1, 2. (a) Ano nga padya ang ginalauman sang mga alagad sang Dios? (b) Ano ang makabulig sa aton nga magpokus sa padya? (Tan-awa ang piktyur sa umpisa sini nga artikulo.)

PAREHO kay apostol Pablo, ang hinaplas nga mga Cristiano subong nagalaum nga batunon nila ang “padya, ang langitnon nga pagtawag sang Dios.” (Fil. 3:14) Nagalaum sila nga mag-alagad kaupod ni Jesucristo sa iya Ginharian sa langit kag buligan ang mga tawo nga mangin himpit. (Bug. 20:6) Matahom gid ini nga paglaum sang mga gin-agda sang Dios! Tuhay ang paglaum sang iban nga karnero. Nagalaum sila nga mabuhi sing wala sing katapusan sa duta, kag nalipay gid sila sa sini!—2 Ped. 3:13.

² Gusto buligan ni Pablo ang pareho niya nga hinaplas nga mga Cristiano nga makapabilin nga matutom kag mabaton nila ang padya. Gani ginpalig-on niya sila: “Ituon ang inyo hunahuna sa mga butang sa ibabaw.” (Col. 3:2) Dapat nila pirme dumdumon ang ila hamili nga paglaum sa langit. (Col. 1:4, 5) Ang paghunahuna sa mga pagpakamaayo nga ginpromisa ni Jehova sa iya katawhan nagabulig sa tanan nga alagad sang Dios nga magpokus  sa padya, sa langit man ini nga paglaum ukon sa duta.—1 Cor. 9:24.

3. Ano ang ginpaandam ni Pablo sa mga Cristiano?

³ Ginapaandaman man ni Pablo ang mga Cristiano nga may mga katalagman nga indi nila mabaton ang padya. Halimbawa, nagsulat sia sa kongregasyon sa Colosas parte sa indi matuod nga mga Cristiano nga gusto nga kahamut-an sang Dios paagi sa pagtuman sa Kasuguan sa baylo sang pagtuo sa Cristo. (Col. 2:16-18) Ginsambit man ni Pablo ang mga katalagman nga nagakatabo asta subong kag mahimo magdula sang aton padya. Halimbawa, ginpaathag niya kon paano sikwayon ang imoral nga mga handum kag kon paano solbaron ang mga problema naton sa aton mga kauturan ukon sa aton pamilya. Makabulig gid sa aton ang iya ginlaygay. Gani binagbinagon naton ang pila ka paandam ni Pablo nga ginsulat niya sa mga taga-Colosas bangod sang iya gugma.

4. Ngaa mahimo naton madula ang padya bangod sang imoral nga mga handum?

⁴ Sa tapos mapahanumdom ni Pablo ang iya mga kauturan parte sa ila matahom nga paglaum, nagsulat sia: “Gani, patya ninyo ang mga bahin sang inyo lawas nga may dutan-on nga huyog subong sang seksuwal nga imoralidad, kahigkuan, indi mapunggan nga kailigbon sa sekso, makahalalit nga handum, kag kakagod.” (Col. 3:5) Mabaskog gid ang imoral nga mga handum kag bangod sini mahimo naton madula ang aton espirituwal nga mga manggad. Isa ka utod nga nakahimo sing imoralidad ang nagsiling sang nakapanumbalik na sia sa kongregasyon, “Kabaskog gid sang akon imoral nga handum amo nga ulihi na sang nakamarasmas ako.”

