1. Ano ang ginpromisa ni Jesus nga mabasa sa Mateo 11:28-30?

ISA ka makapalig-on nga promisa ang ginsiling ni Jesus sa kadam-an nga nagapamati sa iya. “Kari sa akon,” siling niya, “kag papahuwayon ko kamo.” (Basaha ang Mateo 11:28-30.) Masaligan gid ini nga promisa. Halimbawa, hunahunaa kon ano ang ginhimo niya sa isa ka babayi nga nagaantos bangod sang malala nga balatian.

2. Ano ang ginhimo ni Jesus para sa isa ka babayi nga nagamasakit?

² Kinahanglan gid sang babayi ang bulig. Madamo na nga doktor ang ginkadtuan niya kag naglaum sia nga magaayo sia. Pero wala gihapon sia mag-ayo, kag 12 ka tuig na sia nga nagaantos. Suno sa Kasuguan, indi sia matinlo. (Lev. 15:25) Dayon nabatian niya nga mapaayo ni Jesus ang mga nagamasakit, gani ginpangita niya sia. Sang makita niya si Jesus, gintandog niya ang sidsid sang bayo ni Jesus, kag nag-ayo sia gilayon! Pero indi lang pag-ayo sang iya masakit ang ginhimo ni Jesus. Maayo gid ang pagtratar ni Jesus sa iya, gani nabatyagan niya nga ginarespeto sia. Halimbawa, sang gin-istorya sia ni Jesus, gintawag sia ni Jesus nga “anak,” nga nagapakita sang pagpalangga kag pagrespeto. Sigurado gid nga naumpawan, ukon napalig-on, ini nga babayi!—Luc. 8:43-48.

3. Ano nga mga pamangkot ang sabton naton?

³ Talupangda nga nagkadto ang babayi kay Jesus. Nagpanikasog sia nga pangitaon si Jesus. Amo man ang dapat naton himuon subong. Dapat kita magpanikasog nga ‘magkari’ kay Jesus, ukon magpalapit sa iya. Sa aton tion subong, wala na si Jesus nagahimo sing milagro para ayuhon ang mga nagamasakit nga nagapalapit sa iya. Pero ginaagda niya gihapon kita: “Kari sa akon, . . . kag papahuwayon ko kamo.” Sa sini nga artikulo, sabton naton ang lima ka pamangkot: Paano kita makapalapit kay Jesus? Ano ang ginapahangop ni Jesus sang nagsiling sia: “Itakod ang akon gota”? Ano ang matun-an naton kay Jesus? Ngaa makaparepresko ang hilikuton nga ginapahimo niya sa aton? Kag ano ang dapat naton himuon  para padayon kita nga marepreskuhan samtang ginatuman naton si Jesus?

4-5. Ano ang pila ka paagi nga makapalapit kita kay Jesus?

⁴ Ang isa ka paagi nga makapalapit kita kay Jesus amo ang pagtuon sing maayo parte sa iya mga ginsiling kag ginhimo. (Luc. 1:1-4) Wala sing makahimo sini para sa aton. Kita dapat ang magtuon sa Biblia parte kay Jesus. Makapalapit man kita kay Jesus paagi sa pagdesisyon nga magpabawtismo kag mangin disipulo sang Cristo.

⁵ Ang isa pa ka paagi nga makapalapit kita kay Jesus amo ang pagkadto sa mga gulang sang kongregasyon kon kinahanglan naton ang bulig. Ginagamit ni Jesus ining “mga dulot nga mga lalaki” para atipanon ang iya mga karnero. (Efe. 4:7, 8, 11; Juan 21:16; 1 Ped. 5:1-3) Dapat kita magpanikasog nga magkadto sa ila para magpabulig. Indi naton pagpamensaron nga mabasa sang mga gulang ang aton hunahuna kag mabal-an nila ang aton kinahanglanon. Binagbinaga ang ginsiling sang isa ka brother nga si Julian: “Kinahanglan ko mag-untat sa akon pag-alagad sa Bethel bangod nagmasakit ako, kag ang isa sa akon mga abyan nagpanugda nga pangabayon ko ang mga gulang nga bisitahan ako. Sang primero, pamatyag ko daw indi ko ini kinahanglan. Pero sang ulihi, ginpangabay ko ang mga gulang nga bisitahan ako, kag amo ini ang isa sa pinakamaayo nga regalo nga nabaton ko.” Ang matutom nga mga gulang, pareho sang duha nga nag-shepherding kay Julian, makabulig sa aton nga mabal-an “ang hunahuna sang Cristo,” ukon mahangpan kag mailog ang iya panghunahuna kag panimuot. (1 Cor. 2:16; 1 Ped. 2:21) Isa gid ini sa pinakamaayo nga regalo nga mahatag nila sa aton.

