1, 2. (a) Paano maapektuhan ang isa ka Cristiano kon may pagbag-o sa iya kabuhi nga wala niya ginapaabot? (Tan-awa ang piktyur sa umpisa sini nga artikulo.) (b) Suno sa Salmo 131, ano nga panimuot ang makabulig para mangin malinong ang aton hunahuna?

SANG gin-asayn bilang mga payunir sanday Lloyd kag Alexandra, nasubuan sila sang primero. Kay man, sobra 25 ka tuig sila nga nag-alagad sa Bethel. Si Lloyd nagsiling: “Naanad na ako sa Bethel kag sa akon asaynment. Nahangpan ko ang mga rason sa pagbag-o, pero mga pila ka semana kag binulan nga masami ako nagabatyag nga daw ginsikway ako.” May mga tion nga positibo ang pagtamod ni Lloyd sa pagbag-o, pero gulpi lang nga masubuan naman sia.

² Kon may pagbag-o sa aton kabuhi nga wala naton ginapaabot, mahimo mabalaka kita kag ma-stress. (Hulu. 12:25) Mahimo mabudlayan pa gani kita nga batunon ini. Kon matabo ini sa aton, paano naton ‘mapakalma kag mapalinong’ ang aton kalag? (Basaha ang Salmo 131:1-3.) Binagbinagon naton ang pila ka karakter sa Biblia kag pila ka alagad ni Jehova sa aton tion subong nga nagbag-o ang kahimtangan pero nahuptan nila ang malinong nga hunahuna.

3. Paano nagbag-o ang kabuhi ni Jose?

³ Mga 17 anyos si Jose sang ginbaligya sia sang iya mga utod bilang ulipon. Nahisa sila kay Jose bangod sia ang paborito sang ila amay. (Gen. 37:2-4, 23-28) Mga 13 ka tuig nga ginbatas ni Jose nga mangin ulipon kag priso sa Egipto, nga malayo sa iya pinalangga nga amay nga si Jacob. Ano ang nakabulig kay Jose nga indi madulaan sing paglaum kag indi maghinakit?

4. (a) Sang napriso si Jose, sa ano niya ginsentro ang iya hunahuna? (b) Paano ginsabat ni Jehova ang mga pangamuyo ni Jose?

⁴ Sang napriso si Jose, mahimo ginsentro niya ang iya hunahuna sa mga pagpakamaayo ni Jehova. (Gen. 39:21; Sal. 105:17-19) Sang pamatan-on si Jose, may mga damgo sia nga naghalin sa Dios, kag mahimo nagpabakod ini sang iya pagsalig nga ginakahamut-an sia ni Jehova. (Gen. 37:5-11) Mahimo pila ka beses nga ginpabutyag niya kay Jehova ang iya mga kabudlayan. (Sal. 145:18) Ginsabat ni Jehova ang hanuot nga mga pangamuyo ni Jose paagi sa pagpasalig sa iya nga “kaupod niya” sia sa bisan ano nga pagtilaw.—Binu. 7:9, 10. *

5. Paano makabulig “ang paghidait sang Dios” para padayon kita nga mag-alagad?

⁵ Kon may mga kabudlayan kita, “ang paghidait sang Dios” makapakalma man sa aton kag magabantay sang aton ikasarang sa paghunahuna. (Basaha ang Filipos 4:6, 7.) Kon daw indi na naton masarangan ang aton mga problema, magdangop kita kay Jehova kag ang paghidait sang Dios magapabakod sa aton nga padayon nga mag-alagad kag indi mangampo. Binagbinagon naton kon paano ini ginhimo sang pila ka kauturan sa aton tion subong.

6, 7. Paano ang espesipiko nga mga pangamuyo makabulig sa aton nga mangin kalmado? Maghatag sing halimbawa.

