“Ang Diutay” Nangin “Isa ka Libo”

“Ang diutay mangin isa ka libo, kag ang magamay mangin isa ka gamhanan nga pungsod.”​—⁠ISAIAS 60:⁠22.

1, 2. (a) Ngaa ginatabunan sang kadudulman ang duta sa karon? (b) Paano progresibo nga nagsilak ang kapawa ni Jehova sa iya katawhan?

“ANG kadudulman magatabon sang duta, kag ang pitipit nga kadudulman sang pungsudnon nga mga grupo; apang si Jehova magasilak sa imo, kag ang iya himaya makita sa imo.” (Isaias 60:2) Ining pinamulong nagalaragway gid sang kahimtangan sa duta sugod sang 1919. Ginsikway sang Cristiandad ang tanda sang harianon nga presensia ni Jesucristo, ang “kapawa sang kalibutan.” (Juan 8:​12; Mateo 24:3) Bangod sang “daku nga kaakig” ni Satanas, nga pangulo sang “mga manuggahom sang kalibutan sining kadudulman,” ang ika-20 nga siglo amo ang pinakamapintas, pinakamalaglagon nga tion sa maragtas sang tawo. (Bugna 12:​12; Efeso 6:12) Ang kalabanan nga mga tawo nagakabuhi sa espirituwal nga kadudulman.

² Walay sapayan sina, ang kapawa nagaiwag sa karon. Si Jehova ‘nagasilak’ sa iya mga alagad, ang hinaplas nga nagkalabilin, nga amo ang dutan-on nga mga tiglawas sang iya langitnon nga “babayi.” (Isaias 60:1) Ilabi na sugod sang nahilway sila gikan sa pagkabihag sang Babilonia sang 1919, ginpabanaag nila ang himaya sang Dios kag ‘ginpaiwag ang ila kapawa sa atubangan sang mga tawo.’ (Mateo 5:16) Kutob sang 1919 tubtob sang 1931, ang kapawa sang Ginharian labi pa nga nagsanag samtang ginbugto nila ang nabilin nga mga higot sang Babilonianhon nga panghunahuna. Nagdugang ang ila kadamuon tubtob sa linaksa samtang ginatuman ni Jehova ang iya saad: “Pat-od gid nga hugpungon ko ang mga nagkalabilin sang Israel. Ipahamtang ko sila sa paghiusa, kaangay sang kahayupan sa bulukutan, kaangay sang panong sa tunga sang ila halalban; mangin magahod sila bangod sa mga tawo.” (Miqueas 2:12) Sang 1931, labi pa nga nag-athag ang himaya ni Jehova sa iya katawhan sang ginbaton nila ang ngalan nga mga Saksi ni Jehova.​—⁠Isaias 43:​10, 12.

3. Paano nangin maathag nga ang kapawa ni Jehova nagsilak sa iban luwas sa mga hinaplas?

³ Magasilak bala si Jehova sa mga nagkalabilin lamang sang “diutay nga panong”? (Lucas 12:32) Indi. Ang Septiembre 1, 1931, nga guwa sang The Watch Tower nagtudlo sa isa pa ka grupo. Sa isa  ka maathag nga paathag tuhoy sa Ezequiel 9:​1-11, ginpakita sini nga ang tawo nga may tintiruhan sang manunulat nga ginsambit sa sining mga bersikulo nagarepresentar sa hinaplas nga nagkalabilin. Sin-o ang gintandaan sa agtang sina nga “tawo”? Ang “iban nga mga karnero,” ang mga may paglaum nga magkabuhi sing dayon sa paraiso nga duta. (Juan 10:​16; Salmo 37:29) Sang 1935 ini nga grupo sang “iban nga mga karnero” ginhantop nga kaupod sang “dakung kadam-an . . . gikan sa tanan nga pungsod” nga nakita ni apostol Juan sa palanan-awon. (Bugna 7:​9-14) Kutob sang 1935 tubtob karon, daku nga igtalupangod ang gintuon sa pagtipon sa dakung kadam-an.

4. Sin-o ang “mga hari” kag “mga pungsod” nga ginapatuhuyan sa Isaias 60:​3?

⁴ Ining hilikuton sa pagtipon ginpatuhuyan sa tagna ni Isaias sang nagsiling ini: “Ang mga pungsod pat-od nga magakadto sa imo kapawa, kag ang mga hari sa kasanag sang imo pagsilak.” (Isaias 60:3) Sin-o ang “mga hari” nga ginapatuhuyan diri? Ang mga nagkalabilin sang 144,000 nga, kaupod ni Jesucristo, mga masigkamanunubli sang langitnon nga Ginharian kag nanguna sa hilikuton sang pagpanaksi. (Roma 8:​17; Bugna 12:​17; 14:1) Sa karon, mas madamo ang “mga pungsod,” ang mga may dutan-on nga paglaum nga nagkari kay Jehova agod magpatudlo kag nag-agda sa iban nga himuon man ini, sangsa pila ka libo nga nagkalabilin.​—⁠Isaias 2:⁠3.

