1, 2. (a) Ano ang ginsiling sang madamo parte sa espirituwalidad? (b) Ano nga importante nga mga pamangkot ang binagbinagon naton?

“BANGOD gintinguhaan ko nga mangin espirituwal nga tawo, nangin malipayon ako, kag nakabulig ini sa akon nga maatubang ang mga problema,” siling sang utod nga babayi nga taga-Canada. Ang isa ka utod sa Brazil nagsiling, “Nangin malipayon gid kami sang akon asawa sa sulod sang 23 ka tuig bangod ginapanikasugan namon nga pirme pamensaron ang espirituwal nga mga butang.” Ang utod nga lalaki sa Pilipinas nagsiling man, “Paagi sa pagpamensar pirme sang espirituwal nga mga butang, may kalinong ako sa hunahuna, kag nangin maayo ang akon kaangtanan sa mga kauturan nga sarisari ang ginhalinan.”

² Ginapakita sang ila ginsiling nga makabulig sa aton ang aton espirituwalidad. Gani mahimo kita mamangkot, ‘Paano ako mangin espirituwal nga tawo kag makabenepisyo sa sini?’ Pero antes naton ini sabton, dapat anay naton mahangpan ang ginasiling sang Biblia parte sa espirituwal nga tawo. Sa sini nga artikulo, pagasabton naton ang tatlo ka importante nga pamangkot. (1) Ano ang buot silingon kon ang isa espirituwal nga tawo? (2) Kanday sin-o mga halimbawa ang makabulig sa aton nga mag-uswag sa  espirituwal? (3) Paano kita mabuligan nga mangin espirituwal nga tawo kon yara sa aton “ang hunahuna sang Cristo”?

3. Suno sa Biblia, ano ang kinatuhayan sang pisikal nga tawo kag espirituwal nga tawo?

³ Ginabuligan kita ni apostol Pablo nga mahangpan ang kinatuhayan sang “espirituwal nga tawo” kag “pisikal nga tawo.” (Basaha ang 1 Corinto 2:14-16.) Ano ang kinatuhayan nila? “Wala ginabaton sang pisikal nga tawo ang mga butang sang espiritu sang Dios, kay kabuangan ini sa iya; kag indi niya ini mahangpan.” Pero “ang espirituwal nga tawo nagausisa sang tanan nga butang” kag yara sa iya “ang hunahuna sang Cristo.” Ginapalig-on kita ni Pablo nga mangin espirituwal nga tawo. Ano pa gid ang kinatuhayan sang pisikal nga tawo kag espirituwal nga tawo?

4, 5. Ano ang mga kinaiya sang pisikal nga tawo?

⁴ Binagbinaga ang panimuot sang pisikal nga tawo. Lapnag sa kalibutan ang panimuot nga unahon ang makasasala nga mga handum. Ginlaragway ini ni Pablo nga “espiritu nga nagapanghikot na karon sa mga anak sang pagkadimatinumanon.” (Efe. 2:2) Bangod sini, ginasunod lang sang madamo kon ano ang ginahimo sang kalabanan. Ginauna nila ang ila kaugalingon. Ginahimo nila kon ano ang husto para sa ila, kag wala sila nagasapak sa mga talaksan sang Dios. Ginakabalak-an pirme sang pisikal nga tawo ang iya posisyon, materyal nga manggad, ukon kinamatarong, kag amo ini ang pinakaimportante sa iya.

⁵ Ano pa ang kinaiya sang pisikal nga tawo? Ginahimo niya “ang mga buhat sang unod.” (Gal. 5:19-21) Ginsambit ni Pablo sa iya una nga sulat sa kongregasyon sa Corinto ang iban pa nga kinaiya sang pisikal nga mga tawo. Sila ang ginabangdan nga magbahinbahin ang mga tawo, may ginadampigan sila, ginagatungan nila ang indi paghangpanay, nagaakusahay sila sa korte, wala sila nagatahod sa pagkaulo, kag wala sila kontrol sa pagkaon kag pag-inom. Kon ginasulay ang pisikal nga tawo, wala gid sia nagapakigbato. (Hulu. 7:21, 22) Nagsiling si Judas nga ang iban nangin tuman kalain amo nga ‘wala na gid sila sing espirituwalidad.’—Jud. 18, 19.

