Paggawi sing Maalamon Kon Tuhoy sa Kalibutan

“Magpadayon sa paglakat sing maalamon kon tuhoy sa mga tagaguwa.”​—⁠COLOSAS 4:⁠5.

1. Batok sa ano anay nakig-away ang unang mga Cristiano, kag ano ang ginlaygay ni Pablo sa kongregasyon sa Colosas?

 ANG unang mga Cristiano nga nagapuyo anay sa mga siudad sang Romanong kalibutan ginaunayan sang idolatriya, imoral nga pagpangalipay, kag paganong mga rito kag mga kinabatasan. Ang mga nagapuyo sa Colosas, isa ka siudad sa katundan nga sentral sang Asia Minor, wala sing duhaduha nga nakig-away batok sa pagsimba sa iloy nga diosa kag sa espiritismo sang tumandok nga mga Frigianhon, sa paganong pilosopiya sang Griegong mga pumuluyo, kag sa Judaismo sang Judiyong kolonya. Ginlaygayan ni apostol Pablo ang Cristianong kongregasyon nga ‘magpadayon sa paggawi sing maalamon’ kon tuhoy sa sina nga mga “tagaguwa.”​—⁠Colosas 4:⁠5.

2. Ngaa ang mga Saksi ni Jehova karon dapat maggawi sing maalamon ayon sa mga tagaguwa?

² Sa karon, ang mga Saksi ni Jehova nagapakig-away batok sa amo man nga sayop nga mga buhat, kag sa madamo pa. Busa, dapat man sila magmaalamon sa pagpakig-angot sa mga tawo nga indi bahin sang matuod nga Cristianong kongregasyon. Madamo sa relihioso kag politikanhon nga mga establisamento subong man sa media ang batok sa ila. Ang iban sini, sa direkta ukon, mas masami, sa indi direkta nga paagi, nagatinguha sa pagmusing sang reputasyon sang mga Saksi ni Jehova kag nagapukaw sing kaugot batok sa ila. Subong nga ang mga Cristiano sang una dimakatarunganon nga gintamod subong panatiko kag makatalagam pa gani nga “sekta,” ang mga Saksi ni Jehova karon masami nga amo ang puntariya sang dimakatarunganon  nga pagpamatok kag sayop nga mga paghangop.​—⁠Binuhatan 24:14; 1 Pedro 4:⁠4.

Paglandas sa Dimakatarunganon nga Pagpamatok

3, 4. (a) Ngaa indi gid paghigugmaon sang kalibutan ang matuod nga mga Cristiano, apang ano ang dapat tinguhaan naton nga himuon? (b) Ano ang ginsulat sang isa ka awtor nahanungod sa mga Saksi ni Jehova nga nabilanggo sa isa ka kampo konsentrasyon sang mga Nazi?

³ Ang matuod nga mga Cristiano wala nagapaabot nga higugmaon sang kalibutan, nga suno kay apostol Juan, “yara sa gahom sang isa nga malauton.” (1 Juan 5:19) Walay sapayan, ginapalig-on sang Biblia ang mga Cristiano nga daugon ang mga indibiduwal padulong sa bahin ni Jehova kag sang iya putli nga pagsimba. Ginahimo naton ini paagi sa direkta nga pagpanaksi kag paagi man sa aton maayong paggawi. Si apostol Pedro nagsulat: “Hupti nga maayo ang inyo paggawi sa tunga sang mga pungsod, agod nga kon ginapakamalaut kamo nila, sila bangod sang inyo maayong mga buhat nga ila nakita maghimaya sa Dios sa adlaw sang iya pag-usisa.”​—⁠1 Pedro 2:⁠12.

⁴ Sa iya libro nga Forgive​—⁠But Do Not Forget, ang awtor nga si Syl­via Salvesen nagsiling tuhoy sa mga babayi nga Saksi nga masigkabilanggo niya sa isa ka kampo konsentrasyon sang Nazi: “Sila nga duha, si Käthe kag si Marga­rethe, kag ang madamo pa, nakabulig sa akon sing daku, indi lamang paagi sa ila pagtuo kundi sa praktikal nga mga butang man. Sila ang naghatag sa amon sang una nga matinlo nga mga trapo para sa amon mga pilas . . . Sa malip-ot nasapwan namon ang amon kaugalingon sa tunga sang mga tawo nga may pag-ulikid sa amon, kag nagpakita sang ila pagkamainabyanon paagi sa ila mga buhat.” Daw ano kaayo nga pamatuod gikan sa “mga tagaguwa”!

