PAREHO sa mga tagimtim, ang mga tahong nagapilit man sa mga bato, kahoy, ukon mga kasko sang sakayan. Pero indi pareho sa tagimtim nga nagatapik sa ginapilitan sini, ang mga tahong nagaangot sa ginapilitan sini paagi sa manipis nga mga lanotlanot nga ginatawag byssus. Bangod sini, mas makapanginaon kag makasaylosaylo ang tahong. Ang mga lanotlanot sini daw tama ka tapok nga indi makasarang sa mga balod sang dagat. Paano nakabulig ang lanotlanot nga indi maanod ang tahong pakadto sa lawod?

Binagbinaga: Ang mga lanotlanot sang tahong matig-a sa isa ka punta pero mahumok kag mahunit sa pihak nga punta. Natukiban sang mga researcher nga ang eksakto nga kombinasyon nga ginagamit sang tahong—80 porsiento nga katig-a kag 20 porsiento nga kahumok—importante para mangin mabakod gid ang pagpilit. Gani, masarangan sang lanotlanot ang mabaskog katama nga paglabugay sang tubig.

Si Propesor Guy Genin nagtawag sa resulta sini nga research nga “dalayawon gid,” kag nagsiling pa: “Ang makatilingala sa sini nga organismo amo ang maayo gid nga pag-angtanay sang mahumok kag sang matig-a nga bahin.” Ang mga sientipiko nagapati nga ang desinyo sang lanotlanot sang tahong madamo sing magamitan pareho sang pagpatapik sang mga kagamitan sa mga bilding kag sa mga salakyan nga ginagamit sa idalom sang tubig. Mahimo man ini magamit sa pag-angot sang mga lanitlanit sa mga tul-an, kag pagkipot sang mga pilas sa operasyon. “Madamo gid kita sing matun-an sa kinaugali kon parte sa mga pamaagi sa pagpapilit,” siling ni J. Herbert Waite, propesor sa University of California sa Santa Barbara, U.S.A.

Ano sa banta mo? Ang lanotlanot sang tahong resulta bala sang ebolusyon? Ukon gindesinyo ini?