1, 2. Ano ang narealisar sang isa ka utod parte sa iya espirituwalidad, kag ano ang ginhimo niya?

TIN-EDYER pa lang si Robert sang nabawtismuhan sia, pero ang kamatuoran indi ang pinakaimportante sa iya kabuhi. Nagsiling sia: “Wala man ako sing ginahimo nga sala, pero pakulahaw lang ang akon pag-alagad. Sa panan-aw sang iban, mabakod ako sa espirituwal kay nagatambong man ako sa tanan nga miting kag nagaauxiliary payunir pa gani ako pila ka beses kada tuig. Pero daw may kulang sa akon kabuhi.”

² Nabal-an lang ni Robert kon ano ini sang nagpangasawa sia. Kon kaisa, nagapamangkutanay sila sang iya asawa parte sa Biblia. Mabakod sa espirituwal ang iya asawa amo nga kadasig lang sa iya magsabat sa mga pamangkot, pero nahuya si Robert kay wala gid sia pirme sing isabat. Nagsiling sia: “Daw wala gid ako sing nabal-an. Ginpensar ko, ‘Kon ako ang ulo sang akon asawa, dapat gid ako magtinguha.’” Gani nagtinguha gid si Robert. Nagsiling sia: “Gintun-an ko ang Biblia, kag nag-ukod pa gid ako sa pagtuon, gani amat-amat ini nga nangin maathag. Nahangpan ko na ini kag labaw sa tanan, nangin suod ako kay Jehova.”

3. (a) Ano ang matun-an naton sa eksperiensia ni Robert? (b) Ano nga importante nga mga punto ang binagbinagon naton?

³ May matun-an kita sa eksperiensia ni Robert. Mahimo may  nabal-an kita sa Biblia kag ara kita pirme sa mga miting kag ministeryo, pero indi buot silingon sini nga espirituwal nga tawo na kita. Ukon mahimo nga nag-uswag na kita sa espirituwal, pero sang gin-usisa naton ang aton kaugalingon, nakita naton nga may ara pa kita dapat pauswagon. (Fil. 3:16) Para padayon kita nga mag-uswag, sabton naton ang tatlo ka importante nga pamangkot sa sini nga artikulo: (1) Ano ang makabulig para mausisa naton ang aton espirituwalidad? (2) Paano naton mapabakod ang aton espirituwalidad kag padayon nga mag-uswag? (3) Paano makabulig sa aton ang mabakod nga espirituwalidad?

4. Para kay sin-o ang laygay sa Efeso 4:23, 24?

⁴ Sang nagsugod kita sa pag-alagad sa Dios, ginbag-o naton ang aton bug-os nga kabuhi. Wala kita nag-untat sa pagbag-o sang nabawtismuhan kita. Ginsilingan kita sang Biblia nga ‘padayon nga bag-uhon ang aton panghunahuna.’ (Efe. 4:23, 24) Bangod indi kita perpekto, dapat kita tanan magpadayon sa paghimo sing mga pagbag-o. Dapat gihapon pabakuron bisan sang madugay na nga nagaalagad kay Jehova ang ila espirituwalidad.—Fil. 3:12, 13.

5. Ano nga mga pamangkot ang makabulig para mausisa naton ang aton kaugalingon?

⁵ Para mapabakod ang aton espirituwalidad, dapat naton usisaon sing tampad ang aton kaugalingon. Bata man kita ukon tigulang na, mahimo kita mamangkot: ‘May makita bala ako nga pamatuod nga nagauswag ako bilang espirituwal nga tawo? Pareho na bala sa Cristo ang akon personalidad subong? Makita bala sa akon pagtamod kag paggawi sa Cristianong mga miting nga mabakod ang akon espirituwalidad? Ano ang ginapakita sang akon ginahambal sa iban parte sa akon mga handum? Ano ang ginasugid parte sa akon sang akon batasan sa pagtuon, pamayo kag pamustura, ukon reaksion kon ginalaygayan ako? Ano ang ginahimo ko kon ginasulay ako? Hamtong na gid bala ako nga Cristiano?’ (Efe. 4:13) Mabuligan kita sini nga mga pamangkot para mausisa kon nagauswag kita sa espirituwal.

