IMADYINA nga nagalakat ka sa dalan kag gab-i na. Gulpi lang nga nabatyagan mo nga daw may nagasunod sa imo. Kon magpundo ka, nagapundo man sia. Kon magdalidali ka, nagadalidali man sia. Nagdalagan ka kag nagkadto sa malapit nga balay sang imo abyan. Sang gin-abrihan sang imo abyan ang puertahan kag ginpasulod ka, daw naumpawan ka.

Mahimo nga wala mo pa maeksperiensiahan ini, pero basi nabalaka ikaw sa iban nga mga problema. Halimbawa, may ginapakigbatuan ka bala nga kaluyahon, pero daw indi gid ini madula? Madugay ka na bala nga wala sing trabaho kag indi gid makakita sini bisan ano mo nga pagtinguha? Nabalaka ka bala sa matabo kon magtigulang ka na kag magbalatian? Ukon may iban ka pa bala nga problema nga ginapaligban?

Bisan ano man ang imo problema, indi bala makapalig-on kon may abyan ka nga masugiran mo sang imo ginakabalak-an kag makabulig sa imo? May amo ka bala sini nga abyan? Huo! Abyan mo si Jehova, kay abyan man sia ni Abraham sang una, suno sa Isaias 41:8-13. Sa bersikulo 10 kag 13, nagsiling si Jehova sa iya mga alagad: “Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong. Kay ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’”

Indi bala nga makapalig-on gid ini? Imadyina ang ginsiling ni Jehova. Wala ginsiling diri nga ginauyatan ni Jehova ang imo kamot samtang nagalakat kamo, bisan pa kanami man sina. Kay kon amo sina, ginauyatan sang iya tuo nga kamot ang imo wala nga kamot. Sa baylo, ginauntay ni Jehova ang iya “tuo nga kamot sang pagkamatarong” kag gin-uyatan ang “imo tuo nga kamot,” nga daw ginabutong ka niya pagua sa mabudlay nga kahimtangan. Samtang ginahimo niya ini, ginapasalig ka niya: “Indi ka mahadlok. Buligan ko ikaw.”

Ginakabig mo bala si Jehova nga isa ka mahigugmaon nga Amay kag Abyan nga magabulig sa imo kon may problema ka? Nagaulikid sia sa imo, nabalaka sa imo kaayuhan, kag gusto gid niya nga buligan ka. Kon may problema ka, gusto ni Jehova nga indi ka mahangawa kay palangga gid niya ikaw. “Handa gid sia nga magbulig sa tion sang kalisdanan.”—Sal. 46:1.

Ginadumdom gihapon sang iban ang mga sala nila sang una kag nagapalibog kon napatawad na  sila sang Dios. Kon amo sini ang imo ginabatyag, hunahunaa ang matutom nga si Job, nga nag-aku sang iya “mga sala sang bata pa” sia. (Job 13:26) Amo man sini ang ginbatyag ni salmista David kag nakiluoy sia kay Jehova: “Indi pagdumduma ang mga sala nga nahimo ko sang pamatan-on pa ako kag ang akon mga paglapas.” (Sal. 25:7) Bangod indi kita himpit, tanan kita “nakasala kag wala makalab-ot sa himaya sang Dios.”—Roma 3:23.

Ginsulat ang Isaias kapitulo 41 para sa katawhan sang Dios sang una. Grabe gid ang ila mga sala amo nga namat-od si Jehova nga hukman sila kag dalhon nga bihag sa Babilonia. (Isa. 39:6, 7) Pero ginahunahuna gihapon sang Dios ang tion nga luwason niya ang mga magahinulsol kag manumbalik sa iya! (Isa. 41:8, 9; 49:8) Ginapakitaan gihapon subong ni Jehova sing gugma kag kaluoy ang mga sinsero nga nagahinulsol kag gusto sia pahamut-an.—Sal. 51:1.

Binagbinaga ang natabo kay Takuya, * nga nagpakigbato sa indi matinlo nga bisyo nga masturbasyon kag pagtan-aw sing pornograpiya. Sulitsulit niya gihapon ini nga nahimo. Ano ang ginbatyag niya? “Nagbatyag gid ako nga wala pulos, pero sang nagpangamuyo ako kay Jehova kag nagpakiluoy nga patawaron niya ako, ginbuligan niya ako.” Paano ini ginhimo ni Jehova? Ginsilingan si Takuya sang mga gulang sa ila kongregasyon nga tawgan niya sila kon magsulit ang iya bisyo. Gin-aku niya: “Daw indi ako magtawag sa ila, pero sang ginhimo ko ini, napabakod ako.” Gin-iskedyul sang mga gulang nga duawon si Takuya sang manugtatap sang sirkito. Ginsilingan sia sang manugtatap sang sirkito: “Gintuyo gid ang pagkadto ko sa imo. Ari ako kay gusto sang mga gulang nga kadtuan ko ikaw. Ginpili ka nila para duawon kag palig-unon.” Nagsiling si Takuya: “Nakasala ako, pero ginbuligan ako ni Jehova paagi sa mga gulang.” Nauntat ni Takuya ang iya mga bisyo kag nangin regular payunir. Nagaalagad sia subong sa isa ka sanga talatapan. Pareho sa natabo sa sini nga utod, buligan ka man sang Dios kon makahimo ka sang sala.

