1. Ano ang ginatugot ni Jehova nga himuon naton?

GINATUGUTAN kita ni Jehova nga magdesisyon kon ano ang aton himuon sa aton kabuhi. Ginatudluan niya kita kon paano maghimo sang maayo nga mga desisyon, kag ginabuligan niya kita nga magmadinalag-on kon maghimo kita sing mga desisyon nga makapalipay sa iya. (Sal. 119:173) Gani kon ginaaplikar naton ang maalamon nga mga panuytoy nga matun-an naton sa Biblia, mas makahimo kita sing maayo nga mga desisyon.—Heb. 5:14.

2. Ano nga kabudlayan ang mahimo maatubang naton pagkatapos kita makahimo sang desisyon?

² Pero, bisan pa makahimo kita sing maayo nga desisyon, mahimo mabudlayan kita nga tapuson ang aton ginsugdan. Binagbinaga ini nga mga halimbawa: Ang isa ka pamatan-on nga brother nagdesisyon nga basahon ang bilog nga Biblia. Pero pagkatapos sang pila ka semana, nag-untat sia sa pagbasa. Ang isa ka sister nagdesisyon nga mag-alagad bilang regular payunir, pero pirme niya ginaisol ang petsa kon san-o niya ini sugdan. Ang hubon sang mga gulang nagdesisyon nga pirme mag-shepherding sa mga kauturan sa ila kongregasyon, pero pagligad sang madamo nga bulan, wala gihapon nila ini nahimo. Lainlain ini nga mga sitwasyon pero may isa ka butang nga magkaanggid sila. Wala nila ginhimo sing bug-os ang ila desisyon. Nakaatubang man sang pareho sini nga sitwasyon ang mga Cristiano sa Corinto sang unang siglo. Binagbinagon naton kon ano ang matun-an naton sa ila.

3. Ano ang ginhimo nga desisyon sang mga taga-Corinto, pero ano ang natabo?

³ Mga 55 C.E. sadto sang naghimo ang mga taga-Corinto sang importante nga desisyon. Nabal-an nila nga nagaantos ang ila mga kauturan sa Jerusalem kag sa Judea bangod sang mga kabudlayan kag kaimulon. Nabal-an man nila nga nagatipon sang kuarta ang iban nga kongregasyon para buligan ang mga kauturan didto. Mainayuhon kag maalwan ang mga taga-Corinto, gani nagdesisyon sila nga magbulig man. Ginpamangkot nila si apostol Pablo kon paano sila makabulig. Nagpadala si Pablo sa ila sang  mga instruksion kag gintangdo niya si Tito para magbulig sa pagtipon sang mga amot. (1 Cor. 16:1; 2 Cor. 8:6) Pero, pagligad sang pila ka bulan, nabal-an ni Pablo nga wala pa may natipon nga amot ang mga taga-Corinto. Bangod sini, posible nga indi nila matapos ang pagtipon sang ila amot kag indi ini madungan sa mga amot sang iban nga kongregasyon nga ipadala sa Jerusalem.—2 Cor. 9:4, 5.

4. Suno sa 2 Corinto 8:7, 10, 11, ano ang ginpalig-on ni Pablo sa mga taga-Corinto?

⁴ Maayo gid ang ginhimo nga desisyon sang mga taga-Corinto, kag gindayaw sila ni Pablo bangod sang ila mabakod nga pagtuo kag bangod gusto nila mangin maalwan. Pero kinahanglan man niya sila palig-unon nga tapuson ang ila ginsugdan. (Basaha ang 2 Corinto 8:7, 10, 11.) Ang natabo sa ila nagatudlo sa aton nga mahimo mabudlayan bisan ang matutom nga mga Cristiano nga tapuson ang isa ka maayo nga desisyon nga ila ginsugdan.

5. Ano nga mga pamangkot ang aton sabton?

⁵ Pareho sa mga taga-Corinto, mahimo nabudlayan kita nga tapuson kon ano ang gindesisyunan naton nga himuon. Ngaa? Bangod indi kita perpekto, mahimo magpabuyanbuyan kita. Ukon mahimo imposible nga matapos naton ang aton ginsugdan bangod sang wala ginapaabot nga mga hitabo. (Man. 9:11; Roma 7:18) Ano ang dapat naton himuon kon kinahanglan naton usisaon ang ginhimo naton nga desisyon kag kon bala dapat naton ini bag-uhon? Kag paano naton masigurado nga matapos naton ang aton ginsugdan?

6. Ngaa kinahanglan bag-uhon ang iban naton nga desisyon?

⁶ May importante nga mga desisyon nga indi gid naton gusto bag-uhon. Halimbawa, desidido kita nga alagaron si Jehova, kag determinado kita nga mangin matutom sa aton bana ukon asawa. (Mat. 16:24; 19:6) Pero, posible nga ang iban naton nga desisyon kinahanglan bag-uhon. Ngaa? Bangod nagabag-o ang aton mga kahimtangan. Ano ang mga puede naton himuon para mabuligan kita nga makahimo sang pinakamaayo nga desisyon?