6. Ano ang ginapahangop ni Jesus sang nagsiling sia: “Itakod ang akon gota”?

⁶ Sang nagsiling si Jesus: “Itakod ang akon gota,” daw pareho lang nga nagsiling sia nga “Tumana ako.” Daw nagasiling man sia nga “Pas-anon naton nga duha ang gota, kag magkaupod kita nga magaalagad kay Jehova.” Ginapakita sini nga ang gota nagapahangop nga may dapat kita himuon nga hilikuton.

7. Suno sa Mateo 28:18-20, ano nga hilikuton ang ginapahimo sa aton, kag ano ang masigurado naton?

⁷ Ginabaton naton ang pangagda ni Jesus kon idedikar naton ang aton kabuhi kay Jehova kag magpabawtismo. Ang tanan ginaagda ni Jesus nga magpalapit sa iya, kag indi gid niya pagsikwayon ang bisan sin-o nga gusto gid mag-alagad sa Dios. (Juan 6:37, 38) Ang tanan nga sumulunod sang Cristo ginhatagan sang pribilehiyo nga makapakigbahin sa hilikuton nga ginpahimo ni Jehova kay Jesus. Makasigurado kita nga kaupod naton pirme si Jesus para buligan kita sa sini nga hilikuton.—Basaha ang Mateo 28:18-20.

8-9. Ngaa gusto sang mapainubuson nga mga tawo nga mangin suod kay Jesus, kag ano ang dapat naton ipamangkot sa aton kaugalingon?

⁸ Gusto sang mapainubuson nga mga tawo nga mangin suod kay Jesus. (Mat. 19:13, 14; Luc. 7:37, 38) Ngaa? Binagbinaga ang kinatuhayan ni Jesus kag sang mga Fariseo. Ining mga lider sang relihion indi mahigugmaon kag matinaastaason. (Mat. 12:9-14) Si Jesus mahigugmaon kag mapainubuson. Gusto sang mga Fariseo nga dayawon sila kag kilalahon sa komunidad. Nagsiling si Jesus nga indi ini maayo, kag gintudluan niya ang iya mga disipulo nga mangin mapainubuson kag mag-alagad sa iban. (Mat. 23:2, 6-11) Gingamit sang mga Fariseo ang ila awtoridad para pahugon ang iban nga tumanon sila. (Juan 9:13, 22) Ginpaumpawan ni Jesus ang iban paagi sa iya mga ginsiling kag ginhimo bangod sang iya gugma sa ila.

⁹ Ginailog mo bala si Jesus? Pamangkuta ang imo kaugalingon: ‘Ginakabig bala ako sang iban nga isa ka kalmado kag mapainubuson nga tawo? Handa bala ako sa paghimo sang kubos nga mga  obra para maalagad ang iban? Mainayuhon bala ako sa iban?’

12-14. Ngaa makaparepresko ang hilikuton nga ginapahimo sa aton ni Jesus?

¹² Ngaa makaparepresko ang hilikuton nga ginapahimo sa aton ni Jesus? Madamo sing rason, kag binagbinagon naton ang pila sini.

¹³ May ara kita pinakamaayo nga mga manugtatap. Si Jehova, nga aton Supremo nga Manugtatap, indi pareho sa isa ka mapintas nga agalon nga wala nagapasalamat sa iya mga alagad. Ginapabaloran niya ang aton mga ginahimo. (Heb. 6:10) Kag ginahatagan niya kita sang kusog para mahimo naton ang aton responsibilidad. (2 Cor. 4:7; Gal. 6:5, footnote) Si Jesus, nga aton Hari, nagpakita sa aton sang perpekto nga halimbawa kon paano dapat trataron ang iban. (Juan 13:15) Kag ang mga gulang nga nagaatipan sa aton nagapanikasog gid nga ilugon ang “daku nga manugbantay” nga si Jesus. (Heb. 13:20; 1 Ped. 5:2) Ginahimo nila ang ila bug-os nga masarangan nga mangin mainayuhon, makapalig-on, kag maisog samtang ginatudluan nila kita kag ginaamligan.

