“NAKULBAAN ako nga magsaylo diri,” siling ni Allen. * “Indi ako sigurado kon makakita ako sing mga abyan ukon masaw-an ako sang iban.” Bag-o lang magsaylo si Allen sa kongregasyon nga sobra 1,400 ka kilometro ang kalayuon sa ginaistaran niya sang una.

Kon nagsaylo ka sa iban nga kongregasyon, basi nabalaka ka man. Paano ka maka-adjust? Ano ang himuon mo kon nabudlayan ka mag-adjust? Kon ikaw naman ang ara sa kongregasyon nga ginsayluhan sang iban, paano mo sila mabuligan nga mag-adjust?

Binagbinaga ini nga halimbawa: Kon ginahalin ang mga kahoy, daw mapatay ini sa primero. Samtang ginagabot ang kahoy, masami nga ginautod ang madamo sini nga gamot para mahapos ini sayluhon. Pero kon matanom na ini liwat, nagatubo naman ang bag-o nga mga gamot. Daw pareho sa sini kon magsaylo ka sa iban nga kongregasyon, ma-stress ka man. Daw “nakapanggamot” ka na sa una mo nga kongregasyon kay may mga abyan ka na didto kag may naandan ka na nga iskedyul sa pag-alagad. Subong, dapat ka naman magsugod sa pagpakig-abyan kag sa bag-o nga iskedyul para mag-uswag. Ano ang makabulig sa imo? Ang pagsunod sa mga prinsipio sa Kasulatan. Binagbinagon naton ang pila sini.

Ang pirme nagabasa sang Pulong sang Dios kaangay “sang kahoy nga gintanom sa higad sang sapa, isa ka kahoy nga nagapamunga suno sa panahon sini, ang mga dahon sini wala nagakalaya. Kag ang tanan nga ginahimo niya magamadinalag-on.”—Sal. 1:1-3.

Para magdabong ang kahoy, dapat ini pirme nga mabunyagan. Dapat man pirme magtuon sang Pulong sang Dios ang isa ka Cristiano para mangin mabakod sa espirituwal. Gani padayon nga magbasa sang Biblia adlaw-adlaw kag pirme magtambong sa mga miting sang kongregasyon. Padayuna ang inyo iskedyul sa pangpamilya nga pagsimba kag personal nga pagtuon. Ang tanan nga ginahimo mo sa una mo nga kongregasyon para mangin mabakod ka sa espirituwal dapat padayon mo nga himuon sa bag-o mo nga kongregasyon.

“Ang bisan sin-o nga nagapaumpaw sa iban paumpawan man.”—Hulu. 11:25.

Mapalig-on ka kag madali maka-adjust kon makigbahin ka sing bug-os sa ministeryo. “Nakabulig gid sa amon nga mag-asawa ang pag-auxiliary payunir namon dayon sa amon bag-o nga kongregasyon,” siling sang gulang nga si Kevin. “Madasig namon nga nakilala ang mga kauturan, ang mga payunir, kag nangin pamilyar kami sa teritoryo.” Nagsaylo si Roger sa isa ka lugar nga sobra 1,600 ka kilometro ang kalayuon sa ila ginaistaran sang una. Nagsiling sia: “Ang pinakamaayo nga paagi para maka-adjust ka sa bag-o nga kongregasyon amo ang pagbantala pirme kon may kahigayunan. Isiling man sa mga gulang nga handa ka sa pagbulig, halimbawa sa pagpaninlo sa Kingdom Hall, sa pagbulos sa isa ka bahin sa miting, ukon sa pagsugat sa mga utod para makatambong sa mga miting. Kon makita sang mga kauturan nga handa ka magsakripisyo, madali sila makig-abyan sa imo.”

“Buksi man ninyo sing masangkad ang inyo mga tagipusuon.”—2 Cor. 6:13.

Palanggaa ang mga kauturan. Sang nagsaylo sa iban nga kongregasyon ang pamilya ni Melissa, ginpanikasugan nila nga makig-abyan sa mga kauturan.  “Nagaistorya kami sa mga kauturan sa Kingdom Hall antes kag pagkatapos sang miting,” siling niya. “May tion gid kami nga maistorya sila kag indi lang sila matamyaw.” Bangod sini, madali man nila nakilala ang mga kauturan. Gin-agda man nila ang mga kauturan sa ila balay amo nga nagsuod pa gid sila. Nagsiling pa sia: “Ginhatagan namon sila sang numero sang amon telepono kag ginpangayo man namon ang ila numero para matawgan nila kami kag makaupod kami sa kongregasyon kag sa iban pa nga hilikuton.”

Kon nakulbaan ka makig-istorya sa indi mo pa kilala, umpisahi ini sa simple lang anay nga mga paagi. Halimbawa, magyuhum bisan pa daw nasaw-ahan ka sa primero. Paagi sini, magalapit ang buot sang iban sa imo. Kay man, “ang malipayon nga pagpasiplat nagapasadya sa tagipusuon.” (Hulu. 15:30, footnote) “Mahuluy-on gid ako,” siling ni Rachel, nga nagsaylo sa lugar nga malayo gid sa iya gindak-an. “Kon kaisa, ginapilit ko ang akon kaugalingon nga makig-istorya sa mga kauturan sa bag-o ko nga kongregasyon. Ginapalapitan ko ang utod nga nagapungko lang sa Kingdom Hall kag wala sing ginaistorya. Mahimo nga mahuluy-on man sia pareho sa akon.” Ngaa indi pagtinguhai nga makaistorya sa isa nga indi mo pa kilala antes ukon pagkatapos sang kada miting?