5, 6. (a) Ano nga hilikuton ang ginahimo ni Cristo sa karon, kag ano ang indi naton dapat kalipatan? (b) Ano dapat ang mangin panimuot naton sa mga tawo sang kalibutan, kag ngaa?

⁵ Daku ang mahimo naton agod malandas ang dimakatarunganon nga pagpamatok paagi sa aton maalamon nga paggawi ayon sa mga tagaguwa. Matuod, nagakabuhi kita sa tion nga ang aton nagagahom nga Hari, si Cristo Jesus, nagapain sang katawhan sang mga pungsod, “subong sang isa ka manugbantay nga nagapain sang mga karnero gikan sa mga kanding.” (Mateo 25:32) Apang indi gid pagkalipatan nga si Cristo amo ang Hukom; sia ang nagapamat-od kon sin-o “ang mga karnero” kag kon sin-o “ang mga kanding.”​—⁠Juan 5:⁠22.

⁶ Dapat ini mag-impluwensia sang aton panimuot ayon sa mga tawo nga indi bahin sang organisasyon ni Jehova. Mahimo nga kabigon naton sila subong mga kalibutanon, apang bahin sila sang kalibutan sang katawhan nga “ginhigugma gid sang Dios sa bagay nga ginhatag niya ang iya bugtong nga Anak, agod nga ang bisan sin-o nga magpakita sing pagtuo sa iya indi mawala kundi may kabuhi nga walay katapusan.” (Juan 3:16) Maayo pa nga kabigon ang mga tawo subong palaabuton nga mga karnero sangsa matinaastaason nga hukman sila subong mga kanding. Ang iban nga sang una masingki nga nagpamatok sa kamatuoran dedikado nga mga Saksi na karon. Kag madamo sini sa ila ang una nga nadaug sang maluluy-on nga mga buhat, antes sang direkta nga panaksi. Tan-awa, halimbawa, ang laragway sa pahina 18.

Makugi, Indi Agresibo

7. Anong pagmulay ang ginpabutyag sang papa, apang ano ang mahimo ipamangkot naton?

⁷ Ginmulay ni Papa Juan Paulo II ang mga sekta sa kabilugan, kag ang mga Saksi ni Jehova ilabi na, sang magsiling sia: “Ang halos agresibo nga kakugi sang iban sa pagpangita sing bag-ong mga sakop, nga nagapamalaybalay, ukon nagapadulog sang mga nagalalabay sa mga pamusod sang kalye, isa ka sektaryanhon nga huwad sang kakugi sang mga apostoles kag mga misyonero anay.” Mahimo ini ipamangkot, Kon ang sa aton isa ka “huwad sang kakugi sang mga apostoles kag mga misyonero anay,” sa diin makita ang matuod nga kakugi sa pag-ebanghelyo? Sa pagkamatuod indi sa tunga sang mga Katoliko ukon, sa tunga man sang  mga Protestante ukon mga katapo ang Ortodokso nga mga simbahan.

8. Paano naton dapat himuon ang aton pamalaybalay nga pagpanaksi, nga nagalaum sa anong resulta?

⁸ Walay sapayan, agod pamatud-an nga butig ang panumbungon nga agresibo kita sa aton pagpanaksi, dapat kita pirme mangin maluluy-on, matinahuron, kag maayo sing batasan kon nagapalapit kita sa mga tawo. Si disipulo Santiago nagsulat: “Sin-o ang maalam kag mahinangpanon sa inyo? Magpakita sia sa iya maayong paggawi sang iya mga binuhatan nga may pagkalum-ok sang kaalam.” (Santiago 3:13) Ginalaygayan kita ni apostol Pablo nga “indi mangin mapinuyason.” (Tito 3:⁠2) Halimbawa, sa baylo nga pakamalauton sing dayag ang pagtuluuhan sang isa ka tawo nga aton ginapanaksihan, ngaa indi magpakita sing isa ka sinsero nga interes sa iya mga opinyon? Nian sugiri ang tawo sing maayong balita nga yara sa Biblia. Paagi sa paggamit sing positibo nga pagpalapit kag pagpakita sing nagakaigo nga pagtahod sa mga tawo nga may tuhay nga pagtuluuhan, mabuligan naton sila sa pagtigayon sing mas maayo nga panimuot nga mamati, kag ayhan mahangpan ang importansia sang mensahe sang Biblia. Ang resulta mahimo nga ang iban “magahimaya sa Dios.”​—⁠1 Pedro 2:⁠12.

