1. Kon ginaistoryahan ang parte sa maluluy-on nga tawo, ano ang mahimo nga ginahunahuna naton?

KON ginaistoryahan ang parte sa maluluy-on nga tawo, mahimo nga ginahunahuna naton ang isa ka tawo nga maayo, mapinalanggaon, kag maalwan. Mahimo nga ginahunahuna man naton ang ilustrasyon ni Jesus parte sa mabinuligon nga Samaritano. Ini nga tawo nga taga-iban nga pungsod “nagpakita sang kaluoy” sa isa ka Judiyo nga ginbakol kag ginkawatan. “Naluoy” ang Samaritano sa sini nga Judiyo kag ginsigurado niya nga may magaatipan sa iya. (Luc. 10:29-37) Ini nga ilustrasyon nagatudlo sa aton sang dalayawon nga kinaiya sang aton Dios, nga amo ang kaluoy. Maluluy-on ang Dios bangod palangga niya kita. Kag kada adlaw, ginapakitaan niya kita sang kaluoy.

2. Ano ang isa pa ka paagi nga mapakita ang kaluoy?

² May isa pa ka paagi nga mapakita ang kaluoy. Amo ini ang indi pagsilot sa nakasala kon may basihan nga himuon ini. Base sa sini, masiling naton nga maluluy-on gid si Jehova sa aton. “Wala niya kita ginsilutan sang nagakabagay sa aton mga sala,” siling sang salmista. (Sal. 103:10) Pero may mga tion nga kinahanglan disiplinahon ni Jehova ang nakasala.

3. Ano nga mga pamangkot ang binagbinagon naton?

³ Sa sini nga artikulo, binagbinagon naton ang tatlo ka pamangkot: Ngaa nagapakita sang kaluoy si Jehova? Pagpakita bala sang kaluoy ang pag-disfellowship? Kag ano ang makabulig sa aton nga mapakita ang kaluoy? Binagbinagon naton kon paano ginasabat sang Pulong sang Dios ini nga mga pamangkot.

4. Ngaa nagapakita sang kaluoy si Jehova?

⁴ Maluluy-on si Jehova bangod sang iya gugma. Nagsulat si apostol Pablo nga ang Dios “bugana sa kaluoy.” Ginpaathag ni Pablo nga maluluy-on ang Dios bangod ginhatagan niya sang paglaum nga  mabuhi sa langit ang iya hinaplas nga mga alagad bisan pa indi sila perpekto. (Efe. 2:4-7) Pero indi lang ang iya hinaplas nga mga alagad ang ginapakitaan ni Jehova sang kaluoy. Si salmista David nagsulat: “Si Jehova maayo sa tanan, kag ang iya kaluoy makita sa tanan niya nga ginahimo.” (Sal. 145:9) Bangod palangga niya ang mga tawo, nagapakita gid sia sang kaluoy basta may basihan sia nga ipakita ini.

5. Paano nabal-an ni Jesus ang parte sa kaluoy ni Jehova?

⁵ Kabalo si Jesus nga gusto gid ni Jehova nga magpakita sang kaluoy bangod sang iya gugma. Sia ang may pinakamadamo nga nabal-an parte sa sini, bangod kaupod niya si Jehova sa langit sa malawig nga tion antes sia nagkadto sa duta. (Hulu. 8:30, 31) Madamo nga beses nga nakita ni Jesus nga ginpakitaan sang iya Amay sang kaluoy ang makasasala nga mga tawo. (Sal. 78:37-42) Kon nagatudlo si Jesus sa mga tawo, pirme niya ginapatalupangod ining dalayawon nga kinaiya sang iya Amay.

