SANG tungatunga sang dekada ’30, ang akon amay kag iloy nga sanday James kag Jessie Sinclair nagsaylo sa Bronx, nga sakop sang New York City. Nakilala nila didto si Willie Sneddon, nga taga-Scotland pareho nila. Gin-istoryahan nila dayon ang parte sa ila mga pamilya. Natabo ini pila ka tuig antes ako matawo.

Ginsugiran ni Nanay si Willie nga antes sang Bug-os Kalibutan nga Inaway I, nalumos ang iya amay kag magulang nga lalaki sang nakasalapay sing bomba sa North Sea ang ila sakayan sa pagpangisda. Si Willie nga isa ka Saksi ni Jehova nagsiling, “Ara sa impierno si Tatay mo!” Nakibot gid si Nanay, pero amo ini ang umpisa sang paghibalo niya sang kamatuoran sa Biblia.

Naakig si Nanay sa ginsiling ni Willie kay nahibaluan niya nga maayo nga tawo ang iya amay. Pero nagsiling si Willie, “Pero, kabalo ka bala nga nagkadto man si Jesus sa impierno?” Nadumduman ni Nanay ang orihinal nga mga tinaga sa kredo sang simbahan nga nagasiling nga nanaug si Jesus sa impierno kag nabanhaw sa ikatlo nga adlaw. Gani nagpalibog sia, ‘Kon ang impierno isa ka lugar nga nagakalayo kag ginapaantos didto ang mga malauton, ngaa nagkadto didto si Jesus?’ Amo ini ang umpisa nga nangin interesado si Nanay nga hibaluon ang kamatuoran. Gani, nagtambong sia sa mga miting sa Bronx Congregation kag nabawtismuhan sia sang 1940.

Wala sadto ginapalig-on ang Cristianong mga ginikanan nga tudluan sang Biblia ang ila kabataan. Sang gamay pa ako, kon magtambong si Nanay sa mga miting kag magbantala kon Sabado kag Domingo, ginabilin lang ako kay Tatay. Pagligad sang pila ka tuig, nag-upod kami kay Nanay sa pagtambong sa mga miting. Mapisan gid sia magbantala sang maayong balita kag sa pagtudlo sang Biblia sa mga interesado. May tion pa gani nga ginatingob niya ang iya mga ginatudluan nga lapitay sing balay. Ginaupdan ko sia sa pagbantala kon bakasyon. Bangod sini, madamo ako sing natun-an parte sa Biblia kag kon paano ini itudlo sa iban.

Ginakasubo ko nga wala ko ginpabaloran ang kamatuoran sang gamay pa ako. Pero, sang mga 12 anyos ako, nangin manugbantala ako sang Ginharian kag regular ako nga  nagabantala. Sang 16 anyos ako, nagdedikar ako kay Jehova, kag nabawtismuhan ako sang Hulyo 24, 1954, sa kombension sa Toronto, Canada.

Ang pila ka kauturan sa amon kongregasyon katapo sang pamilya Bethel ukon nag-alagad anay didto. Daku ang ila impluwensia sa akon. Ang ila ikasarang sa pagbantala, paghatag sang ila mga bahin, kag pagpaathag sang mga kamatuoran sa Biblia nagpalig-on sa akon. Gusto sang akon mga manunudlo nga mag-eskwela ako sa unibersidad, pero gusto ko mag-alagad sa Bethel. Gani, ginhatag ko ang akon aplikasyon para mag-alagad sa Bethel sang kombension sadto sa Toronto. Naghatag ako liwat sang aplikasyon sang 1955 sa kombension sa Yankee Stadium, New York City. Wala magdugay, sang 17 anyos ako, nakabaton ako sang sulat nga nagasiling nga magaalagad ako sa Bethel sa Brooklyn umpisa sa Septiembre 19, 1955. Sang ikaduha ko nga adlaw sa Bethel, nag-obra ako sa Bindery sa 117 Adams Street. Naasayn ako sa makina nga nagatingob sang 32 ka pahina nga bahin sang libro, kag dayon dalhon ini sa makina nga nagatahi sang libro.

