Indi mahapos dulaon ang diskriminasyon. Pareho sa virus nga mabudlay patyon, kay nagakinahanglan sing tion kag panikasog para madula ini, kinahanglan man sing tion kag panikasog para madula ang diskriminasyon. Ano ang puede mo himuon para madula mo ang diskriminasyon?

“Isuksok ninyo ang gugma, kay amo ini ang himpit nga higot sang paghiusa.”—COLOSAS 3:14.

Ano ang buot silingon sini? Ang paghimo sing maayo sa iban nagapasuod sa mga tawo. Kon pakitaan mo sang gugma ang iban, amat-amat man madula ang diskriminasyon nga imo nabatyagan. Kag kon puno na sang gugma ang imo tagipusuon, wala na ini sing lugar para sa kaakig ukon dumot.

Magpamensar sing mga paagi kon paano mo mapakita ang gugma sa isa ka partikular nga grupo sang mga tawo nga wala mo nanamian. Mahimo mo ini bisan sa simple lang nga mga butang. Tilawi nga himua ang isa ukon ang pila sa masunod:

• Ipakita ang maayo nga pamatasan sa mga tawo nga halin sa sina nga grupo paagi sa pagbukas sang puertahan ukon paghatag sang imo pulungkuan sa ila kon naga-commute ka.

• Tinguhai nga maistorya sila bisan makadali lang bisan pa indi sila sagad maghambal sang imo lenguahe.

• Mangin pasensioso kon indi mo maintiendihan ang iya mga ginahimo.

• Magpakita sang simpatiya kon mag-istorya sila parte sa ila mga problema.