ANG MGA TAWO PINASAHI GID—MAKASULAT KITA, MAKADROWING, MAKAHIMO SANG MGA BUTANG, KAG MAKAPAMENSAR PARTE SA IMPORTANTE NGA MGA PAMANGKOT SA KABUHI: Ngaa may uniberso? Diin kita naghalin? Ano ang katuyuan sang kabuhi? Ano ang matabo sa palaabuton?

Ginalikawan sang pila ka tawo ini nga mga pamangkot, kay mabudlay kuno ini sabton. Ang iban nagasiling nga wala kuno ini sing pulos kay ang kabuhi resulta lang sang ebolusyon. “Wala sing mga dios, wala man sing katuyuan,” siling sang propesor sa kasaysayan kag biology nga si William Provine. Sia nagdugang: “Wala gid sing mga pagsulundan sa moral, wala gid sing katuyuan ang kabuhi.”

Pero, wala nagaugyon sa sini ang pila ka tawo. Para sa ila, ang uniberso ginapahulag sang mga kasuguan nga sibu gid, matahom, kag gindesinyo sing maayo. Nagadayaw gid sila sa matahom nga mga desinyo sang palibot, nga ang pila sa sini ginatinguhaan nga ilugon sang mga tawo sa ila mga produkto. Ang komplikado kag matahom gid nga desinyo nga makita nila adlaw-adlaw nagapamatuod nga may maalam gid nga desinyador, indi nga natabuan lang.

Bangod sini nga pangatarungan, gin-usisa sang pila ka ebolusyonista ang ila ginapatihan. Tan-awa ang duha ka halimbawa.

ANG NEUROSURGEON NGA SI DR. ALEXEI MARNOV. “Ang akon mga gin-eskwelahan nagatudlo sang ateismo kag ebolusyon,” siling niya. “Ang bisan sin-o nga nagapati sa Dios ginakabig nga wala matudluan.” Pero sang 1990, nagbag-o ang iya pagpati.

“Pirme ko sadto ginapaligban kon paano nagluntad ukon nagapanghikot ang mga butang,” paathag niya, “lakip ang utok sang tawo. Ining dalayawon nga bahin sang lawas amo ang pinakakomplikado nga butang sa uniberso. Pero gindesinyo bala ang utok para makakuha sang ihibalo kag makatuon sang mga ikasarang kag dayon mapatay man lang? Indi gid ina makatarunganon. Gani nagapalibog ako: ‘Ngaa ari kita diri? Ano ang katuyuan sang kabuhi?’ Sang ginpamensaran ko ini, nakasiling ako nga may Manunuga gid.”

Gusto gid mahibaluan ni Alexei ang katuyuan sang kabuhi, gani gin-usisa niya ang Biblia. Sang ulihi, ang iya asawa nga isa ka doktor kag isa man ka ateista, nagtuon man sa Biblia para pamatud-an nga sala ang iya bana! Pero subong, pareho na sila nga nagapati sa Dios kag nahangpan na nila ang iya katuyuan para sa mga tawo suno sa ginapaathag sang Kasulatan.

ANG PLASMA SCIENTIST NGA SI DR. HUABI YIN. Nagtuon si Huabi Yin sang physics, kag sa madamo nga tinuig, gintun-an niya ang plasma. Ang plasma (nga ara man sa adlaw) ginakabig nga ikaapat nga klase sang matter, kag ginahuman ini sang madamo nga electron kag positive ion.

“Sa kada tion nga ginatun-an namon ang natural nga mga hitabo sa kinaugali,” siling ni Huabi, “pirme namon makita nga tama gid ini ka organisado, kag bangod ini sa sibu katama nga mga kasuguan. ‘Diin naghalin ini nga mga kasuguan?’ Nagapalibog gid ako. ‘Kon ang simple nga kalayo nga ginagamit sa pagluto kinahanglan kontrolon, sin-o ang naghimo sang mga kasuguan nga nagakontrol sa init sang adlaw?’ Sang ulihi, nakasiling ako nga ang una nga ginsiling sang Biblia amo gid ang sabat sa sini: ‘Sa ginsuguran gintuga sang Dios ang langit kag ang duta.’”—Genesis 1:1.

Ang siensia nagasabat sang madamo nga pamangkot nga “paano,” pareho sang: Paano nagapanghikot ang mga selula sang utok? Kag paano nagapagua sang kainit kag kasanag ang adlaw? Pero si Alexei kag si Huabi nakahibalo nga ang Biblia nagasabat sang mas importante nga mga pamangkot nga “ngaa”: Ngaa nagaluntad ang uniberso? Ngaa ginakontrol ini sang mga kasuguan? Kag ngaa ari kita diri?

Kon parte sa duta, ang Biblia nagasiling: “[Ang Dios] wala nagtuga sini sa wala sing pulos, kundi nagbuhat sini agod puy-an.” (Isaias 45:18) Gani, may katuyuan ang Dios sa duta, kag pareho sang ipakita sang masunod nga artikulo, may labot gid ini sa aton paglaum sa palaabuton.