1-2. Suno sa 1 Timoteo 6:20, ano ang gintugyan kay Timoteo?

MASAMI nga ginapabantayan naton sa iban ang aton importante nga mga pagkabutang. Halimbawa, mahimo nga ginadeposito naton sa bangko ang aton kuarta. Ginahimo naton ini kay nagasalig kita nga maamligan diri ang aton kuarta kag indi ini madula ukon makawat. Gani kon gintugyan naton sa isa ka tawo ang butang nga hamili sa aton, ginapakita naton nga may salig kita sa iya.

² Basaha ang 1 Timoteo 6:20. Gintugyan kay Timoteo ang sibu nga ihibalo parte sa katuyuan sang Dios sa katawhan. Hamili gid ini, gani ginpahanumdom ini sa iya ni apostol Pablo. Gintugyan man kay Timoteo ang pribilehiyo nga “ibantala ang pulong” kag ‘himuon ang hilikuton sang isa ka ebanghelisador.’ (2 Tim. 4:2, 5) Ginpalig-on ni Pablo si Timoteo nga bantayan ang gintugyan sa iya. Pareho kay Timoteo, gintugyan man sa aton ang importante nga mga butang. Ano ini? Kag ngaa dapat naton bantayan ang mga bahandi nga gintugyan sa aton ni Jehova?

3-4. Ngaa hamili ang mga kamatuoran sa Biblia?

³ Ginbuligan kita ni Jehova nga mabal-an ang sibu nga ihibalo parte sa hamili nga mga kamatuoran sa iya Pulong, ang Biblia. Hamili ini bangod ginatudluan kita sini kon paano mangin suod kay Jehova, kag ginapaathag sini kon paano kita mangin matuod nga malipayon. Sang gin-aplikar naton ang natun-an naton nga mga kamatuoran, nahilway kita sa butig nga mga panudlo kag imoral nga mga buhat.—1 Cor. 6:9-11.

⁴ Ari ang isa pa ka rason kon ngaa hamili ang mga kamatuoran sa Pulong sang Dios. Ang mga mapainubuson lang nga “may husto nga panimuot” ang ginabuligan ni Jehova nga makabalo sini. (Binu. 13:48) Kay man, nagapati sila nga ang matutom kag mainandamon nga ulipon amo ang ginagamit ni Jehova sa pagtudlo sa aton sang mga kamatuoran subong. (Mat. 11:25; 24:45) Indi naton  mahangpan ini nga mga kamatuoran kon indi kita magpabulig. Wala na sing mas importante pa nga bahandi sangsa mahangpan ini nga mga kamatuoran.—Hulu. 3:13, 15.

5. Ano pa ang gintugyan sa aton ni Jehova?

⁵ Gintugyan man sa aton ni Jehova ang pribilehiyo nga itudlo sa iban ang kamatuoran parte sa iya kag sa iya mga katuyuan. (Mat. 24:14) Hamili gid ang mensahe nga ginadala naton kay nagabulig ini sa mga tawo nga mangin bahin sang pamilya ni Jehova kag nagahatag ini sa ila sang paglaum nga mabuhi sing wala sing katapusan. (1 Tim. 4:16) Gamay man ukon daku ang aton mahimo sa pagbantala, ginapakita naton nga ginasuportahan naton ining pinakaimportante nga hilikuton subong. (1 Tim. 2:3, 4) Isa gid ka kadungganan nga mangin masigkamanugpangabudlay sang Dios!—1 Cor. 3:9.

6. Ano ang natabo sa pila ka Cristiano nga wala nag-amlig sa gintugyan sa ila?

⁶ Sang panahon ni Timoteo, wala ginpabaloran sang pila ka Cristiano ang ila pribilehiyo nga mangin masigkamanugpangabudlay sang Dios. Halimbawa, bangod ginhigugma ni Demas ining sistema sang mga butang, ginbalewala niya ang iya pribilehiyo nga mag-alagad upod kay Pablo. (2 Tim. 4:10) Posible nga nag-untat sa pagbantala sanday Figelo kag Hermogenes bangod nahadlok sila nga basi hingabuton man sila pareho sa ginhimo kay Pablo. (2 Tim. 1:15) Nangin apostata sanday Himeneo, Alejandro, kag Fileto kag nag-untat sila sa pag-alagad kay Jehova. (1 Tim. 1:19, 20; 2 Tim. 2:16-18) Ini nga mga halimbawa nagapakita nga bisan pa mabakod gid ang pagtuo sini nga mga Cristiano sang primero, wala nila ginpabaloran ang hamili nga pribilehiyo nga gintugyan sa ila ni Jehova.

