1. Ano nga mga problema ang aton ginaatubang, kag ngaa nalipay si Jehova sa iya matutom nga mga alagad? (Tan-awa ang mga piktyur sa umpisa sini nga artikulo.)

NAHIBALUAN naton nga indi madula ang problema sa sini nga sistema. Madamo sa inyo nga mga pinalangga namon nga mga kauturan ang may balatian. Ang iban nagaatipan sang ila tigulang nga mga paryente, bisan sila mismo nagatigulang na man. Ang iban nabudlayan sa pag-aman sa ila pamilya, indi sang mga luho, kundi sang ila mga kinahanglanon. Kag madamo sa inyo ang indi lang isa ka problema ang ginaatubang. Kinahanglan ang madamo nga tion, kusog, kag kuarta para mabatas ini. Pero, nagasalig gid kamo sa mga promisa sang Dios, kag nagatuo gid kamo nga may maayo nga palaabuton. Nalipay gid sa sini si Jehova!

2. Paano kita ginapalig-on sang Isaias 40:29, pero ano nga serioso nga sala ang posible mahimo naton?

² Pero nagabatyag ka bala kon kaisa nga indi mo na masarangan ang mga problema? Wala ka nagaisahanon. Ginapakita sang Biblia nga ang matutom nga mga alagad sang Dios sang una nagbatyag man nga indi na sila makapadayon. (1 Hari 19:4; Job 7:7) Pero, sa baylo nga mag-untat, nagsalig sila kay Jehova nga hatagan sila sing kusog. Wala sila napaslawan, kay ang aton Dios ‘nagahatag sing kusog sa mga ginakapoy.’ (Isa. 40:29) Makapasubo  nga ang pila sa katawhan sang Dios sa aton tion naghunahuna nga ang pinakamaayo nga paagi para maatubang ang mga problema amo ang ginasiling nila nga ‘pagpahuway anay sa pag-alagad.’ Para sa ila, ang Cristianong mga hilikuton nagapabudlay lang imbes nga pagpakamaayo. Gani nag-untat sila sa pagbasa sang Pulong sang Dios, pagtambong sa mga miting sang kongregasyon, kag pagbantala. Amo gid sini ang gusto ni Satanas nga himuon nila.

3. (a) Ano ang dapat naton himuon para indi kita mapaluya ni Satanas? (b) Ano ang binagbinagon naton sa sini nga artikulo?

³ Nahibaluan sang Yawa nga kon masako kita sa aton Cristianong mga hilikuton, makapabakod ini sa aton. Indi niya gusto nga mangin mabakod kita. Gani kon pamatyag mo kapoy ka na gid kag gina-stress, indi magpalayo kay Jehova. Magpalapit sa iya, kay ‘pabaskugon ka niya, pabakuron ka niya.’ (1 Ped. 5:10; Sant. 4:8) Binagbinagon naton sa sini nga artikulo ang duha ka sitwasyon nga mahimo mangin rason nga maghinay kita sa pag-alagad sa Dios, kag tun-an naton kon paano makabulig ang pag-aplikar sang mga prinsipio sa Biblia. Pero binagbinagon anay naton ang ikasarang ni Jehova sa pagpabakod sa aton nga ginalaragway sa Isaias 40:26-31.

4. Ano ang matun-an naton sa Isaias 40:26?

⁴ Basaha ang Isaias 40:26. Wala sing nakaisip sang tanan nga bituon sa uniberso. Nagapati ang mga sientipiko nga bisan sa aton lang galaksiya nga Milky Way, mga 400 ka bilyon na ang bituon. Pero, ginngalanan ni Jehova ang kada bituon. Ano ang matun-an naton sa sini? Kon interesado si Jehova sa iya mga tinuga nga wala sing kabuhi, imadyina kon ano ang iya ginabatyag sa imo pag-alagad! Nagaalagad ka sa iya indi bangod obligado ka nga himuon ini, kundi bangod ginahigugma mo sia. (Sal. 19:1, 3, 14) Kilala ka gid sang aton pinalangga nga Amay. “Bisan ang buhok sa [imo] ulo naisip niya tanan.” (Mat. 10:30) Kag ang salmista nagapasalig sa aton: “Nahibaluan ni Jehova ang nagakatabo sa kabuhi sang mga wala sing kasaypanan.” (Sal. 37:18) Huo, nahibaluan niya ang imo mga problema, kag hatagan ka niya sing kusog para mabatas ini.

