“Magpangabudlay sia. Magtrabaho sia sing dungganon, agod may ipaambit sia sa nagakinahanglan.”—EFESO 4:28.

Gusto sang aton Manunuga nga mapisan kita. Ngaa? Bangod ang tawo nga mapisan malipayon, kay kabalo sia nga paagi sa sini masuportahan niya ang iya kaugalingon kag ang iya pamilya. Posible man niya mabuligan ang nagakinahanglan. Ang mga amo nanamian sa tawo nga mapisan, gani labanlaban nga indi sia madulaan sing obra. Ang Kasulatan nagasiling nga ang kalipay nga resulta sang pagpangabudlay ‘dulot ukon regalo sang Dios.’—Manugwali 3:13.

“Nagasalig kami nga may bunayag kami nga konsiensia, kag luyag namon magkabuhi sing bunayag sa tanan nga butang.”—HEBREO 13:18.

Kon honest kita may respeto kita sa aton kaugalingon, wala kita ginakonsiensia, kag maayo ang aton pagtulog kon gab-i. Isa pa, saligan kita kag respetuhon sang iban. Indi ini mabatyagan sang mga tawo nga indi honest. Kay man, ginakonsiensia sila sa ila ginahimo kag nahadlok sila nga basi pila ka adlaw madakpan sila.

“Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo.”—HEBREO 13:5.

Kinahanglan naton sing kuarta para ibakal sang aton pagkaon kag iban pa nga kinahanglanon. Pero ang “gugma sa kuarta” delikado gid. Posible nga maubos ang tion kag kusog sang isa ka tawo sa pagpangita sing mas madamo nga kuarta. Bangod sini, mahimo nga maguba ang ila pag-asawahay, wala na sia sing tion sa iya kabataan, kag mahimo pa sia gani magmasakit. (1 Timoteo 6:9, 10) Ang tawo nga nagahigugma sa kuarta mahimo man masulay nga maghimo sing malain. Ang isa ka maalam nga tawo nagsiling: “Ang tawo nga matutom makabaton sing madamo nga pagpakamaayo, apang ang nagadali sa pagmanggaranon indi magpabilin nga wala sing sala.”—Hulubaton 28:20.

“Tipigi ang praktikal nga kaalam kag ang ikasarang sa paghunahuna sing maayo.”—HULUBATON 3:21.

Ang maayo nga edukasyon makabulig sa aton para mangin responsable kita nga tawo kag mangin maayo nga ginikanan. Pero bisan pa may tinapusan kita, indi buot silingon sini nga indi na gid kita mawad-an ukon mangin malipayon na kita pirme. Para mangin matuod kita nga madinalag-on sa tanan naton nga ginahimo, dapat naton tun-an ang edukasyon nga halin sa Dios. Ang Kasulatan may ginasiling parte sa tawo nga nagapamati sa Dios: “Ang tanan nga ginahimo niya magamadinalag-on.”—Salmo 1:1-3.