¹⁴ May ara kita pinakamaayo nga mga kaupdanan. Wala na sing iban pa nga katawhan nga may mahigugmaon nga mga abyan kag makalilipay nga hilikuton pareho sa aton. Hunahunaa ini: Kaupod naton ang mga kauturan nga nagasunod sa pinakamataas nga mga talaksan sa moral pero wala sila nagahunahuna nga mas maayo sila sangsa iban. Madamo sila sing ikasarang pero wala nila ini ginapabugal, kag ginakabig nila ang iban nga mas labaw sangsa ila. Ginakabig nila kita, indi lang bilang mga masigkamanugpangabudlay, kundi bilang mga abyan man. Kag tumalagsahon gid ang ila gugma sa aton kay handa sila nga mapatay para sa aton!

15. Ano ang dapat naton mabatyagan sa hilikuton nga ginahimo naton?

¹⁵ May ara kita pinakamaayo nga hilikuton. Ginatudluan naton ang mga tawo sang kamatuoran parte kay Jehova kag ginabuyagyag naton ang mga kabutigan sang Yawa. (Juan 8:44) Ginapabug-atan ni Satanas ang mga tawo sang mga lulan nga indi nila madala. Halimbawa, gusto niya kita papatihon nga wala kita ginapatawad ni Jehova sa aton mga sala kag indi kita takus higugmaon. Grabe gid ang epekto sang sini nga kabutigan bangod ginapaluya sini ang buot sang katawhan! Pero ang matuod, kon magpalapit kita sa Cristo, patawaron kita sa aton mga sala. Kag palangga gid kita tanan ni Jehova. (Roma 8:32, 38, 39) Makalilipay gid ang pagbulig sa mga tawo nga magdangop kay Jehova kag makita nga nagauswag ang ila kabuhi!

16. Ano ang kinatuhayan sang lulan nga ginapadala sa aton ni Jesus kag sang iban pa nga lulan nga dapat man naton dalhon?

¹⁶ Ang lulan nga ginapadala sa aton ni Jesus lain sangsa iban pa nga lulan nga dapat man naton dalhon. Halimbawa, pagkatapos magtrabaho sa bilog nga adlaw, madamo ang nagabatyag sing kakapoy kag indi sila malipayon. Pero pagkatapos naton maalagad si Jehova kag ang Cristo, nagabatyag kita sing tuman nga kalipay. Mahimo nga kapoy gid kita pagkatapos sang trabaho kag kinahanglan naton puersahon ang aton kaugalingon nga magtambong sa mga miting. Pero sa masami, narepreskuhan kita kag napalig-on pagkatapos sang miting. Amo man sini ang ginabatyag naton kon nagapanikasog kita nga magbantala kag maghimo sang personal nga pagtuon sa Biblia. Mas labaw ang mabaton naton nga pagpakamaayo sangsa tion kag kusog nga aton ginsakripisyo!

17. Ngaa dapat kita mangin realistiko, kag ngaa dapat naton hunahunaon sing maayo ang mga gusto naton nga himuon?

¹⁷ Dapat kita mangin realistiko bangod may limitasyon ang aton masarangan. Gani dapat naton hunahunaon sing maayo ang mga gusto naton nga himuon. Halimbawa, mahimo nga mauyang lang ang aton kusog kon ginatinguhaan gid naton nga magtipon sang manggad. Talupangda ang ginsiling ni Jesus sa isa ka manggaranon nga pamatan-on nga namangkot sa iya: “Ano bala ang dapat ko himuon agod mapanubli ang kabuhi nga wala sing katapusan?” Ginatuman na sini nga pamatan-on ang Kasuguan. Mahimo nga maayo sia nga tawo bangod ang Ebanghelyo ni Marcos nagasiling nga “mahigugmaon sia nga gintulok ni Jesus.” Gin-agda ni Jesus ining pamatan-on nga manugdumala nga mangin sumulunod niya. “Lakat ka, ibaligya ang imo mga pagkabutang,” siling ni Jesus, “kag kari ka, mangin sumulunod ko.” Gusto niya magsunod kay Jesus, pero daw indi niya masarangan nga isakripisyo ang iya ‘madamo nga pagkabutang.’ (Mar. 10:17-22) Gani ginpangindian niya ang gota nga gintanyag sa iya ni Jesus kag padayon sia nga nagpaulipon “sa Manggad.” (Mat. 6:24) Kon ikaw ang sa lugar sang pamatan-on, ano ang himuon mo?

