Ang Biblia wala sing espesipiko nga ginahambal parte sa legal nga mga kinamatarong sa pagpakasal sang mga tawo nga pareho sing sekso. Ang mas importante nga pamangkot amo, Ano ang ginasiling sang Biblia parte sa homoseksuwalidad?

Para sa madamo nga tawo, nahibaluan nila ang sabat sa sini bisan pa wala nila mausisa sing maayo ang Biblia. Apang ang ila mga sabat nagakontrahanay! Ang pila nagasiling nga ginapakamalaut gid sang Biblia ang homoseksuwalidad. Ang iban naman nagasiling nga ang sugo sang Biblia nga “higugmaa ang imo isigkatawo” nagapakita nga puede ang tanan nga seksuwal nga relasyon.—Roma 13:9.

Para sa imo, diin sa sini ang ginakabig mo nga husto?

1. Ginapakamalaut sang Biblia ang homoseksuwal nga mga buhat.

2. Ginakunsinti sang Biblia ang homoseksuwal nga mga buhat.

3. Ginasuportahan sang Biblia ang kaakig ukon diskriminasyon sa mga homoseksuwal.

MGA SABAT:

1. HUSTO. Ang Biblia nagasiling: Ang “mga lalaki nga nagahimo sang homoseksuwalidad . . . indi makapanubli sang Ginharian sang Dios.” (1 Corinto 6:9, 10) Naaplikar man ini sa mga babayi.—Roma 1:26.

2. SALA. Ang Biblia nagatudlo nga ang pagpakigsekso para lamang sa lalaki kag babayi nga nakasal.—Genesis 1:27, 28; Hulubaton 5:18, 19.

3. SALA. Bisan pa ginapakamalaut sang Biblia ang homoseksuwal nga mga buhat, wala sini ginasuportahan ang diskriminasyon, kaakig, ukon tanan nga klase sang kapintas sa mga homoseksuwal.—Roma 12:18. ^[1]

Nagapati ang mga Saksi ni Jehova nga ang moral nga pagsulundan sang Biblia amo ang pinakamaayo nga talaksan sang pagkabuhi, kag ginasunod nila ini. (Isaias 48:17) ^[2] Bangod sini, ginasikway sang mga Saksi ni Jehova ang tanan nga klase sang seksuwal nga imoralidad, lakip na ang homoseksuwalidad. (1 Corinto 6:18) ^[3] Amo sini nga klase sang pagkabuhi ang ginasunod sang mga Saksi, kag kinamatarong nila ini.

Pero ginatinguhaan man sang mga Saksi ni Jehova nga ‘makighidait sa tanan nga tawo.’ (Hebreo 12:14) Bisan pa ginasikway sang mga Saksi ni Jehova ang homoseksuwal nga mga buhat, wala nila ginapilit sa iban ang ila pagtamod, wala sila nagapamintas sa mga homoseksuwal, kag wala man sila nalipay kon mabatian nila ini nga pagpamintas. Ginatinguhaan gid sang mga Saksi ni Jehova nga himuon sa iban ang gusto nila nga himuon sa ila.—Mateo 7:12.

Ang iban nagasiling nga ginasuportahan sang Biblia ang diskriminasyon sa mga homoseksuwal, kag ang mga nagasunod sa moral nga pagsulundan sini indi bukas sing hunahuna. ‘Ang Biblia ginsulat sang tion nga ang mga tawo makitid sing pamensaron,’ siling nila. ‘Ginabaton na naton subong ang tanan nga tawo ano man ang ila rasa, nasyonalidad, agi man sila, tomboy, ukon iban pa.’ Para sa ila, ang pagsikway sa homoseksuwalidad pareho sa pagsikway sa mga tawo nga lain ang kolor sang panit. Rasonable bala ini nga pagpaanggid? Indi. Ngaa?

Bangod may kinatuhayan ang pagsikway sa homoseksuwal nga buhat kag ang pagsikway sa homoseksuwal nga mga tawo. Ang Biblia nagasiling nga dapat tahuron sang mga Cristiano ang tanan nga klase sang tawo. (1 Pedro 2:17) ^[4] Pero indi buot silingon nga dapat batunon sang mga Cristiano ang tanan nga klase sang buhat.

Binagbinaga ini nga pagpaanggid: Halimbawa, para sa imo, ang pagpanigarilyo makahalalit kag makangilil-ad. Ano abi kon may upod ka sa obra nga nagapanigarilyo? Makitid bala ang imo pamensaron bangod ang imo pagtamod sa pagpanigarilyo lain sa iya? Buot bala silingon nga may diskriminasyon ka sa iya kay sia nagapanigarilyo kag ikaw wala? Kon piliton ka niya nga bag-uhon mo ang imo pagtamod sa pagpanigarilyo, indi bala nga sia ang makitid sing pamensaron?

Ginasunod sang mga Saksi ni Jehova ang moral nga pagsulundan sang Biblia. Ginasikway nila ang mga buhat nga ginadumilian sang Biblia. Pero wala nila ginapakalain ukon ginadaugdaug ang mga tawo nga lain ang paggawi sangsa ila.