6. Ano pa ang kinahanglan para mausisa ang aton espirituwalidad?

⁶ Kon kaisa, kinahanglan man naton ang bulig sang iban para mausisa ang aton espirituwalidad. Ginpaathag ni apostol Pablo nga indi mahangpan sang pisikal nga tawo nga ang iya pagkabuhi wala nagapahalipay sa Dios. Pero nahangpan sang espirituwal nga tawo ang pagtamod sang Dios, kag nabal-an niya nga wala nalipay ang Dios sa pagkabuhi sang pisikal nga tawo. (1 Cor. 2:14-16; 3:1-3) Ang mga gulang may hunahuna sang Cristo, gani matalupangdan nila dayon kon ang isa ka utod nagasugod na nga mangin pisikal nga tawo, kag ginatinguhaan nila nga mabuligan sia. Kon ginabuligan kita sang mga gulang, ginabaton bala naton kag ginasunod ang ila laygay? Kon himuon naton ini, ginapakita naton nga gusto gid naton mag-uswag sa espirituwal.—Man. 7:5, 9.

7. Ngaa indi lang ihibalo sa Biblia ang kinahanglan para mangin espirituwal nga tawo?

⁷ Kon may nabal-an kita sa Biblia, wala ini nagakahulugan nga espirituwal nga tawo na kita. Madamo gid sing nabal-an si Hari Solomon sang una parte sa mga pamaagi ni Jehova. Nangin bahin pa gani sang Biblia ang iya mga hulubaton. Pero sang ulihi, nagluya ang iya kaangtanan kay Jehova kag indi sia nangin matutom sa iya. (1 Hari 4:29, 30; 11:4-6) Gani wala labot sa ihibalo sa Biblia, ano pa ang kinahanglan naton? Dapat kita padayon nga mag-uswag sa espirituwal. (Col. 2:6, 7) Paano naton ini mahimo?

8, 9. (a) Ano ang makabulig para magbakod ang aton pagtuo? (b) Ngaa nagatuon kita kag nagapamalandong? (Tan-awa ang piktyur sa umpisa sini nga artikulo.)

⁸ Ginpalig-on ni Pablo ang mga Cristiano  sang unang siglo nga ‘magpanikasog padulong sa pagkahamtong.’ (Heb. 6:1) Paano naton masunod ang laygay ni Pablo? Ang isa ka importante nga paagi amo ang pagtuon sa libro nga Magpabilin Kamo sa Gugma sang Dios. Magabulig ini sa imo nga mahangpan kon paano iaplikar sa imo kabuhi ang mga prinsipio sa Biblia. Kon tapos ka na sa pagtuon sini nga libro, may iban pa nga publikasyon nga puede mo tun-an para mapabakod ang imo pagtuo. (Col. 1:23) Nagapangamuyo ka bala kag nagapamalandong kon paano mo iaplikar sa imo kabuhi ang imo natun-an?

⁹ Dumdumon naton nga nagatuon kita kag nagapamalandong para handumon sang aton tagipusuon nga pahamut-an si Jehova kag tumanon ang iya mga sugo. (Sal. 40:8; 119:97) Ginatinguhaan man naton nga isikway ang bisan ano nga magapugong sa aton pag-uswag sa espirituwal.—Tito 2:11, 12.

10. Paano mapabakod sang mga pamatan-on ang ila espirituwalidad?

¹⁰ Kon pamatan-on ka, may espirituwal ka bala nga mga tulumuron? Kon nagatambong sa sirkito nga asembleya ang isa ka brother nga Bethelite, ginatinguhaan niya gid nga istoryahon antes magsugod ang programa ang mga pamatan-on nga magapabawtismo. Ginapamangkot niya sila kon ano ang ila espirituwal nga mga tulumuron. Madamo ang nagasiling nga gusto nila alagdon si Jehova sing bug-os tion ukon magsaylo sa lugar nga kinahanglan ang dugang nga manugbantala sang Ginharian. Pero ang iban nga pamatan-on daw wala sing tulumuron. Ginapakita bala sini nga para sa ila, indi ini importante? Bilang pamatan-on, pamangkuta ang imo kaugalingon: ‘Nagatambong bala ako sa mga miting kag nagabantala bangod lang gusto ini sang akon mga ginikanan? Ukon ginatinguhaan ko bala nga mangin suod pa gid sa Dios?’ Siempre, indi lang mga pamatan-on ang dapat may espirituwal nga mga tulumuron. Kon may mga tulumuron kita, magabulig ini sa aton nga mangin mabakod sa espirituwal bilang mga alagad ni Jehova.—Man. 12:1, 13.

