nga grupo sang mga hinaplas bilang “ang matutom kag mainandamon nga ulipon.” Ini nga ulipon nagapanguna sa pagbantala nga hilikuton kag nagahatag sa mga sumulunod sang Cristo sang “pagkaon sa nagakaigo nga tion.” (Mat. 24:45) Makita bala naton ang klaro nga ebidensia nga ginasakdag sang Dios ang matutom kag mainandamon nga ulipon?
16 Ginatinguhaan ni Satanas kag sang iya kalibutan nga pauntaton ang hilikuton sining matutom nga ulipon. Kon wala sing bulig halin kay Jehova, imposible nga mahimo sang matutom nga ulipon ini nga hilikuton. Bisan pa sang duha ka bug-os kalibutan nga inaway, wala untat nga pagpamatok, krisis sa ekonomiya, kag inhustisya, padayon nga nagahatag ang matutom kag mainandamon nga ulipon sang espirituwal nga pagkaon para sa mga sumulunod sang Cristo sa duta. Hunahunaa kon ano kadamo ang aton wala sing bayad nga mga publikasyon sa sobra 900 ka lenguahe! Klaro ini nga ebidensia nga ginasakdag sang Dios ang matutom nga ulipon. Ang pagbantala nga hilikuton isa man ka ebidensia sang pagpakamaayo ni Jehova. Ang maayong balita matuod gid nga ginabantala “sa bug-os nga duta.” (Mat. 24:14) Maathag gid nga ginagiyahan kag ginapakamaayo ni Jehova ang iya organisasyon subong.
17. Paano naton mapakita nga ginasakdag naton ang organisasyon nga ginagamit ni Jehova?
17 Maayo gid kon pamangkuton naton ang aton kaugalingon, ‘Nagapasalamat bala ako nga bahin ako sang organisasyon ni Jehova?’ Sang panahon nanday Moises kag Aaron, nagpadala si Jehova sang kalayo halin sa langit para ipakita nga ginasakdag niya ang iya mga gintangdo. Sing kaanggid, ginhatagan kita ni Jehova sang klaro nga ebidensia nga ginagamit niya ang iya organisasyon subong. Gani madamo gid kita sing mapasalamatan kay Jehova. (1 Tes. 5:18, 19) Paano naton mapakita nga ginasakdag naton ang organisasyon nga ginagamit ni Jehova? Mapakita naton ini kon tumanon naton ang nabase sa Biblia nga mga panuytoy nga mabasa naton sa aton mga publikasyon kag mabatian sa aton mga miting, asembleya, kag kombension. Mapakita man naton ang aton pagsakdag paagi sa pagbantala kag pagtudlo sa mga tawo sa bug-os naton nga masarangan.—1 Cor. 15:58.
18. Ano ang determinado mo nga himuon?
18 Mangin determinado kita nga iaplikar ang mga leksion nga natun-an naton sa libro sang Levitico. Gusto naton mapahamut-an si Jehova para batunon niya ang aton mga halad. Ginaalagad naton si Jehova bangod gusto naton pasalamatan sia. Ginahatag naton ang aton pinakamaayo kay Jehova bangod palangga naton sia sa bug-os naton nga tagipusuon. Kag ginasakdag naton sa aton bug-os nga masarangan ang organisasyon nga ginagamit niya subong. Kon ginahimo naton ini tanan, ginapakita naton kay Jehova nga ginapabaloran naton ang aton pribilehiyo nga maalagad sia bilang iya mga Saksi!
AMBAHANON 96 Libro sang Dios—Isa ka Bahandi
^ par. 5 Ang libro sang Levitico nagaunod sang mga kasuguan nga ginhatag ni Jehova sa Israel sang una. Bilang mga Cristiano, indi kita obligado nga tumanon ini nga mga kasuguan, pero makabenepisyo kita sa sini subong. Binagbinagon naton sa sini nga artikulo ang importante nga mga leksion nga matun-an naton sa libro sang Levitico.
^ par. 4 Ang incienso nga ginasunog sa tabernakulo ginakabig nga balaan, kag ginagamit ini para lang sa pagsimba kay Jehova sa Israel sang una. (Ex. 30:34-38) Wala kita sing may mabasa nga rekord nga ang mga Cristiano sang unang siglo nagasunog sang incienso bilang bahin sang ila pagsimba.
^ par. 9 Para sa dugang nga impormasyon parte sa halad sa pag-ambitanay, tan-awa ang Insight on the Scriptures, Volume 2, p. 526.
^ par. 54 PIKTYUR: Sa Adlaw sang Pagtumbas Para sa Sala, ang mataas nga saserdote sang Israel nagasulod sa Labing Balaan dala ang incienso kag ang incensario nga puno sing baga para mapuno sing mahamot nga incienso ang duog. Pagkatapos sini, masulod sia liwat sa Labing Balaan dala ang dugo sang mga dulot para sa sala.
^ par. 56 PIKTYUR: Ginhatagan sang Israelinhon ang saserdote sang isa ka karnero para sa halad sa pag-ambitanay bangod gusto niya kag sang iya pamilya nga pasalamatan si Jehova.
^ par. 58 PIKTYUR: Sa tion sang ministeryo ni Jesus sa duta, ginpakita niya ang iya tudok nga gugma kay Jehova paagi sa pagtuman sang mga sugo sang Dios kag pagbulig sa iya mga sumulunod nga tumanon man ini.
^ par. 60 PIKTYUR: Bangod limitado ang mahimo sang isa ka tigulang nga sister, nagapanaksi sia paagi sa sulat, gani ginahatag niya ang iya pinakamaayo kay Jehova.
^ par. 62 MGA PIKTYUR: Sang Pebrero 2019, ginpahibalo ni Brother Gerrit Lösch sang Nagadumala nga Hubon nga may ara na ginrebisar nga New World Translation sa German nga lenguahe. Subong, malipayon nga ginagamit sang mga manugbantala sa Germany ini nga Biblia sa ila ministeryo, pareho sining duha ka sister.