Kamusta naman ang mga tawo nga may homoseksuwal nga mga huyog? Natawo bala sila nga may amo sini nga mga huyog? Kon amo sini, indi bala mapintas nga silingon sila nga sala nga pasundan nila ang ila mga handum?

Wala sang ginasiling ang Biblia kon bala may natawo nga mga homoseksuwal, bisan pa ginabaton sini nga may pila ka batasan nga napanubli. Pero ang Biblia nagsiling nga may pila ka paggawi nga dapat likawan, lakip ang homoseksuwalidad, agod mapahamut-an ang Dios.—2 Corinto 10:4, 5.

Ang iban nagasiling nga mapintas ang panindugan sang Biblia. Pero ang ila opinyon nabase sa pagpati nga dapat naton pasundan ang aton mga handum. Halimbawa, nagapati sila nga ang kailigbon sa sekso importante gid, amo nga indi ini dapat pagpunggan kag indi gid ini mapunggan. Apang ginapadunggan sang Biblia ang mga tawo paagi sa pagsiling nga masarangan nila kontrolon ang ila mga kailigbon. Indi pareho sa mga sapat, makadesisyon sila nga indi pagpasundan ang ila mga handum.—Colosas 3:5. ^[5]

Binagbinaga ini nga pagpaanggid: Ang iban nga eksperto nagasiling nga ang pila ka  batasan, pareho sang pagkamaakigon, mahimo nga napanubli sang isa. Ang Biblia wala nagsiling nga natawo ang isa nga maakigon, apang ginabaton sini nga ang pila ka tawo “madali maakig” kag “madali magsingkal.” (Hulubaton 22:24; 29:22) Apang ang Biblia nagsiling man: “Isikway ang kaakig kag bayai ang kasingkal.”—Salmo 37:8; Efeso 4:31.

Pila lang ang indi mag-ugyon sa sini nga laygay ukon magsiling nga masakit ini nga laygay para sa mga tawo nga maakigon. Bisan gani ang mga eksperto nga nagapati nga ang isa natawo nga maakigon nagabulig gid sa sini nga mga tawo nga makontrol ang ila kaakig.

Amo man sini ang pagtamod sang mga Saksi ni Jehova sa bisan ano nga paggawi nga supak sa mga talaksan sang Biblia, lakip ang pagpakigsekso sang babayi kag lalaki nga wala makasal. Pareho nga naaplikar sa sini nga mga kahimtangan ang laygay sang Biblia: “Dapat mahibaluan sang kada isa sa inyo kon paano niya punggan ang iya kaugalingon nga lawas sa balaan kag dungganon nga paagi, indi sa makagod kag indi mapunggan nga kailigbon sa sekso.”—1 Tesalonica 4:4, 5.

Ang mga luyag mangin Cristiano sang unang siglo may lainlain nga ginhalinan kag estilo sang pagkabuhi, kag ang pila sa ila naghimo sing daku nga mga pagbag-o. Halimbawa, ang Biblia nagsambit parte sa “mga nagahimo sang seksuwal nga imoralidad, mga nagasimba sa mga diosdios, mga makihilahion, mga lalaki nga nagapasugot sa homoseksuwal nga mga buhat,” dayon nagsiling ini: “Amo sina anay ang iban sa inyo.”—1 Corinto 6:9-11.

Sang nagsiling ang Biblia nga “amo sina anay ang iban sa inyo,” buot bala sini silingon nga ang mga nag-untat sa paghimo sang homoseksuwal nga mga buhat wala na gid nagbatyag sing homoseksuwal nga mga handum? Indi, bangod ang Biblia nagpalig-on man: “Magpadayon kamo sa paglakat suno sa espiritu kag indi gid kamo makahimo sang undanon nga handum.”—Galacia 5:16.

Ang Biblia wala nagsiling nga ang isa ka Cristiano indi na gid makabatyag sing indi nagakaigo nga handum. Sa baylo, nagsiling ini nga makadesisyon sia nga indi paghimuon ina nga handum. Natun-an sang mga Cristiano nga kontrolon ini nga mga handum, imbes nga pirme ini pamensaron asta nga mahimo nila ini.—Santiago 1:14, 15. ^[6]

Gani, ginapakita sang Biblia ang kinatuhayan sang mga huyog kag mga buhat. (Roma 7:16-25) Makontrol sang tawo nga may homoseksuwal nga mga huyog kon ano ang iya pirme pamensaron, subong nga makontrol man niya ang bisan ano nga malain nga huyog, lakip na ang huyog nga maakig, manghilahi, kag mangin makagod.—1 Corinto 9:27; 2 Pedro 2:14, 15.

Bisan pa ginasunod sang mga Saksi ni Jehova ang moral nga pagsulundan sang Biblia, wala nila ginapilit ang ila panindugan sa iban. Wala man nila ginapatiko ang mga kasuguan nga nagaamlig sa mga kinamatarong sang mga tawo nga tuhay ang pagkabuhi sa ila. Positibo ang mensahe nga dala sang mga Saksi ni Jehova, kag nalipay sila nga isugid ini sa tanan nga gusto mamati.—Binuhatan 20:20.