5. Ngaa makasalig kita nga mapabakod kita ni Jehova?

⁵ Basaha ang Isaias 40:28. Si Jehova ang ginahalinan sang tanan nga enerhiya. Halimbawa, binagbinaga ang enerhiya nga ginhatag niya sa adlaw. Ang manunulat parte sa siensia nga si David Bodanis nagsiling nga kada segundo, ang adlaw nagapatubas sang enerhiya nga katumbas sang pila ka bilyon nga bomba atomika. Ang isa pa ka researcher nagsiling nga ang enerhiya nga ginapatubas sang adlaw sa isa lang ka segundo bastante na para sa tanan nga tawo sa bilog nga kalibutan sa sulod sang 200,000 ka tuig! Kon masarangan ni Jehova nga mahatag ini nga enerhiya sa adlaw, indi bala nga masarangan man niya nga ihatag ang kusog nga kinahanglan naton para maatubang ang bisan ano nga problema?

6. Ano ang buot silingon nga mahapos pas-anon ang gota ni Jesus, kag paano ini dapat makaapekto sa aton?

⁶ Basaha ang Isaias 40:29. Ang pag-alagad kay Jehova makapahalipay gid. Ginsilingan ni Jesus ang iya mga disipulo: “Itakod ang akon gota.” Nagsiling pa sia: “Makakita kamo sing kapahuwayan para sa inyo kaugalingon. Kay ang akon gota mahapos pas-anon kag ang akon lulan mamag-an.” (Mat. 11:28-30) Matuod gid ini! Kon kaisa, mahimo nga kapoy kita paghalin naton sa balay para magtambong sa miting sang kongregasyon ukon para magbantala. Pero ano ang ginabatyag naton pagpauli naton? Naumpawan kita kag mas handa na kita nga atubangon ang mga problema. Matuod gid nga mahapos pas-anon ang gota ni Jesus!

7. Magsaysay sing eksperiensia nga nagapakita nga matuod ang ginasiling sang Mateo 11:28-30.

 ⁷ Isa ka utod nga tawgon naton nga Kayla ang may chronic fatigue syndrome, depresyon, kag migraine. Gani nabudlayan sia kon kaisa magtambong sa mga miting sang kongregasyon. Pero isa ka bes, nagpanikasog gid sia nga makatambong sa miting. Nagsulat sia: “Parte sa pagluya sang buot ang pamulongpulong. Ginpresentar ini sa paagi nga nabatyagan ko gid ang pag-ulikid kag ang kabalaka amo nga nakahibi ako. Napahanumdom ako sini nga dapat ko gid tambungan ang mga miting.” Nalipay gid sia nga nagpanikasog sia nga makatambong!

8, 9. Ano ang buot silingon ni apostol Pablo sa iya ginsulat nga, “Kon maluya ako, mabaskog ako”?

⁸ Basaha ang Isaias 40:30. Bisan pa may ikasarang kita, limitado lang ang aton mahimo kon sa aton lang kusog. Dapat naton ini dumdumon. Halimbawa, madamo sing nahimo si apostol Pablo, pero may mga limitasyon sia nga nakaupang sa iya nga himuon ang iya gusto. Sang ginpabutyag niya sa Dios ang iya ginabatyag, ginsilingan sia sang Dios: “Ang akon gahom mapakita sing bug-os sa kaluyahon.” Nahangpan ini ni Pablo, gani nagsiling sia: “Kon maluya ako, mabaskog ako.” (2 Cor. 12:7-10) Ano ang iya buot silingon?

⁹ Narealisar ni Pablo nga limitado lang ang iya mahimo. Kinahanglan niya ang bulig sang isa nga mas gamhanan. Ang balaan nga espiritu sang Dios makahatag sing kusog nga kinahanglan ni Pablo. Mabuligan man sini si Pablo nga himuon ang mga hilikuton nga indi niya mahimo kon sa iya lang kusog. Matuod man ini sa aton bahin. Kon hatagan kita ni Jehova sang balaan nga espiritu, magabakod kita!

10. Paano ginbuligan ni Jehova si David sa iya mga problema?

¹⁰ Madamo nga beses nga naeksperiensiahan ni salmista David ang gahom sang balaan nga espiritu sang Dios. Nag-amba sia: “Sa bulig mo masalakay ko ang guban sang mga tulisan; paagi sa gahom sang Dios mataklas ko ang pader.” (Sal. 18:29) May pila ka pader, ukon problema, nga indi naton “mataklas” kon sa aton lang kusog; kinahanglan naton ang bulig ni Jehova.

11. Ilaragway kon paano nagabulig ang balaan nga espiritu para maatubang naton ang mga problema.

¹¹ Basaha ang Isaias 40:31. Ang agila makalupad sing mataas kag malayo, pero wala ini nagasalig sa iya kusog. Ang huyop sang mainit nga hangin nagabulig sa agila nga magpaibabaw, amo nga gamay lang nga kusog ang iya ginagamit para makalupad. Kon may daku ka nga problema, dumduma ang agila. Pangabaya si Jehova nga hatagan ka sing kusog paagi sa “manugbulig, ang balaan nga espiritu.” (Juan 14:26) Makalilipay nga mapangabay naton ini bisan ano oras sa bilog nga adlaw. Mahimo nga kinahanglan gid naton pangabayon ang bulig ni Jehova kon wala kita naghangpanay sang isa ka utod sa kongregasyon. Pero ngaa nagakatabo ang mga indi paghangpanay?

