Ang uniberso bala kag ang kabuhi sa sini gintuga sang Dios ukon nagtuhaw lang? Ang sabat sang Biblia sa sini nga pamangkot lain sangsa sabat sang duha ka physicist nga ginsambit sa sini nga artikulo. May mga tawo nga nagapati sa Biblia, pero may mga tawo man nga nagapati sa sining duha ka physicist. Pero madamo man ang indi sigurado kon ano ang ila patihan. Pirme ini ginadebatihan sang mga tawo sa mga libro kag kon kaisa sa mga programa sa TV.

Mahimo gintudluan ka sang imo mga maestro ukon maestra nga wala sing Dios kag ang uniberso kag ang kabuhi sa sini amat-amat lang nga nagtuhaw. Pero may mga ebidensia bala ang imo mga maestro ukon maestra nga wala sing Manunuga? Sa pihak nga bahin, mahimo nabatian mo ang mga lider sang relihion nga nagasiling nga may Manunuga. Pero may mga ebidensia bala sila nga matuod ang ila ginsiling? Ukon ginsilingan ka bala nila nga dapat magtuo lang nga may Dios?

Sigurado nga ginpaligban mo na ini nga pamangkot. Mahimo nagabatyag ka nga wala gid sing isa nga makasabat kon bala may Manunuga gid man. Kag mahimo may isa ka pa ka pamangkot: Importante gid bala ang sabat sa sini?

Ipresentar sa sini nga isyu sang Magmata! ang mga ebidensia nga nagkumbinsi sa madamo nga tawo nga magpati nga may Manunuga. Binagbinagon man sa sini kon ngaa importante ang sabat sa pamangkot parte sa ginhalinan sang kabuhi.