11. (a) Ano ang dapat naton himuon para mag-uswag sa espirituwal? (b) Kay sin-o halimbawa sa Biblia ang mailog naton?

¹¹ Kon makita na naton ang kinahanglan naton pauswagon, dapat kita maghimo sang mga pagbag-o. Importante gid nga mangin espirituwal nga tawo kay nagadepende sa sini ang aton kabuhi. (Roma 8:6-8) Pero indi man buot silingon nga perpekto na kita kon hamtong kita sa espirituwal. Mabuligan kita sang espiritu ni Jehova para mag-uswag. Pero dapat kita gihapon magpanikasog. Nagkomento anay si John Barr, nga nag-alagad sadto bilang miembro sang Nagadumala nga Hubon, parte sa Lucas 13:24, kag nagsiling sia, “Madamo ang wala nagauswag bangod wala sila magpanikasog nga mangin mabakod sa espirituwal.” Dapat kita magpanikasog pareho kay Jacob, nga wala nag-untat sa pagpakigdumog sa anghel para pakamaayuhon sia. (Gen. 32:26-28) Bisan pa makalilipay ang pagtuon sang Biblia, indi ini pareho sang pagbasa sa nobela nga nagalingaw lang sa aton. Dapat kita magpanikasog nga pangitaon ang espirituwal nga mga hiyas nga makabulig sa aton.

12, 13. (a) Ano ang makabulig para masunod naton ang Roma 15:5? (b) Paano makabulig sa aton ang halimbawa kag laygay ni apostol Pedro? (c) Paano mo mapabakod ang imo espirituwalidad? (Tan-awa ang kahon nga “ Ano ang Himuon Mo Para Mag-uswag sa Espirituwal?”)

¹² Kon nagapanikasog kita nga mangin mabakod sa espirituwal, buligan kita sang balaan nga espiritu nga bag-uhon ang aton hunahuna. Amat-amat naton nga matun-an nga maghunahuna pareho sa Cristo. (Roma 15:5) Buligan man kita sini nga isikway ang makasasala nga mga handum kag ipakita ang mga kinaiya nga makapahamuot sa Dios. (Gal. 5:16, 22, 23) Kon matalupangdan naton nga nagapokus na kita sa materyal nga mga butang ukon sa makasasala nga mga handum, indi kita mag-untat sa pagpangabay kay Jehova  nga hatagan kita sang balaan nga espiritu. Buligan niya kita nga ipokus ang aton hunahuna sa husto nga mga butang. (Luc. 11:13) Dumduma si apostol Pedro. May mga tion sa iya kabuhi nga wala sia maghunahuna pareho sa Cristo. (Mat. 16:22, 23; Luc. 22:34, 54-62; Gal. 2:11-14) Pero padayon sia nga nagpanikasog. Sa bulig ni Jehova, amat-amat nga natun-an ni Pedro nga maghunahuna pareho sa Cristo. Mahimo man naton ini.

¹³ Sang ulihi, ginsambit ni Pedro ang mga kinaiya nga makabulig sa aton. (Basaha ang 2 Pedro 1:5-8.) Kon ‘panikasugan gid’ naton nga ipakita ang pagpugong sa kaugalingon, pagbatas, utudnon nga pagpalangga, kag iban pa nga kinaiya, mabuligan kita sini nga padayon nga mag-uswag sa espirituwal. Kada adlaw, mahimo naton pamangkuton ang aton kaugalingon, ‘Ano nga kinaiya ang puede ko panikasugan nga ipakita subong para mag-uswag ako sa espirituwal?’

14. Kon nagahunahuna kita pareho sa Cristo, ano ang epekto sini sa aton kabuhi?

¹⁴ Kon nagahunahuna kita pareho sa Cristo, may epekto ini sa aton ginahambal, sa aton paggawi sa trabaho ukon sa eskwelahan, kag sa aton mga desisyon kada adlaw. Makita sa aton mga desisyon nga nagapanikasog kita nga sundon ang Cristo. Kon espirituwal nga tawo kita, indi gid naton pagtugutan nga maguba ang aton kaangtanan sa aton Amay sa langit. Kon ginasulay kita nga maghimo sing sala, ang paghunahuna pareho sa Cristo makabulig sa aton nga isikway ini. Antes kita magdesisyon, ginapamalandungan anay naton ini nga mga pamangkot: ‘Ano nga mga prinsipio sa Biblia ang makabulig sa akon? Ano ayhan ang himuon sang Cristo kon ara sia sa sini nga sitwasyon? Ano nga desisyon ang makapahalipay kay Jehova?’ Para mahanas kita nga maghunahuna sa sini nga paagi, binagbinagon naton ang pila ka sitwasyon nga posible matabo. Sa kada sitwasyon, gamiton naton ang isa ka prinsipio sa Kasulatan nga makabulig sa aton nga magdesisyon sing maayo.