12, 13. (a) Ngaa nagakatabo ang mga indi paghangpanay sa mga Cristiano? (b) Ano ang ginatudlo sa aton sang kasaysayan ni Jose parte kay Jehova?

¹² Nagakatabo ang mga indi paghangpanay bangod tanan kita indi himpit. May mga tion nga mairitar kita sa ginsiling ukon ginhimo sang aton mga kauturan, ukon mairitar man sila sa aton. Mabudlay gid ini nga pagtilaw. Pareho sang iban nga pagtilaw, ginahatagan kita ni Jehova sing kahigayunan nga pamatud-an ang aton katutom paagi sa pagpanghikot sing nahiusa upod sa aton mga kauturan. Palangga sila ni Jehova bisan pa indi sila himpit, gani dapat palanggaon man naton sila.

¹³ Wala ginapunggan ni Jehova ang mga pagtilaw sa iya mga alagad. Ginapamatud-an ini sang natabo kay Jose. Sang pamatan-on si Jose, nahisa sa iya ang iya mga utod sa amay. Ginbaligya nila sia bilang ulipon kag gindala sia sa Egipto. (Gen. 37:28) Nakita  ini ni Jehova kag sigurado gid nga nasubuan sia sa indi maayo nga pagtratar sa iya abyan kag matarong nga tawo nga si Jose. Pero, wala sia nagpasilabot. Sang ulihi, sang gin-akusar si Jose nga gusto niya luguson ang asawa ni Potifar kag ginpriso sia, wala gihapon nagpasilabot si Jehova. Ginpabay-an bala sang Dios si Jose? Wala. Ang Biblia nagasiling: “Ginhimo ni Jehova nga madinalag-on ang [ginahimo ni Jose].”—Gen. 39:21-23.

14. Ano ang mga benepisyo kon “isikway” naton ang kaakig?

¹⁴ Ari ang isa pa ka halimbawa. Pila lang ka tawo ang nakaagi sang indi maayo nga pagtratar nga naagyan ni David. Pero, wala gintugutan sining abyan sang Dios nga maapektuhan sia sang paghinakit. Sa baylo, nagsulat sia: “Isikway ang kaakig kag bayai ang kasingkal; indi ka magkaakig kag maghimo sing malaut.” (Sal. 37:8) Ang pinakaimportante nga rason kon ngaa dapat “isikway” ang kaakig amo ang pag-ilog kay Jehova, nga ‘wala nagasilot sang nagakabagay sa aton mga sala.’ (Sal. 103:10) May mga benepisyo man ang ‘pagsikway’ sang kaakig. Ang kaakig mahimo bangdan sang alta-presyon kag problema sa pagginhawa. Mahalitan sini ang atay kag ang pancreas ukon lapay, kag mahimo ini bangdan sang problema sa pagtunaw sang pagkaon. Kon akig kita, indi kita makapamensar sing maayo. Posible may mahambal kita ukon mahimo nga makasakit sa iban, kag ma-depress kita sa malawig nga tion. Gani mas maayo nga mangin kalmado. Ang Biblia nagasiling: “Ang malinong nga tagipusuon nagahatag sing kabuhi sa lawas.” (Hulu. 14:30) Ano ang himuon naton kon nasaklaw kita sang iban, kag paano kita makapakighidait sa aton utod? Dapat naton iaplikar ang laygay sang Biblia.

15, 16. Ano ang himuon naton kon nasaklaw kita sang iban?

¹⁵ Basaha ang Efeso 4:26. Wala kita natingala kon ginapakalain kita sang kalibutan. Pero kon ang isa ka utod sa kongregasyon ukon miembro sang aton pamilya may ginsiling ukon ginhimo nga nakasakit sa aton, mahimo nga magalalain gid kita. Ano abi kon indi naton malimtan ang ginhimo sa aton? Pabay-an lang bala naton nga magdugay sing tinuig ang aton kaakig? Ukon sundon bala naton ang laygay sang Biblia nga husayon dayon ang mga indi paghangpanay? Samtang ginapadugay naton ang paghusay, mas nagabudlay ang pagpakighidait sa aton utod.