7. Ano ang dapat naton ipangamuyo, kag ngaa?

⁷ Mangamuyo sang kaalam. Gintuytuyan ni Jehova si Santiago nga isulat: “Kon may isa sa inyo nga kulang sang kaalam, padayon sia nga magpangayo sa Dios . . . , kay maalwan Sia nga nagahatag sa tanan.” (Sant. 1:5) Tanan kita “kulang sang kaalam.” Gani magsalig kay Jehova kon nagahimo sang desisyon kag kon ginausisa ini nga desisyon. Dayon buligan ka ni Jehova nga makahimo sang maayo nga desisyon.

8. Ano nga sahi sang pag-research ang dapat naton himuon antes maghimo sang desisyon?

⁸ Mag-research sang maayo. Magpagiya sa Pulong sang Dios, basaha ang mga publikasyon sang organisasyon ni Jehova, kag mag-istorya sa mga masaligan mo. (Hulu. 20:18) Importante ini nga sahi sang pag-research antes maghimo sang mga desisyon pareho sang pag-ilis sang trabaho, pagsaylo sa iban nga lugar, ukon pagpili sang nagakaigo nga edukasyon nga makabulig sa imo nga masuportahan ang imo ministeryo.

9. Paano kita makabenepisyo kon bunayag kita sa aton kaugalingon?

⁹ Usisaa ang imo motibo. Importante kay Jehova ang aton motibo. (Hulu. 16:2) Gusto niya nga bunayag ukon honest kita sa tanan nga butang. Gani kon nagahimo kita sang mga desisyon, gusto man naton nga mangin bunayag sa aton kaugalingon kag sa iban kon ano ang aton motibo. Kon indi kita bug-os nga bunayag, mahimo mabudlayan kita nga tapuson ang aton ginsugdan. Halimbawa, ang isa ka pamatan-on nga brother mahimo nagdesisyon nga magregular payunir. Pero pagligad sang pila ka bulan, indi na niya malab-ot ang iya oras kag wala na sia nalipay sa iya ministeryo. Para sa iya, ang iya panguna nga motibo sa pagpayunir amo ang  pahamut-an si Jehova. Pero mahimo ayhan nga nagpayunir sia bangod gusto lang niya pahamut-an ang iya mga ginikanan ukon ang iban?

10. Ano ang kinahanglan para makahimo sang mga pagbag-o?

¹⁰ Hunahunaa ang halimbawa sang isa nga nagatuon sa Biblia nga nagdesisyon nga mag-untat sa pagpanigarilyo. Bisan mabudlay, wala sia nagpanigarilyo sa sulod sang isa ukon duha ka semana. Pero nagpanigarilyo sia liwat. Sang ulihi, nagmadinalag-on gid man sia! Nauntat niya ang iya bisyo bangod sang iya gugma kay Jehova kag bangod gusto niya pahamut-an Sia.—Col. 1:10; 3:23.

11. Ngaa kinahanglan espesipiko ang imo mga tulumuron?

¹¹ Mangin espesipiko. Kon espesipiko ang imo mga tulumuron, mas mahapos mo ini himuon. Halimbawa, mahimo nagdesisyon ka nga pirme magbasa sang Biblia. Pero kon wala ka sang espesipiko nga iskedyul, posible indi mo ini mahimo. * Ukon ang mga gulang sa kongregasyon mahimo nagdesisyon nga pirme mag-shepherding sa mga kauturan, pero pagligad sang pila ka bulan, wala nila ini nahimo. Para magmadinalag-on, puede nila ipamangkot: “Nakahimo bala kita sang listahan kon sin-o sa mga kauturan ang kinahanglan naton i-shepherding? May espesipiko bala nga tion kon san-o sila bisitahon?”

12. Kon kinahanglanon, ano ang puede naton himuon, kag ngaa?

¹² Mangin realistiko. Indi posible nga mahimo naton ang tanan nga gusto naton bangod indi bastante ang aton tion, kuarta, ukon kusog. Gani mangin realistiko kag rasonable. Kon kinahanglanon, puede mo bag-uhon ang imo desisyon nga sa pamatyag mo indi mo gid mahimo. (Man. 3:6) Ibutang ta nga gin-usisa mo ang imo desisyon, ginbag-o ini, kag sa pamatyag mo mahimo mo na ini. Ari ang lima ka butang nga puede mo himuon para mabuligan ka nga matapos ang imo ginsugdan.

13. Paano ka makatigayon sang kusog nga kinahanglan mo para mahimo mo ang imo desisyon?

¹³ Mangamuyo sang kusog. Puede ka mahatagan sang Dios sang ‘kusog para mahimo’ mo ang imo desisyon. (Fil. 2:13) Gani mangayo kay Jehova sang iya balaan nga espiritu para mahatagan ka sang kusog nga kinahanglan mo. Padayon nga magpangamuyo bisan pamatyag mo daw kadugay sang sabat sa imo pangamuyo. Si Jesus nagsiling: “Padayon kamo sa pagpangayo [sang balaan nga espiritu], kag kamo pagahatagan.”—Lucas 11:9, 13.

