NALIPAY gid ako nga Saksi ang akon mga ginikanan nga sanday Fred kag Edna Molohan, kag gintudluan nila ako nga higugmaon ang Dios. Beinte ka tuig na sila nga aktibo nga mga Estudyante sang Biblia (mga Saksi ni Jehova) sang natawo ako sang 1934. Nagaistar kami sa Parsons, nga isa ka gamay nga banwa sa bagatnan-nasidlangan sang Kansas. Hinaplas ang halos tanan nga kauturan sa amon kongregasyon. Regular kami nga pamilya sa pagtambong sa mga miting sang kongregasyon kag sa pagbantala sa iban parte sa kamatuoran sa Pulong sang Dios. Kon Sabado sang hapon, masami kami nagapanaksi sa dalan, nga amo ang pagtawag namon sadto sa pagpanaksi sa publiko nga mga lugar. Makakalapoy ini kon kaisa, pero pirme kami ginabaklan ni Tatay sang ice cream pagkatapos.

Diutay lang kami sa kongregasyon pero malapad ang amon teritoryo nga nagalakip sang gamay nga mga banwa kag madamo nga uma sa kaingod nga mga probinsia. Kon nagabantala sa mga mangunguma, masami nga ginabayluhan nila ang amon mga literatura sang ila mga utan, bag-o nga itlog (halin gid sa pugaran), ukon sang buhi nga manok. Ginadugang namon ini sa amon adlaw-adlaw nga pagkaon, bangod abanse na nga nakahatag si Tatay sing donasyon para sa mga literatura.

May radyo pono ang akon mga ginikanan nga ginagamit sa pagbantala. Gamay pa ako gani indi ko pa masarangan magpatokar sini. Pero nalipay gid ako magbulig kanday Tatay kag Nanay kon ginapatokar nila ang mga pamulongpulong ni Utod Rutherford sa ila mga ginaduaw liwat kag ginatun-an sa Biblia.

Ginbutangan ni Tatay sing daku nga trompa ang atop sang amon salakyan nga 1936 Ford. Epektibo gid ini sa pagpalapnag sang mensahe sang  Ginharian. Sa masami, nagapatokar kami anay sang musika para makuha ang atension sang mga tawo, dayon nagapatokar kami sang pamulongpulong base sa Biblia. Kon matapos na ang pamulongpulong, nagatanyag kami sing mga literatura sa mga interesado.

Sa gamay nga banwa sang Cherryvale, Kansas, ginsilingan si Tatay sang pulis nga indi puede patokaron ang de-trompa nga salakyan sa parke sang banwa bangod madamo nga tawo ang nagapahuway diri kon Domingo, pero puede magpatokar sa gua sang parke. Gani ginsaylo ni Tatay ang salakyan sa tabok lang sang dalan nga nagaatubang sa parke para mabatian gihapon ini sang mga tawo, kag ginpadayon niya ang pagpatokar. Masadya gid pirme mag-upod kanday Tatay kag Manong Jerry sa sini nga mga hilikuton.

Sang talipuspusan sang dekada ’30, madasig ang pagkobre namon sa mga teritoryo nga grabe ang pagpamatok. Nagaumpisa kami antes magpamanagbanag (pareho sang ginhimo namon sa Joplin, Missouri) kag ginasuok namon ang mga tract ukon bukleta sa idalom sang mga puertahan. Nagahalong gid kami para wala sing mabatian nga gahod. Dayon nagatipon kami sa gua sang siudad para mabal-an kon may nadakpan sang pulis.

Sa sini nga mga tinuig, masadya man magbantala paagi sa information march. Para ibantala ang Ginharian, nagasuksok kami sang plakard sa atubang kag sa likod, kag dayon nagamartsa kami nga nakalinya sa bilog nga siudad. Nadumduman ko pa ang isa ka bes nga ginhimo ini sa amon banwa sang mga kauturan nga nagasuksok sang plakard nga may nakasulat nga “Religion Is a Snare and a Racket” (Ang Relihion Isa ka Siod kag Isa ka Pagpangdaya). Nagmartsa sila sa bilog nga banwa sing mga isa ka kilometro kag tunga, kag dayon nagtipon sila sa amon balay. Wala gid sing may namatok sa ila, pero madamo sila sing nakilala nga interesado.