5. Paano naton maamligan ang aton kaugalingon sa delikado nga mga sitwasyon?

⁵ Dapat gid kita maghalong kon ara kita sa mga sitwasyon nga mahimo kita masulay nga indi pagsundon ang mga talaksan ni Jehova sa moral. Halimbawa, maalamon ang magnobyahanay kon sa umpisa pa lang gin-istoryahan na nila nga may limitasyon ang ila pag-uyatay, paghalok, ukon pag-updanay nga sila lang nga duha. (Hulu. 22:3) Delikado man ang sitwasyon kon magbiyahe sa malayo nga lugar ang isa ka Cristiano bangod sang iya trabaho ukon kaupod niya sa trabaho ang isa nga tuhay sing sekso. (Hulu. 2:10-12, 16) Kon amo sini ang imo sitwasyon, magpakilala nga Saksi ka ni Jehova, maggawi sing talahuron, kag dumduma nga malain gid ang resulta sang pag-flirt. Dapat man kita maghalong kon na-depress kita ukon nasubuan. Basi gusto naton nga may isa nga magpabatyag sa aton nga importante kita. Basi desperado na kita nga daw batunon na naton ang bisan sin-o nga magpakita sing atension sa aton. Kon amo sini ang ginabatyag mo, indi maghimo sang butang nga magadula sang imo padya. Magpangayo sing bulig kay Jehova kag sa mga kauturan.—Basaha ang Salmo 34:18; Hulubaton 13:20.

6. Ano ang dapat naton dumdumon kon nagapili kita sang kalingawan?

⁶ Para mapatay naton ang imoral nga mga handum, dapat naton likawan ang imoral nga mga kalingawan. Ang kalabanan nga kalingawan subong pareho sa kahimtangan sang Sodoma kag Gomorra sang una. (Jud. 7) Ginatinguhaan sang mga nagahimo sang mga kalingawan nga daw normal lang ang seksuwal nga imoralidad kag indi makahalit. Gani dapat kita mangin alerto pirme. Indi puede nga batunon lang naton ang bisan ano nga kalingawan sa kalibutan. Dapat gid naton pilion ang kalingawan nga indi makadula sang aton padya nga kabuhi.—Hulu. 4:23.

7. Ano nga mga problema ang mahimo matabo sa Cristianong kongregasyon?

⁷ Isa gid ka pagpakamaayo nga mangin bahin  kita sang Cristianong kongregasyon. Nagatuon kita sang Pulong sang Dios sa aton mga miting kag nagabuligay sa isa kag isa bangod sa gugma. Gani, makapokus kita sa padya. Pero kon kaisa, mahimo indi maghangpanay ang mga kauturan kag mahimo ini magresulta sa mga problema. Kon indi ini pagsolbaron, madali ini magresulta sa paglainay sing buot.—Basaha ang 1 Pedro 3:8, 9.

8, 9. (a) Ano nga mga kinaiya ang makabulig sa aton nga mabaton ang padya? (b) Ano ang makabulig sa aton nga makighidait kon nasaklaw kita sang isa ka utod?

⁸ Ano ang himuon naton para indi mangin kabangdanan ang paglainay sing buot nga madula naton ang padya? Ginlaygayan ni Pablo ang mga taga-Colosas: “Subong mga pinili sang Dios, balaan kag hinigugma, isuksok ninyo ang mapinalanggaon nga kaawa, kaayo, pagkamapainubuson, kalulo, kag pagkamapinasensiahon. Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo. Apang dugang pa sa sining tanan, isuksok ninyo ang gugma, kay amo ini ang himpit nga higot sang paghiusa.”—Col. 3:12-14.

⁹ Mapatawad naton ang iban kon may gugma kita kag kaayo. Halimbawa, kon nasaklaw kita sa ginhambal ukon ginhimo sang isa ka utod, dumdumon naton ang mga tion nga may nahambal kita ukon nahimo nga indi maayo sa iban. Indi bala nga nagapasalamat kita sa gugma kag kaayo sang mga utod nga nagpatawad sa aton? (Basaha ang Manugwali 7:21, 22.) Nagapasalamat gid kita nga mainayuhon nga ginahiusa sang Cristo ang matuod nga mga sumilimba. (Col. 3:15) Ginahigugma naton ang pareho nga Dios, ginabantala ang pareho nga mensahe, kag ginaatubang ang halos pareho nga mga problema. Kon mainayuhon kita kag mahigugmaon nga nagapatawad sa iban, makabulig kita sa aton paghiusa kag makapokus kita sa padya nga kabuhi.

10, 11. (a) Ngaa makatalagam ang kahisa? (b) Ano ang himuon naton para indi mangin kabangdanan ang kahisa nga madula naton ang padya?