18. Ano ang dapat naton himuon kon kaisa, kag ngaa?

¹⁸ Mas maayo gid kon usisaon naton kon kaisa ang aton mga prioridad sa kabuhi. Ngaa? Para masigurado naton nga ginagamit naton sing maalamon ang aton kusog. Binagbinaga ang ginsiling sang pamatan-on nga si Mark: “Sa sulod sang madamo nga tuig, abi ko simple na ang akon pagkabuhi. Nagapayunir ako, pero pirme ko ginapamensar kon paano makakuarta kag kon paano mangin mas komportable ang akon kabuhi. Natingala ako ngaa daw indi na ako malipayon. Narealisar ko nga mas ginauna ko ang mga hilikuton nga para lang sa akon kaayuhan, kag ang nabilin ko na lang nga tion kag kusog ang ginahatag ko kay Jehova.” Ginbag-o ni Mark ang iya panghunahuna kag ang iya paagi sang pagkabuhi para mas madamo sia sing mahimo sa pag-alagad kay Jehova. “Kon kaisa, ginakabalak-an ko ang kuarta,” siling ni Mark, “pero sa bulig ni Jehova kag ni Jesus, nadaug ko ang mga kabudlayan.”

19. Ngaa importante nga pirme husto ang aton pagtamod?

¹⁹ Para padayon kita nga marepreskuhan sa hilikuton nga ginapahimo sa aton ni Jesus, dapat naton himuon ang tatlo ka butang. Una, dapat pirme husto ang aton pagtamod. Ginahimo naton ang hilikuton ni Jehova, gani dapat ini himuon suno sa pamaagi ni Jehova. Kita ang mga alagad, kag si Jehova ang Agalon. (Luc. 17:10) Kon himuon naton ini nga hilikuton suno sa aton pamaagi, ginapabudlayan lang naton ang aton kaugalingon. Bisan ang makusog nga toro mahimo mapilasan ukon kapuyon kon pirme niya ginakontra ang direksion sang gota nga ginakontrol sang iya agalon. Pero kon sundon naton ang panuytoy ni Jehova, makahimo kita sang mga hilikuton  nga abi naton indi naton masarangan kag malampuwasan naton ang bisan ano nga mga kabudlayan. Tandai nga wala sing makapugong sa pagtuman niya sang iya kabubut-on!—Roma 8:31; 1 Juan 4:4.

20. Ano dapat ang aton motibo sa pagpas-an sang gota ni Jesus?

²⁰ Ikaduha, himua ang hilikuton nga may husto nga motibo. Ang aton tulumuron amo ang paghatag sing kadayawan sa aton mahigugmaon nga Amay nga si Jehova. Sang panahon ni Jesus, ang mga tawo nga makagod kag gin-una ang ila kaugalingon nangin indi malipayon kag ginhukas nila ang gota ni Jesus. (Juan 6:25-27, 51, 60, 66; Fil. 3:18, 19) Pero, ang mga naghigugma gid sa Dios kag sa ila isigkatawo malipayon nga nagpas-an sang sini nga gota sa bilog nila nga kabuhi, kag may paglaum sila nga mag-alagad upod ang Cristo sa langit. Pareho nila, padayon kita nga mangin malipayon kon pas-anon naton ang gota ni Jesus nga may husto nga motibo.

21. Suno sa Mateo 6:31-33, ano ang masaligan naton nga himuon ni Jehova?

²¹ Ikatlo, padayon nga magsalig. Kabalo kita nga ang aton desisyon magaresulta sa pagsakripisyo kag pagpangabudlay. Nagpaandam man si Jesus nga pagahingabuton kita. Pero makasalig kita nga hatagan kita ni Jehova sang kusog para mabatas ang bisan ano nga kabudlayan. Samtang nagabatas kita, mas nagabakod pa gid kita. (Sant. 1:2-4) Makasalig man kita nga amanan kita ni Jehova sang aton mga kinahanglanon, atipanon kita ni Jesus, kag palig-unon kita sang aton mga kauturan. (Basaha ang Mateo 6:31-33; Juan 10:14; 1 Tes. 5:11) Huo, ara na sa aton ang tanan naton nga kinahanglanon para mabatas ang tanan nga kabudlayan!

22. Ngaa may rason kita nga mangin malipayon?

²² Ang babayi nga gin-ayo ni Jesus nakabatyag sing kaumpawan sang adlaw nga gin-ayo sia. Pero mapaumpawan lang sia sing dayon kon nangin matutom sia nga disipulo sang Cristo. Ano sa banta mo ang ginhimo niya? Kon gintakod niya ang gota ni Jesus, imadyina ang iya padya nga amo ang pag-alagad upod kay Jesus sa langit! Ano man ang iya ginsakripisyo para magsunod sa Cristo, gamay lang ini kon ikumparar sa mga pagpakamaayo. Sa langit man ukon sa duta ang aton paglaum nga mabuhi sing wala sing katapusan, may rason gid kita nga mangin malipayon bangod ginbaton naton ang pangagda ni Jesus: “Kari sa akon”!