Sang mga 1940, nagtuon sang Biblia ang akon mga ginikanan sa mga Saksi ni Jehova. Bisan pa nag-untat sila sa pagtuon sang ulihi, padayon nga ginabaton ni Nanay ang mga magasin nga Ang Lalantawan kag Magmata! Sang 1950, ginhiwat ang isa ka internasyonal nga kombension sa New York City, kag nag-attend sa sini ang amon pamilya.

Pagkatapos sini, ginduaw kami ni Brother Lawrence Jeffries. Gusto gid niya ako buligan. Sang primero, indi ako magkomporme sa iya kay nagsiling sia nga wala nagaentra sa pulitika kag wala nagasoldado ang mga Saksi ni Jehova. Ginsilingan ko sia nga kon indi magsoldado ang tanan nga tawo sa America, salakayon kag sakupon ang amon pungsod sang kontra namon nga mga pungsod. Mapinasensiahon si Brother Jeffries nga nagpaathag: “Sa banta mo, ano ayhan ang himuon ni Jehova nga Dios kon nagaalagad sa iya ang tanan nga tawo sa America kag salakayon sila sang kontra nila nga mga pungsod?” Bangod sang iya ginsiling parte sa sini kag sa iban pa nga topiko, narealisar ko nga sala ako. Gani gusto ko na mabal-an ang ginatudlo sang Biblia.

Nanamian ako magbasa sang daan nga mga isyu sang Ang Lalantawan kag Magmata! nga ginabutang ni Nanay sa bodega. Sang ulihi, narealisar ko nga ang ginabasa ko amo ang kamatuoran, gani nagsugot ako nga mag-Bible study kami ni Brother Jeffries. Pirme naman ako naga-attend sa mga miting. Nanamian gid ako sa akon natun-an, kag nagabantala na ako. Nagbag-o ang gusto ko himuon sa akon kabuhi sang nahangpan ko nga “malapit na ang daku nga adlaw ni Jehova.” (Sof. 1:14) Indi ko na gusto mag-eskwela sa unibersidad. Gusto ko na nga buligan ang iban nga matun-an ang kamatuoran sa Biblia.

 Sang Hunyo 13, 1956, naggradweyt ako sa hayskul. Pagligad sang tatlo ka adlaw, ginbawtismuhan ako sa isa ka sirkito nga asembleya. Wala ko kabalo nga kadamo gali sang pagpakamaayo nga mabaton ko, kay nagdesisyon ako nga gamiton ang akon kabuhi sa pagtuon kag sa pagtudlo sa iban parte kay Jehova.

Pagligad sang anom ka bulan pagkatapos ako nabawtismuhan, nagregular payunir ako. Sa Disiembre 1956 nga Kingdom Ministry, may artikulo nga “Puede Ka Bala Mag-alagad sa Lugar nga Kinahanglan ang Madamo nga Manugbantala?” Para sa akon, mahimo ko man ini. Gusto ko magbulig sa mga lugar nga diutay lang ang nagabantala sang maayong balita.—Mat. 24:14.

Nagsaylo ako sa Edgefield, South Carolina. Apat lang ang manugbantala sa kongregasyon diri. Pagsaylo ko, lima na kami. Ginahiwat namon ang mga miting sa isa ka kuarto sa balay sang isa ka utod. Kada bulan, 100 ka oras ang ginagamit ko sa pagbantala. Pirme ko ginapangunahan ang pagbantala kag pirme ako may bahin sa mga miting. Bangod sini, mas madamo pa gid ako sang natun-an parte kay Jehova.

Ang isa ka babayi nga gina-Bible study ko amo ang tag-iya sang isa ka punerarya sa Johnston, isa ka banwa nga pila ka kilometro ang kalayuon. Ginbuligan niya ako nga makaobra sing part-time kag ginpagamit niya sa amon ang isa ka gamay nga bilding para mangin amon Kingdom Hall.