9. Paano naton maaplikar ang laygay ni Pablo (a) sa Colosas 4:5? (b) sa Colosas 4:⁠6?

⁹ Si apostol Pablo naglaygay: “Magpadayon sa paggawi sing maalamon kon tuhoy sa mga tagaguwa, nga ginabakal ang nagakaigo nga tion para sa inyo kaugalingon.” (Colosas 4:⁠5) Sa pagpaathag sining naulihi nga ekspresion, si J. B. Lightfoot nagsulat: “Indi pagpaligara ang kahigayunan, sa paghambal kag sa paghimo sing butang nga makapauswag sang katuyuan sang Dios.” (Italiko amon.) Huo, dapat kita mangin handa sa mga pulong kag sa mga buhat sa nagakaigo nga tion. Ina nga kaalam nagadalahig man sang pagpili kon ano ang nagakaigo nga oras sa pagduaw. Kon ang aton mensahe ginapangindian, bangod bala kay wala ini ginaapresyar sang mga tawo, ukon ini bangod kay nagduaw kita sa oras nga indi nagakaigo? Si Pablo nagsulat man: “Magpamulong kamo sing mainayuhon sa tanan nga tion, nga naunawan sing asin, agod nga makahibalo kamo kon ano ang dapat nga pagsabat ninyo sa tagsatagsa.” (Colosas 4:⁠6) Nagakinahanglan ini sing pasunaid kag matuod nga gugma para sa isigkatawo. Itanyag naton sa tanan nga tion ang mensahe sang Ginharian sing mainayuhon.

Matinahuron kag ‘Handa sa Tagsa ka Maayong Buluhaton’

10. (a) Ano ang ginlaygay ni apostol Pablo sa mga Cristiano nga nagapuyo sa Creta? (b) Paano ang mga Saksi ni Jehova nangin huwaran sa pagsunod sang laygay ni Pablo?

¹⁰ Indi naton makompromiso ang mga prinsipio sang Biblia. Sa pihak nga bahin, indi naton  dapat baisan ang mga pamangkot nga wala sing kaangtanan sa Cristianong integridad. Si apostol Pablo nagsulat: “Padayon nga pahanumduma sila [mga Cristiano sa Creta] nga magpasakop kag magmatinumanon sa mga panguluhan kag mga awtoridad subong mga manuggahom, nga maghanda sa tagsa ka maayong buluhaton, nga dili maghambal sing malaut nahanungod kay bisan sin-o, nga indi magmapinuyason, nga mangin makatarunganon, kag nagapakita sing himpit nga pagtahod sa tanan nga tawo.” (Tito 3:​1, 2) Ang eskolar sa Biblia nga si E. F. Scott nagsulat nahanungod sining dinalan: “Indi lamang dapat tumanon sang mga Cristiano ang awtoridad, kundi dapat sila mangin handa sa bisan anong maayong buluhaton. Ini . . . nagakahulugan nga, kon ginapangayo sang okasyon, ang mga Cristiano dapat amo ang manguna sa pagpakita sing interes sa publiko. May yara pirme sunog, kalalat-an, nanuhaytuhay nga mga kalamidad, nga sa amo nga tion ang tanan nga maayong banwahanon magahandum sa pagbulig sa ila mga isigkatawo.” Madamo nga kalamidad ang nagbunal sa bug-os nga kalibutan kag ang mga Saksi ni Jehova nalakip sa una nga mga nagtabang. Nabuligan nila indi lamang ang ila kauturan kundi ang mga tagaguwa man.

11, 12. (a) Paano dapat maggawi ang mga Cristiano sa mga awtoridad? (b) Ano ang nalakip sa pagpasakop sa mga awtoridad kon tuhoy sa pagpatindog sing mga Kingdom Hall?

