Ang pagtudlo nga nabase sa Biblia makapabag-o gid sang kabuhi. Binagbinaga ang duha ka halimbawa sini: Si Ricardo kag si Andres.

RICARDO: Sang 15 anyos ako, nag-entra ako sa isa ka gang. Daku gid ang impluwensia sang akon bag-o nga mga abyan sa akon. Ang matuod, gusto ko sadto nga mapriso sing napulo ka tuig! Daw binuang ini. Pero sa amon lugar, ang mga napriso ginadayaw kag ginarespeto. Kag gusto ko mangin pareho sa ila.

Naagyan ko ang tanan bilang miembro sang gang, ang paggamit sing droga, pagpakigsekso, kag pag-entra sa gamo. Isa ka gab-i, nakaentra ako sa tiniruhay. Abi ko mapatay na ako, pero nakapalagyo ako. Sugod sadto, ginpamensaran ko sing maayo ang akon kabuhi kag ang mga gusto ko himuon, kag nagdesisyon ako nga magbag-o. Pero paano? Sin-o ang makabulig sa akon?

Kalabanan sa akon paryente indi malipayon. Ang ila kabuhi puno sing problema. Pero lain ang kabuhi sang isa ko ka tiyo. Nahibaluan ko nga maayo sila, kag ginasunod nila ang mga prinsipio sang Biblia. Ang matuod, sa ila ko natun-an nga Jehova gali ang ngalan sang Dios. Wala madugay pagkatapos sadto nga tiniruhay, nangamuyo ako kay Jehova, gingamit ko ang iya ngalan kag nangayo ako sing bulig sa iya. Nakibot gid ako kay pagkasunod nga adlaw, nanuktok sa akon puertahan ang isa sa mga Saksi ni Jehova! Sia ang nagtudlo sa akon sa Biblia.

Dayon, nakaatubang ako sang daku nga problema. Pirme ako ginatawgan sang akon mga amigo sang una kag ginahagad nga mag-upod sa ila. Bisan pa mabudlay, ginabalibaran ko sila. Gusto ko gid magpadayon sa pagtuon sa Biblia, kag maayo gid kay nagpadayon ako! Nagbag-o gid ako kag nabatyagan ko ang matuod nga kalipay.

Nadumduman ko nga nangamuyo ako sadto sa Dios nga gusto ko mapriso sing napulo ka tuig para respetuhon ako bilang miembro sang gang. Gani nangamuyo ako nga tani mangin bug-os tion ako nga ministro bisan napulo lang ka tuig para mabuligan ko man ang iban. Ginsabat ini sang Dios, kay 17 ka tuig na ako nga nagaalagad bilang bug-os tion nga ministro! Kag isa pa, wala ako kaagi nga napriso.

Madamo sa mga abyan ko sang una ang tinuig na nga napriso. Ang iban sa ila patay na. Nagapasalamat gid ako sa mga paryente ko nga Saksi. Indi pareho sa iban, ginasunod gid nila ang Biblia. Mas ginarespeto ko  sila sangsa pagrespeto ko sa mga upod ko sa gang. Labaw sa tanan, nagapasalamat ako sa Dios kay gintudluan niya ako sang pinakamaayo nga paagi sang pagkabuhi.

ANDRES: Natawo ako kag nagdaku sa imol nga lugar nga normal lang ang droga, pagpangilkil, pinatyanay, kag prostitusyon. Si Tatay palahubog kag adik sa cocaine. Pirme lang sila nagabaisay kag nagasakitanay ni Nanay.

Bata pa ako nakatuon mag-inom kag magdroga. Pirme lang ako nagaistambay sa mga dalan, nga nagapangawat kag nagabaligya sang akon kinawatan. Pagdaku ko, gusto ni Tatay nga mangin suod kami gani gintudluan niya ako magpasulod sa pungsod sang droga kag iban pa nga ilegal nga produkto kag ibaligya ini. Kadasig lang sa akon nagmanggaranon. Isa ka adlaw, nag-abot ang mga pulis sa balay. Gindakop nila ako kag ginsentensiahan sing lima ka tuig nga pagkapriso bangod sa wala madayon nga pagpatay.

Isa ka aga, may pahibalo nga ginaagda ang mga priso nga magtambong sa isa ka pagbinagbinag sa Biblia nga himuon sang mga Saksi ni Jehova. Nagtambong ako. Kumbinsido ako sa akon nabatian, gani nagtuon ako sing Biblia upod sa mga Saksi. Wala nila ginapatahaw ang kamatuoran kundi ginpakita gid nila sa akon ang mataas nga talaksan sa moral sang Dios.

Sang ulihi, narealisar ko nga indi ko mahimo ang mga pagbag-o kon ako lang, ilabi na kay ginapahog ako sang mga upod ko sa prisuhan kay indi nila gusto ang akon ginahimo. Gani nangamuyo ako sing kusog kag kaalam kay Jehova, kag ginbuligan niya ako. Ang matuod, may kaisog pa gani ako nga isugid sa iban nga priso ang parte sa Biblia.

Sang paguaon na ako, kinulbaan gid ako amo nga daw gusto ko na lang magtener sa prisuhan! Paghalin ko, nagbabay ang pila ka priso sa akon. Ang iban gani naglahog, “Pastor, puli ka na?”

Ginakulbaan ako sa pagpamensar kon ano ayhan ang natabo sa akon kon wala ako magpatudlo sa Dios. Nagapasalamat gid ako nga palangga ako sang Dios kag wala sia nangampo sa akon. *