7. Ano ang ginagamit ni Satanas para sulayon kita nga himuon ang iya gusto?

⁷ Ano ang ginahimo ni Satanas para indi naton maamligan ang mga bahandi nga gintugyan sa aton ni Jehova? Ari ang pila sa ginahimo ni Satanas. Ginagamit niya ang kalingawan kag ang media para impluwensiahan ang aton mga ginahunahuna kag mga ginahimo para amat-amat kita nga mag-untat sa pag-alagad kay Jehova. Ginagamit man niya ang pagpakalain sang iban nga tawo ukon ang paghingabot para mahadlok kita kag mag-untat sa pagbantala. Kag ginagamit niya “ang mga sayop nga ihibalo” sang mga apostata para hayluhon kita nga indi pagtumanon si Jehova.—1 Tim. 6:20, 21.

8. Ano ang matun-an mo sa eksperiensia sang brother nga si Daniel?

⁸ Kon indi kita maghalong, mahimo nga amat-amat kita nga magpalayo kay Jehova. Binagbinaga ang eksperiensia ni Daniel * nga nanamian sa mga video game. Nagsiling sia: “Mga dies anyos ako sang nagsugod ako sa paghampang sang mga video game. Sang primero, indi man malain ang mga  ginahampang ko. Pero sang ulihi, masingki na nga mga hampang kag parte sa espiritismo ang akon nanamian.” Kada adlaw, mga 15 ka oras nga nagahampang si Daniel. Nagsiling sia: “Sa tuod lang, kabalo ako nga ang akon mga ginahampang kag ang inoras ko nga paghampang amat-amat nga nagapahilayo sa akon kay Jehova. Pero, nangin kabalan ako kag ginapapati ko ang akon kaugalingon nga indi ako mahalitan bisan pa wala ko ginasunod ang mga prinsipio sa Biblia.” Kon indi kita maghalong sa aton ginapili nga kalingawan, mahimo amat-amat kita nga mag-untat sa pag-alagad kay Jehova, kag indi naton maamligan ang importante nga mga butang nga gintugyan niya sa aton.

9. Suno sa 1 Timoteo 1:18, 19, sa ano ginpaanggid ni Pablo si Timoteo?

⁹ Basaha ang 1 Timoteo 1:18, 19. Nagsiling si Pablo nga si Timoteo daw pareho sa isa ka soldado, kag ginpalig-on niya sia nga ‘magpadayon sa maayo nga pagpakig-away.’ Indi literal nga inaway ang ginasiling ni Pablo. Ngaa daw pareho sa mga soldado ang mga Cristiano? Ano nga mga kinaiya ang dapat naton ipakita bilang mga soldado sang Cristo? Binagbinagon naton ang lima ka leksion nga matun-an naton sa ilustrasyon ni Pablo. Makabulig ini sa aton nga maamligan ang kamatuoran nga gintugyan sa aton.

10. Ano ang diosnon nga debosyon, kag ngaa kinahanglan naton ini?

¹⁰ Ipakita ang diosnon nga debosyon. Wala nagaatras sa inaway ang isa ka maisog nga soldado. Himuon gid niya ang tanan para maamligan ang iya mga pinalangga ukon ginapabaloran. Ginpalig-on ni Pablo si Timoteo nga ipakita ang diosnon nga debosyon, ukon ang pag-unong sa Dios bisan ano pa ang matabo. (1 Tim. 4:7) Kon pabakuron naton ang aton gugma kag debosyon sa Dios, magapalig-on ini sa aton nga magpanikasog pa gid nga amligan ang kamatuoran nga gintugyan sa aton.—1 Tim. 4:8-10; 6:6.

