1. Ngaa sigurado gid kita nga nagakabuhi na kita sa “katapusan nga mga adlaw”?

KON natawo ka pagkatapos sang 1914, nagakabuhi ka sa “katapusan nga mga adlaw” sini nga sistema. (2 Tim. 3:1) Nabatian naton tanan ang mga balita parte sa mga hitabo nga gintagna ni Jesus. Lakip sa sini ang mga inaway, kakulang sa pagkaon, mga linog, mga balatian, ang pagdamo sang kalautan, kag ang paghingabot sa katawhan ni Jehova. (Mat. 24:3, 7-9, 12; Luc. 21:10-12) Nakita man naton ang mga pamatasan sang mga tawo nga gintagna ni apostol Pablo. (Tan-awa ang kahon nga “ Ang mga Tawo Subong.”) Bilang mga Saksi ni Jehova, sigurado gid kita nga nagakabuhi na kita sa “ulihi nga bahin sang mga adlaw.”—Miq. 4:1.

2. Ano nga mga pamangkot ang dapat masabat?

² Bangod malawig na nga panahon ang nagligad sugod sang 1914, nagakabuhi na kita sa ulihi nga bahin sang “katapusan nga mga adlaw.” Bangod malapit na gid ang katapusan sini nga sistema, dapat naton mabal-an ang sabat sa sining importante nga mga pamangkot: Ano ang matabo sa ulihi nga bahin sang “katapusan nga mga adlaw”? Kag ano ang gusto ni Jehova nga himuon naton samtang ginahulat naton ini nga matabo?

3. Suno sa tagna sa 1 Tesalonica 5:1-3, ano ang ipahibalo sang mga lider sang kalibutan?

³ Basaha ang 1 Tesalonica 5:1-3. Ginsambit ni Pablo “ang adlaw ni Jehova.” Sa sini nga teksto, magasugod ini nga tion kon salakayon na ang “Babilonia nga Daku,” nga amo ang bug-os kalibutan nga emperyo sang butig nga relihion, kag matapos ini sa Armageddon. (Bug. 16:14, 16; 17:5) Antes magsugod ini nga “adlaw,”  ipahibalo sang mga lider sang kalibutan nga may ara na “Paghidait kag kalig-unan!” (Ang iban nga translation nagasiling: “Malinong ang tanan kag wala sing katalagman.”) Kon kaisa, ginagamit sang mga lider sang kalibutan ini nga mga ekspresyon kon nagahambalanay sila para mangin maayo ang relasyon sang mga pungsod. * Pero mangin tuhay ang ginsiling sang Biblia nga pagpahibalo nga may “paghidait kag kalig-unan.” Ngaa? Kon matabo ini, pensaron sang mga tawo nga nagmadinalag-on ang ila mga lider para mangin malinong kag wala sing katalagman ang kalibutan. Pero ang matuod, magasugod na ang “dakung kapipit-an” kag magaabot dayon ang “hinali nga kalaglagan.”—Mat. 24:21.

4. (a) Ano pa ang dapat naton mabal-an parte sa pagpahibalo nga may “paghidait kag kalig-unan”? (b) Ano na ang nabal-an naton parte sa sini?

⁴ Wala kita kabalo kon ngaa ipahibalo sang mga lider sang kalibutan nga may “paghidait kag kalig-unan,” ukon paano nila himuon ini nga pagpahibalo. Wala man kita kabalo kon makaisa lang ini himuon nga pahibalo ukon sunodsunod ini nga mga pahibalo. Pero kabalo kita nga indi kita dapat magpati nga mapahanabo sang mga lider sang kalibutan ang matuod nga paghidait. Ginsilingan kita sang Biblia nga dapat naton bantayan ang pagpahibalo nila sini. Sinyales ini nga magasugod na “ang adlaw ni Jehova”!

5. Suno sa 1 Tesalonica 5:4-6, ano ang dapat naton himuon para mangin handa kita sa “adlaw ni Jehova”?

⁵ Basaha ang 1 Tesalonica 5:4-6. Ginlaygayan kita ni Pablo kon ano ang dapat naton himuon para mangin handa kita sa “adlaw ni Jehova.” “Indi kita [dapat] magtulog subong sang ginahimo sang iban.” Dapat “magpabilin kita nga nagamata” kag pirme mangin alisto. Halimbawa, dapat kita maghalong para makapabilin kita nga neutral kag indi kita dapat magpasilabot sa mga isyu sa pulitika. Kon magpasilabot kita sa sini, mangin “bahin [na kita] sang kalibutan.” (Juan 15:19) Kabalo kita nga mahanabo ang paghidait sa bilog nga kalibutan paagi lamang sa Ginharian sang Dios.