Nangin kaupod ko sa pagpayunir si Brother Jolly Jeffries nga halin sa Brooklyn, New York. Bata sia sang brother nga nag-Bible study sa akon. Nag-istar kami sa gamay nga trailer nga ginpagamit sa amon sang isa ka brother.

Kagamay gid sang sueldo sang mga trabahador sa mga lugar sa bagatnan sang United States. Sa bilog nga adlaw namon nga obra, makabaton lang kami sang duha ukon tatlo ka dolyar. Isa ka bes, nagbakal ako sang pagkaon sa grocery store kag wala na gid ako sing kuarta nga nabilin. Paggua ko, nagpalapit ang isa ka tawo kag ginpamangkot niya ako: “Nagapangita ka obra? May ipaobra ako sa imo, kag sa kada oras nga obra, isa ka dolyar ang imo sueldo.” Ginpaobra niya ako sing tatlo ka adlaw sa pagpaninlo sa isa ka construction site. Nakita ko nga ginabuligan gid ako ni Jehova para magtener ako sa Edgefield. Bisan pa gamay lang ang akon sueldo, naka-attend ako sa internasyonal nga kombension sa New York City sang 1958.

Sa ikaduha nga adlaw sang kombension, may natabo nga espesyal gid sa akon. Nakilala ko si Ruby Wadlington, isa ka regular payunir sa Gallatin, Tennessee. Pareho sa akon, gusto man niya mangin misyonero, gani nag-attend kami sa miting para sa mga gusto mag-eskwela sa Gilead sa sini nga kombension. Sang ulihi, nagsulatay na kami. Dayon gin-imbitar ako nga magpamulongpulong sa Gallatin. Pagkadto ko didto, ginhagad ko si Ruby nga magpakasal. Pagkatapos sini, nagsaylo ako sa kongregasyon ni Ruby, kag nagpakasal kami sang 1959.

Sang 23 anyos ako, gintangdo ako nga congregation servant (ukon koordenitor sang hubon sang mga  gulang) sa Gallatin. Ang amon kongregasyon amo ang una nga ginduaw ni Charles Thompson, nga bag-o lang nangin manugtatap sang sirkito. Bisan pa madamo na sia sing eksperiensia, ginpamangkot niya ako kon ano ang mga kinahanglanon sang mga kauturan kag kon paano ini ginaatipan sang iban nga mga manugtatap sang sirkito. Natun-an ko sa iya nga antes maghimo sang desisyon, mas maayo nga mamangkot anay kag hibaluon ang tanan nga detalye.

Sang Mayo 1964, gin-agda ako nga mag-eskwela sa Kingdom Ministry School sa South Lansing, New York, sa sulod sang isa ka bulan. Ginpalig-on ako sang mga brother nga nagtudlo sa amon nga magtuon pa gid parte kay Jehova kag magsuod pa gid sa iya.

Sang Enero 1965, gin-asayn ako nga mangin manugtatap sang sirkito kag magduaw sa mga kongregasyon kaupod si Ruby. Madamo nga lugar ang sakop sang amon una nga sirkito. Halin ini sa Knoxville, Tennessee, kag halos makalab-ot sa Richmond, Virginia. Nalakip diri ang mga kongregasyon sa North Carolina, Kentucky, kag West Virginia. Nag-alagad lang ako sa mga kongregasyon sang itom nga mga kauturan. Wala pa sadto ginatugutan sang mga kasuguan sang gobierno sa bagatnan sang United States nga mag-updanay sa mga miting ang mga itom kag mga puti. Pigado ang mga kauturan, gani natun-an namon nga mangin maalwan para buligan ang mga nagakinahanglan. May importante ako nga natun-an sa isa ka madugay na nga manugtatap sang sirkito. Nagsiling sia: “Kon nagaduaw ka sa mga kongregasyon, ipabatyag sa mga kauturan nga utod ka nila, indi nga boss ka nila. Mabuligan mo sila kon mabatyagan nila nga utod ka nila.”