Pagligad sang mga isa ka bulan sa Bindery, gin-asayn ako sa Magazine Department kay kahibalo ako magmakinilya. Sadto, ginamakinilya sang mga kauturan sa metal nga stencil ang adres sang mga nagakuha sang suskripsion para sa Ang Lalantawan kag Magmata! Pagligad sang pila ka bulan, gin-asayn ako sa Shipping Department. Ang department overseer nga si Klaus Jensen nangabay sa akon kon puede ko updan ang drayber nga nagadeliber sang mga karton sang literatura sa mga pier para ipadala sa bilog nga kalibutan. May mga magasin man nga nasulod sa mga sako nga dapat dalhon sa post office para ipadala sa mga kongregasyon sa bilog nga Estados Unidos. Si Utod Jensen nagsiling nga makabulig sa akon ang mabug-at nga mga obra. Mga 57 ka kilo lang ako sadto kag  kaniwang gid sa akon. Ang pakadto-pakari sa mga pier kag sa post office nakabulig nga maundan ang akon lawas. Nahibaluan gid ni Utod Jensen kon ano ang maayo para sa akon!

Ginaasikaso man sang Magazine Department ang mga order sang mga kongregasyon nga magasin. Gani nahibaluan ko kon ano nga mga lenguahe sang magasin ang ginaimprinta sa Brooklyn kag ginapadala sa iban nga pungsod. Wala ko pa nabatian ang madamo sa sini nga mga lenguahe pero nalipay ako nga linibo ka magasin ang ginapadala sa malayo gid nga mga lugar. Wala ko mahunahuna sadto nga hatagan ako sa ulihi sing pribilehiyo nga mabisita ang madamo sa sini nga mga lugar.

Sang 1961, gin-asayn ako sa Treasurer’s Office nga ginadumalahan ni Grant Suiter. Pagligad sang pila ka tuig, ginpatawag ako sa opisina ni Nathan Knorr, nga amo ang nagapanguna sadto sa aton bug-os kalibutan nga hilikuton. Ginpaathag niya nga ang isa ka utod sa iya departamento magaeskwela sa Kingdom Ministry School sing isa ka bulan kag iasayn dayon sa Service Department. Ako ang ginbulos sa sini nga utod kag makaupod ko sa obra si Don Adams. Si Don ang nagbaton sadto sang akon aplikasyon para sa Bethel sang kombension sang 1955. Ang duha pa ka utod nga sanday Robert Wallen kag Charles Molohan nagaobra na nga daan sa amo man nga departamento. Sobra 50 ka tuig kami nga apat nga magkaupod sa obra. Nalipay gid ako nga makaupod sa pag-alagad ining matutom nga mga utod!—Sal. 133:1.

Sugod sang 1970, gin-asayn ako nga bisitahon ang pila ka sanga talatapan sang Watch Tower Society. Ginatawag ini sadto nga zone visit. Nagabiyahe ako sing pila ka semana kada tuig ukon kada duha ka tuig. Nalakip sa sini ang pagbisita sa mga pamilya Bethel kag  mga misyonero sa bilog nga kalibutan, paghatag sang espirituwal nga pagpalig-on, kag pag-usisa sang mga rekord sang mga sanga talatapan. Nalipay gid ako nga makilala ang pila nga naggradwar sa una nga mga klase sang Gilead School nga matutom gihapon sa ila asaynment sa iban nga pungsod! Bangod sini nga asaynment, nalipay gid ako nga mabisita ang sobra 90 ka pungsod.

Ang tanan nga Bethelite sa Brooklyn ginaasayn sa mga kongregasyon sa New York City. Gin-asayn ako sa isa ka kongregasyon sa Bronx. Ang pinakauna nga kongregasyon sa sini nga lugar nag-uswag kag gintunga. Ang orihinal gintawag nga Upper Bronx Congregation, kag diri ako nagpakig-upod.

Sang mga tungatunga sang dekada ’60, isa ka pamilya nga taga-Latvia nga nangin Saksi sa bagatnan sang Bronx ang nagsaylo sa teritoryo sang amon kongregasyon. Ang kamagulangan nga babayi nga si Livija nagregular payunir dayon paggradwar niya sa hayskul. Pagligad sang pila ka bulan, nagsaylo sia sa Massachusetts para mag-alagad sa lugar nga nagakinahanglan sing dugang nga manugbantala sang Ginharian. Ginasulatan ko sia parte sa amon kongregasyon, kag ginasulatan man niya ako parte sa iya maayo nga mga eksperiensia sa ministeryo sa Boston.

