1. Ano ang magapalig-on sa aton kon nagabatyag kita nga wala sing may nagabulig sa aton nga mabatas ang aton mga problema? (Salmo 118:5-7)

NAGABATYAG ka bala nga wala sing may nagabulig sa imo nga mabatas ang imo mga problema? Madamo ang nagabatyag sini lakip na ang matutom nga mga alagad ni Jehova. (1 Hari 19:14) Kon mabatyagan mo ini, dumduma ang promisa ni Jehova: “Indi ko gid kamo pagbayaan, kag indi ko gid kamo pagpabay-an.” Gani makasiling gid kita: “Si Jehova ang akon manugbulig; indi ako magkahadlok.” (Heb. 13:5, 6) Ginsulat ini ni apostol Pablo para sa iya mga kauturan sa Judea sang mga 61 C.E. Nagapahanumdom ini sa aton sang ginsulat sang salmista nga mabasa sa Salmo 118:5-7.—Basaha.

2. Ano ang binagbinagon naton sa sini nga artikulo, kag ngaa?

² Pareho sa salmista, kabalo si Pablo nga ginabuligan sia ni Jehova. Halimbawa, sang mga 58 C.E., nakaeksperiensia si Pablo sang mabaskog nga unos sang nagapanakayon sia sa dagat. (Binu. 27:4, 15, 20) Sa sining tion sang iya paglakbay kag bisan antes pa sini, ginbuligan ni Jehova si Pablo. Binagbinagon naton ang tatlo ka paagi nga ginhimo ini ni Jehova. Gingamit ni Jehova si Jesus kag ang mga anghel, ang mga tawo nga may awtoridad, kag ang mga kauturan. Tun-an naton ini nga mga hitabo sa kabuhi ni Pablo para magbakod pa gid ang aton pagsalig sa promisa sang Dios nga sabton man Niya ang aton pagpangabay sing bulig.

3. Ano ang mahimo nga ginapamensar ni Pablo, kag ngaa?

³ Kinahanglan ni Pablo ang bulig. Sang mga 56 C.E., ginganoy sia sang mga tawo pagua sa templo sa Jerusalem kag ginbunal nila sia kay gusto nila sia nga patyon. Pagkadason nga adlaw, sang gindala si Pablo sa Sanhedrin, halos mapatay na sia bangod sang ginahimo sang iya mga kaaway. (Binu. 21:30-32; 22:30; 23: 6-10) Sadto nga tion, mahimo nagapamensar si Pablo, ‘Daw ano kadugay ko pa ini kinahanglan nga batason?’

4. Paano gingamit ni Jehova si Jesus para buligan si Pablo?

⁴ Paano ginbuligan si Pablo? Pagkagab-i pagkatapos gindakop si Pablo, “ang Ginuo” nga si Jesus nagtindog sa tupad niya kag nagsiling: “Magpakaisog ka! Kay subong nga nagpanaksi ka sing maid-id tuhoy sa akon sa Jerusalem, dapat ka man magpanaksi sa Roma.” (Binu. 23:11) Makapalig-on gid ini. Gindayaw ni Jesus si Pablo sa iya ginhimo nga pagpanaksi sa Jerusalem. Kag nagpromisa sia kay Pablo nga makalab-ot sia sa Roma kay magapanaksi man sia didto. Pagkatapos mabatian ni Pablo ini nga promisa, mahimo gid nga nagbatyag sia nga wala sing malain nga matabo sa iya, pareho sang ginabatyag sang isa ka bata nga ginahakos sang iya amay.

5. Paano gingamit ni Jehova ang anghel para buligan si Pablo? (Tan-awa ang piktyur sa kober.)

⁵ Ano pa gid nga mga kabudlayan ang naeksperiensiahan ni Pablo? Mga duha ka tuig pagkatapos sang natabo kay Pablo sa Jerusalem, nagsakay sia sa barko pakadto sa Italya. Samtang nagalakbay sila, nagwaswas ang mabaskog nga unos. Abi sang mga tripulante kag mga pasahero mapatay na gid sila. Pero wala nahadlok si Pablo. Ngaa? Ginsilingan niya ang tanan nga ara sa barko: “Kagab-i nagtindog malapit sa akon ang anghel sang Dios nga akon ginasimba kag ginaalagad. Nagsiling ang anghel: ‘Indi ka magkahadlok, Pablo. Kinahanglan mag-atubang ka sa Cesar, kag tungod sa imo luwason sang Dios ang tanan nga nagapanakayon kaupod mo.’” Gingamit ni Jehova ang anghel para ihambal liwat ang ginpromisa niya kay Pablo. Una ini nga ginpromisa ni Jehova sa iya paagi kay Jesus. Natuman gid ini kay nakalab-ot si Pablo sa Roma.—Binu. 27:20-25; 28:16.