11. Ngaa dapat naton hanason ang aton kaugalingon nga himuon ang husto?

¹¹ Hanasa ang imo kaugalingon nga himuon ang husto. Dapat hanason sang soldado ang iya kaugalingon para handa sia pirme sa inaway. Nabatuan ni Timoteo ang impluwensia ni Satanas bangod ginsunod niya ang laygay ni Pablo nga magpalagyo sa malain nga mga handum, tinguhaan ang maayo nga mga kinaiya, kag magpakig-upod sa mga kauturan. (2 Tim. 2:22) Nahimo ini ni Timoteo bangod ginhanas niya ang iya kaugalingon nga himuon ang husto. Gani dapat naton hanason ang aton kaugalingon para mabatuan naton ang aton malain nga mga handum. (Roma 7:21-25) Dapat man naton ini himuon para mabag-o naton ang aton indi maayo nga mga pamatasan kag mapakita naton ang maayo nga mga kinaiya. (Efe. 4:22, 24) Kag kon kapoy kita pagkatapos mag-obra sa bilog nga adlaw, mahimo nga kinahanglan naton nga piliton ang aton kaugalingon nga magtambong sa miting.—Heb. 10:24, 25.

12. Ano ang himuon naton para magamit naton sing maayo ang Biblia?

¹² Dapat magpraktis ang isa ka soldado sa paggamit sang iya armas. Dapat regular niya ini nga himuon para magsagad sia sa sini. Dapat maayo man kita maggamit sang Pulong sang Dios. (2 Tim. 2:15) Gani ginatudluan kita sa aton mga miting kon paano ini gamiton. Pero kon gusto naton nga buligan ang iban nga magpati nga importante ang mga kamatuoran sa Biblia, dapat naton ini tun-an sing regular. Dapat naton gamiton ang Pulong sang Dios para pabakuron ang aton pagtuo. Para mahimo ini, indi bastante nga basahon lang naton ang Biblia. Dapat naton pamalandungan ang aton nabasa, kag dapat kita mag-research sa aton mga publikasyon para insakto ang aton paghangop kag pagpaathag sang Kasulatan. (1 Tim. 4:13-15) Kon himuon naton ini, magamit naton ang Pulong sang Dios sa pagtudlo sa iban. Pero indi bastante nga basahon lang naton ang teksto sa ila. Gusto naton nga mahangpan  nila ini kag mabal-an nila kon paano ini iaplikar. Gani kon regular naton nga ginatun-an ang Biblia, matudlo naton sing maayo sa iban ang parte sa Pulong sang Dios.—2 Tim. 3:16, 17.

13. Suno sa Hebreo 5:14, ngaa dapat kabalo kita kon ano ang maayo kag malain?

¹³ Dapat kabalo kita kon ano ang maayo kag malain. Dapat kabalo ang isa ka soldado sang posible nga katalagman para malikawan niya ini. Dapat kabalo man kita kon ang isa ka sitwasyon mahimo makahalit sa aton para makalikaw kita dayon. (Hulu. 22:3; basaha ang Hebreo 5:14.) Halimbawa, dapat naton pilion sing maayo ang aton kalingawan. Masami nga makita sa mga palaguaon sa TV kag sa mga pelikula ang imoral nga mga buhat. Ginakaugtan sang Dios ini nga mga buhat kag makahalalit ini. Gani dapat naton likawan ang mga kalingawan nga amat-amat nga makapaluya sang aton gugma sa Dios.—Efe. 5:5, 6.

14. Ano ang resulta sang nangin maathag kay Daniel kon ano ang maayo kag malain?

¹⁴ Narealisar ni Daniel, nga ginsambit kaina, nga nakahalit gid sa iya ang mga video game nga masingki kag parte sa espiritismo. Nag-research sia sa Watchtower Library para mabuligan sia sa iya problema. Ano ang resulta? Gin-untatan niya ang paghampang sang indi maayo nga mga video game. Dayon gin-untatan niya ang pag-subscribe sa mga hampang sa Internet, kag wala na sia nagpakig-upod sa iban pa nga nagahampang sang mga video game. Si Daniel nagsiling, “Imbes nga maghampang sang mga video game, nagagua ako para maglingawlingaw kag nagaupod ako sa mga kauturan sa kongregasyon.” Isa na subong ka gulang kag payunir si Daniel.