Ukon basi nanamian ka man makig-istorya sa indi mo pa kilala sa una nga mga semana sang pagsaylo mo. Pero puede ini magtahaw sa pagligad sang tion. Gani dapat padayon ka nga magpanikasog sa pagpakig-abyan.

Ang iban nga kahoy mas madugay makapanggamot sing maayo sa ginsayluhan sini nga lugar. Gani indi man palareho ang kalawigon sang tion nga maka-adjust ang mga kauturan nga nagsaylo sa bag-o nga kongregasyon. Kon madugay ka na nga nagsaylo pero indi ka gihapon maka-adjust, makabulig ini nga mga prinsipio sa Biblia:

“Indi kita magpangampo sa paghimo sing maayo, kay sa nagakaigo nga tion magaani kita kon indi kita paglapyuon.”—Gal. 6:9.

Dugangi ang tion sa kalawigon nga ginapaabot mo nga maka-adjust ka. Halimbawa, madamo nga misyonero nga ginhanas sa Gilead School ang nagapabilin anay sing pila ka tuig sa pungsod nga gin-asayn sa ila antes sila magbakasyon sa ila ginhalinan nga pungsod. Nakabulig ini sa ila nga mangin suod sa mga kauturan kag maka-adjust sa bag-o nga kultura.

Kapila na magsaylo si Alejandro, gani nahibaluan niya nga nagakinahanglan gid sing tion para maka-adjust. Nagsiling sia: “Sang nagligad lang namon nga pagsaylo, nagsiling ang akon asawa, ‘Ara sa una ta nga kongregasyon ang tanan ko nga abyan!’” Ginpahanumdom niya nga amo gid sini ang ginsiling sang iya asawa sang nagligad nga duha ka tuig sang nagsaylo man sila. Pero sa sining duha ka tuig, nagpakita ang iya asawa sing interes sa iban kag nangin suod niya nga mga abyan ang indi niya anay kilala.

“Indi ka magsiling, ‘Ngaa mas maayo sang una sangsa subong?’ kay indi ina maalamon nga pamangkot.”—Man. 7:10.

Indi pag-ikumparar ang kongregasyon mo subong sa nagligad mo nga kongregasyon. Halimbawa, basi ang mga kauturan sa bag-o mo nga kongregasyon mahuluy-on ukon basi palaistorya indi pareho sa una mo nga kongregasyon. Magpokus sa ila maayo nga mga kinaiya, kay amo man sini ang gusto mo nga himuon nila sa imo. Narealisar sang pila ka nagsaylo nga dapat nila pamangkuton ang ila kaugalingon, ‘Ginahigugma ko gid bala “ang tanan nga kauturan”?’—1 Ped. 2:17.

 “Padayon kamo sa pagpangayo, kag kamo pagahatagan.”—Luc. 11:9.

Padayon nga magpangamuyo nga buligan ka. “Indi ini pagsoloha,” siling sang gulang nga si David. “Madamo kita sing mahimo paagi lamang sa bulig ni Jehova. Ipangamuyo gid ini!” Nagapati man sa sini si Rachel, nga ginsambit kaina. “Kon magbatyag kami sang akon bana nga daw mga estranghero kami sa kongregasyon,” siling niya, “nagapangamuyo kami kay Jehova, ‘Palihug ipahibalo sa amon kon may ginahimo kami kon ngaa indi magsuod sa amon ang iban.’ Dayon ginadugangan namon ang amon tion sa pagpakig-upod sa mga kauturan.”

Mga ginikanan, kon nabudlayan mag-adjust ang inyo kabataan, ipangamuyo ini upod sa ila. Buligi sila nga makapakig-abyan paagi sa pagplano nga makapakig-upod sila sa mga kauturan kag mapalig-on.

Paano mo mabuligan ang mga nagsaylo sa inyo kongregasyon? Sa umpisa pa lang, panikasugi nga mangin matuod nga abyan. Para mahimo ini, imadyina kon ano ang gusto mo nga himuon sa imo kon ikaw ang nagsaylo, kag amo ini ang himua sa ila. (Mat. 7:12) Puede mo bala sila maagda nga mag-upod sa inyo pangpamilya nga pagsimba ukon sa pagtan-aw sang programa sa JW Broadcasting? Puede mo bala sila maagda nga updan ka sa ministeryo? Kon agdahon mo sila bisan sa simple nga pagkaon, indi nila malipatan ang imo pag-abiabi sa ila. Ano pa ang mabulig mo sa mga nagsaylo?

“Sang nagsaylo kami sa bag-o namon nga kongregasyon,” siling ni Carlos, “ginhatagan kami sang isa ka utod nga babayi sing listahan sang mga balaligyaan nga makabarato kami. Nakabulig gid ini.” Mahimo nga malipay gid ang mga naghalin sa lugar nga tuhay ang klima kon buligan mo sila kon ano ang bagay isuksok sa inyo lugar kon tig-ilinit, tigtulugnaw, ukon tig-ululan. Mabuligan mo man sila sa ila ministeryo paagi sa pagsugid sang kasaysayan sang inyo lugar ukon sang mga ginapatihan sang mga tawo.

Si Allen, nga ginsambit sa umpisa, sobra na isa ka tuig sa bag-o niya nga kongregasyon. Nagsiling sia: “Sang primero, ginapilit ko ang akon kaugalingon para makilala ko ang mga kauturan. Pero subong, daw pamilya ko na sila, kag malipayon ako.” Narealisar ni Allen nga wala madula ang iya mga abyan sang magsaylo sia. Ang matuod, nadugangan ang iya mga abyan, nga posible nga mangin mga abyan niya sa bug-os niya nga kabuhi.