6. Ano nga ilustrasyon ang ginsugid ni Jesus para buligan kita nga mahangpan ang kaluoy sang iya Amay?

⁶ Sa nagligad nga artikulo, ginbinagbinag naton ang makatalandog nga ilustrasyon ni Jesus parte sa rebelyuso nga anak. Ginbuligan kita sini nga mahangpan nga gusto gid ni Jehova magpakita sang kaluoy bangod sang iya gugma. Naghalin ang anak sa ila balay kag “gin-uyangan niya ang iya pagkabutang paagi sa patuyang nga pagkabuhi.” (Luc. 15:13) Sang ulihi, ginhinulsulan niya ang iya imoral nga pagkabuhi, nagpaubos sia, kag nagpauli sia sa ila balay. Ano ang reaksion sang iya amay? Nabal-an dayon sang anak kon ano ang ginabatyag sang iya amay. Si Jesus nagsiling: “Samtang malayo pa [ang anak], nakita sia sang iya amay. Naluoy gid ang iya amay sa iya, gani nagdalagan sia kag ginhakos ang iya anak kag mapinalanggaon nga ginhalukan.” Wala ginpakahuy-an sang amay ang iya anak. Sa baylo, naluoy sia sa iya anak. Gani ginpatawad niya sia kag ginbaton sia liwat sa ila pamilya. Daku gid ang sala sang rebelyuso nga anak. Pero bangod naghinulsol sia, ginpatawad sia sang iya amay. Sa sini nga ilustrasyon, ang maluluy-on nga amay nagapatuhoy kay Jehova. Ginpakita ni Jesus nga handa ang iya Amay nga patawaron ang mga nakasala basta sinsero ang ila paghinulsol.—Luc. 15:17-24.

7. Ngaa masiling naton nga maalam gid si Jehova sa iya pagpakita sang kaluoy?

⁷ Nagapakita sang kaluoy si Jehova bangod sang iya indi matupungan nga kaalam. Ang kaalam ni Jehova indi lang basta isa ka kinaiya. Sa baylo, ang Biblia nagasiling nga “ang kaalam nga halin sa langit . . . puno sang kaluoy kag maayong mga bunga.” (Sant. 3:17) Pareho sa isa ka mahigugmaon  nga ginikanan, kabalo si Jehova nga para sa kaayuhan sang iya katawhan kon pakitaan niya sila sang kaluoy. (Sal. 103:13; Isa. 49:15) Bangod sang kaluoy ni Jehova sa iya katawhan, may paglaum sila sa palaabuton bisan pa indi sila perpekto. Gani bangod maalam gid si Jehova, pirme gid sia nagapakita sang kaluoy basta may nagakaigo nga basihan. Pero kabalo man si Jehova kon san-o sia indi dapat magpakita sang kaluoy. Bangod maalam sia, wala gid sia nagapakita sang kaluoy kon ang paghimo sini magakunsinti sa paghimo sang sala.

8. Ano ang dapat himuon kon kaisa, kag ngaa?

⁸ Ibutang ta nga ang isa ka alagad sang Dios hungod nga nagahimo sang sala. Ano ang dapat naton himuon? Gintuytuyan ni Jehova si Pablo nga isulat kon ano ang dapat naton himuon. Nagsiling sia: “Untatan ninyo ang pagpakig-upod” sa iya. (1 Cor. 5:11) Gina-disfellowship sa kongregasyon ang mga nakasala nga wala nagahinulsol. Dapat ini himuon para maamligan ang mga kauturan, kag para mapakita naton nga ginasunod naton ang mga ginapatuman ni Jehova. Pero may iban nga nagasiling nga indi pagpakita sang kaluoy sang Dios ang pag-disfellowship. Matuod bala ini? Tan-awon naton.

9-10. Base sa Hebreo 12:5, 6, ngaa masiling naton nga pagpakita sang kaluoy ang pag-disfellowship? Maghatag sing ilustrasyon.

⁹ Kon ginpabalo sa miting sang kongregasyon nga ang aton pinalangga “indi na isa sa mga Saksi ni Jehova,” nasubuan gid kita. Mahimo nagapalibog kita kon ngaa gin-disfellowship gid ang aton pinalangga. Pagpakita gid man bala sang kaluoy ang pag-disfellowship? Huo. Kon indi pagdisiplinahon ang isa nga nagakinahanglan sini, indi ini maalamon, maluluy-on, ukon mahigugmaon. (Hulu. 13:24) Kon i-disfellowship ang nakasala nga wala nagahinulsol, makabulig bala ini sa iya nga magbag-o? Huo. Madamo nga kauturan nga nakahimo sang serioso nga sala ang nagsiling nga ang pag-disfellowship sa ila amo ang nakabulig sa ila nga makamarasmas, magbag-o, kag magbalik kay Jehova.—Basaha ang Hebreo 12:5, 6.