¹⁶ Ano abi kon nasaklaw ka sang isa ka utod kag indi mo ini malimtan? Ano ang mga puede mo himuon para magpakighidait? Una, hanuot nga mangamuyo kay Jehova. Pangabaya sia nga buligan ka nga makaistorya sing matawhay sa imo utod. Dumduma nga abyan man sia ni Jehova.  (Sal. 25:14) Palangga sia sang Dios. Ginatratar sing maayo ni Jehova ang iya mga abyan, kag ginapaabot niya nga amo man sini ang himuon naton. (Hulu. 15:23; Mat. 7:12; Col. 4:6) Dayon, pamensara sing maayo ang imo ihambal. Indi paghunahunaa nga ginhungod sang imo utod nga masakitan ka; basi wala mo lang sia nahangpan. Mangin handa sa pagbaton nga basi may ginhimo ka man nga ginbangdan sang inyo indi paghangpanay. Mahimo mo sugdan ang paghambalanay paagi sa pagsiling, “Basi sala lang ang pag-intiende ko, pero sang gin-istorya mo ’ko kahapon, abi mo bala . . . ” Kon wala masolbar ang inyo problema, magpakighidait sa iban naman nga tion. Ipangamuyo ang imo utod; pangabaya si Jehova nga pakamaayuhon sia. Magpabulig sa Dios nga masentro mo ang imo hunahuna sa maayo nga mga kinaiya sang imo utod. Makasalig ka nga nalipay si Jehova sa imo pagpanikasog nga magpakighidait sa imo utod, nga abyan sang Dios.

17. Ano ang ginaaman ni Jehova para mapasag-uli ang aton maayo nga kaangtanan sa iya kon nakasala kita, kag ngaa dapat naton batunon ini nga bulig?

¹⁷ May pila nga nagabatyag nga indi sila takus mag-alagad kay Jehova bangod sang ila nahimo nga serioso nga sala. Kon ginakonsiensia kita, mahimo madula ang aton kalinong, kalipay, kag kusog. Naeksperiensiahan ini ni Hari David. Nagsiling sia: “Sang wala ko gintu-ad ang akon sala nagpalangluya ako bangod sang akon pag-ugayong sa bug-os nga adlaw. Sa adlaw kag gab-i indi ko maagwanta ang imo kaakig.” Maayo lang kay may kaisog si David nga himuon ang luyag ni Jehova nga himuon sang iya mga alagad. “Sang ulihi gintu-ad ko sa imo ang akon sala,” sulat ni David, “kag ginpatawad mo ang akon mga sala.” (Sal. 32:3-5) Kon nakahimo ka sing serioso nga sala, handa si Jehova nga buligan ka nga mapasag-uli ang imo maayo nga kaangtanan sa iya. Pero dapat mo batunon ang bulig nga ginaaman niya paagi sa kongregasyon. (Hulu. 24:16; Sant. 5:13-15) Indi magpabuyanbuyan, nadalahig diri ang imo palaabuton nga kabuhi nga wala sing katapusan. Pero ano abi kon ginakonsiensia ka gihapon bisan pa madugay na nga napatawad ang imo sala?

18. Paano ang halimbawa ni Pablo makabulig sa mga nagabatyag nga indi sila takus mag-alagad kay Jehova?

¹⁸ May mga tion nga nasubuan si apostol Pablo bangod sang iya mga sala sang una. Nagsiling sia: “Ako ang labing kubos sa mga apostoles, kag indi ako takus tawgon nga apostol, bangod ginhingabot ko ang kongregasyon sang Dios.” Pero, nagsiling pa si Pablo: “Apang paagi sa wala tupong nga kaayo sang Dios may yara ako sini nga katungdanan.” (1 Cor. 15:9, 10) Ginbaton ni Jehova si Pablo bisan pa nakasala sia sang una, kag gusto Niya nga marealisar ini ni Pablo. Kon sinsero mo na nga ginhinulsulan ang imo mga sala sang una kag gintu-ad mo na ini tanan, makasalig ka sa kaluoy ni Jehova. Magsalig nga ginpatawad ka na ni Jehova!—Isa. 55:6, 7.

19. Ano ang tuigan nga teksto sa 2018, kag ngaa nagakaigo ini?

¹⁹ Samtang nagahilapit ang katapusan sini nga sistema, mapaabot naton nga magabudlay pa gid ang kahimtangan. Pero, magsalig nga ang Isa nga ‘nagahatag sing kusog sa ginakapoy kag sing kabaskog sa mga kulang sing kusog’ makahatag sang bisan ano nga kinahanglan mo para makapadayon. (Isa. 40:29; Sal. 55:22; 68:19) Ining makapalig-on nga kamatuoran ipahanumdom sa aton kada magtambong kita sa miting sa Kingdom Hall sa kabug-usan sang tuig 2018. Amo ini ang ginapadaku sang aton tuigan nga teksto: “Ang mga nagalaum kay Jehova maulian sing kusog.”—Isa. 40:31.