GUSTO sang mga tawo nga mangin malipayon. Pero sa sining katapusan nga mga adlaw, ang tanan may mga problema nga “mabudlay atubangon.” (2 Tim. 3:1) Nadula ang kalipay sang iban kay ginhimuan sila sang malain, nagmasakit sila, nadulaan sang obra, namatyan, ukon may iban pa sila nga ginakabalak-an. Bisan ang mga alagad sang Dios mahimo man maluyahan sang buot kag masubuan. Kon natabo ini sa imo, paano ka mangin malipayon?

Para masabat ini nga pamangkot, dapat naton mahangpan kon ano ang matuod nga kalipay kag kon paano nangin malipayon ang iban bisan may mga problema sila. Dayon, binagbinagon naton kon paano kita mangin mas malipayon.

Ang kalipay indi lang mapakita paagi sa pagkadlaw. Bilang halimbawa: Ang isa ka hubog mahimo magkadlaw todo. Pero kon maulian na sia, wala na sia nagakadlaw kag mahimo marealisar niya nga madamo gihapon sia sing problema. Umalagi lang ang iya kasadya kag indi ini matuod nga kalipay.—Hulu. 14:13.

Pero ang kalipay isa ka kinaiya nga ginabatyag sang aton tagipusuon. Suno sa isa ka paglaragway, “amo ini ang nabatyagan sang isa bangod may maayo sia nga nabaton ukon ginapaabot.” Ang kalipay isa ka balatyagon nga wala nagakadula, maayo man ukon indi ang aton kahimtangan. (1 Tes. 1:6) Ang matuod, posible nga malipayon gihapon ang isa nga may problema. Halimbawa, ginbunal ang mga apostoles bangod sang ila pagbantala parte sa Cristo. Pero “naghalin sila sa atubangan sang Sanhedrin, nga nagakasadya bangod ginkabig sila nga takus pakahuy-an tungod sa iya ngalan.” (Binu. 5:41) Wala sila nagkasadya kay ginbunal sila. Sa baylo, nalipay sila kay nangin matutom sila nga mga alagad sang Dios.

Wala kita matawo nga may amo sini nga kalipay kag indi ini basta lang naton mabatyagan. Ngaa? Bangod ang matuod nga kalipay isa sa mga kinaiya nga ginapatubas sang balaan nga espiritu sang Dios. Ginabuligan kita sang espiritu sang Dios nga matigayon “ang bag-o nga personalidad,” kag nalakip sa sini ang kalipay. (Efe. 4:24; Gal. 5:22) Kon malipayon kita, mas mahapos naton maatubang ang aton mga problema.

Gusto ni Jehova nga mahanabo sa duta ang maayo, indi ang malain nga makita naton subong. Pero bisan pa malain ang ginahimo sang iban, wala madula ang kalipay ni Jehova. Nagsiling ang Pulong sang Dios: “Yara sa iya ginapuy-an ang kusog kag ang kalipay.” (1 Cron. 16:27) Isa pa, ang maayo nga ginahimo sang mga alagad ni Jehova ‘nagapasadya sang iya tagipusuon.’—Hulu. 27:11.

Ginailog naton si Jehova kon indi madula ang aton kalipay bisan pa indi matabo ang ginapaabot naton. Sa baylo nga mabalaka, magpokus kita sa maayo nga mga butang nga ara sa aton subong kag mapinasensiahon nga hulaton  ang mas maayo nga mga butang sa palaabuton. *

May madamo man nga halimbawa sa Biblia sang mga tawo nga nangin malipayon bisan may mga problema sila. Isa sa ila si Abraham. Pila ka beses nga nabutang sa katalagman ang iya kabuhi kag nakaatubang sia sing mga problema nga resulta sang ginhimo sang iban. (Gen. 12:10-20; 14:8-16; 16:4, 5; 20:1-18; 21:8, 9) Pero nangin malipayon gihapon si Abraham. Ngaa? Maathag sa iya hunahuna ang paglaum niya nga mabuhi sa bag-ong kalibutan nga pagagamhan sang Mesias. (Gen. 22:15-18; Heb. 11:10) Nagsiling si Jesus: “Si Abraham nga inyo amay nagkasadya gid sa paglaum nga makita ang akon adlaw.” (Juan 8:56) Mailog naton si Abraham kon pamalandungan naton ang kalipay nga mabaton naton sa palaabuton.—Roma 8:21.

Pareho kay Abraham, nagpokus man sa mga promisa sang Dios si apostol Pablo kag si Silas. Mabakod ang ila pagtuo, kag malipayon sila wala sapayan sang madamo nga kabudlayan. Halimbawa, madamo nga beses sila nga ginbunal kag dayon ginpriso. Pero “sang mga tungang-gab-i na, [nagpangamuyo sila] kag nagdayaw sa Dios paagi sa ambahanon.” (Binu. 16:23-25) Nabatas nanday Pablo kag Silas ang kabudlayan bangod padayon nila nga ginhunahuna ang ila paglaum, kag malipayon sila bangod nabal-an nila nga nag-antos sila tungod sa ngalan sang Cristo. Mailog naton sanday Pablo kag Silas kon dumdumon naton ang maayo nga resulta sang matutom nga pag-alagad sa Dios.—Fil. 1:12-14.

Subong, may madamo man nga halimbawa sang mga kauturan nga malipayon bisan ara sila sa kabudlayan. Halimbawa, sang Nobiembre 2013, ginlaslas sang tuman kabaskog nga Bagyo Yolanda (Haiyan) ang sentral nga bahin sang Pilipinas, kag naguba ang mga balay sang sobra 1,000 ka pamilya sang mga Saksi. Nawasak ang balay ni George sa siudad sang Tacloban, pero nagsiling sia: “Wala sapayan sang natabo, malipayon ang mga kauturan. Indi ko malaragway ang kalipay nga nabatyagan namon.” Kon pamalandungan naton ang mga ginhimo ni Jehova para sa aton kag pasalamatan sia, mangin malipayon kita bisan pa makaeksperiensia kita sang mabudlay nga mga problema. Ano pa ang ginhatag ni Jehova sa aton para malipay kita?