¹⁰ Binagbinaga ini nga ilustrasyon. Natalupangdan sang manugbantay nga nagamasakit ang isa niya ka karnero. Kabalo ang manugbantay nga para mabulong niya ang nagamasakit nga karnero, dapat niya painon sa panong ang karnero. Pero gusto sang mga karnero nga ara sila pirme sa panong, kag nagalalain sila kon ginapain sila. Mapintas bala ang manugbantay kay ginpain niya ang nagamasakit nga karnero? Indi. Kabalo sia nga kon pabay-an lang niya ang nagamasakit nga karnero sa panong, malatnan gid ang iban nga karnero. Paagi sa pagpain sa nagamasakit nga karnero, ginaamligan niya ang bilog nga panong.—Ipaanggid ang Levitico 13:3, 4.

11. (a) Ngaa mapaanggid naton sa nagamasakit nga karnero ang na-disfellowship? (b) Ano ang mga puede himuon sang mga na-disfellowship kag paano sila mabuligan?

¹¹ Kon gin-disfellowship ang isa ka utod, daw pareho sia sa nagamasakit nga karnero. Nagamasakit sia bangod nahalitan ang iya kaangtanan kay Jehova. (Sant. 5:14) Posible nga maimpluwensiahan niya ang iban nga maghimo man sang malain, pareho sa isa ka tawo nga may balatian nga puede makalaton sa iban. Gani may mga sitwasyon nga kinahanglan ipain sa kongregasyon ukon i-disfellowship ang nakasala. Ginapakita sini nga pagdisiplina nga palangga ni Jehova ang iya matutom nga katawhan sa kongregasyon, kag mahimo ini makabulig sa nakasala nga makamarasmas kag maghinulsol. Puede gihapon maka-attend sa mga miting ang na-disfellowship, gani makabati sia sang mga laygay halin sa Biblia kag mapabakod niya liwat ang iya pagtuo. Puede man sia makakuha sang mga publikasyon kag makatan-aw sang JW Broadcasting^®. Kag kon makita sang mga gulang nga nagahimo sia sang mga pagbag-o, mahimo nila sia laygayan kon kaisa para mabuligan sia nga mangin maayo liwat ang iya kaangtanan  kay Jehova kag makapanumbalik bilang Saksi ni Jehova. *

12. Ano ang mahigugmaon kag maluluy-on nga paagi nga puede himuon sang mga gulang para sa nakasala nga wala nagahinulsol?

¹² Dapat naton tandaan nga ang mga gina-disfellowship lang amo ang mga nakasala nga wala nagahinulsol. Kabalo ang mga gulang nga serioso gid ini nga desisyon, gani ginabinagbinag gid nila ini sing maayo. Kabalo sila nga nagadisiplina si Jehova “sa nagakaigo nga paagi.” (Jer. 30:11) Palangga nila ang ila mga kauturan, kag indi nila gusto nga mahalitan ang kaangtanan sang ila mga kauturan kay Jehova. Pero kon kaisa, kinahanglan i-disfellowship ang nakasala para mapakita ang gugma kag kaluoy.

13. Ngaa dapat i-disfellowship ang isa ka utod sa Corinto?

¹³ Binagbinaga ang ginhimo ni apostol Pablo sa isa nga nakasala nga wala nagahinulsol. May isa ka utod sa Corinto nga nagahimo sang seksuwal nga imoralidad sa asawa sang iya amay. Makahuluya gid ini! Kabalo si Pablo nga ginsilingan ni Jehova ang mga Israelinhon sang una: “Ang lalaki nga nagahulid sa asawa sang iya amay nagapakahuya sa iya amay. Dapat patyon sila nga duha.” (Lev. 20:11) Pero indi gid pagsuguon ni Pablo ang kongregasyon nga patyon ini nga tawo. Gani ginsilingan niya ang mga taga-Corinto nga i-disfellowship ang nakasala. May malain nga impluwensia sa iban nga kauturan sa kongregasyon ang imoral nga ginahimo sini nga tawo. Para gani sa iban, indi serioso ang iya sala.—1 Cor. 5:1, 2, 13.

