1. Ngaa nalipay gid kita?

NALIPAY gid kita sa pagdamo sang katawhan ni Jehova! Nakadumala kita sing 10,000,000 ka regular nga pagtuon sa Biblia sang nagligad nga tuig. Maathag gid nga ginapaiwag sang mga alagad sang Dios ang ila kapawa! Kag talalupangdon man ang minilyon ka interesado nga gin-abiabi naton sa Memoryal. Natun-an nila ang gugma sang Dios nga ginpakita niya paagi sa pag-aman sing gawad.—1 Juan 4:9.

2, 3. (a) Ano ang wala makapugong sa aton nga mag-iwag “subong mga suga”? (b) Suno sa ginsiling ni Jesus sa Mateo 5:14-16, ano ang binagbinagon naton?

² Sa bilog nga duta, nagahambal sing madamo nga lenguahe ang katawhan ni Jehova. Pero wala ini magpugong sa aton nga dayawon sing nahiusa ang aton Amay, si Jehova. (Bug. 7:9) Bisan ano man ang aton lenguahe ukon bisan diin kita nagaistar, makaiwag kita “subong mga suga sa kalibutan.”—Fil. 2:15.

³ Ang aton pag-uswag, paghiusa, kag ang padayon naton nga pagbantay nagahimaya kay Jehova. Sa sini nga artikulo, binagbinagon naton kon paano ini nahimo.—Basaha ang Mateo 5:14-16.

4, 5. (a) Magluwas sa pagbantala, paano pa naton mapaiwag ang aton kapawa? (b) Ano ang mahimo nga epekto kon mangin mainabyanon kita? (Tan-awa ang piktyur sa umpisa sini nga artikulo.)

⁴ “Indi puede nga mangin matutom ang isa sa Ginuo sa sining nabilin nga mga inadlaw . . . kon indi niya paghingalitan ang kahigayunan nga paiwagon ang iya kapawa.” Amo sini ang komento sa artikulo nga “Light in the Darkness,” sa Hunyo 1, 1925, nga The Watch Tower. Ang artikulo nagpaathag: “Dapat himuon niya ini paagi sa pagsugid sang maayong balita sa mga tawo sa bilog nga duta, kag paagi sa pagpahisuno sang iya pagkabuhi sa mga dalanon sang kapawa.” Gani ang isa ka paagi nga mapaiwag naton ang aton kapawa amo ang pagbantala sang maayong balita kag pagtudlo sa mga tawo para mangin disipulo. (Mat. 28:19, 20) Dugang pa, mahimaya naton si Jehova paagi sa aton paggawi. Ginapanilagan kita sang mga tagbalay kag sang mga nagalalabay. Kon magyuhum kita sa ila kag magtamyaw, mangin maayo ang pagtamod nila sa aton kag sa Dios nga aton ginasimba.

⁵ “Kon magsulod kamo sa balay,” siling ni Jesus sa iya mga disipulo, “tamyawa ninyo ang tagbalay.” (Mat. 10:12) Sa mga lugar nga ginbantalaan ni Jesus kag sang mga apostoles, indi katingalahan nga agdahon sa sulod sang balay ang mga estranghero. Pero subong indi na amo sini ang nagakatabo sa madamo nga lugar. Kon mangin mainabyanon ka samtang ginapaathag mo ang imo katuyuan, mahimo madula ang pagpangalag-ag sang tagbalay ukon ang iya kaugot. Maayo man ang epekto sang yuhum. Epektibo ini sa mga kauturan nga nagagamit sing cart sa publiko nga pagpanaksi. Mahimo natalupangdan mo nga maayo ang epekto sa mga tawo kon yuhuman mo sila kag tamyawon. Posible nga maganyat sila nga magpalapit kag magkuha sang aton mga publikasyon. Makabulig man ang pagkamainabyanon para makasugod ka sang paghambalanay.