6. Ano ang gusto naton nga mabal-an sang iban, kag ngaa?

⁶ Gusto man naton buligan ang iban nga mabal-an ang gintagna sang Biblia nga matabo sa kalibutan. Dapat na naton ini himuon subong, kay kon magsugod na ang dakung kapipit-an, indi na ini ang tion para palig-unon ang mga tawo nga alagaron si Jehova. Amo ini ang rason kon ngaa dapat na kita magbantala subong! *

7. Ano ang gusto ni Jehova nga himuon naton subong?

⁷ Malip-ot na lang ang nabilin nga tion antes magsugod “ang adlaw ni Jehova,” gani gusto niya nga mangin mapisan kita sa pagbantala. Dapat “madamo [kita] sing ginahimo sa hilikuton sang Ginuo.” (1 Cor. 15:58) Gintagna ni Jesus ang dapat naton himuon. Sang ginsugid niya ang  importante nga mga matabo sa katapusan nga mga adlaw, ginsiling man niya ini: “Subong man, dapat anay ibantala ang maayong balita sa tanan nga pungsod.” (Mar. 13:4, 8, 10; Mat. 24:14) Pamensara ini: Kon nagabantala ka, nagabulig ka nga matuman ini nga tagna sang Biblia!

8. Ngaa masiling naton nga padayon nga nagauswag ang pagbantala parte sa Ginharian?

⁸ Ngaa masiling naton nga nagauswag ang pagbantala parte sa Ginharian? Kada tuig, madamo pa gid nga mga tawo ang makabati sang maayong balita sang Ginharian. Halimbawa, hunahunaa ang pagdamo sang manugbantala sang Ginharian sa bilog nga kalibutan sa katapusan nga mga adlaw. Sang 1914, may 5,155 ka manugbantala sa 43 ka pungsod. Subong, mga walo ka milyon kag tunga na ang mga manugbantala sa 240 ka pungsod! Pero wala pa matapos ang aton pagbantala. Dapat padayon naton nga isugid sa iban nga ang Ginharian sang Dios lamang ang makasolbar sang tanan nga problema sang mga tawo.—Sal. 145:11-13.

9. Ngaa dapat naton padayon nga ibantala ang mensahe sang Ginharian?

⁹ Si Jehova ang magasiling kon san-o matapos ang aton pagbantala parte sa Ginharian. Ano na lang kalip-ot ang nabilin nga tion para makilala pa sang mga tawo si Jehova nga Dios kag si Jesucristo? (Juan 17:3) Wala kita kabalo. Pero kabalo kita nga antes magsugod ang dakung kapipit-an, “ang tanan nga may husto nga panimuot sa pagtigayon sing kabuhi nga wala sing katapusan” puede pa magpamati sa maayong balita kag magdesisyon nga mag-alagad kay Jehova. (Binu. 13:48) Paano naton sila mabuligan samtang may tion pa?

10. Ano ang ginhatag sa aton ni Jehova para matudlo naton sa mga tawo ang kamatuoran?

¹⁰ Ginagamit ni Jehova ang iya organisasyon para hatagan kita sang tanan nga kinahanglan naton sa pagtudlo sa mga tawo sang kamatuoran. Halimbawa, ginahanas kita kada semana sa aton midweek miting. Ginatudluan kita sini kon ano ang aton ihambal sa una nga pag-istoryahanay kag kon magbalik kita sa mga interesado. Ginabuligan man kita sini kon paano itudlo ang Biblia sa mga tawo. Ginhatagan man kita sang organisasyon ni Jehova sang Mga Gamit sa Pagpanudlo. Ginabuligan kita sini para . . .

• makasugod sa pag-istorya,

• mangin interesado ang mga tawo sa aton mensahe,

• mapalig-on ang mga tawo nga magtuon pa gid,

• matudlo ang kamatuoran sa mga ginatudluan naton sang Biblia, kag

•   maagda ang mga interesado nga kadtuan ang aton website kag ang aton Kingdom Hall.

Maayo kon may ara na kita sini nga mga gamit. Pero mas maayo kon ginagamit naton ini. * Halimbawa, kon mahatagan mo sang tract ukon magasin ang isa ka interesado, may basahon sia samtang wala mo pa sia mabalikan. Responsibilidad sang kada isa sa aton nga mangin mapisan sa pagbantala parte sa Ginharian kada bulan.