⁶ Sang ginsilingan sanday Ryan kag Juliette nga mauntat na sila bilang temporaryo nga mga espesyal payunir, naluyahan sila sing buot. “Ginpangamuyo namon dayon ini kay Jehova,” siling ni Ryan. “Kabalo kami nga isa ini ka kahigayunan para mapakita namon nga nagasalig kami sa iya. Madamo ang bag-uhan sa amon kongregasyon, gani nangamuyo kami kay Jehova nga buligan kami nga magbakod ang amon pagtuo para mangin maayo kami nga halimbawa.”

⁷ Paano ginsabat ni Jehova ang ila pangamuyo? Si Ryan nagsiling: “Pagkatapos gid namon mangamuyo, nadula dayon ang negatibo nga mga balatyagon kag mga kabalaka nga nabatyagan namon sang primero. Ginbantayan sang paghidait sang Dios ang amon tagipusuon kag ikasarang sa paghunahuna. Narealisar namon nga padayon kami nga makabulig sa mga hilikuton ni Jehova kon husto ang amon panimuot.”

8-10. (a) Paano makabulig sa aton ang espiritu sang Dios kon nabalaka kita? (b) Paano kita mahimo buligan ni Jehova kon nagapanikasog kita nga unahon ang aton pag-alagad sa iya?

⁸ Ang espiritu sang Dios makapakalma sa aton kag makapahanumdom sa aton sang mga teksto sa Biblia nga makabulig sa aton nga unahon ang aton espirituwalidad. (Basaha ang Juan 14:26, 27.) Binagbinaga ang eksperiensia sang mag-asawa nga sanday Philip kag Mary nga nag-alagad sa Bethel sing halos 25 ka tuig. Sa sulod sang apat ka bulan, napatay ang ila mga iloy, napatay ang isa nila ka paryente, kag kinahanglan nila atipanon ang amay ni Mary nga may dementia.

⁹ Si Philip nagsiling: “Pamatyag ko nabatas ko ini nga mga kabudlayan, pero daw may dapat pa ako himuon. Dayon nabasa ko  ang parte sa Colosas 1:11 sa isa ka artikulo sang tulun-an nga edisyon sang Ang Lalantawan. Nagabatas matuod ako, pero indi bug-os. Dapat ‘magbatas ako sing bug-os nga may pagpailob kag kalipay.’ Ini nga teksto nagpahanumdom sa akon nga ang akon kalipay wala nagadepende sa akon kahimtangan, kundi sa paggiya sang espiritu sang Dios sa akon kabuhi.”

¹⁰ Bangod nagpanikasog sanday Philip kag Mary nga unahon ang ila pag-alagad kay Jehova, ginpakamaayo niya sila sa madamo nga paagi. Wala madugay paghalin nila sa Bethel, nakakita ang kada isa sa ila sing mga interesado magtuon sa Biblia nga madasig nga nag-uswag kag gusto magtuon sing sobra isa ka beses kada semana. Si Mary nagsiling: “Nalipay gid kami sa pagbulig sa ila, kag amo ini ang paagi ni Jehova sa pagsiling sa amon nga wala kami sing dapat kabalak-an.”

11, 12. (a) Ngaa ginpakamaayo ni Jehova si Jose? (b) Paano ginpadyaan si Jose sa iya pagbatas?

¹¹ Kon hinali lang nga nagbag-o ang aton kahimtangan, mahimo mabalaka kita dayon kag daw indi na kita kabalo sang aton himuon. Mahimo nga amo man sini ang ginbatyag ni Jose. Pero, ginhimo niya ang iya bug-os nga masarangan sa iya kahimtangan, gani ginpakamaayo sia ni Jehova. Bisan pa napriso si Jose, mapisan niya nga gintuman ang bisan ano nga ginsugo sa iya sang pangulo nga opisyal, pareho sang ginhimo niya sang nagaalagad pa sia kay Potifar.—Gen. 39:21-23.

