SUNO sa rekord sang Biblia sa Genesis 22:6, sang nagahanda si Abraham sa paghalad sa malayo nga lugar, “ginkuha [niya] ang kahoy para sa dulot nga sinunog kag ginpapas-an ini kay Isaac nga iya anak. Dayon ginkuha niya ang kalayo kag ang sundang, kag naglakat sila nga duha.”

Wala ginasambit sa Kasulatan kon paano magsindi sing kalayo sang una. Nagkomento ang isa ka researcher parte sa rekord sang Genesis nga kon gindala nanday Abraham kag Isaac ang kalayo, ‘mabudlayan sila nga indi mapatay ang kalayo sa malawig nga paglakbay.’ Gani mahimo nga ang ginpatuhuyan diri amo ang gamit para magsindi sing kalayo.

Pero suno sa iban, indi mahapos ang pagsindi sing kalayo sang una. Kon posible, mas mahapos nga mangayo sang baga sa mga kaingod sangsa magsindi sing kalayo. Gani nagapati ang madamo nga iskolar nga mahimo nagdala si Abraham sing kolon nga may kadena nga uluyatan kag ginbutangan ini sing baga halin sa kalayo nga gindabok sang nagligad nga gab-i. (Isa. 30:14) Kon nagalakbay, mahapos na magsindi sing kalayo kon paamakan ang baga sang laya nga kahoy.