¹¹ Ini gihapon nga dinalan gikan sa sulat ni Pablo kay Tito nagapadaku man sang importansia sang paghupot sing matinahuron nga panimuot ayon sa mga awtoridad. Ang mga pamatan-on nga Cristiano nga bangod sang ila tindog sa neutralidad magaatubang sa mga hukom dapat ilabi na mangin maalamon sa paggawi ayon sa mga tagaguwa. Daku ang mahimo nila sa pagpauswag ukon sa paghalit sang reputasyon sang katawhan ni Jehova paagi sa ila panagway, paggawi, kag panghambal sa sina nga mga awtoridad. Dapat sila ‘magbayad sing . . . pagtahod sa talahuron,’ kag pangapinan ang ila kaugalingon nga may dakung pagtahod.​—⁠Roma 13:​1-7; 1 Pedro 2:17; 3:⁠15.

¹² Ang “mga awtoridad” nagalakip sa lokal nga mga opisyal sang gobierno. Karon nga madamo pa nga mga Kingdom Hall ang ginapatindog, indi malikawan ang pagpakig-angot sa lokal nga mga awtoridad. Sa masami, ang mga gulang dimakatarunganon nga ginapamatukan. Apang nasapwan nga kon ang mga tiglawas sang kongregasyon magtukod sing maayong kaangtanan sa mga awtoridad kag magkooperar sa komisyon sang banwa para sa pagplano sing mga butang, ining dimakatarunganon nga pagpamatok sarang malandas. Sa masami nahatag ang maayong panaksi sa mga tawo nga sang una diutay lamang ukon wala gid sing nahibaluan nahanungod sa mga Saksi ni Jehova kag sa ila mensahe.

“Kon Mahimo, Mangin Mahidaiton sa Tanan”

13, 14. Ano ang ginlaygay ni Pablo sa mga Cristiano sa Roma, kag paano naton maaplikar ini sa aton pagpakig-angot sa mga tagaguwa?

¹³ Ginhatag ni Pablo ang masunod nga laygay sa mga Cristiano nga nagapuyo anay sa paganong Roma: “Dili magbayad sa bisan kay sin-o sing malaut sa malaut. Maghimo sing maayong mga butang sa panulok sang tanan nga tawo. Kon mahimo, sa masarangan ninyo, magpakighidait sa tanan nga tawo. Dili kamo magtimalos, mga hinigugma, kundi pabayai ang kasingkal; kay nasulat na: ‘Akon ang pagtimalos; ako ang magatumbas, siling ni Jehova.’ Apang, ‘kon ang imo kaaway ginagutom, pakauna sia; kon ginauhaw sia, paimna sia; kay sa paghimo mo sini magatumpi ka sing mga baga sa iya ulo.’ Dili magpadaug sa malaut, kundi dag-a ang malaut paagi sa maayo.”​—⁠Roma 12:​17-21.

¹⁴ Sa aton pagpakig-angot sa mga tagaguwa, indi malikawan nga masumalang naton nga matuod nga mga Cristiano ang mga manugpamatok. Sa dinalan sa ibabaw, ginapakita ni Pablo nga ang banas sang kaalam amo ang paglandas sang pagpamatok paagi sa maluluy-on nga mga buhat. Kaangay sang masingkal nga mga baga, mahimo nga tunawon sining mga buhat sang pagkamaluluy-on ang kaawayon kag madaug ang manugpamatok agod mangin maluluy-on man sa katawhan ni Jehova, ayhan mapukaw pa gani ang iya interes sa maayong  balita. Kon amo sini ang matabo, ang malaut nadaug sang maayo.

15. San-o ang mga Cristiano dapat labi na nga maghalong sa paggawi sing maalamon ayon sa mga tagaguwa?

¹⁵ Ang maalamon nga paggawi ayon sa mga tagaguwa ilabi na nga importante sa mga puluy-an diin ang isa sang mga tiayon wala pa magbaton sang kamatuoran. Ang pagsunod sa mga prinsipio sang Biblia magapatubas sing mas maayo nga mga bana, mas maayo nga mga asawa, mas maayo nga mga amay, mas maayo nga mga iloy, kag kabataan nga mas matinumanon kag mas palatuon sa eskwelahan. Dapat makita sang ditumuluo ang maayo nga epekto sang mga prinsipio sang Biblia sa tumuluo. Sa amo, ang iban ‘madaug sa walay pulong bangod sang paggawi’ sang dedikado nga mga katapo sang pamilya.​—⁠1 Pedro 3:​1, 2.