¹⁰ Nagapaandam ang Biblia nga ang kahisa puede mangin kabangdanan nga madula naton ang padya. Halimbawa, nahisa si Cain sa iya utod nga si Abel kag ginpatay niya sia. Nahisa sanday Kora, Datan, kag Abiram kay Moises kag nagpamatok sila sa iya. Nahisa man si Hari Saul kay David kag gintinguhaan niya nga patyon sia. Matuod gid ang ginasiling sang Pulong sang Dios: “Kon may kahisa kag huyog nga makigbais, may yara man kagamo kag tanan nga malaut nga butang.”—Sant. 3:16.

¹¹ Kon panikasugan naton nga mangin mahigugmaon kag mainayuhon, indi kita madali mahisa. Ang Pulong sang Dios nagasiling: “Ang gugma mapinasensiahon kag mainayuhon. Ang gugma indi mahisaon.” (1 Cor. 13:4) Para indi magtubo ang kahisa sa aton tagipusuon, dapat mangin pareho sa Dios ang aton pagtamod. Tamdon naton ang aton mga kauturan nga daw mga bahin sang isa ka lawas, nga nagapatuhoy sa kongregasyon. Magabulig ini para mapakita naton ang empatiya, suno sa ginasiling sang Biblia: “Kon ang isa ka bahin ginapadunggan, ang tanan nga bahin nagakasadya man.” (1 Cor. 12:16-18, 26) Gani sa baylo nga mahisa, malipay kita kon ginapakamaayo ang iban. Binagbinaga ang halimbawa ni Jonatan nga anak ni Hari Saul. Wala sia nahisa sang ginpili si David nga mangin hari. Ginpalig-on pa niya gani si David. (1 Sam. 23:16-18) Mailog man bala naton ang kaayo kag gugma ni Jonatan?

12. Ano nga laygay sa Kasulatan ang makabulig sa aton pamilya nga mabaton ang padya?

¹² Kon sundon sang isa ka pamilya ang mga prinsipio sa Biblia, mangin malinong  kag malipayon sila, kag magabulig ini para mabaton nila ang padya. Ano ang ginlaygay ni Pablo sa Cristiano nga mga pamilya sa Colosas? Nagsiling sia: “Kamo nga mga asawa, magpasakop kamo sa inyo bana, kay nagakaigo ini sa sumulunod sang Ginuo. Kamo nga mga bana, padayon nga higugmaa ang inyo asawa kag indi kamo magkaakig sing tuman sa ila. Kamo nga mga anak, mangin matinumanon kamo sa inyo mga ginikanan sa tanan nga butang, kay kalahamut-an ini sa Ginuo. Kamo nga mga amay, indi ninyo pagpaakiga ang inyo mga anak, agod indi sila maluyahan sing buot.” (Col. 3:18-21) Mabuligan gihapon subong ang mga bana, asawa, kag kabataan kon sundon nila ang ginlaygay ni Pablo.

13. Paano mabuligan sang isa ka Cristiano nga asawa ang iya indi tumuluo nga bana nga batunon ang kamatuoran?

¹³ Ano ang himuon mo bilang asawa kon indi nagakaigo ang pagtratar sa imo sang imo indi tumuluo nga bana? Makabulig bala kon baison mo sia bangod sang iya ginahimo? Bisan pa napilit mo sia nga himuon ang luyag mo, makabulig ayhan ini para batunon niya ang kamatuoran? Daw indi gid. Pero kon respetuhon mo ang imo bana bilang imo ulo, makabulig ka nga mangin malinong ang inyo pamilya kag mapadunggan mo si Jehova.  Basi mabuligan mo pa ang imo bana nga batunon ang matuod nga pagsimba kag mabaton ninyo nga duha ang padya.—Basaha ang 1 Pedro 3:1, 2.

