MADAMO nga mamalya nga nagaistar sa matugnaw nga tubig ang may madamol nga sapay sa ila panit agod indi sila matugnawan. Pero ang sea otter may isa pa ka rason para indi matugnawan—ang iya madabong nga balahibo.

Binagbinaga: Ang balahibo sang sea otter mas madabong sangsa iban nga mamalya, mga 155,000 ka balahibo sa kada sentimetro kuadrado. Bangod sini nga kadabungon, indi makagua ang hangin sa idalom sang iya balahibo kon maglangoy sia sa tubig. Ina nga hangin amo ang rason kon ngaa indi makadapat ang matugnaw nga tubig sa iya panit amo nga indi sia matugnawan.

Nagapati ang mga sientipiko nga may matun-an kita sa balahibo sang sea otter. Gin-eksperimentuhan nila ang pila ka artipisyal nga balahibo nga may lainlain nga kalabaon kag kadabungon. Nakahinakop sila nga “kon ang balahibo mas malaba kag mas madabong, mas mamala ukon mas indi madali madapatan sang tubig ang panit sini.” Gani indi matupungan ang madabong nga balahibo sang sea otter.

Nagalaum ang mga sientipiko nga ini nga mga pagtuon magabulig para mag-uswag ang teknolohiya sang pagdesinyo kag paghimo sang mga tela nga indi madali mabasa. Mahimo pa gani maghunahuna ang iban nga kon ang mga tawo maglangoy sa matugnaw nga tubig, mas maayo nga magsuksok sila sing bayo nga may madabong nga balahibo—pareho sa sea otter!

Ano sa banta mo? Ang madabong nga balahibo sang sea otter resulta bala sang ebolusyon? Ukon gindesinyo ini?