6. Ano ang ginpromisa ni Jesus, kag ngaa makapalig-on gid ini sa aton?

⁶ Paano kita ginabuligan? Buligan man kita ni Jesus pareho sa ginhimo niya kay Pablo. Halimbawa, ginpromisahan ni Jesus ang tanan nga nagasunod sa iya: “Kaupod ninyo ako sa tanan nga tion tubtob sa hingapusan sang sistema sang mga butang.” (Mat. 28:20) Makapalig-on gid sa aton ining ginsiling ni Jesus. Ngaa? Bangod may mga tion nga nabudlayan kita nga magbatas. Halimbawa, kon mapatyan kita sang pinalangga, indi dayon madula ang aton kasubo pagligad lang sang pila ka adlaw. Posible nga tinuig pa naton ini nga mabatyagan. Para naman sa mga tigulang na, may mga tion nga nabudlayan gid sila. Ang iban naman nabudlayan bangod na-depress sila. Bisan pa sang sini nga mga kabudlayan, nagapadayon kita kay kabalo kita nga kaupod naton si Jesus “sa tanan nga tion,” lakip na sa tion nga makaeksperiensia  kita sang mabudlay nga mga problema.—Mat. 11:28-30.

7. Suno sa Bugna 14:6, paano kita ginabuligan ni Jehova subong?

⁷ Ang Pulong sang Dios nagapasalig sa aton nga ginagamit ni Jehova ang mga anghel para buligan kita. (Heb. 1:7, 14) Halimbawa, ginabuligan kita sang mga anghel sa aton pagbantala sang “maayong balita sang Ginharian” sa mga tawo “sa tagsa ka pungsod kag tribo kag hambal kag katawhan.”—Mat. 24:13, 14; basaha ang Bugna 14:6.

8. Paano gingamit ni Jehova ang kumander sang militar para buligan si Pablo?

⁸ Paano ginbuligan si Pablo? Sang 56 C.E., nagpromisa si Jesus kay Pablo nga makalab-ot sia sa Roma. Pero ang pila ka Judiyo sa Jerusalem nagplano nga lambatan nila si Pablo para patyon sia. Sang mabal-an sang kumander sang militar sang Roma nga si Claudio Lisias ang ila plano, ginbuligan niya si Pablo. Ginmanduan dayon ni Claudio ang madamo nga soldado nga amligan si Pablo kag dal-on sia sa Cesarea, kag mga 105 ka kilometro ang ila lakbayon halin sa Jerusalem. Sang ara na si Pablo sa Cesarea, nagmando si Gobernador Felix nga “bantayan sia sa palasyo ni Herodes.” Gani wala na sing mahimo ang mga Judiyo nga gusto magpatay kay Pablo.—Binu. 23:12-35.

9. Paano ginbuligan ni Gobernador Festo si Pablo?

⁹ Pagligad sang duha ka tuig, napriso gihapon si Pablo sa Cesarea. Ginbuslan ni Festo si Felix bilang gobernador. Nagpangabay ang mga Judiyo kay Festo nga pakadtuon si Pablo sa Jerusalem para didto sia bistahon, pero wala nagpasugot si Festo. Mahimo nga nabal-an sang gobernador nga “nagaplano [ang mga Judiyo] nga lambatan si Pablo sa dalan agod patyon” sia.—Binu. 24:27–25:5.

10. Ano ang ginhimo ni Gobernador Festo sang nagsiling si Pablo nga gusto niya mag-apelar sa Cesar?

¹⁰ Sang ulihi, ginbista si Pablo sa Cesarea. Bangod gusto ni Festo “nga kahamut-an sia sang mga Judiyo,” ginpamangkot niya si Pablo: “Luyag mo bala magkadto sa hukmanan sa Jerusalem kag didto ka hukman sa atubangan ko?” Kabalo si Pablo nga mahimo patyon sia sang mga Judiyo sa Jerusalem. Kabalo man sia sang dapat niya himuon para maamligan ang iya kabuhi. Dapat sia makalab-ot sa Roma kag padayunon ang iya pagbantala didto. Gani nagsiling sia: “Nagaapelar ako sa Cesar!” Ginpamangkot ni Festo ang iya mga manuglaygay, dayon ginsilingan niya si Pablo: “Sa Cesar ka nag-apelar; sa Cesar ka makadto.” Bangod sa desisyon ni Festo nga dalhon si Pablo sa Roma, nakaluwas si Pablo sa plano sang iya mga kaaway. Kon makalab-ot na si Pablo sa Roma, malayo na sia sa mga Judiyo nga gusto magpatay sa iya.—Binu. 25:6-12.