6. Ano ang mga kinaiya sang espirituwal nga tawo?

⁶ Pero ano naman ang “espirituwal nga tawo”? Nabalaka gid ang espirituwal nga tawo sa iya kaangtanan sa Dios, indi pareho sa pisikal nga tawo. Nagapagiya ang espirituwal nga mga tawo sa balaan nga espiritu sang Dios kag nagapanikasog nga ‘mangin manug-ilog sa Dios.’ (Efe. 5:1) Buot silingon, ginatinguhaan nila nga mabal-an ang panghunahuna ni Jehova kag sundon ang iya pagtamod. Para sa ila, matuod gid ang Dios. Ginasunod gid nila ang mga talaksan ni Jehova sa bug-os nila nga kabuhi. (Sal. 119:33; 143:10) Wala ginahimo sang espirituwal nga tawo “ang mga buhat sang unod,” sa baylo, ginatinguhaan niya nga ipakita “ang mga kinaiya nga ginapatubas sang espiritu.” (Gal. 5:22, 23) Binagbinaga ini nga pagpaanggid: Ang tawo nga sagad magnegosyo pirme nagapamensar sang negosyo. Gani ang tawo nga nagapabalor gid sa iya pagsimba sa Dios pirme nagapamensar sang espirituwal nga mga butang.

7. Ano ang ginasiling sang Biblia parte sa espirituwal nga mga tawo?

⁷ Ginadayaw gid sang Biblia ang espirituwal nga mga tawo. Ang Mateo 5:3 nagasiling: “Malipayon ang mga mahunahunaon sa ila espirituwal nga kinahanglanon, kay ila ang Ginharian sang langit.” Ginsambit sang Roma 8:6 ang kaayuhan kon pirme naton pamensaron ang espirituwal nga mga butang: “Ang paghunahuna suno sa unod nagakahulugan sing kamatayon, apang ang paghunahuna suno sa espiritu nagakahulugan sing  kabuhi kag paghidait.” Kon unahon naton ang espirituwal nga mga butang, may paghidait kita sa Dios, may kalinong kita sa hunahuna, kag may paglaum kita nga mabuhi sing wala sing katapusan.

8. Ngaa dapat gid kita magpanikasog nga mangin espirituwal nga tawo?

⁸ Pero nagakabuhi kita sa makatalagam nga kalibutan subong. Napalibutan kita sang mga tawo nga wala nagasapak sa mga panghunahuna sang Dios, gani dapat gid kita magpanikasog nga mangin espirituwal nga tawo kag amligan ang aton hunahuna. Kon indi naton pagpamensaron ang mga panghunahuna ni Jehova, buslan ini sang mahigko nga panghunahuna sang kalibutan. Ano ang himuon naton para indi ini matabo sa aton? Paano kita mag-uswag sa espirituwal?

9. (a) Ano ang makabulig sa aton nga mag-uswag sa espirituwal? (b) Sin-o nga espirituwal nga mga tawo ang binagbinagon naton?

⁹ Nagahamtong ang isa ka bata kon ginaobserbahan niya kag ginailog ang maayo nga halimbawa sang iya mga ginikanan. Gani magauswag man kita sa espirituwal kon obserbahan naton kag ilugon ang mga mabakod sa espirituwal. Kon obserbahan naton ang pisikal nga mga tawo, mabal-an naton ang indi naton dapat himuon. (1 Cor. 3:1-4) Ginasambit sang Biblia ining duha ka sahi sang mga tawo. Pero gusto naton mag-uswag bilang espirituwal nga mga tawo, gani binagbinagon naton ang pila ka maayo nga halimbawa nga mailog naton: sanday Jacob, Maria, kag Jesus.

10. Paano ginpakita ni Jacob nga espirituwal nga tawo sia?

¹⁰ Una, binagbinaga ang halimbawa ni Jacob. May mga problema man si Jacob pareho sa kalabanan sa aton subong. Gusto gid sia patyon sang iya utod nga si Esau. Madamo nga beses sia nga ginhingalitan sang iya ugangan nga lalaki. Pero bisan pa nakaupod ni Jacob ining “pisikal” nga mga tawo, nagpabilin sia nga espirituwal nga tawo. Nagtuo  sia sa ginpromisa ni Jehova kay Abraham kag ginpanikasugan niya nga atipanon ang iya pamilya nga may bahin sa katumanan sang katuyuan ni Jehova. (Gen. 28:10-15) Ginpakita sang ginsiling kag ginhimo ni Jacob nga ginahunahuna niya ang mga talaksan kag kabubut-on sang Dios. Halimbawa, sang hinadlukan sia bangod kay Esau, nagsiling sia sa Dios: “Nagapangamuyo ako sa imo, luwasa ako . . . Nagsiling ka, ‘Magahimo gid ako sing maayo sa imo, kag himuon ko ang imo kaliwat nga pareho sang mga balas sa dagat.’” (Gen. 32:6-12) Nagtuo gid sia sa mga ginpromisa ni Jehova sa iya kag sa iya mga katigulangan kag gusto niya magkabuhi suno sa kabubut-on kag katuyuan sang Dios.

