Mapaathag bala sang mga scientist kon paano nagsugod ang uniberso kag ang kabuhi? Ang simple nga sabat indi. Siling sang iban mapaathag ini sang mga scientist nga nagatuon parte sa uniberso. Pero si Marcelo Gleiser nga isa ka professor sang astronomy sa Dartmouth College kag isa ka agnostic, nagsiling: “Indi gid namon mapaathag kon paano nagsugod ang uniberso.”

Pareho man sini ang ginsiling sang isa ka artikulo sang Science News nga magasin parte sa ginhalinan sang kabuhi. Nagsiling ini: “Mahimo nga indi gid mabal-an kon paano nagsugod ang kabuhi sa Duta: Ang kalabanan nga mga bato kag mga fossil nga puede tun-an para mabal-an kon ano ang natabo sa Duta sang una, wala na subong.” Ginapakita sang ila mga ginsiling nga indi gihapon masabat sang science ang pamangkot nga, Paano nagsugod ang uniberso kag ang kabuhi?

Pero mahimo magpalibog ka, ‘Kon gindesinyo ang kabuhi sa duta, sin-o ang nagdesinyo sini?’ Mahimo nga nagapamangkot ka pa gid: ‘Kon may maalam kag mapinalanggaon nga Manunuga, ngaa ginapabay-an niya nga mag-antos ang mga tawo nga iya gintuga? Ngaa ginapasugtan niya nga may sarisari nga relihion? Ngaa ginapabay-an lang niya ang iya mga sumilimba nga maghimo sing malain?’

Indi gid masabat sang science ini nga mga pamangkot. Pero indi buot silingon nga indi mo na mabal-an ang sabat sa sini. Ang matuod, nakita sang madamo nga tawo ang sabat sa Biblia, kag nalipay gid sila sa sini.

Kon gusto mo mabal-an kon ngaa ang pila ka scientist nga nagtuon sang Biblia nagasiling nga nagapati sila nga may Manunuga, kadtui ang jw.org/hil. Pangitaa ang “pagpati parte sa ginhalinan sang kabuhi.”