14. Paano ang prinsipio sa Hulubaton 21:5 makabulig sa imo nga matapos ang imo ginsugdan?

¹⁴ Maghimo sang plano. (Basaha ang Hulubaton 21:5.) Para matapos mo ang isa ka proyekto, kinahanglan mo maghimo sang plano. Kag dapat mo sundon ini nga plano. Sing kaanggid, kon maghimo ka sang desisyon, dapat ilista mo ang tanan nga dapat mo himuon para matapos ini. Kon komplikado ang imo himuon, bahinbahina ini sa mas simple nga mga buluhaton. Kada may natapos ka nga simple nga buluhaton, makita mo kon daw ano na kadamo ang imo nahimo. Ginpalig-on ni Pablo ang mga taga-Corinto nga magpain sang ila amot “kada nahauna nga adlaw sang semana” imbes nga maghulat sa pag-abot niya antes magpangolekta. (1 Cor. 16:2) Kon bahinbahinon mo ang dalagku nga mga ulubrahon sa magagmay nga mga buluhaton, indi ka magbatyag nga daw imposible mo ini matapos.

15. Pagkatapos maghimo sang plano, ano dayon ang himuon mo?

¹⁵ Kon isulat mo ang ginplano mo nga himuon, mas mahapos mo ini sugdan. (1 Cor. 14:40) Halimbawa, may instruksion nga ginhatag sa hubon sang mga gulang nga dapat sila mag-asayn sang isa ka gulang nga magsulat sang tanan nila  nga nadesisyunan nga himuon, kon sin-o ang gin-asayn sa paghimo sini, kag kon san-o nila ini dapat matapos. Kon ginahimo ini sang mga gulang, mas mahapos nila sugdan ang ila gindesisyunan nga himuon. (1 Cor. 9:26) Puede mo man ini tilawan nga himuon sa imo adlaw-adlaw nga mga hilikuton. Halimbawa, puede ka makahimo sang listahan sang mga dapat mo himuon kada adlaw, kag unaha nga isulat sa listahan ang pinakauna nga dapat mo himuon. Mabuligan ka sini nga matapos mo ang imo ginsugdan kag mas madamo ka sing mahimo sa malip-ot nga tion.

16. Ano ang kinahanglan mo himuon para matapos mo ang imo ginsugdan, kag paano ini ginapalig-on sang Roma 12:11?

¹⁶ Magpanikasog. Kinahanglan mo magpanikasog para masunod mo ang imo ginplano kag matapos mo ang imo ginsugdan. (Basaha ang Roma 12:11.) Ginsilingan ni Pablo si Timoteo nga dapat sia “mag-ukod” kag ‘magpadayon’ nga mangin mas maayo nga manunudlo. Maaplikar man naton ang laygay ni Pablo sa bisan ano nga tulumuron nga gusto naton himuon para kay Jehova.—1 Tim. 4:13, 16.

17. Paano kita mabuligan sang Efeso 5:15, 16 para masugdan naton ang gindesisyunan naton nga himuon?

¹⁷ Mangin maalamon sa paggamit sang imo tion. (Basaha ang Efeso 5:15, 16.) Iskedyula kon san-o mo sugdan ang gindesisyunan mo nga himuon kag indi ini pagbag-uha. Indi paghulata ang pinakamaayo nga kahimtangan para sugdan ang imo mga buluhaton bangod posible nga indi gid ini mag-abot. (Man. 11:4) Indi magpokus sa mga butang nga indi masyado importante bangod mauyang sini ang imo tion kag kusog para sa mas importante nga mga butang. (Fil. 1:10) Kon posible, magpili sang tion nga wala gawa sing may makaisturbo sa imo. Ipahibalo sa iban nga kinahanglan mo sang tion para makakonsentrar. Puede mo man patyon ang imo cellphone kag indi anay pagtan-awa ang imo e-mail ukon social media. *

18-19. Ano ang makabulig sa imo nga indi dayon mag-untat sa imo ginahimo bisan may mga problema?

¹⁸ Magpokus sa resulta. Ang resulta sang imo desisyon daw kaangay sa destinasyon sang isa ka biyahe. Kon gusto mo gid makaabot sa imo destinasyon, padayunon mo ang imo pagbiyahe bisan pa kinahanglan mo mangita sang iban nga dalan kay sirado ang dalan nga plano mo agyan. Sing kaanggid, kon nagapokus kita sa resulta sang aton mga desisyon, indi kita dayon mag-untat sa aton ginahimo bisan may mga problema.—Gal. 6:9.

¹⁹ Mabudlay ang paghimo sang maayo nga desisyon, kag mahimo mabudlay man ini sugdan. Pero hatagan ka ni Jehova sang kaalam kag kusog para matapos mo ang imo ginsugdan.