14. Paano ginpakitaan ni Pablo sang kaluoy ang na-disfellowship nga tawo sa Corinto, kag ngaa ginhimo ini ni Pablo? (2 Corinto 2:5-8, 11)

¹⁴ Sang ulihi, nabal-an ni Pablo nga daku gid ang pagbag-o sini nga tawo. Matuod gid ang iya paghinulsol. Bisan pa nahuy-an ang kongregasyon bangod sang ginhimo sang nakasala, ginsilingan ni Pablo ang mga gulang nga indi niya luyag nga “mangin matigdas.” Ginsilingan niya sila: “Patawara ninyo sia kag palig-una.” Talupangda kon ngaa ginsilingan sila ni Pablo nga himuon ini: “Agod indi sia madaug sang tuman nga kasubo.” Naghinulsol ini nga tawo kag naluoy si Pablo sa iya. Indi gusto ni Pablo nga maluyahan sang buot ini nga tawo bangod sang grabe nga kasubo sa iya nahimo, kay basi maghunahuna sia nga indi na gid sia mapatawad.—Basaha ang 2 Corinto 2:5-8, 11.

15. San-o dapat magpadapat sang mabug-at nga disiplina ang mga gulang, kag san-o sila dapat magpakita sang kaluoy?

¹⁵ Pareho kay Jehova, nagapakita man sang  kaluoy ang mga gulang bangod sang ila gugma. Ipadapat nila ang mabug-at nga disiplina kon kinahanglanon, pero magapakita man sila sang kaluoy kon posible kag kon may nagakaigo nga basihan nga himuon ini. Kon indi gid pagdisiplinahon sang mga gulang ang nakasala, wala sila nagapakita sang kaluoy. Sa baylo, ginakunsinti nila ang paghimo sang sala. Pero ang mga gulang lang bala ang dapat magpakita sang kaluoy?

16. Suno sa Hulubaton 21:13, ano ang himuon ni Jehova sa mga wala nagapakita sang kaluoy?

¹⁶ Ginapanikasugan sang tanan nga alagad ni Jehova nga ilugon ang iya kaluoy. Ngaa? Ang isa ka rason amo nga indi pagpamatian ni Jehova ang mga wala nagapakita sang kaluoy sa iban. (Basaha ang Hulubaton 21:13.) Indi naton gusto nga indi pagpamatian ni Jehova ang aton mga pangamuyo, gani indi naton pagpatig-ahon ang aton balatyagon. Kon gusto mag-istorya sang aton utod nga nagaantos, likawan naton nga indi pagsapakon ang iya ginabatyag. Sa baylo, dapat handa kita pirme nga pamatian ang mga “kubos nga nagapangayo sing bulig.” Dapat man naton iaplikar ini nga prinsipio: “Ang isa nga wala nagapakita sang kaluoy pagahukman nga wala sing kaluoy.” (Sant. 2:13) Kon mangin mapainubuson kita kag dumdumon naton nga kinahanglan gid naton ang kaluoy, mapalig-on kita sini nga magpakita man sang kaluoy. Kinahanglan gid naton pakitaan sang kaluoy kon naghinulsol ang isa nga nakasala kag magbalik sa kongregasyon.

17. Paano nagpakita si Hari David sang matuod nga kaluoy?

¹⁷ May mga halimbawa sa Biblia nga nagapalig-on sa aton nga magpakita sang kaluoy kag likawan nga mangin mapintas. Halimbawa, binagbinaga si Hari David. Pirme sia nagapakita sang kaluoy. Bisan pa gusto sia patyon ni Saul, naluoy si David sa hari nga hinaplas sang Dios. Wala gid sia nagbalos kay Saul ukon nagtinguha nga halitan sia.—1 Sam. 24:9-12, 18, 19.

18-19. Ano ang duha ka tion sa kabuhi ni David nga wala sia nagpakita sang kaluoy?