Nabalaka ang iban kay nadulaan sila sing trabaho kag indi sila makakita sang palangitan-an. Ano ayhan ang batyagon mo kon wala ka sing maobrahan? Nagabatyag ang iban nga wala sila pulos. Paano ka mabuligan ni Jehova? Mahimo nga indi ka man niya dayon hatagan sang maayo gid nga trabaho, pero buligan ka niya nga madumduman ang ginsiling ni Hari David: “Nangin pamatan-on ako kag karon tigulang na, apang wala pa ako makakita sang matarong nga ginpabay-an, ukon sang iya mga anak nga nagapangayukayo sing pagkaon.” (Sal. 37:25, footnote) Hamili ka kay Jehova, kag buligan ka niya paagi sa iya “tuo nga kamot sang pagkamatarong” para matigayon mo ang imo kinahanglanon agod padayon nga makaalagad sa iya.

Naeksperiensiahan ni Sara, nga taga-Colombia, ang bulig ni Jehova. Nagatrabaho sia sing  bug-os tion sa isa ka kilala nga kompanya kag daku ang iya sueldo. Pero gusto niya nga dugangan ang iya tion sa pag-alagad kay Jehova, gani naghalin sia sa iya trabaho kag nagpayunir. Pero indi sia makakita sang part-time nga trabaho. Nagpatindog sia sang balaligyaan sang ice cream, pero naputo sia. “Nagligad ang tatlo ka tuig, pero sa bulig ni Jehova, nabatas ko ini,” siling ni Sara. Natun-an niya kon ano gid ang iya kinahanglanon, kag indi niya dapat pagkabalak-an ang buas. (Mat. 6:33, 34) Sang ulihi, gintawgan sia sang iya amo sadto kag ginapabalik sia sa iya trabaho. Nagsiling sia sa iya amo nga gusto niya lang magtrabaho sing part-time kag batunon niya ini kon hatagan sia sang tion para sa iya ministeryo kag pagtambong sa mga miting. Bisan pa gamay na lang ang sueldo ni Sara, nakapadayon sia sa pagpayunir. Sa tion sang kabudlayan, nagsiling sia, “Nabatyagan ko ang mahigugmaon nga bulig ni Jehova.”

Madamo man ang nabalaka kon magtigulang na sila kag magretiro. Nagapalibog sila kon may bastante ayhan sila nga kuarta para sa masulhay nga kabuhi. Ginapaligban man nila ang matabo sa ila kon magbalatian sila. Mahimo gid nga ginpangabay ini ni David kay Jehova: “Indi ako pagsikwaya kon magtigulang na ako; indi ako pagbayai kon magluya na ako.”—Sal. 71:9, 18.

Ano ang himuon sang tigulang na nga mga alagad ni Jehova agod indi sila mahangawa? Dapat padayon nila nga pabakuron ang ila pagtuo sa Dios kag magsalig nga ihatag niya ang ila mga kinahanglanon. Kon naeksperiensiahan nila ang kasulhayan sang madamo pa ang ila kuarta, mahimo nga kinahanglan nila pasimplehon ang ila kabuhi kag malipay bisan sa diutay na lang nga materyal nga butang. Marealisar nila nga mas manami kon “utan lang ang ginakaon” sangsa “matambok nga baka” kag mahimo nga makapaayo pa ini sa panglawas! (Hulu. 15:17) Kon ginauna mo ang pag-alagad kay Jehova, ihatag niya ang imo kinahanglanon kon magtigulang ka na.

Binagbinaga ang natabo kanday José kag Rose, nga sobra na 65 ka tuig nga nagaalagad sing bug-os tion kay Jehova. Gin-atipan man nila ang amay ni Rose nga dapat bantayan adlaw kag gab-i. Gin-operahan pa si José kay may kanser sia kag nagpa-chemotherapy. Ginbuligan bala ni Jehova ining matutom nga mag-asawa? Huo, pero paano? Gingamit niya sanday Tony kag Wendy, ang mag-asawa sa ila kongregasyon nga may apartment. Ginapaistar nila sa sini nga wala sing bayad ang mga payunir. Sang hayskul pa si Tony, makita niya sa bintana sang ila eskwelahan sanday José kag Rose nga pirme nagagua sa latagon. Gin-apresyar niya ang ila kapisan kag natandog gid sia sa sini. Bangod gingamit nila ang bug-os nila nga kabuhi sa pag-alagad kay Jehova, ginpaistar sila nanday Tony kag Wendy sa ila apartment. Sa sulod na sang 15 ka tuig, ginabuligan nila sanday José kag Rose, nga mga 85 anyos na subong. Nagapati sanday José kag Rose nga regalo ini ni Jehova sa ila.

Ginauntay man sang Dios ang iya “tuo nga kamot sang pagkamatarong” sa imo. Idaho mo man bala ang imo kamot sa Isa nga nagapromisa sa imo: “Indi ka mahadlok. Buligan ko ikaw”?