Ang amon pamilya pirme nagabiyahe halin sa Kansas pakadto sa Texas para magtambong sa kombension. Nagaobra si Tatay sa Missouri-Kansas-Texas Railroad (ginatawag man nga M-K-T, ukon Katy, Railroad), gani libre kami sa tren. Bangod sini, mabisita namon ang amon mga paryente kag makatambong kami sa kombension nga magkaupod. Ang magulang ni Nanay nga si Fred Wismar kag ang iya asawa nga si Eulalie nagaistar sa Temple, Texas. Natun-an ni Tito Fred ang kamatuoran sang pamatan-on pa sia sang mga 1900. Nagpabawtismo sia, kag ginsugid niya ang iya natun-an sa iya mga utod, lakip kay Nanay. Kilala sia sang mga kauturan sa mga lugar sa tunga nga bahin sang Texas, kay nag-alagad sia diri bilang zone servant (ginatawag subong nga manugtatap sang sirkito). Mabuot sia, pirme malipayon, kag kanami gid mag-upod sa iya. Mapisan sia sa pag-alagad, kag daku gid ang impluwensia niya sa akon sang pamatan-on ako.

Sang 1941, nagsakay kami sa tren pakadto sa St. Louis, Missouri, para magtambong sa kombension. Ang tanan nga pamatan-on ginpangabay nga magpungko sing tingob sa isa ka bahin sang istadyum para pamatian ang pamulongpulong ni Utod Rutherford nga “Children of the King” (Mga Anak sang Hari). Sa iya konklusion, nasorpresa gid  kami nga makabaton sing regalo nga bag-o nga libro nga Children, nga ginhatag mismo ni Utod Rutherford kag sang iya mga kaupod. Sobra 15,000 ka pamatan-on ang nakabaton sini nga pagpakamaayo.

Sang Abril 1943, nagtambong kami sa “Call to Action” nga asembleya sa Coffeyville, Kansas. Ginpahibalo sa sini ang parte sa Teokratikong Eskwelahan Para sa Ministeryo, nga isa ka bag-o nga bahin sang miting nga himuon sa tanan nga kongregasyon. Nakabaton man kami sing bukleta nga may 52 ka tulun-an nga gamiton sa sini nga eskwelahan. Sang ulihi sa sini nga tuig, ginpresentar ko ang akon pinakauna nga bahin. Indi ko gid malipatan ini nga asembleya, bangod kaupod ang pila ka utod, ginbawtismuhan ako sa isa ka matugnaw nga linaw.

Naggradwar ako sa hayskul sang 1951 kag kinahanglan ko magdesisyon kon ano ang himuon ko sa akon kabuhi. Nakaalagad sang una si Manong Jerry sa Bethel. Gusto ko man mag-alagad sa Bethel, gani ginpadala ko ang akon aplikasyon sa opisina sa Brooklyn. Daku gid ang nabulig sang akon desisyon sa akon espirituwalidad. Wala madugay, gin-agda ako sa Bethel kag nagsugod ako sa pag-alagad diri sang Marso 10, 1952.

Handum ko nga maasayn sa imprintahan para magbulig sa paghimo sang mga magasin kag mga literatura. Pero, wala gid ako maasayn diri. Gin-asayn ako nga mangin waiter kag sang ulihi sa kusina. Nalipay gid ako sa sini nga asaynment kag madamo ako sing natun-an. Nagabag-obag-o ang iskedyul sang mga naasayn sa kusina, gani may tion kon kaisa kon adlaw nga wala ako sing obra. Sa sini nga mga tion, nagakadto ako sa librarya sang Bethel kag nagatuon. Nakabulig ini nga mag-uswag ang akon espirituwalidad kag magbakod ang akon pagtuo. Nagpalig-on man ini sa akon nga alagaron si Jehova sa Bethel asta sa masarangan ko. Naghalin si Manong Jerry sa Bethel sang 1949 kag napangasawa niya si Patricia, pero malapit lang sa Brooklyn ang ila ginaistaran. Daku gid ang ila nabulig sa akon kag ginapalig-on nila ako sang bag-o pa lang ako sa Bethel.

Wala madugay pag-abot ko sa Bethel, gindugangan ang listahan sang mga Bethelite nga mga humalambal sa publiko. Ang mga ara sa listahan ginaasayn nga duawon ang mga kongregasyon, asta sa kalayuon nga 322 ka kilometro halin sa Brooklyn, para magpamulongpulong kag mag-upod sa pagbantala. Isa ako sa gindugang sa listahan. Grabe ang akon kulba sa una ko nga pamulongpulong nga isa pa ka oras sadto ang kalawigon. Masami ako nagabiyahe paagi sa tren. Nadumduman ko pa sang tigtulugnaw sang 1954 sang nagsakay ako sa tren pabalik sa New York. Domingo sang hapon sadto kag dapat ara na ako sa Bethel pagkagab-i. Pero, bangod sang grabe nga katugnaw sang hangin kag sang snow ukon yelo, naaberiya ang tren. Mga alas singko sang aga sang Lunes na kami nakaabot sa New York City. Dalidali ako nga nagsakay liwat sa isa ka tren pakadto sa Brooklyn kag nagdiretso dayon ako sa kusina. Naulihi ako sa akon obra, kag kapoy gid ako bangod wala ako makapahuway sing maayo sa bilog nga gab-i. Pero balewala ini nga mga sakripisyo kon ipaanggid sa kalipay sa pag-alagad sa mga kongregasyon kag makakilala sing bag-o nga mga abyan.