11. Ngaa ginhimo ang Online Bible Study Lessons?

¹¹ Ang isa pa ka paagi kon paano ginabuligan ni Jehova ang mga tawo nga mabal-an ang kamatuoran amo ang Online Bible Study Lessons sa jw.org^®. (Buksi ang BIBLE TEACHINGS > ONLINE LESSONS.) Ngaa ginhimo ini nga mga leksion? Kada bulan, linibo ka tawo ang naga-search sa Internet parte sa mga topiko sa Biblia. Ang mga leksion sa aton website makabulig sa ila nga mabal-an ang kamatuoran sa Pulong sang Dios. Ang iban nga maistorya mo basi nagaduhaduha pa kon bala matuon sila sang Biblia upod sa isa ka Saksi. Ipakita sa ila ini nga seksion sa aton website ukon i-send sa ila ang link sa sini nga mga leksion. *

12. Ano ang mabal-an sang isa kon tun-an niya ang Online Bible Study Lessons?

¹² Ginabinagbinag sa aton Online Bible Study Lessons ini nga mga topiko: “Ang Biblia kag ang Awtor Sini,” “Ang Panguna nga mga Karakter sa Biblia,” kag “Ang Mensahe sang Biblia nga Nagahatag sang Paglaum.” Kon tun-an sang isa ang mga leksion, amo ini ang mabal-an niya:

• Kon paano makabulig ang Biblia sa isa ka tawo

• Kon sin-o si Jehova, si Jesus, kag ang mga anghel

• Kon ngaa gintuga sang Dios ang mga tawo

• Kon ngaa nagakatabo ang malain kag pag-antos

Ginabinagbinag man sa mga leksion ang himuon ni Jehova para . . .

• madula ang pag-antos kag kamatayon

• mabanhaw ang mga patay, kag

• mabuslan sang Ginharian sang Dios ang napaslawan nga mga gobierno sang tawo.

13. Kon matapos sang isa ang Online Bible Study Lessons, kinahanglan pa bala sia tudluan sang isa ka Saksi? Ipaathag.

¹³ Ini nga mga leksion indi tal-us sa kinaandan naton nga ginahimo nga pagtuon sang Biblia. Ginhatagan kita ni Jesus sang pribilehiyo nga tudluan ang mga tawo para mangin disipulo sila. Ginhimo ini nga mga leksion para tun-an ini sang mga interesado, magustuhan nila ang ila matun-an, kag mapalig-on sila nga magtuon pa gid. Basi batunon nila ang isa ka pagtuon sang Biblia. Sa katapusan sang kada leksion, ginaagda ang nagabasa nga magpadala sing request para magtuon sang Biblia upod sa isa ka Saksi. Paagi sa aton website, makabaton kita sang sobra 230 ka request kada adlaw para sa pagtuon sang Biblia sa bilog nga kalibutan! Importante gid ining personal nga pagtudlo sa isa ka tawo!

14. Suno sa sugo ni Jesus sa Mateo 28:19, 20, ano ang dapat naton himuon sa aton bug-os nga masarangan, kag ngaa?

¹⁴ Basaha ang Mateo 28:19, 20. Kon ginatudluan naton ang mga tawo sang Biblia, dapat naton himuon ang aton bug-os nga masarangan ‘agod mangin disipulo sila kag tudluan sila nga tumanon ang tanan nga ginsugo ni Jesus.’ Dapat naton buligan ang mga tawo nga mahangpan nga dapat sila magdesisyon nga mag-alagad kay Jehova kag suportahan ang iya Ginharian. Buot silingon sini nga dapat naton palig-unon ang mga tawo nga iaplikar ang ila natun-an, idedikar ang ila kabuhi kay Jehova, kag magpabawtismo. Kon himuon nila ini, maluwas sila sa adlaw ni Jehova.—1 Ped. 3:21.

15. Ano ang indi na naton pagpadayunon, kag ngaa?

 ¹⁵ Malip-ot na lang ang nabilin nga tion antes mag-abot ang katapusan sini nga sistema. Bangod sini, mas maayo kon indi na lang naton pagpadayunon ang pagtudlo sang Biblia sa mga tawo nga wala nagahimo sang mga pagbag-o para ipakita nga gusto nila mangin disipulo sang Cristo. (1 Cor. 9:26) Ginadalian gid ang aton hilikuton subong! Madamo pa nga tawo ang dapat makabati sang mensahe sang Ginharian samtang may tion pa.