14. Ano ang dapat himuon sang Cristiano nga bana kon wala sia ginarespeto sang iya indi tumuluo nga asawa?

¹⁴ Ano ang himuon mo bilang bana kon wala ka ginarespeto sang imo indi tumuluo nga asawa? Respetuhon ka niya ayhan kon singgitan mo sia kag ipilit nga ikaw dapat ang sundon? Indi gid! Ginapaabot sang Dios nga mangin mahigugmaon ka nga bana nga nagailog kay Jesus. (Efe. 5:23) Mahigugmaon kag mapinasensiahon si Jesus sa pagdumala sa iya kongregasyon. (Luc. 9:46-48) Kon sundon sang bana si Jesus, mabuligan niya ang iya asawa nga batunon ang matuod nga pagsimba.

15. Paano mapakita sang isa ka Cristiano nga ginapalangga niya ang iya asawa?

¹⁵ Ginasugo ang mga bana: “Padayon nga higugmaa ang inyo asawa kag indi kamo magkaakig sing tuman sa ila.” (Col. 3:19) Ginapadunggan sang mahigugmaon nga bana ang iya asawa kon ginapamatian niya ang iya opinyon kag ginapahibalo sa iya nga importante sa iya ang ginasiling sang iya asawa. (1 Ped. 3:7) Bisan pa kon kaisa indi niya mapasugtan ang luyag sang iya asawa, mas makadesisyon sia sing maayo kon pamatian niya sia. (Hulu. 15:22) Ginatinguhaan sang mahigugmaon nga bana nga respetuhon sia sang iya asawa pero wala niya ini ginapilit. Kon ang bana nagapalangga sa iya asawa kag kabataan, mahimo gid nga mangin malipayon ang ila pamilya sa pag-alagad kay Jehova kag mabaton nila ang padya nga kabuhi.

16, 17. Kon isa ikaw ka pamatan-on, paano mo malikawan nga maakig sa imo mga ginikanan?

¹⁶ Kon isa ikaw ka tin-edyer, ano ang himuon mo kon sa banta mo indi ka mahangpan sang imo Cristiano nga mga ginikanan kag kaestrikto gid sa ila? Basi maugot ka sa sini kag magduhaduha kon alagdon mo pa si Jehova. Pero kon mag-untat ka sa pag-alagad kay Jehova, sa ulihi makita mo nga wala na sang iban pa nga nagapalangga gid sa imo pareho sang imo Cristiano nga mga ginikanan kag sang mga kauturan sa kongregasyon.

¹⁷ Kon wala ka ginasaway sang imo mga ginikanan, paano mo mahibaluan kon palangga ka gid nila? (Heb. 12:8) Pero basi ang naugtan mo amo ang ila paagi sang pagdisiplina sa imo. Sa baylo nga maugot sa sini, tinguhai nga hangpon ang mga rason sang ila ginahimo. Gani mangin kalmado lang kag panikasugi nga indi maakig kon ginasaway ka. Ang Pulong sang Dios nagasiling: “Ang tawo nga maalamon nagahalong sa iya ginahambal, kag ang tawo nga may paghangop magapabilin nga kalmado.” (Hulu. 17:27) Panikasugi nga mangin hamtong nga tawo nga kalmado nga nagabaton sang laygay kag nagasunod sa sini nga wala na ginakabalak-an kon paano ka ginlaygayan. (Hulu. 1:8) Isa gid ka pagpakamaayo kon ang imo mga ginikanan nagahigugma kay Jehova. Gusto ka nila buligan nga mabaton mo ang padya nga kabuhi.

18. Ngaa determinado ka nga magpokus sa padya?

¹⁸ Makalilipay gid hunahunaon ang aton padya nga imortal nga kabuhi sa langit ukon wala katapusan nga kabuhi sa paraiso nga duta. Sigurado ini nga paglaum nga nabase sa ginpromisa mismo sang Manunuga. Ang Dios nagsiling parte sa Paraiso: “Ang duta mapuno sang ihibalo tuhoy kay Jehova.” (Isa. 11:9) Sa sina nga tion, ang tanan nga nagaistar sa duta pagatudluan sang Dios. Matahom gid ini nga padya nga dapat naton panikasugan. Gani dumduma pirme ang ginpromisa ni Jehova, kag indi pagtuguti nga madula mo ang padya!