Sang una ko nga mga tuig sa Bethel, nalakip ako sa programa sang pagtuon sa Biblia nga mabatian kada semana sa aton estasyon sa radyo nga WBBR. Nahamtang sadto ang studio sa ikaduha nga panalgan sang 124 Columbia Heights nga bilding. Ang kada isa may ginatungdan nga papel sa programa. Si Utod A. H. Macmillan, nga isa ka madugay na nga Bethelite, pirme may bahin sa sini nga mga programa. Ginatawag namon sia nga Brother Mac. Maayo gid sia nga halimbawa para sa amon nga mga pamatan-on nga Bethelite sa iya katutom sa pag-alagad kay Jehova.

Sang 1958, gin-asayn ako nga buligan ang mga naggradwar sa Gilead School. Buligan ko ining mapisan nga mga kauturan nga makakuha sang visa kag tiket para sa ila biyahe. Mahal sadto ang tiket sa eroplano, gani pila lang ang nagabiyahe paagi sa sini. Ang kalabanan nga makadto sa Africa kag Far East nagasakay sa mga barko nga pangkargamento. Sang nagbarato ang tiket sa eroplano, amo na ini ang ginasakyan sang kalabanan nga misyonero.

Sang 1960, may ginkontrata ako nga mga kompanya sang eroplano nga magabiyahe halin sa Estados Unidos pakadto sa Europa para sa internasyonal nga  mga kombension nga hiwaton pagkasunod nga tuig. Ginsakyan ko ang eroplano nga halin sa New York pakadto sa Hamburg, Germany, para sa sini nga kombension. Pagkatapos sang kombension, ako kag ang tatlo pa ka Bethelite nga lalaki nag-arkila sing salakyan halin sa Germany pakadto sa Italy, kag ginbisitahan namon ang sanga talatapan sa Rome. Halin didto, nagbiyahe kami pakadto sa France, kag nag-agi kami sa Pyrenees Mountains. Dayon nagkadto kami sa Spain diin ginadumilian ang pagbantala. Pero nakadala kami sing mga literatura sa mga kauturan sa Barcelona, kay ginputos namon ini nga daw mga regalo. Nalipay gid kami nga makita ang mga kauturan! Dayon nagbiyahe kami pakadto sa Amsterdam, kag nagsakay kami didto sa eroplano pabalik sa New York.

Pagligad sang mga isa ka tuig, gin-asayn ako nga asikasuhon ang pagbiyahe sang mga delegado para sa internasyonal nga mga kombension nga hiwaton sa bilog nga kalibutan. Amo ini ang “Everlasting Good News” Assembly sang 1963. Tambungan sang 583 ka delegado ang mga kombension sa Europa, Asia, kag South Pacific, kag ang katapusan nga kombension hiwaton sa Honolulu, Hawaii, kag Pasadena, California. Maagi man sila sa Lebanon kag Jordan para kadtuan ang mga lugar nga ginsambit sa Biblia. Ang amon departamento sa Bethel amo ang nag-asikaso sang ila tiket, hotel, kag mga visa sa lainlain nga pungsod.

May isa pa ka hitabo sang 1963 nga importante gid sa akon. Sang Hunyo 29, ginpakaslan ko si Lila Rogers nga taga-Missouri. Nangin Bethelite sia mga tatlo ka tuig ang nagligad. Isa ka semana pagkatapos sang amon kasal, nag-upod kami ni Lila sa pagbiyahe sa bilog nga kalibutan kag ginbisitahan namon ang Greece, Egypt, kag Lebanon. Halin sa Beirut, nagsakay kami sa eroplano pakadto sa gamay nga erport sa Jordan. Bangod ginadumilian ang hilikuton sa Jordan kag ginsilingan kami nga wala ginahatagan sing visa ang mga Saksi ni Jehova pasulod sa sini nga pungsod, nagapamensar kami kon ano ayhan ang matabo pag-abot namon didto. Nasorpresa gid kami pag-abot namon sa erport sang makita namon ang madamo nga kauturan nga nagauyat sang daku nga banner nga may nakasulat “Welcome Jehovah’s Witnesses”! Nalipay gid kami nga makita ang mga lugar nga ginsambit sa Biblia! Ginkadtuan namon ang mga lugar nga gin-istaran nanday Abraham, Isaac, kag Jacob, ang mga lugar diin nagbantala si Jesus kag ang iya mga apostoles, kag ang lugar diin nag-umpisa ang Cristianismo nga naglapnag tubtob sa pinakamalayo nga bahin sang duta.—Binu. 13:47.