16. Suno sa Bugna 18:2, 4, 5, 8, ano ang dapat naton tanan himuon? (Tan-awa man ang footnote.)

¹⁶ Basaha ang Bugna 18:2, 4, 5, 8. Ginapakita sini nga teksto ang isa pa nga gusto ni Jehova nga himuon sang mga nagasimba sa iya. Dapat siguraduhon sang tanan nga Cristiano nga ginalikawan nila sing bug-os ang butig nga relihion. Antes matun-an sang isa ang kamatuoran sa Biblia, mahimo nga miembro sia sang isa ka butig nga relihion. Mahimo nga nagasimba sia sa sini kag nagaentra sa mga hilikuton sini. Ukon mahimo nga nagaamot sia sing kuarta sa sini nga relihion. Para maaprobahan bilang indi bawtismado nga manugbantala ang isa nga nagatuon sang Biblia, dapat siguraduhon niya nga indi na sia bahin sang butig nga relihion. Dapat sia maghimo sing sulat sa iya anay simbahan ukon relihion nga bahin sang Babilonia nga Daku nga nagapahibalo nga indi na sia miembro sini. *

17. Ano nga klase sang trabaho ang dapat likawan sang isa ka Cristiano, kag ngaa?

¹⁷ Dapat siguraduhon sang matuod nga Cristiano nga wala gid sing labot sa butig nga relihion ang iya trabaho. (2 Cor. 6:14-17) Halimbawa, indi sia dapat empleyado sang isa ka simbahan. Isa pa, ang isa ka Cristiano nga empleyado sang isa ka kompanya indi dapat maghimo sang daku nga trabaho sa pasilidad nga ginagamit sa butig nga pagsimba. Kag kon may kaugalingon sia nga kompanya, indi gid sia dapat mangita sing ulubrahon ukon magbaton sang kontrata sa bisan ano nga bahin sang butig nga relihion. Ngaa indi gid naton ini paghimuon? Bangod indi naton gusto nga may bahin kita sa butig nga mga panudlo kag sala nga mga ginahimo sang butig nga relihion nga mahigko sa pagtamod sang Dios.—Isa. 52:11. *

18. Paano gintuman sang isa ka utod ang mga prinsipio sa Biblia sa iya trabaho?

 ¹⁸ Pila ka tuig na ang nagligad, gusto ipaobra sang isa ka kontraktor sa isa ka gulang nga panday ang gamay nga kalay-uhon sa isa ka simbahan sa banwa nga ginaistaran sang gulang. Nabal-an sang kontraktor nga pirme nagapangindi ang gulang sa pag-obra sa mga simbahan. Pero wala na sang iban pa nga makita ang kontraktor para magkay-o. Gintuman sang gulang ang mga prinsipio sa Biblia, gani wala niya ginbaton ang obra. Sang madason nga semana, ara sa newspaper ang piktyur sang isa ka panday nga nagabutang sang krus sa simbahan. Kon ginbaton sang aton utod ini nga obra, sia ang ara sa piktyur sa newspaper. Naguba gid kuntani ang iya reputasyon sa mga kauturan! Hunahunaa man ang ginbatyag ni Jehova kon natabo ini.

19-20. (a) Ano ang natun-an naton? (b) Ano pa ang dapat naton tun-an?

¹⁹ Gintagna sang Biblia nga ang masunod nga importante nga matabo amo ang pagpahibalo sang mga lider sang kalibutan nga may ara na “paghidait kag kalig-unan.” Bangod ginatudluan kita ni Jehova, kabalo kita nga indi mapahanabo sang mga pungsod ang matuod kag wala sing katapusan nga paghidait. Ano ang dapat naton himuon antes ini matabo kag antes mag-abot ang hinali nga kalaglagan? Gusto ni Jehova nga mangin mapisan kita sa pagbantala sang mensahe sang Ginharian kag sa pagtudlo sa madamo pa nga tawo para mangin disipulo sila. Dapat man naton likawan sing bug-os ang butig nga relihion. Lakip sa sini ang paghalin bilang miembro sang butig nga relihion kag paglikaw sa trabaho nga may labot sa sini.

²⁰ May iban pa nga matabo sa ulihi nga bahin sang “katapusan nga mga adlaw.” Kag may iban pa nga gusto ni Jehova nga himuon naton. Ano ini, kag paano kita mangin handa sa tanan nga matabo sa palaabuton? Binagbinagon naton ini sa masunod nga artikulo.