¹² Isa ka adlaw, gintugyan kay Jose ang duha ka lalaki nga nagaalagad sadto sa palasyo sang Paraon. Bangod sang kaayo ni Jose sa ila, ginsugid nila sa iya ang ila mga problema kag ang ila makalilibog nga mga damgo sang nagligad nga gab-i. (Gen. 40:5-8) Wala pa sadto marealisar ni Jose nga ang ila pag-istoryahanay magaresulta sa iya kaayuhan. Bisan pa kinahanglan niya magbatas sing duha pa ka tuig sa prisuhan, ginpagua man sia sang ulihi. Kag sang adlaw mismo nga ginpagua sia, gintangdo man sia nga manuggahom nga ikaduha sa Paraon.—Gen. 41:1, 14-16, 39-41.

13. Ano ang himuon naton para pakamaayuhon kita ni Jehova bisan ano pa ang aton kahimtangan?

¹³ Pareho kay Jose, mahimo mabutang man kita sa kahimtangan nga indi naton kontrolado. Pero, kon padayon kita nga maghulat kag himuon naton ang aton bug-os nga masarangan bisan ano pa ang aton kahimtangan, pakamaayuhon gid kita ni Jehova. (Sal. 37:5) Matuod, “ginaligban” kita kon kaisa, pero suno kay apostol Pablo, indi gid matabo nga ‘wala na kita sing malutsan.’ (2 Cor. 4:8) Kon magpokus kita sa aton ministeryo, mangin matuod gid sa aton ining ginsiling ni Pablo.

14-16. Bisan pa nagbag-o ang kahimtangan ni Felipe nga ebanghelisador, paano sia nagpokus sa iya ministeryo?

¹⁴ Si Felipe nga ebanghelisador maayo gid nga halimbawa sang isa nga nagpokus sa iya ministeryo bisan pa nagbag-o ang iya kahimtangan. Sang didto sia sa Jerusalem, sunodsunod ang paghingabot sa mga Cristiano pagkatapos nga ginpatay si Esteban bilang martir. * Kag may bag-o sadto nga pribilehiyo si Felipe. (Binu. 6:1-6) Pero sang nag-alaplaag ang mga sumulunod sang Cristo, indi mabatas ni Felipe nga magpahimunong lang. Nagbantala sia sa siudad sang Samaria, nga ang kalabanan nga tawo didto wala pa makabati sang maayong balita.—Mat. 10:5; Binu. 8:1, 5.

¹⁵ Handa si Felipe nga magpagiya sa espiritu sang Dios, gani ginpakadto sia ni Jehova sa mga lugar nga ang mga pumuluyo wala pa makabati sang maayong balita. Sadto nga tion, ginapakanubo kag ginapakalain sang mga Judiyo ang mga Samaritano. Pero wala sing ginapasulabi si Felipe, gani ginbantalaan niya ang mga Samaritano. Kag ‘ginpamatian gid sia sing maayo sang bug-os nga kadam-an.’—Binu. 8:6-8.

¹⁶ Gingiyahan dayon si Felipe sang espiritu sang Dios nga magkadto sa mga siudad sang Asdod kag Cesarea, nga madamo sing Gentil. (Binu. 8:39, 40) Samtang didto sia nagaistar, nagbag-o liwat ang iya kahimtangan. Mga 20 ka tuig pagkatapos sang iya pagbantala sa Samaria, may pamilya na sia. Bisan pa nagbag-o ang kahimtangan ni Felipe, nagpokus gihapon sia sa iya ministeryo, kag ginpakamaayo ni Jehova ang iya pamilya.—Binu. 21:8, 9.

17, 18. Paano ang pagpokus sa ministeryo makabulig sa aton nga mangin malipayon kag positibo kon nagbag-o ang aton kahimtangan?