15, 16. Maghatag sing mga halimbawa kon paano makabulig sa aton ang paghunahuna pareho sa Cristo nga magdesisyon sing maayo (a) kon nagapili sang pangasaw-on ukon pamanahon. (b) kon nagapili sang abyan.

¹⁵ Kon nagapili sang pangasaw-on ukon pamanahon. Ang prinsipio sa Kasulatan mabasa sa 2 Corinto 6:14, 15. (Basaha.) Maathag sa ginsiling ni Pablo nga indi gid maghisantuanay ang pagtamod sang espirituwal nga tawo kag sang pisikal nga tawo. Paano ini magamit kon nagapili sang pangasaw-on ukon pamanahon?

¹⁶ Kon nagapili sang abyan. Binagbinaga ang prinsipio sa Kasulatan nga mabasa sa 1 Corinto 15:33. (Basaha.) Wala nagapakig-abyan ang diosnon nga tawo sa mga tawo nga magapaluya sang iya espirituwalidad. Hunahunaa kon paano mo maaplikar ini nga prinsipio. Halimbawa, paano ini makabulig kon nagadesisyon ka parte sa paggamit sang social network? Ukon paano ini makabulig sa imo sa pagdesisyon kon bala mahampang ka sang mga video game sa Internet kag indi mo kilala ang imo kahampang?

17-19. Kon espirituwal ka nga tawo, paano ini makabulig sa imo nga (a) likawan ang wala pulos nga mga hilikuton? (b) maghimo sing mga tulumuron? (c) masolbar ang indi paghangpanay?

¹⁷ Mga hilikuton nga makahalit sa aton espirituwalidad.  Nagpaandam si Pablo sa pareho niya nga mga Cristiano. (Basaha ang Hebreo 6:1.) Ano ang “patay nga mga buhat” nga dapat naton likawan? Amo ini ang wala pulos nga mga hilikuton nga indi makabulig sa aton nga magbakod sa espirituwal. Makabulig ini nga prinsipio para masabat ang mga pamangkot pareho sini: ‘Nalakip bala ini nga hilikuton sa “patay nga mga buhat”? Maentra bala ako sa sini nga negosyo? Ngaa indi ako dapat magpasilabot sa mga hublag para sa reporma?’

¹⁸ Espirituwal nga mga tulumuron. Naghatag si Jesus sang laygay parte sa mga tulumuron sa iya Sermon sa Bukid. (Mat. 6:33) Ginauna sang espirituwal nga tawo ang Ginharian sa iya kabuhi. Makabulig ini nga prinsipio para masabat naton ang mga pamangkot pareho sini: ‘Maeskwela pa bala ako sa kolehiyo ukon unibersidad? Dapat ko bala batunon ini nga obra?’

¹⁹ Indi paghangpanay. Paano makabulig sa aton ang ginlaygay ni Pablo sa kongregasyon sa Roma para masolbar ang indi paghangpanay? (Roma 12:18) Bangod ginasunod naton ang Cristo, ginatinguhaan naton nga ‘magpakighidait sa tanan nga tawo.’ Kon may indi paghangpanay, ano ang ginahimo naton? Nabudlayan bala kita magpaumod, ukon kilala kita nga “nagapakighidait”?—Sant. 3:18.

20. Ngaa gusto mo mag-uswag sa espirituwal?

²⁰ Pila lang ini ka halimbawa kon paano makabulig sa aton ang mga prinsipio sa Biblia nga magdesisyon bilang espirituwal nga tawo. Mangin malipayon kita kon nagapagiya kita sa espiritu sang Dios. Si Robert, nga ginsambit sa umpisa sini nga artikulo, nagsiling: “Sang nangin suod na ako kay Jehova, nangin mas maayo ako nga bana kag amay. Nangin kontento ako kag malipayon.” Mabaton man naton ang mga pagpakamaayo kon panikasugan gid naton nga mag-uswag sa espirituwal. Kon espirituwal nga tawo kita, mangin malipayon kita subong kag mabaton naton ang “matuod nga kabuhi” sa ulihi.—1 Tim. 6:19.