Ang United Nations nagapalig-on sa tanan nga tawo nga magbinuligay, respetuhon ang kinamatarong sang tawo, kag amligan ang palibot. Ngaa? Si Maher Nasser sang UN Chronicle nagsiling nga “ang daku nga pagbag-o sang klima, organisado nga krimen, indi pag-alalangay, padayon nga pag-ilinaway, pagsaylo sang madamo bangod sa gamo, terorismo sa bilog nga kalibutan, paglapnag sang makalalaton nga balatian, kag iban pa nga problema nagakatabo bisan diin lang.”

Ang iban gani nagapasanyog nga dapat isa na lang ang gobierno sa kalibutan. Lakip sa ila amo ang Italyano nga pilosopo, mamalaybay, kag pulitiko nga si Dante (1265-1321) kag ang physicist nga si Albert Einstein (1879-1955). Si Dante nagapati nga indi magpadayon ang kalinong kon nabahinbahin sa pulitika ang kalibutan. Ginsambit niya ang ginsiling ni Jesucristo nga ang “ginharian nga nabahinbahin mahapay.”—Lucas 11:17.

Pagkatapos sang Bug-os Kalibutan nga Inaway II, nga naggamit sing duha ka atomic bomb, nagsulat si Albert Einstein sa General Assembly sang United Nations nga ginbalhag sa pamantalaan. “Ang United Nations,” siling niya, “dapat maghimo dayon sing mga kinahanglanon para sa internasyonal nga seguridad paagi sa paghanda sang isa ka matuod nga gobierno sang kalibutan.”

Pero ang mga pulitiko bala nga mangin parte sina nga gobierno sigurado nga may ikasarang, indi korap, kag indi abusador? Ukon mangin pareho man sila sa iban nga malain nga manuggahom? Nagapahanumdom ini sa aton sang ginsiling sang British nga nagatuon sa kasaysayan nga si Lord Acton: “Ang gahom nagapalain kag ang bug-os nga gahom nagapalain sing bug-os.”

Bisan pa sa sini, mangin malinong lamang kag mahim-ong ang tanan nga tawo kon maghiusa kita. Pero paano naton ina mahimo? Posible bala ina? Huo ang sabat sang Biblia. Posible gid ini kag sigurado nga matabo. Paano? Indi paagi sa gobierno sang kalibutan nga ginagamhan sang korap nga mga pulitiko. Kundi paagi sa gobierno nga ginhimo sang Dios. Ipakita man sini nga gobierno nga sia ang may kinamatarong nga maggahom sa iya mga tinuga. Ano ina nga gobierno? Ginatawag ini sang Biblia nga “Ginharian sang Dios.”—Lucas 4:43.

Ang Ginharian sang Dios ang ara sa pensar ni Jesucristo sang nagsiling sia sa iya modelo nga pangamuyo: “Magkari ang imo Ginharian. Matuman ang imo kabubut-on sa duta.” (Mateo 6:9, 10) Huo, siguraduhon sang Ginharian sang Dios nga matuman ang kabubut-on sang Dios sa duta, indi ang kabubut-on sang uhaw sa gahom ukon maiyaiyahon nga mga tawo.

Ang Ginharian sang Dios ginatawag man nga “Ginharian sang langit.” (Mateo 5:3) Ngaa? Bisan gamhan sini ang bilog nga duta, indi ini maggahom halin sa duta kundi halin sa langit. Buot silingon, indi kinahanglan sini nga gobierno ang materyal ukon pinansial nga suporta. Gani paumpaw gid ini sa mga tawo nga sakop sini!

Ang termino nga “ginharian” nagapakita nga ang Ginharian sang Dios isa ka gobierno nga ginagamhan sang hari. May Hari ini—si Jesucristo—kag ang iya awtoridad naghalin sa Dios. Parte kay Jesus, ang Biblia nagasiling:

•   “Ibutang sa iya abaga ang paggahom . . . Ang iya paggahom magalapnag kag ang paghidait mangin wala sing katapusan.”—Isaias 9:6, 7.

• “Ginhatagan sia sing awtoridad sa paggahom, sing kadungganan, kag sing ginharian, agod mag-alagad sa iya ang tanan nga katawhan halin sa lainlain nga mga pungsod kag mga lenguahe. Ang iya paggahom wala sing katapusan.”—Daniel 7:14.

• “Ang ginharian sang kalibutan nangin Ginharian na sang aton Ginuo kag sang iya Cristo.”—Bugna 11:15.

Para mangin matuod ang modelo nga pangamuyo ni Jesus, tumanon sing bug-os sang Ginharian sang Dios ang kabubut-on sang Dios sa duta. Sa paggahom sini, ang tanan nga katawhan magatuon kon paano atipanon ang aton planeta para mapasag-uli ini kag mangin bugana liwat ang buhi nga mga butang.

Labaw sa tanan, tudluan sang Ginharian sang Dios ang mga sakop sini. Ang tanan tudluan sang isa lang ka talaksan. Wala na sing pagbinahinbahin. “Indi sila manghalit ukon mangguba . . . bangod ang duta mapuno sang ihibalo tuhoy kay Jehova kaangay sang tubig nga nagahil-ob sa dagat,” siling sang Isaias 11:9.

Ang mga tawo sa bilog nga duta mangin pareho gid sa ginahandum sang United Nations—nahiusa kag may kalinong. “Mangin malipayon gid sila sa bugana nga paghidait,” siling sang Salmo 37:11. Sa ulihi, indi na naton mabatian ang mga tinaga nga “krimen,” “polusyon,” “kapigaduhon,” kag “inaway.” Pero san-o ini matabo? San-o na magagahom ang Ginharian sang Dios sa bilog nga duta? Paano ini magagahom? Kag paano ka makabenepisyo sa sini? Hibaluon naton.