¹⁷ Madamo nga nagaalagad sing bug-os tion ang makapamatuod nga ang pagpokus sa ministeryo nakabulig sa ila nga mangin malipayon kag positibo bisan nagbag-o ang ila kahimtangan. Halimbawa, sang naghalin sa Bethel ang mag-asawa nga sanday Osborne kag Polite, nga taga-South Africa, abi nila makakita sila dayon sing maistaran kag part-time nga obra. Pero nagsiling si Osborne: “Nadugayan kami makakita sang obra.” Si Polite nagsiling: “Wala kami makakita sang obra sa sulod sang tatlo ka bulan, kag wala kami sing sinuptan. Mabudlay gid ini.”

¹⁸ Ano ang nakabulig sa ila nga magbatas? Si Osborne nagsiling: “Ang pagbantala upod sa kongregasyon nakabulig gid sa amon nga  makapamensar sing maayo kag mangin positibo. Sa baylo nga magpahimunong lang kag pamensaron ang mga problema, nangin masako kami sa pagbantala, kag nalipay gid kami sa sini. Padayon man kami nga nangita sang obra, kag nakakita gid man kami sang ulihi.”

19-21. (a) Ano ang makabulig nga mangin malinong ang aton hunahuna? (b) Ano ang mga pagpakamaayo kon magpasibu kita sa mga pagbag-o sa aton kahimtangan?

¹⁹ Ginapakita sang sini nga mga halimbawa nga kon ginahimo naton ang aton bug-os nga masarangan sa aton kahimtangan kag nagahulat kita nga may pagsalig kay Jehova, mangin malinong ang aton hunahuna. (Basaha ang Miqueas 7:7.) Sa ulihi, makita naton ang madamo nga espirituwal nga pagpakamaayo bangod nagpasibu kita sa mga pagbag-o sa aton kahimtangan. Amo ini ang ginsiling ni Polite, nga ginsambit kaina, parte sa iya eksperiensia: “Ang pag-asayn sa amon bilang mga payunir nagtudlo sa akon nga magsalig gid sing bug-os kay Jehova bisan pa tuman kabudlay sang kahimtangan. Gani nagsuod pa gid ako sa iya.”

²⁰ Si Mary, nga ginsambit kaina, nagapayunir gihapon bisan pa ginaatipan niya ang iya tigulang na nga amay. Nagsiling sia: “Natun-an ko nga kon nabalaka ako, dapat ko untatan ang pagkabalaka, dayon mangamuyo, kag magrelaks. Ang pagsalig sing bug-os kay Jehova amo ang pinakaimportante nga leksion nga natun-an ko, kag maabot ang tion nga labi pa gid naton ini nga dapat ipakita.”

²¹ Sanday Lloyd kag Alexandra, nga ginsambit sa umpisa, nagsiling nga ang pagbag-o sa ila kahimtangan nagtilaw sang ila pagtuo sa paagi nga wala nila ginapaabot. Pero nagsiling sila: “Ang mga pagtilaw sa amon pagtuo nagbulig sa amon nga makita kon bala matuod gid ang amon pagtuo kag kon bala makapabakod ini sa amon sa tion sang mga kabudlayan. Mas naghamtong kami bangod sini.”

22. Kon ginahimo naton ang aton bug-os nga masarangan sa aton kahimtangan, ano ang masaligan naton?

²² Kon may pagbag-o sa aton kabuhi nga wala naton ginapaabot, pareho sang bag-o nga asaynment sa pag-alagad, problema sa panglawas, ukon responsibilidad sa pamilya, magsalig nga nagaulikid si Jehova sa imo kag buligan ka niya sa husto nga tion. (Heb. 4:16; 1 Ped. 5:6, 7) Gani, himua ang imo bug-os nga masarangan sa imo kahimtangan. Mangamuyo sa aton Amay sa langit para magsuod ka pa gid sa iya, kag magsalig sa iya sing bug-os. Kon himuon mo ini, mangin malinong man ang imo hunahuna bisan pa nagbag-o ang imo kahimtangan.