Sang nagduaw kami sa isa ka gamay nga kongregasyon, na-Bible study ni Ruby ang isa ka pamatan-on nga babayi nga may isa ka tuig nga bata. Bangod wala sing utod nga maka-Bible study sa babayi, naga-Bible study sila ni Ruby paagi sa sulat. Sang nagduaw kami liwat sa kongregasyon, nag-attend sa tanan nga miting ang babayi. Sang gin-asayn ang duha ka espesyal payunir nga sister sa sini nga kongregasyon, ginpadayon nila ang pag-Bible study sa iya. Sang ulihi, nabawtismuhan sia. Sang 1995, pagligad sang mga 30 ka tuig, may isa ka sister nga nag-istorya kay Ruby sa Bethel sa Patterson. Sia gali ang bata sang babayi nga gin-Bible study ni Ruby. Sia kag ang iya bana mga estudyante sa ika-100 nga klase sang Gilead School.

Ang ikaduha namon nga sirkito amo ang mga kongregasyon sa Florida. Bangod kinahanglan na namon ang salakyan, nagbakal kami sang isa ka awto nga barato lang. Pero sa una pa lang nga semana, naguba ang makina sini. Wala gid kami sing kuarta para ipakay-o ini. Gintawgan ko ang isa ka brother nga posible nga makabulig sa amon. Ginpakay-o sang brother ang amon salakyan sa isa niya ka mekaniko. Pero indi gid pagbatunon sang brother ang bayad namon sa iya. Nagsiling lang sia, “OK lang, Brod. Wala ka sang dapat bayaran.” Ginhatagan pa gani niya kami sing kuarta. Nabatyagan gid namon ang pag-atipan ni Jehova sa iya mga alagad. Ginpahanumdom kami sini nga mangin maalwan sa iban.

Kon nagaduaw kami sa mga kongregasyon, nagadayon kami sa balay sang mga kauturan. Bangod sini, madamo kami sang nangin mga abyan. Isa ka adlaw, gin-umpisahan ko ang pag-type sang akon report parte sa kongregasyon, pero wala ko ini natapos. Pagbalik ko sang gab-i, nakita ko nga may sugpon na nga mga letra ang akon report kay ginhampangan gali sang tatlo ka tuig nga bata sang gindayunan namon ang typewriter. Ginsilingan ko sia nga nagapasalamat ako sa pagbulig niya sa akon. Mga pila man ka tuig nga ginsunlog ko sia parte sa sini.

Sang 1971, nakabaton ako sang sulat nga gin-asayn ako nga mangin manugtatap sang distrito sa New York City. Nakibot gid kami. Sang nagsaylo kami didto, 34 anyos pa lang ako. Ako ang una nga itom nga manugtatap sang distrito sa sini nga lugar, pero gin-abiabi gid ako sang mga kauturan.

Bilang manugtatap sang distrito, nalipay ako magtudlo parte kay Jehova kada Sabado kag Domingo sa sirkito nga asembleya. Madamo sa mga manugtatap sang sirkito ang mas madamo sing eksperiensia sangsa akon. Ang isa sa ila amo ang nagpamulongpulong sang ginbawtismuhan ako. Ang isa pa gid amo si Brother Theodore Jaracz, nga nangin miembro sang Nagadumala nga Hubon. Madamo man sang mga brother ang nagaalagad sa Bethel sa Brooklyn kag madamo na sila sang eksperiensia. Nagapasalamat gid ako sa sini nga mga manugtatap sang sirkito kag mga Bethelite kay ginpabatyag nila sa akon nga indi ako dapat mabalaka. Nakita ko gid nga mapinalanggaon sila nga mga manugbantay nga nagapabalor sa Pulong  sang Dios kag matutom nga nagasuporta sa organisasyon. Bangod mapainubuson sila, wala ako nabudlayan sa pag-alagad bilang manugtatap sang distrito.