Mainunungon ako nga gin-updan ni Lila sing 55 ka tuig sa tanan namon nga asaynment sa pag-alagad. Nakadtuan namon sing pila ka beses ang Spain kag Portugal sang ginadumilian sadto ang hilikuton. Ginapalig-on namon ang mga kauturan kag ginadalhan namon sila sing mga literatura kag iban pa nga butang nga kinahanglan nila. Nakadtuan man namon ang pila sa aton utod nga napriso sa isa ka prisuhan sa Cádiz, Spain. Nalipay gid ako nga mapalig-on sila paagi sa pamulongpulong base sa Kasulatan.

 Pagkasunod nga mga tinuig sugod sang 1963, pribilehiyo ko nga makabulig sa pag-asikaso sang internasyonal nga mga kombension sa Africa, Australia, Central kag South America, Europe, Far East, Hawaii, New Zealand, kag Puerto Rico. Madamo nga kombension nga natambungan namon ni Lila ang indi gid namon malipatan, lakip ang kombension sa Warsaw, Poland, sang 1989. Madamo nga kauturan sa Russia ang nakatambong sa sining daku nga kombension, kag amo ini ang pinakauna nila nga natambungan nga kombension! Nakilala namon ang pila ka utod nga tinuig nga napriso sa Soviet Union bangod sang ila pagtuo.

Nalipay man ako sa pagbisita sa mga sanga talatapan sa bilog nga kalibutan para palig-unon ang mga Bethelite kag mga misyonero. Sa amon katapusan nga pagbisita sa sanga sa South Korea, nakilala namon ang 50 ka utod nga lalaki nga napriso sa Suwon. Positibo gid ang panimuot sini nga mga utod kag nalangkag sila nga maalagad liwat si Jehova sing hilway. Napalig-on gid kami nga makilala sila!—Roma 1:11, 12.

Nakita ko kon paano ginpakamaayo ni Jehova ang iya katawhan sa sulod sang mga tinuig. Sang nabawtismuhan ako sang 1943, mga 100,000 lang ang manugbantala. Subong, sobra na 8,000,000 ang nagaalagad kay Jehova sa 240 ka kadutaan. Ang kapisan sa pagbantala sang mga naggradwar sa Gilead nakabulig gid sing daku sa sini nga pag-uswag. Nalipay gid ako nga makilala ang madamo sa sini nga mga misyonero, kag mabuligan sila nga makakadto sa ila asaynment sa iban nga pungsod!

Wala gid ako maghinulsol sa akon desisyon nga mag-alagad sa Bethel sang pamatan-on ako. Ginpakamaayo gid ako ni Jehova. Magluwas sa kalipay sa pag-alagad sa Bethel, nalipay man kami ni Lila sa pila ka dekada nga pagbantala upod sa sarisari nga mga kongregasyon sa Brooklyn, diin madamo kami sing nangin abyan.

Nagaalagad gihapon ako sa Bethel kag ginabuligan ako ni Lila. Bisan pa sobra na ako 84 anyos, nalipay ako kay makabulig gihapon ako sa pag-asikaso sa mga sulat nga ginapadala kag ginabaton sang sanga.

Makalilipay gid mangin bahin sang dalayawon nga organisasyon ni Jehova, kag makita ang daku nga kinatuhayan sang mga nagaalagad kay Jehova kag sang mga wala nagaalagad sa iya. Matuod gid ang ginasiling sang Malaquias 3:18: “Makita ninyo liwat ang kinatuhayan sang matarong kag sang malaut, sang isa nga nagaalagad sa Dios kag sang isa nga wala nagaalagad sa iya.” Kada pagligad sang adlaw, makita naton nga nagalala pa gid ang kalibutan ni Satanas, kag ang mga tawo wala sing paglaum kag indi malipayon. Pero ang mga nagahigugma kag nagaalagad kay Jehova malipayon sa ila kabuhi, bisan pa sa sining mabudlay nga mga tion, kag sigurado ang ila paglaum sa palaabuton. Pribilehiyo gid naton nga ipalapnag ang maayong balita sang Ginharian! (Mat. 24:14) Malapit na lang gid dulaon sang Ginharian sang Dios ining daan nga kalibutan kag buslan sang bag-ong kalibutan. Ginakalangkagan na gid naton ini nga tion! Kon mag-abot ini, ang tanan nga matutom nga alagad ni Jehova mangin maayo na ang panglawas kag magakabuhi sing wala sing katapusan.