6. Ano ang ginhimo sang tigulang na nga mag-asawa para makapanaksi?

⁶ Indi maayo ang panglawas sang tigulang na nga mag-asawa sa England amo nga indi sila makapamalaybalay. Ginpaiwag nila ang ila kapawa sa gua lang sang ila balay. Nagbutang sila sang lamesa kag gindispley didto ang mga publikasyon sang Biblia kon tion na nga sugaton sang mga ginikanan ang ila kabataan sa eskwelahan nga malapit sa ila balay. Madamo ang nagkuha sang Questions Young People Ask—Answers That Work, Volume 1 kag 2, kag sang mga brosyur. Nag-upod sa ila ang isa ka payunir sa ila kongregasyon. Bangod mainabyanon sia kag gusto gid sang mag-asawa nga buligan ang iban, may isa ka ginikanan nga nasugdan sa pagtuon sa Biblia.

7. Paano mo mabuligan ang mga refugee sa inyo lugar?

⁷ Sining nagligad nga mga tinuig, madamo nga pungsod ang ginkadtuan sang mga refugee. Paano naton sila mabuligan nga makilala si Jehova kag mahibaluan ang iya katuyuan? Una, puede naton tun-an ang panamyaw sa ila lenguahe. Puede makabulig sa aton ang JW Language app. Dugang pa, ngaa indi naton pagtun-an ang pila ka tinaga para mapukaw ang ila interes? Puede naton dayon isugid sa ila ang jw.org kag ipakita sa ila ang mga video kag mga publikasyon sa ila lenguahe.—Deut. 10:19.

8, 9. (a) Ano ang nabulig sa aton sang midweek miting? (b) Paano buligan sang mga ginikanan ang ila kabataan nga makigbahin sa mga miting?

⁸ Nag-aman si Jehova sing Pagkabuhi kag Pagministeryo nga Miting para hanason pa gid kita sa pagbantala. Ang mga instruksion nga nabaton naton sa sini nga miting makabulig  sa aton nga indi magpangalag-ag sa pagduaw liwat kag pagdumala sing mga pagtuon sa Biblia.

⁹ Madamo nga bisita ang nakaobserbar nga nagapakigbahin ang aton mga kabataan sa mga miting. Mga ginikanan, buligi ang inyo kabataan nga magpaiwag sang ila kapawa paagi sa pagtudlo sa ila nga magkomento nga wala ginabasa ang parapo. Ang pila nagtuon sang kamatuoran kay nabatian nila ang kabataan nga nagsabat sing simple kag sinsero.—1 Cor. 14:25.

10. Ano ang mabulig sang pangpamilya nga pagsimba sa pagpabakod sang paghiusa?

¹⁰ Ang isa pa ka paagi nga mapaiwag naton ang aton kapawa amo ang pagpabakod sang paghiusa sang aton pamilya kag sang kongregasyon. Mahimo ini sang mga ginikanan paagi sa paghiwat sing regular nga Pangpamilya nga Pagsimba. Madamo nga pamilya ang nagaiskedyul nga tan-awon ang JW Broadcasting kada bulan. Pagkatapos matan-aw ang programa, ginabinagbinag nila kon paano iaplikar ang ila mga natun-an. Kon nagadumala sing pangpamilya nga pagsimba, dapat dumdumon sang ginikanan nga tuhay ang kinahanglan sang mga bata sangsa mga tin-edyer. Ipasibu ang materyal nga inyo ginatun-an para ang tanan sa pamilya makabenepisyo.—Sal. 148:12, 13.

11-13. Paano ang tanan makapabakod sang paghiusa sa kongregasyon kag makabulig sa iban nga mapaiwag ang ila kapawa?