11. Ano ang makapalig-on nga ginsiling ni Isaias nga mahimo ginpamalandungan ni Pablo?

¹¹ Samtang ginahulat ni Pablo kon san-o sila malakbay pakadto sa Italya, mahimo nga ginpamalandungan niya ang paandam ni manalagna Isaias sa mga nagapamatok kay Jehova. Amo ini ang ginpasulat ni Jehova kay Isaias: “Magpahito kamo, apang mapaslawan kamo! Maghambal kamo sang luyag ninyo, apang indi kamo magmadinalag-on, kay ang Dios kaupod namon!” (Isa. 8:10) Sigurado si Pablo nga buligan sia sang Dios, gani nagpalig-on ini sa iya nga mabatas niya ang bisan ano nga problema nga maabot.

12. Ano ang ginhimo ni Julio kay Pablo, kag ano ang mahimo nga nahunahuna ni Pablo?

¹² Sang 58 C.E., naglakbay si Pablo pakadto sa Italya. Bangod isa sia ka priso, ginpaguardiahan sia sa opisyal sang soldado sang Roma nga si Julio. Puede nga pabudlayan ni Julio si Pablo ukon puede man niya nga pakitaan sia sing kaayo. Ano ang ginhimo ni Julio? Pagkadason nga adlaw pagdungka nila, “ginpakitaan ni Julio sing kaayo  si Pablo. Gintugutan niya si Pablo nga magkadto sa iya mga abyan.” Sang ulihi, ginluwas pa gani ni Julio si Pablo. Paano? Gusto sang mga soldado nga patyon ang tanan nga priso nga ara sa barko, pero ginpunggan sila ni Julio. Ngaa? Bangod “luyag [niya] nga luwason si Pablo.” Mahimo gid nga nahunahuna ni Pablo nga gingamit ni Jehova ining mabuot nga opisyal para amligan sia.—Binu. 27:1-3, 42-44.

13. Paano mahimo gamiton ni Jehova ang mga tawo nga may awtoridad?

¹³ Paano kita ginabuligan? Para matuman ang katuyuan ni Jehova, mahimo niya gamiton ang iya gamhanan nga espiritu para himuon sang mga tawo nga may awtoridad ang iya gusto. Si Hari Solomon nagsulat: “Ang tagipusuon sang hari kaangay sang nagailig nga tubig sa kamot ni Jehova. Ginapailig Niya ini sa bisan diin nga luyag Niya.” (Hulu. 21:1) Ano ang buot silingon sini? Kon gusto sang mga tawo nga pailigon ang tubig sa sapa pakadto sa direksion nga gusto nila, puede sila magkutkot sang kanal. Puede man gamiton ni Jehova ang iya espiritu para siguraduhon nga ang desisyon nga himuon sang mga tawo nga may awtoridad makabulig sa pagtuman sang iya katuyuan. Gani, ginahunahuna nila kon ano nga desisyon ang makahatag sang kaayuhan sa katawhan sang Dios.—Ipaanggid ang Esdras 7:21, 25, 26.

14. Base sa Binuhatan 12:5, sin-o ang puede naton ilakip sa aton mga pangamuyo?

¹⁴ Ano ang puede naton himuon? Puede kita makapangamuyo “para sa mga hari kag sa tanan nga may mataas nga posisyon” kon magahimo sila sang mga desisyon nga makaapekto sa aton pagbantala kag pagtambong sa mga miting. (1 Tim. 2:1, 2; Neh. 1:11) Pareho sa ginhimo sang mga Cristiano sang unang siglo, hanuot man kita nga nagapangamuyo sa Dios para sa aton mga kauturan nga napriso. (Basaha ang Binuhatan 12:5; Heb. 13:3) Puede man kita makapangamuyo para sa mga guardia sa prisuhan nga nagabantay sa aton mga kauturan. Puede naton pangabayon si Jehova nga kabay pa nga pakitaan sing “kaayo” sang mga guardia ang aton mga kauturan pareho sa ginhimo ni Julio.—Binu. 27:3.

15-16. Paano gingamit ni Jehova si Aristarco kag si Lucas para buligan si Pablo?

¹⁵ Paano ginbuligan si Pablo? Sang nagalakbay si Pablo pakadto sa Roma, madamo nga beses nga gingamit ni Jehova ang mga kauturan para buligan sia. Binagbinagon naton ang pila ka halimbawa.