¹⁸ Pero may mga tion nga wala nagpakita sang kaluoy si David. Halimbawa, gin-insulto si David sang mapintas nga si Nabal kag wala niya ginhatagan sang pagkaon si David kag ang iya mga tinawo. Gani naakig gid si David kag gusto niya patyon si Nabal kag ang tanan nga lalaki sa iya panimalay. Pero may ginhimo dayon ang maayo kag mapinasensiahon nga asawa ni Nabal nga si Abigail. Ginhatagan niya sang pagkaon si David. Gani wala gindayon ni David ang pagpatay kay Nabal kag sa iya mga tinawo.—1 Sam. 25:9-22, 32-35.

¹⁹ Ari ang isa pa ka hitabo sa kabuhi ni David. Ginkadtuan sia ni manalagna Natan kag ginsugiran sia parte sa manggaranon nga tawo nga nagkuha sang karnero sang iya imol nga kaingod. Isa lang ang karnero sining imol nga tawo kag palangga gid niya ini. Naakig gid si David kag nagsiling sia: “Ginapanumpa ko sa buhi nga Dios nga si Jehova, dapat mapatay ang tawo nga naghimo sina!” (2 Sam. 12:1-6) Kabalo si David sang Mosaikong Kasuguan. Kon ang isa ka tawo magpangawat sing karnero, dapat niya ini bayaran sing apat ka karnero. (Ex. 22:1) Gani tama gid kapintas ang ginsiling ni David nga dapat patyon ang tawo. Isa lang gali ini ka ilustrasyon ni Natan para buligan si David nga mahangpan nga mas malain  pa sa sini ang nahimo niya nga mga sala. Wala naluoy si David sa nagkuha sang karnero sa ilustrasyon ni Natan, pero naluoy si Jehova kay David.—2 Sam. 12:7-13.

20. Ano ang matun-an naton kay David?

²⁰ Sang grabe gid ang kaakig ni David, nagdesisyon sia nga patyon si Nabal kag ang tanan niya nga tinawo. Kag sang ulihi, nagsiling si David nga dapat patyon ang manggaranon nga tawo sa ilustrasyon ni Natan bangod sang iya ginhimo. Pero isa ka maayo nga tawo si David, gani ngaa nagsiling sia nga dapat gid patyon ang tawo nga nagkuha sang karnero? Binagbinagon naton kon ano ang natabo antes sini, kag kon ano ang ginabatyag ni David sadto. Ginakonsiensia sadto si David. Kon mapintas nga ginahukman sang isa ang iban, ginapakita sini nga indi mabakod ang iya kaangtanan kay Jehova. Ginpaandaman ni Jesus ang iya mga sumulunod: “Untati ninyo ang paghukom agod indi kamo paghukman sang Dios; kay kon paano kamo nagahukom, amo man ang paghukom sang Dios sa inyo.” (Mat. 7:1, 2) Gani likawan gid naton nga mangin mapintas, kag panikasugan gid naton nga mangin “bugana sa kaluoy” pareho sa aton Dios.

21-22. Ano ang pila ka paagi nga makapakita kita sang kaluoy?

²¹ Ang kaluoy indi lang isa ka balatyagon. May ginahimo gid ang maluluy-on nga tawo para buligan ang iban. Panilagan naton kon sin-o sa aton pamilya, kongregasyon, ukon sa aton lugar ang nagakinahanglan sang bulig. Kon himuon naton ini, madamo gid kita sang makita nga kahigayunan nga mapakita ang kaluoy. May kinahanglan bala nga paumpawan? Puede bala kita makadala sang pagkaon ukon makabulig sa mga nagakinahanglan? May nakapanumbalik bala sa inyo kongregasyon nga nagakinahanglan sang abyan nga magapalig-on sa iya? Masugid bala naton sa iban ang makapaumpaw nga maayong balita? Amo ini ang isa sa pinakamaayo nga paagi nga mapakita naton ang kaluoy sa tanan nga maistorya naton.—Job 29:12, 13; Roma 10:14, 15; Sant. 1:27.

²² Kon nagapanilag kita kon sin-o ang nagakinahanglan sang bulig, makita naton nga madamo sang kahigayunan nga makapakita kita sang kaluoy. Kon nagapakita kita sang kaluoy, mapahalipay gid naton ang aton Amay sa langit kay sia ang Dios nga “bugana sa kaluoy.”