¹¹ Paano mapabakod sang mga lamharon ang paghiusa sa kongregasyon kag mapalig-on ang iban nga ipaiwag ang ila kapawa? Kon pamatan-on ka, makig-abyan sa mga mas magulang sa imo. Mahimo mapamangkot mo sila kon paano sila nakaalagad kay Jehova sa sulod sang madamo nga tinuig. Makapalig-on gid ini, kag kamo nga duha mahimo mapahulag pa gid nga ipaiwag ang kapawa sang kamatuoran. Tanan kita puede makaabiabi sa mga nagatambong sa Kingdom Hall. Magabakod pa gid ang aton paghiusa kon himuon naton ini kag mahimo mapahulag ang mga bisita nga mag-upod sa pagpaiwag naton sang kapawa. Mahimo naton yuhuman ang mga bisita, kag buligan sila nga makapungko. Ipakilala sila sa iban para magtawhay ang ila buot.

¹² Kon gin-asayn ka nga magdumala sing miting para sa pag-alagad sa latagon, may mabulig ka gid sa mga may edad nga  makapakigbahin sa ministeryo. Mahapos bala ang ila teritoryo? Sa pila ka kahimtangan, puede mo paupdon sa ila ang mas bata para buligan sila. Puede mo man sila palig-unon kay indi na sila makabantala sing maayo bangod sang ila panglawas. Huo, ang pagpakita naton sing kaayo sa mga pamatan-on kag tigulang, sa mga eksperiensiado ukon indi, makabulig sa ila nga mangin mapisan sa pagbantala sang maayong balita.—Lev. 19:32.

¹³ Ang salmista nagsiling: “Tuman kaayo kag tuman katahom kon ang mag-ulutod magkabuhi nga may paghiusa!” (Basaha ang Salmo 133:1, 2.) Maayo gid ang epekto sa mga Israelinhon kon makig-upod sila sa ila masigkasumilimba kay Jehova. Pareho ini sa paghaplas sang lana nga tuman kaayo kag makapaumpaw. Tinguhai nga makabulig sa paghiusa sang mga kauturan. Takus ka dayawon kon ginahimo mo na ini. Puede mo man bala himuon nga “magpasangkad” pirme?—2 Cor. 6:11-13, footnote.

14. Ano ang imo himuon para mapaiwag mo ang kapawa sa imo mga kaingod?

¹⁴ Makapanikasog ka man bala sa pagpaiwag sang kapawa sa imo mga kaingod? Ang imo maayo nga mga pinamulong kag buhat mahimo makapahulag sa ila nga maghibalo sang kamatuoran. Pamangkuta ang imo kaugalingon: ‘Ano ang pagtamod sa akon sang mga kaingod? Matinlo bala ang akon balay kag ugsaran, amo nga nagabulig ini sa palibot nga mangin matahom? Nagabulig bala ako sa iban?’ Kon nagapakig-istorya sa iban nga Saksi, puede mo bala sila mapamangkot kon paano ang ila kaayo kag paggawi may maayo nga epekto sa ila mga paryente, kaingod, kaupod sa trabaho, ukon kaupod sa eskwelahan? Mahimo sugiran ka nila sang makapalig-on nga mga eksperiensia.—Efe. 5:9.

15. Ngaa nga dapat gid kita magbantay?

¹⁵ Kon gusto naton nga mapaiwag pirme ang aton kapawa, dapat nahibaluan naton kon sa diin na kita nagakabuhi. Pirme ginpalig-on ni Jesus ang iya mga disipulo: “Padayon kamo nga magbantay.” (Mat. 24:42; 25:13; 26:41) Kon sa banta naton madugay pa ang “dakung kapipit-an,” nga indi ini matabo samtang buhi kita, mahimo nga indi naton paghingalitan ang kahigayunan nga magbantala. (Mat. 24:21) Sa baylo nga mag-iwag kita sing masanag sa aton mga kaingod, magapiraw ang aton kapawa kag mahimo pa gani nga mapalong.

16, 17. Ano ang imo himuon para makapabilin ka nga nagabantay?