11. Ngaa masiling naton nga espirituwal nga tawo si Maria?

¹¹ Binagbinaga man ang halimbawa ni Maria. Ngaa ginpili ni Jehova si Maria nga mangin iloy ni Jesus? Sigurado gid nga espirituwal nga tawo si Maria. Ngaa masiling naton ini? Maathag ini nga makita sa iya matahom nga pagdayaw sa Dios sang nagduaw sia sa iya mga paryente nga sanday Zacarias kag Elisabet. (Basaha ang Lucas 1:46-55.) Ang ginhambal ni Maria nagapakita nga ginapabaloran gid niya ang Pulong sang Dios kag pamilyar gid sia sa Hebreong Kasulatan. (Gen. 30:13; 1 Sam. 2:1-10; Mal. 3:12) Talupangda man nga bisan pa bag-o lang makasal sanday Maria kag Jose, wala gid sila naghulid antes matawo si Jesus. Ano ang ginapakita sini? Mas importante sa ila ang kabubut-on ni Jehova sangsa ila mga handum. (Mat. 1:25) Sa pagligad sang tion, ginbinagbinag gid ni Maria ang mga nahanabo kay Jesus kag ginpamatian sing maayo ang mga ginsiling ni Jesus. Dayon, ‘gintipigan niya ini tanan sa iya tagipusuon.’ (Luc. 2:51) Interesado gid sia sa katuyuan sang Dios parte sa Mesias. Mailog bala naton si Maria nga pirme unahon sa aton kabuhi ang kabubut-on sang Dios?

12. (a) Paano gin-ilog ni Jesus ang iya Amay? (b) Paano naton mailog si Jesus? (Tan-awa ang piktyur sa umpisa sini nga artikulo.)

¹² Sa tanan nga tawo nga nagkabuhi, sin-o ang pinakamaayo nga halimbawa sang espirituwal nga tawo? Si Jesus. Sa bug-os niya nga kabuhi kag pagministeryo, ginpakita niya nga gusto niya ilugon ang iya Amay, si Jehova. Pareho gid kay Jehova ang iya ginhunahuna, ginbatyag, kag ginhimo. Nagkabuhi si Jesus suno sa kabubut-on kag mga talaksan sang Dios. (Juan 8:29; 14:9; 15:10) Halimbawa, ikumparar ang ginbatyag ni Jehova nga kaluoy nga ginlaragway ni manalagna Isaias sa ginbatyag ni Jesus nga ginlaragway sang manunulat sang Ebanghelyo nga si Marcos. (Basaha ang Isaias 63:9; Marcos 6:34.) Pareho bala kita kay Jesus nga naluoy kag handa magbulig sa mga tawo? Gingamit man ni Jesus ang iya tion kag kusog sa pagbantala kag pagtudlo sang maayong balita. (Luc. 4:43) Amo ini ang ginabatyag kag ginahimo sang espirituwal nga tawo.

13, 14. (a) Ano ang matun-an naton sa halimbawa sang espirituwal nga mga tawo sa panahon naton? (b) Maghatag sing halimbawa.

¹³ Magluwas sa mga halimbawa sa Kasulatan, madamo man sang halimbawa sang espirituwal nga mga tawo sa panahon naton ang nagtinguha gid nga ilugon ang Cristo. Mahimo nga nakita mo nga makugi sila sa ministeryo, maabiabihon, maluluy-on, ukon may iban pa nga maayo nga kinaiya. Pareho man sila sa aton nga may mga kaluyahon kag indi perpekto, pero nagapanikasog sila nga ipakita ang diosnon nga mga kinaiya. Ang utod sa Brazil nga si Rachel nagsiling: “Mahilig anay ako sa uso sa kalibutan. Gani indi ako maugdang mamayo. Pero sang natun-an ko ang kamatuoran, napalig-on ako nga magpanikasog gid nga mangin espirituwal nga tawo. Indi mahapos magbag-o, pero mas malipayon ako subong kag may katuyuan na ang akon kabuhi.”