15. Ngaa makatalagam ang indi matuod nga mga istorya?

¹⁵ Pareho kay Timoteo, dapat nabal-an man naton nga makatalagam ang butig nga mga impormasyon nga ginapalapta sang mga apostata. (1 Tim. 4:1, 7; 2 Tim. 2:16) Halimbawa, mahimo magpalapta sila sang indi matuod nga mga istorya parte sa aton mga kauturan, ukon mahimo papatihon nila kita nga indi kuno masaligan ang organisasyon ni Jehova. Ini nga mga impormasyon makapaluya sang aton pagtuo. Indi gid naton ini dapat pagpatihan. Ngaa? Bangod halin ini sa “mga tawo nga nahalitan ang hunahuna kag nawad-an sang kamatuoran.” Ginapalapta nila ini para ‘magbaisay kag magdebatihay’ ang mga tawo. (1 Tim. 6:4, 5) Gusto nila nga patihan naton ang ila kabutigan kag duhaduhaan naton ang aton mga kauturan.

16. Ano ang posible nga rason nga indi na kita makapokus sa aton ministeryo?

¹⁶ Magpokus. Bilang “isa ka maayo nga soldado  ni Cristo Jesus,” dapat magpokus si Timoteo sa ministeryo imbes nga sa materyal nga mga butang ukon sa iban pa nga hilikuton. (2 Tim. 2:3, 4) Pareho kay Timoteo, indi naton dapat paghandumon nga padamuon pa gid ang aton materyal nga mga butang. Bangod sang “limbong sang manggad,” mahimo indi na naton paghigugmaon si Jehova, indi na naton pagpabaloran ang Pulong sang Dios, kag indi na kita magpanikasog nga isugid sa iban ang mensahe sang Biblia. (Mat. 13:22) Gani dapat naton pasimplehon ang aton kabuhi, kag gamiton naton ang aton tion kag kusog sa ‘padayon nga pag-una sa Ginharian.’—Mat. 6:22-25, 33.

17-18. Ano ang himuon naton para maamligan naton ang aton kaangtanan kay Jehova?

¹⁷ Mangin maabtik sa paghimo sang husto. Dapat abanse nga ginaplano sang isa ka soldado kon ano ang iya himuon kon may katalagman. Para maamligan naton ang mga butang nga gintugyan sa aton ni Jehova, dapat mangin maabtik kita sa paghimo sang husto kon ara kita sa sitwasyon nga posible makapaluya sang aton pagtuo. Paano naton ini mahimo? Dapat abanse naton nga handaan kon ano ang aton himuon sa mga sitwasyon nga posible makaguba sang aton kaangtanan kay Jehova.

¹⁸ Halimbawa, antes magsugod ang isa ka programa sa isa ka tilipunan, ginapangabay anay ang mga tumalambong nga mangin pamilyar kon diin ang pinakamalapit nga exit ukon alagyan pagua. Ngaa? Para madasig sila nga makagua engkaso may emerhensia. Amo man sini ang dapat naton himuon kon naga-Internet kita ukon nagalantaw sang palaguaon sa TV ukon pelikula. Dapat nahandaan naton sing abanse kon ano ang aton himuon kon gulpi lang may maggua nga imoral ukon masingki nga eksena, ukon mga impormasyon halin sa mga apostata. Kon himuon naton ini, makalikaw kita dayon sa makatalagam nga sitwasyon. Gani maamligan naton ang aton kaangtanan kay Jehova kag mangin matinlo kita pirme sa iya atubangan.—Sal. 101:3; 1 Tim. 4:12.

19. Ano ang mga pagpakamaayo kon amligan naton ang importante nga mga butang nga gintugyan sa aton ni Jehova?

¹⁹ Dapat naton amligan ang hamili nga mga kamatuoran sa Biblia kag ang pribilehiyo nga itudlo ini sa iban. Importante ini nga mga butang nga gintugyan sa aton ni Jehova. Kon himuon naton ini, mangin matinlo ang aton konsiensia, may direksion ang aton kabuhi, kag mangin malipayon kita sa pagbulig sa iban nga makilala si Jehova. Maamligan gid naton ang gintugyan sa aton ni Jehova bangod buligan niya kita.—1 Tim. 6:12, 19.