¹⁶ Samtang nagalala pa gid ang makahalanguyos nga mga tion, dapat nga tanan kita magbantay. Manghikot si Jehova suno sa iya iskedyul. Indi naton ini maduhaduhaan. (Mat. 24:42-44) Samtang wala pa ini mag-abot, dapat mapinasensiahon kita kag pirme nagabantay. Basaha ang Biblia kada adlaw, kag mangin handa pirme sa pagpangamuyo. (1 Ped. 4:7) Hibalua ang maayo nga mga halimbawa sang mga kauturan nga nangin malipayon kay padayon sila nga nagabantay kag nagapaiwag sang ila kapawa. Ang isa ka maayo nga halimbawa amo ang eksperiensia sa artikulo nga “Setenta ka Tuig nga Nagabuyot sa Sidsid sang Isa ka Judiyo,” sa Abril 15, 2012, nga Ang Lalantawan, pahina 18-21.

¹⁷ Mangin masako sa pag-alagad kay Jehova. Buligi ang iban kag makig-upod sa mga kauturan. Magapahalipay gid ini sa imo kag indi mo matalupangdan ang pagligad sang tion. (Efe. 5:16) Masako kag madamo sing nahimo ang aton mga kauturan sa nagligad nga isa ka gatos ka tuig. Pero mas madamo kita sing nahimo subong paagi sa bulig ni Jehova. Ipaiwag naton sing maayo ang aton kapawa.

18, 19. Paano makabulig sa aton ang mga gulang para maalagad naton sing matutom si Jehova? Maghatag sing halimbawa.

 ¹⁸ Bisan pa nga indi kita himpit, ginatugutan gihapon kita ni Jehova nga mag-alagad sa iya. Para buligan kita, nag-aman si Jehova sing “mga dulot nga mga lalaki,” ang mga gulang sa kongregasyon. (Basaha ang Efeso 4:8, 11, 12.) Gani kon duawon ka sang mga gulang, hingaliti ang kahigayunan nga matudluan ka nila kag mahatagan sing laygay.

¹⁹ Duha ka gulang sa England ang nagduaw sa mag-asawa nga may mga problema. Pamatyag sang asawa wala nagapanguna ang iya bana sa pag-alagad kay Jehova. Gin-aku sang bana nga indi sia maayo magtudlo kag wala sia nagahiwat sing regular nga pangpamilya nga pagsimba. Ginbuligan sang mga gulang ang mag-asawa nga talupangdon ang halimbawa ni Jesus. Gin-atipan niya ang iya mga disipulo kag ang mga kinahanglanon nila. Ginpalig-on sang mga gulang ang bana nga ilugon si Jesus. Ginpalig-on nila ang asawa nga magpailob lang sa iya bana. Naghatag dayon sing panugda ang mga gulang sa mag-asawa kon paano nila hiwaton ang pangpamilya nga pagsimba upod sa ila duha ka bata. (Efe. 5:21-29) Ginpasalamatan sang ulihi sang mga gulang ang panikasog sang bana. Ginpalig-on nila sia nga magpadayon kag magsalig sa balaan nga espiritu para buligan sia nga mangin maayo nga ulo sang pamilya. Bangod sang mahigugmaon nga pag-atipan sang mga gulang, nabuligan ini nga pamilya nga mapaiwag ang ila kapawa.

20. Ano ang mangin resulta kon ipaiwag mo ang imo kapawa?

²⁰ “Malipayon ang nagakahadlok kay Jehova, nga nagalakat sa Iya mga dalanon,” amba sang salmista. (Sal. 128:1) Mangin malipayon ka kon paiwagon mo ang imo kapawa paagi sa pagbulig sa iban nga mag-alagad sa Dios, paagi sa pagpanghikot nga magbakod ang paghiusa, kag paagi sa padayon nga pagbantay. Kon makita sang iban ang imo maayo nga mga buhat, mapahulag sila nga dayawon man ang aton Amay.—Mat. 5:16.