‘Pagbuhat sing Maayo Ayon sa Tanan’

16, 17. (a) Sa ano nga mga halad nahamuot gid ang Dios? (b) Paano kita dapat ‘magbuhat sing maayo’ ayon sa aton kauturan kag sa mga tagaguwa man?

¹⁶ Ang labing maayo nga mahimo naton para sa aton isigkatawo amo ang pagdala sa iya sang mensahe sang kabuhi kag tudluan sia nahanungod sa pagpanumbalik kay Jehova paagi kay Jesucristo. (Roma 5:​8-11) Busa si apostol Pablo nagasugo sa aton: “Paagi sa iya [Cristo] maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.” (Hebreo 13:15) Si Pablo nagdugang: “Dugang pa, dili pagkalimti ang paghimo sing maayo kag ang pagpaambit sing mga butang sa iban, kay sa sina nga mga halad nahamuot ang Dios.” (Hebreo 13:16) Dugang sa aton dayag nga pagpanaksi, indi naton dapat pagkalipatan “ang pagbuhat sing maayo.” Isa ini ka kinahanglanon nga bahin sang mga halad nga nagapahamuot sa Dios.

¹⁷ Sa pagkamatuod, nagabuhat kita sing maayo sa aton espirituwal nga kauturan, nga mahimo may pagkinahanglan sa emosyon, sa espirituwal, sa pisikal, ukon sa materyal. Ginpakita ini ni Pablo sang magsulat sia: “Kon may tion kita nga nagakaigo para sa sini, magbuhat kita sing maayo ayon sa tanan nga tawo, apang labi na gid sa mga tagapanimalay sang pagtuo.” (Galacia 6:10; Santiago 2:​15, 16) Apang, indi naton dapat kalimtan ang mga pulong, “Magbuhat kita sing maayo ayon sa tanan nga tawo.” Ang isa ka maluluy-on nga buhat sa isa ka paryente, isigkatawo, ukon kaupod sa trabaho makahimo sing daku agod malandas ang dimakatarunganon nga pagpamatok sa aton kag magabukas sang tagipusuon sina nga tawo sa kamatuoran.

18. (a) Anong mga katalagman ang dapat naton likawan? (b) Paano naton magamit ang aton Cristianong pagkaayo subong panakdag sa aton dayag nga hilikuton sa pagpanaksi?

¹⁸ Agod mahimo ini, indi kinahanglan nga makigsuod kita sa mga tagaguwa. Ina nga mga pagpakig-upod makatalagam gid. (1 Corinto 15:33) Kag indi kita dapat magpakig-abyan sa kalibutan. (Santiago 4:⁠4) Apang ang aton Cristianong pagkaayo makabulig sa aton pagbantala. Sa pila ka kadutaan amat-amat nga nagabudlay ang pagpakighambal sa mga tawo sa ila mga puluy-an. Ang iban sang matag-as nga mga apartment ginaproteksionan sing mga kasangkapan nga nagasablag sa aton sa pagpakig-angot sa mga nagapuyo sa sini. Sa mauswagon nga mga pungsod ang telepono isa ka maayo nga  paagi sa pagbantala. Sa kalabanan nga mga pungsod ang pagpanaksi sa kalye sarang mahimo. Apang, sa tanan nga pungsod, ang pagkamainayuhon, pagkamatinahuron, pagkamaluluy-on, kag pagkamabuligon nagabukas sing mga kahigayunan nga malandas ang dimakatarunganon nga pagpamatok sang mga tawo kag makahatag kita sing maayong panaksi.

Pagpahipos sa mga Manugpamatok

19. (a) Sanglit indi ang tawo ang ginapahamut-an naton, ano ang aton mapaabot? (b) Paano kita dapat magtinguha sa pagsunod sang huwaran ni Daniel kag iaplikar ang laygay ni Pedro?