Ang aton kaangtanan sa Dios amo ang una nga rason kon ngaa malipayon kita. Kilala naton ang Soberano sang uniberso. Sia ang aton Amay, Dios, kag Abyan!—Sal. 71:17, 18.

Ginapabaloran man naton ang ginhatag sa aton nga kabuhi kag ikasarang nga malipay sa sini. (Man. 3:12, 13) Bangod ginbuyok kita ni Jehova, nahangpan naton ang iya kabubut-on para sa aton. (Col. 1:9, 10) Gani may katuyuan kag direksion ang aton kabuhi. Pero ang kalabanan nga tawo wala makahibalo sang katuyuan sang kabuhi. Ginpakita ni Pablo ini nga kinatuhayan sang magsulat sia: “‘Wala makita sang mata kag wala mabatii sang dulunggan, kag wala mahangpan sang tagipusuon sang tawo ang mga butang nga ginhanda sang Dios para sa mga nagahigugma sa iya.’ Apang ginpahayag ini sang Dios sa aton paagi sa iya espiritu.” (1 Cor. 2:9, 10) Nalipay gid kita kay nahangpan naton ang kabubut-on kag katuyuan ni Jehova.

Binagbinaga ang madamo pa nga ginhimo ni Jehova para sa iya katawhan. Indi bala nga nalipay kita kay mapatawad kita sa aton mga sala? (1 Juan 2:12) Bangod sang kaluoy sang Dios, may paglaum kita nga mabuhi sa bag-ong kalibutan nga malapit na mag-abot. (Roma 12:12) Subong, ginhatagan na kita ni Jehova sing madamo nga abyan nga kaupod naton sa pagsimba sa iya. (Sal. 133:1) Ginapasalig man kita sang Pulong sang Dios nga amligan ni Jehova ang iya katawhan para indi sila mahalitan ni Satanas kag sang mga demonyo. (Sal. 91:11) Kon pamalandungan naton ini nga mga pagpakamaayo sang Dios, mangin malipayon gid kita.—Fil. 4:4.

Kon malipayon na ang isa ka Cristiano, puede pa bala sia mangin mas malipayon? Nagsiling si Jesus: “Pangayo kamo kag magabaton kamo, agod mangin bug-os ang inyo kalipay.” (Juan 16:24) Ginapakita sini nga puede pa kita mangin mas malipayon. Mapaanggid naton sa kalayo ang aton kalipay. Para magdabdab ang kalayo, dapat naton ini gatungan. Gani dapat man naton pabakuron ang aton espirituwalidad para mangin mas malipayon kita. Dumduma ini: Ang kalipay ginapatubas sang espiritu sang Dios. Gani para mangin mas malipayon kita, dapat naton ipangamuyo pirme kay Jehova nga buligan kita sang iya espiritu. Dapat man kita magpamalandong sa iya Pulong, nga gintuytuyan sang balaan nga espiritu.—Sal. 1:1, 2; Luc. 11:13.

Mas malipayon ka man kon masako ka sa mga hilikuton nga nagapahalipay kay Jehova. (Sal. 35:27; 112:1) Ngaa? Bangod gintuga kita para ‘magkahadlok sa matuod nga Dios kag magtuman sa iya mga sugo, kay amo ini ang bug-os nga katungdanan sang tawo.’ (Man. 12:13) Buot silingon, gintuga kita para himuon ang kabubut-on sang Dios. Gani kon nagaalagad kita kay Jehova, malipayon gid kita. *

Kon may diosnon kita nga kalipay, mabaton naton ang madamo pa nga kaayuhan. Halimbawa, malipay gid sa aton ang aton Amay sa langit kon malipayon kita nga nagaalagad sa iya bisan may mga problema kita. (Deut. 16:15; 1 Tes. 5:16-18) Isa pa, bangod may matuod kita nga kalipay, wala kita nagahunahuna nga importante gid ang madamo nga materyal nga mga butang. Sa baylo, nagasakripisyo pa gid kita para sa Ginharian sang Dios. (Mat. 13:44) Kon makita naton ang maayo nga resulta sang aton pagsakripisyo, malipay gid kita, mangin kontento, kag mapahalipay naton ang iban.—Binu. 20:35; Fil. 1:3-5.

“Kon malipayon ka kag kontento sa imo kabuhi subong, posible gid nga mangin maayo ang imo panglawas.” Amo ini ang ginsulat sang isa ka researcher sa University of Nebraska sa United States nga nagtuon parte sa maayong panglawas. Pareho gid ini sa ginsiling sang Biblia: “Ang tagipusuon nga malipayon maayo nga bulong.” (Hulu. 17:22) Gani kon mas malipayon ka, posible gid nga mangin mapagros ka.

Gani bisan pa madamo kita sing kabudlayan subong, matigayon naton ang matuod nga kalipay kon mabaton naton ang balaan nga espiritu paagi sa pangamuyo, pagtuon, kag pagpamalandong sa Pulong ni Jehova. Mangin malipayon pa gid kita kon pamalandungan naton ang mga pagpakamaayo naton subong, ilugon ang pagtuo sang iban, kag himuon naton ang kabubut-on sang Dios. Gani maeksperiensiahan man naton ang ginasiling sang Salmo 64:10: “Ang matarong magakalipay kay Jehova kag magadangop sa iya.”