Sang 1974, gin-asayn sang Nagadumala nga Hubon ang isa naman ka grupo sang mga manugtatap sang sirkito para mangin mga manugtatap sang distrito. Gani nag-alagad ako liwat sa sirkito, kag naasayn ako sa South Carolina. Maayo gid kay sa sini nga tion, puede na mag-updanay sa mga kongregasyon kag mga sirkito ang mga kauturan nga mga itom kag mga puti, kag nalipay gid sila.

Sang 1976, gin-asayn ako sa isa ka sirkito sa Georgia, halin sa Atlanta pakadto sa Columbus. Nadumduman ko pa sang nagpamulongpulong ako para sa lubong sang lima ka itom nga kabataan. Napatay sila sang ginsunog ang ila balay. Nasamaran ang ila iloy kag naospital. Madamo nga mga Saksi ni Jehova, mga itom kag mga puti, ang nagkadto sa ospital para paumpawan sila. Dalayawon gid ang gugma sang mga kauturan. Bangod sang ginapakita nga kaluoy sang mga alagad sang Dios sa isa kag isa, nabatas nila ang mabudlay gid nga mga kahimtangan.

Sang 1977, ginpakadto kami sa Bethel sa Brooklyn para magbulig sa isa ka proyekto sa sulod sang pila ka bulan. Sang malapit na ini matapos, gin-istorya ako sang duha ka miembro sang Nagadumala nga Hubon, kag namangkot sila kon gusto namon ni Ruby nga magpadayon sa pag-alagad sa Bethel. Ginbaton namon ini nga asaynment.

Sa sulod sang 24 ka tuig, nag-alagad ako sa Service Department. Masami nga ginaasikaso diri ang mabudlay nga mga pamangkot sang mga kauturan. Halin sang una, padayon nga nagahatag sang panuytoy ang Nagadumala nga Hubon nga nabase sa mga prinsipio sa Biblia. Nagabulig ini para masabat ang mga pamangkot, kag ginagamit man ini sa paghanas sa mga manugtatap sang sirkito, mga gulang, kag mga payunir. Nakabulig ini nga paghanas sa madamo nga kauturan para mangin hamtong pa gid sila. Bangod sini, napabakod pa gid ang organisasyon ni Jehova.

Halin sang 1995 asta sang 2018, nagbisita ako sa mga branch office bilang headquarters representative, nga ginatawag nga zone overseer sang una. Nagamiting ako sa mga Branch Committee, sa mga Bethelite, kag sa mga misyonero para palig-unon sila kag para buligan sila sa ila mga problema. Pero pirme man kami ni Ruby mapalig-on sang mga eksperiensia nga ginasugid sa amon sang mga kauturan. Halimbawa, ginbisita namon ang Rwanda sang 2000. Napalig-on gid kami sa mga eksperiensia sang mga kauturan kag sang pamilya Bethel sang natabo ang pagpatyanay sang duha ka rasa sang 1994. Madamo ang napatyan sang mga pinalangga. Bisan pa amo sini ang ginbatas sang mga kauturan, wala nagluya ang ila pagtuo, kag wala nadula ang ila paglaum kag kalipay.

Sobra na kami 80 anyos subong. Sang nagligad nga 20 ka tuig, nag-alagad ako bilang miembro sang Branch Committee sa United States. Wala gid ako makaeskwela sa unibersidad, pero nabaton ko ang pinakamaayo nga edukasyon halin kay Jehova kag sa iya organisasyon. Nagbulig ini sa akon para matudluan ko ang iban parte sa kamatuoran sa Biblia, kag makabenepisyo sila sa sini sing wala sing katapusan. (2 Cor. 3:5; 2 Tim. 2:2) Nakita ko nga nabuligan sang mensahe sang Biblia ang mga tawo nga mangin malipayon kag mangin suod sa ila Manunuga. (Sant. 4:8) Ginatinguhaan gid namon ni Ruby nga padayon nga palig-unon ang iban nga pabaloran ang pribilehiyo nga magtuon parte kay Jehova kag tudluan ang iban parte sa kamatuoran sa Biblia. Amo ini ang pinakadungganon nga pribilehiyo sang isa ka alagad ni Jehova.