¹⁹ Ang mga Saksi ni Jehova indi mga manugpahamuot sa mga tawo ukon mahinadlukon man sa mga tawo. (Hulubaton 29:25; Efeso 6:⁠6) Nahibaluan gid nila nga walay sapayan sang tanan nila nga panikasog nga mangin huwaran nga mga manugbayad sing buhis kag maayong mga banwahanon, ang mga manugpamatok magapalapnag gihapon sing malaut nga kabutigan kag magapakalain sa ila. (1 Pedro 3:16) Bangod nahangpan nila ini, ginatinguhaan nila nga ilugon si Daniel, nga tuhoy sa iya ang iya mga kaaway nagsiling: “Indi kita makakita sing bisan ano nga kahigayunan batok sini nga Daniel luwas nga makita naton ini batok sa iya nahanungod sa kasuguan sang iya Dios.” (Daniel 6:⁠5) Indi gid naton pag-ikompromiso ang mga prinsipio sang Biblia agod mapahamut-an ang mga tawo. Sa pihak nga bahin, wala kita nagatinguha nga mangin mga martir. Nagatinguha kita nga magkabuhi sing mahidaiton kag sundon ang laygay sang apostol: “Gani ang kabubut-on sang Dios amo, nga paagi sa paghimo sing maayo pahipuson ninyo ang pagkakulang sing ihibalo nga halambalanon sang dimakatarunganon nga mga tawo.”​—⁠1 Pedro 2:⁠15.

20. (a) Ano ang aton ginapatihan gid, kag anong pagpalig-on ang ginhatag sa aton ni Jesus? (b) Paano kita makapadayon sa paggawi sing maalamon ayon sa mga tagaguwa?

²⁰ Nagapati gid kita nga nahisanto sing bug-os sa Biblia ang aton tindog nga napain sa kalibutan. Ginasakdag ini sang maragtas sang unang-siglo nga mga Cristiano. Nagakalipay kita sa ginsiling ni Jesus: “Sa kalibutan may kapipit-an kamo, apang magpakaisog kamo! nadaug ko ang kalibutan.” (Juan 16:33) Wala kita nahadlok. “Sa pagkamatuod, sin-o nga tawo ang magahalit sa inyo kon magmakugihon kamo tungod sa maayo? Apang bisan pa kon mag-antos kamo tungod sa pagkamatarong, malipayon kamo. Apang, dili pagkahadluki ang ila ginakahadlukan, ukon malisang kamo. Kundi pakabalaana si Cristo subong Ginuo sa inyo tagipusuon, handa pirme sa pagpangapin sa atubangan ni bisan sin-o nga nagakinahanglan sa inyo sing rason para sa paglaum nga yara sa inyo, apang ginahimo ini nga may pagpaubos kag daku nga pagtahod.” (1 Pedro 3:​13-15) Samtang nagahulag sa sining paagi, magapadayon kita sa paggawi sing maalamon ayon sa mga tagaguwa.

Subong Repaso

◻ Ngaa ang mga Saksi ni Jehova dapat maggawi sing maalamon ayon sa mga tagaguwa?

◻ Ngaa indi gid maglaum ang matuod nga mga Cristiano nga higugmaon sang kalibutan, apang ano ang dapat nila tinguhaan nga himuon?

◻ Ano dapat ang mangin panimuot naton sa mga tawo sang kalibutan, kag ngaa?

◻ Ngaa dapat kita ‘magbuhat sing maayo’ indi lamang sa aton kauturan kundi sa mga tagaguwa man?

◻ Paano ang aton paggawi sing maalamon ayon sa mga tagaguwa makabulig sa aton hilikuton sa pagpanaksi sing dayag?

[Mga Pamangkot sa Pagtinuon]

[Piktyur sa pahina 18]

Sa wala: Ang matuod nga mga Cristiano sa Pransia nga nagabulig sa ila mga isigkatawo sa tapos sang baha

[Piktyur sa pahina 20]

Ang maluluy-on nga mga buhat sang mga Cristiano makahimo sing daku sa paglandas sa dimakatarunganon nga pagpamatok

[Piktyur sa pahina 23]

Ang mga Cristiano dapat ‘mangin handa sa tagsa ka maayong buluhaton’