Pagligad sang pila ka tuig, gin-asayn si Livija bilang espesyal payunir. Gusto gid niya himuon ang iya bug-os nga masarangan sa pag-alagad kay Jehova, gani nag-aplay sia sa Bethel kag ginpatawag sia sang 1971. Pamatyag ko daw may luyag isiling sa akon si Jehova! Sang Oktubre 27, 1973, nagpakasal kami ni Livija kag nalipay gid kami nga si Utod Knorr ang nagpamulongpulong sa amon kasal. Ang Hulubaton 18:22 nagasiling: “Ang nakakita sing maayo nga asawa nakakita sing maayo nga butang, kag mabaton niya ang kahamuot ni Jehova.” Nabaton namon ang kahamuot ni Jehova kay sobra na 40 ka tuig ang amon pag-alagad sa Bethel nga magkaupod. Padayon man ang amon pagsuporta sa isa ka kongregasyon sa pareho gihapon nga lugar sa Bronx.

Makalilipay gid nga makaupod sa obra si Utod Knorr. Daw wala sia ginakapoy sa pagpalapnag sang kamatuoran kag palangga gid niya ang mga misyonero sa bilog nga kalibutan. Madamo sa ila ang gin-asayn sa mga pungsod nga wala sing Saksi. Nasubuan gid ako nga makita nga nagaantos si Utod Knorr bangod sang kanser sang 1976. Isa ka bes, sang nagahigda na lang sia, ginpangabay niya ako nga basahon sa iya ang pila ka artikulo nga ginahanda para imprintahon. Ginpangabay niya ako nga pakadtuon si Frederick Franz para makapamati man sia. Nahibaluan ko sang ulihi nga bangod indi na masyado makakita si Utod Franz, ginahatagan gid sing tion ni Utod Knorr nga mabasa ang mga artikulo sa iya.

Napatay si Utod Knorr sang 1977, pero nalugpayan ang mga nakakilala kag nagapalangga sa iya bangod nangin matutom sia asta sa iya kamatayon bilang isa ka hinaplas.  (Bug. 2:10) Si Utod Franz ang nagbulos sa iya sa pagpanguna sa aton hilikuton.

Sadto nga tion, sekretaryo ako ni Milton Henschel, nga nakaupod ni Utod Knorr sing pila ka dekada. Ginsilingan ako ni Utod Henschel nga ang akon subong panguna nga responsibilidad sa Bethel amo ang pagbulig kay Utod Franz sa bisan ano nga kinahanglan niya. Ginabasa ko sa iya ang mga artikulo antes ini imprintahon. Tumalagsahon gid ang memorya ni Utod Franz kag ang iya ikasarang nga makakonsentrar sa ginabasa sa iya. Nalipay gid ako nga nakabulig ako sa iya sa sini nga paagi asta sa iya kamatayon sang Disiembre 1992 bilang isa ka hinaplas!

Kadasig lang sang tion, 61 ka tuig na ako nga nagaalagad sa Bethel. Ang akon mga ginikanan matutom kay Jehova asta sa ila kamatayon, kag ginakalangkagan ko ang tion nga abiabihon sila sa mas maayo nga kalibutan. (Juan 5:28, 29) Wala sing matanyag ining daan nga sistema nga sarang makatupong sa dalayawon nga pribilehiyo nga mag-alagad kaupod ang matutom nga mga kauturan para sa kaayuhan sang katawhan sang Dios sa bilog nga kalibutan. Masiling gid namon ni Livija nga sa amon pag-alagad sing bug-os tion, “ang kalipay ni Jehova amo ang [amon] pamakod.”—Neh. 8:10.

Padayon nga magalapnag ang kamatuoran parte sa Ginharian bisan ano pa ang matabo, kag wala ini nagadepende sa isa ka tawo sa organisasyon ni Jehova. Nalipay gid ako nga makaupod sa pag-alagad ang madamo nga matutom kag mainunungon nga mga kauturan sa madamo nga tinuig. Ang kalabanan nga hinaplas nga nakaupod ko wala na sa duta. Pero nalipay gid ako nga nakaupod ko ining mga matutom sa pag-alagad kay Jehova.