 ¹⁴ Tuhay naman ang problema sang isa ka utod sa Pilipinas nga si Reylene. Gin-una niya ang mataas nga edukasyon kag daku sing sueldo nga trabaho. Nagsiling sia: “Amat-amat nga nadula ang akon espirituwal nga mga tulumuron. Narealisar ko nga may kulang sa akon kabuhi, isa ka butang nga mas importante sangsa trabaho ko. Gani ginbag-o ko ang akon prioridad kag gin-una ang pag-alagad kay Jehova.” Sang ginhimo ini ni Reylene, ginpakita niya nga nagatuo sia sa promisa ni Jehova nga mabasa sa Mateo 6:33, 34. Nagsiling sia: “Sigurado gid ako nga indi ako pagpabay-an ni Jehova!” Mahimo nga may kilala ka man sa inyo kongregasyon nga pareho sa ila. Napalig-on ka man bala nga ilugon ang pagtuo sini nga mga nagasunod sa Cristo?—1 Cor. 11:1; 2 Tes. 3:7.

15, 16. (a) Para mailog naton ang Cristo, ano ang dapat naton himuon? (b) Paano kita mangin pamilyar sa “hunahuna sang Cristo”?

¹⁵ Paano naton mailog ang Cristo? Nagsiling ang Biblia sa 1 Corinto 2:16 nga dapat yara sa aton “ang hunahuna sang Cristo.” Ginsambit sang Roma 15:5 ang pagtigayon sang “panghunahuna nga pareho sang iya ni Cristo Jesus.” Gani para mailog naton ang Cristo, dapat naton mabal-an kon ano ang iya ginhunahuna, ginbatyag, kag ginhimo. Dayon, dapat naton sundon ang iya mga tikang. Ginakabalak-an pirme ni Jesus ang iya kaangtanan sa Dios. Gani kon ginailog naton si Jesus, nagasuod pa gid kita kay Jehova. Amo ini ang rason kon ngaa importante nga mabal-an naton ang panghunahuna ni Jesus.

¹⁶ Paano naton ini mahimo? Nakita sang mga disipulo ni Jesus ang ginhimo niya nga mga milagro, nabatian nila ang iya mga gintudlo, nakita nila kon paano niya gintratar ang tanan nga tawo, kag kon paano niya ginsunod ang mga prinsipio sang Dios. Nagsiling sila: “Mga saksi kami sang tanan nga ginhimo niya.” (Binu. 10:39) Indi naton makita si Jesus subong. Pero bangod palangga kita ni Jehova, ginpasulat niya ang mga kasaysayan sa mga Ebanghelyo nga makabulig sa aton nga mahanduraw ang mga kinaiya ni Jesus. Kon basahon naton kag pamalandungan ang mga libro sa Biblia nga Mateo, Marcos, Lucas, kag Juan, mangin pamilyar kita sa hunahuna sang Cristo. Gani ‘masunod naton sing maayo ang iya mga tikang’ kag ‘masangkapan naton ang aton kaugalingon sang panghunahuna’ sang Cristo.—1 Ped. 2:21; 4:1.

17. Paano makabulig sa aton ang paghunahuna pareho sa Cristo?

¹⁷ Paano makabulig sa aton ang paghunahuna pareho sa Cristo? Pareho sang masustansia nga pagkaon nga nagapabakod sang aton lawas, magabakod man ang aton espirituwalidad kon ilugon naton ang hunahuna sang Cristo. Amat-amat naton nga mabal-an kon ano ang himuon sang Cristo sa kada sitwasyon. Makabulig ini sa aton nga magdesisyon nga may matinlo nga konsiensia kag mapahalipay ang Dios. Indi bala maayo gid ini nga mga rason para ‘ilugon naton si Ginuong Jesucristo’?—Roma 13:14.

18. Ano ang natun-an mo sa sini nga artikulo kon paano mangin espirituwal nga tawo?

¹⁸ Ginbinagbinag naton kon paano mangin espirituwal nga tawo. Natun-an naton nga puede naton mailog ang maayo nga mga halimbawa sang espirituwal nga mga tawo. Natun-an man naton nga kon yara sa aton “ang hunahuna sang Cristo,” mabuligan kita sini nga mag-uswag sa espirituwal. Pero may iban pa nga bahin sang aton espirituwalidad nga dapat naton binagbinagon. Halimbawa, paano naton mabal-an kon mabakod ang aton espirituwalidad? Ano ang himuon naton para mangin mabakod pa ini? Kag ano ang epekto sang aton espirituwalidad sa aton kabuhi? Pagasabton ini nga mga pamangkot sa masunod nga artikulo.