¹⁶ Nag-upod kay Pablo sa iya paglakbay pakadto sa Roma ang iya duha ka matutom nga  mga abyan nga si Aristarco kag si Lucas. * Wala kita sang mabasa sa Biblia nga nagpromisa man si Jesus kay Aristarco kag kay Lucas nga wala sing may malain nga matabo sa ila kag makalab-ot sila sa Roma. Pero handa sila nga irisgo ang ila kabuhi para buligan si Pablo. Sang ulihi na lang nila nabal-an sang nagwaswas na ang mabaskog nga unos nga makalab-ot man sila sa Roma nga buhi. Gani sang nagsakay si Aristarco kag si Lucas sa barko sa Cesarea, mahimo gid nga nangamuyo si Pablo kay Jehova para pasalamatan sia kay gingamit niya ining duha ka maisog nga utod para buligan sia.—Binu. 27:1, 2, 20-25.

17. Paano gingamit ni Jehova ang mga kauturan para buligan si Pablo?

¹⁷ Sang nagalakbay si Pablo, madamo nga beses sia nga ginbuligan sang mga kauturan. Halimbawa, sang nagdungka sila sa siudad sang Sidon, ginpasugtan ni Julio si Pablo “nga magkadto sa iya mga abyan agod matatap nila sia.” Kag sang ulihi sa siudad sang Puteoli, nakita ni Pablo kag sang iya mga kaupod “ang mga kauturan kag ginpangabay nila [sila] nga magtener anay upod sa ila sing pito ka adlaw.” Gin-atipan sang mga kauturan sa sini nga mga lugar ang kinahanglanon ni Pablo kag sang iya mga kaupod. Kag sigurado gid nga nalipay ang mga kauturan nga gindayunan ni Pablo sa ginsugid niya nga makapalig-on nga mga eksperiensia. (Ipaanggid ang Binuhatan 15:2, 3.) Pagkatapos sang makapalig-on nga pagbisita, nagpadayon sa paglakbay si Pablo kag ang iya mga kaupod.—Binu. 27:3; 28:13, 14.

18. Ano ang rason ngaa ginpasalamatan ni Pablo ang Dios kag nangin maisog sia?

¹⁸ Samtang nagalakat si Pablo pakadto sa Roma, mahimo gid nga ginahunahuna niya ang iya ginsulat sa kongregasyon sa sini nga siudad tatlo ka tuig na ang nagligad. Amo ini ang iya ginsulat: “Madamo na nga tuig nga luyag ko gid magkadto sa inyo.” (Roma 15:23) Pero wala gid niya mahunahuna nga makakadto gali sia sa Roma nga isa ka priso. Sigurado gid nga napalig-on sia sang nakita niya ang mga kauturan sa Roma nga nagasugata sa iya sa dalan. “Sang makita  sila ni Pablo, nagpasalamat sia sa Dios kag nagpakaisog.” (Binu. 28:15) Talupangda nga sang makita ni Pablo ang mga kauturan, ginpasalamatan niya ang Dios. Ngaa? Bangod nahunahuna liwat ni Pablo nga ginagamit ni Jehova ang mga kauturan para buligan sia.

19. Suno sa 1 Pedro 4:10, paano kita posible nga gamiton ni Jehova para buligan niya ang mga nagakinahanglan?

¹⁹ Ano ang puede naton himuon? May mga kauturan bala sa inyo kongregasyon nga nabudlayan bangod nagamasakit sila ukon may mga problema? Napatyan bala sila sang pinalangga? Kon may nabalitaan kita nga may utod nga nagakinahanglan sang bulig, puede naton pangabayon si Jehova nga buligan kita nga makapamensar sang aton ihambal ukon himuon nga makapaumpaw sa utod. Posible nga ang aton ihambal ukon himuon amo gid ang kinahanglan sang aton utod para mapalig-on sia. (Basaha ang 1 Pedro 4:10.) * Nagpromisa si Jehova, “Indi ko gid kamo pagbayaan, kag indi ko gid kamo pagpabay-an.” Kon buligan naton ang aton mga utod, magabakod liwat ang ila pagsalig nga ginatuman gid ni Jehova ini nga promisa. Sigurado gid nga malipay ka nga nabuligan mo ang imo utod.

20. Ngaa masiling gid naton nga ‘si Jehova ang aton manugbulig’?

²⁰ Pareho kay Pablo kag sa iya mga kaupod, may mga problema man kita. Pero kabalo man kita nga masarangan naton ini bangod kaupod naton si Jehova. Ginagamit niya si Jesus kag ang mga anghel para buligan kita. Kag para matuman ang iya katuyuan, ginagamit man ni Jehova ang mga tawo nga may awtoridad para buligan kita. Kag ginagamit ni Jehova ang iya balaan nga espiritu para palig-unon ang mga kauturan nga buligan kita. Madamo sa aton ang nakaeksperiensia sini. Gani pareho kay Pablo, makasalig man kita kag masiling gid naton: “Si Jehova ang akon manugbulig; indi ako magkahadlok. Ano ang mahimo sang tawo sa akon?”—Heb. 13:6.