Ang Makugi nga mga Alagad ni Jehova

5. (a) Ano nga mga katunayan ang nagapakita nga ang kakugi sang katawhan ni Jehova wala mag-ugdaw? (b) Ano nga mga pungsod ang may talalupangdon nga mga pag-uswag sang 1999? (Tan-awa ang tsart sa pahina 17-20.)

⁵ Daw ano nga kakugi ang ginpakita sang modernong-adlaw nga mga Saksi ni Jehova sa bug-os nga ika-20 nga siglo! Kag walay sapayan sang dugang nga mga pag-ipit, ang ila kakugi wala mag-ugdaw samtang nagahilapit ang tuig 2000. Ginatuman nila gihapon sing hanuot gid ang sugo ni Jesus: “Maghimo sing mga disipulo sa mga tawo sa tanan nga kapungsuran.” (Mateo 28:​19, 20) Ang kadamuon sang aktibo nga mga manugbantala sing maayong balita sa katapusan nga tuig sang pag-alagad sang ika-20 nga siglo naglab-ot sa bag-ong kataason nga 5,912,492. Naghinguyang sila sing tumalagsahon nga kabug-usan nga 1,144,566,849 ka oras sa pagpakighambal sa iban tuhoy sa Dios kag sa iya mga katuyuan. Naghimo sila sing 420,047,796 ka pagduaw liwat sa mga interesado kag naghiwat sing 4,433,884 ka wala bayad nga pagtuon sa Biblia sa puluy-an. Daw ano ka makalilipay nga rekord sang makugi nga pag-alagad!

6. Anong bag-o nga kahimusan ang ginhimo para sa mga payunir, kag ano ang reaksion sa sini?

⁶ Sang nagligad nga Enero, ginpahibalo sang Nagadumala nga Hubon ang pagbag-o sa lalambuton nga oras para sa mga payunir. Ginhimuslan ini sang madamo agod magsulod sa grupo sang mga regular kag auxiliary payunir. Halimbawa, sa nahaunang apat ka bulan sang kalendaryo sang 1999, ang sanga talatapan sang Netherlands nakabaton sing apat ka pilo sang kadamuon sang aplikasyon sang regular payunir sangsa amo man nga tion sang nagligad nga tuig. Ang Ghana nagreport: “Sugod sang ginpatuman ang bag-ong tulumuron nga oras sa pagpayunir, ang kadamuon sang amon mga regular payunir dalayon nga nagdugang.” Sa 1999 nga tuig sang pag-alagad, ang kadamuon sang mga payunir sa bug-os nga kalibutan nakalab-ot sa 738,343​—⁠isa ka dalayawon nga pagpakita sing ‘kakugi sa maayong mga buhat.’​—⁠Tito 2:⁠14.

7. Paano ginpakamaayo ni Jehova ang makugi nga hilikuton sang iya mga alagad?

⁷ Ginpakamaayo bala ni Jehova ining makugi nga hilikuton? Huo. Paagi kay Isaias sia nagsiling: “Bayawa ang imo mga mata sa bug-os nga palibot kag tan-awa! Sila tanan nagatipon sing tingob; nagakari sila sa imo. Gikan sa malayo ang imo mga anak nga lalaki magaabot, kag ang imo mga anak nga babayi atipanon sa kilid.” (Isaias 60:4) Ang hinaplas nga “mga anak nga lalaki” kag “mga anak nga babayi” nga gintipon nagaalagad gihapon sing makugi sa Dios. Kag karon, ang iban nga mga karnero ni Jesus ginatipon sa bahin sang hinaplas nga “mga anak nga lalaki” kag “mga anak nga babayi” ni Jehova sa 234 ka kadutaan kag kapuluan sang dagat.

“Tagsa ka Maayong Buhat”

8. Sa anong ‘maayong mga buhat’ aktibo ang mga Saksi ni Jehova?

⁸ Ang mga Cristiano may responsabilidad nga ibantala ang maayong balita sang Ginharian kag buligan ang mga interesado nga mangin mga disipulo. Apang “nasangkapan [sila] sing bug-os para sa tagsa ka maayong buhat.” (2 Timoteo 3:17) Busa, mahigugmaon nila nga ginaatipan ang ila mga pamilya, ginapakita ang pagkamaabiabihon, kag ginaduaw ang mga masakiton. (1 Timoteo 5:​8; Hebreo 13:16) Kag ang mga boluntaryo nadalahig  sa mga proyekto subong sang pagpatindog sing mga Kingdom Hall​—⁠ang hilikuton nga nagahatag man sing panaksi. Sa Togo, pagkatapos sang pagpatindog sing isa ka tilipunan, luyag mahibaluan sang masaligan nga mga miembro sang lokal nga karismatik nga simbahan kon ngaa nakapatindog ang mga Saksi ni Jehova sang ila kaugalingon nga mga tinukod samtang ang simbahan nagkinahanglan pa nga magsuhol sing mga tawo para sa sini nga katuyuan! Ang Togo nagareport nga ang pagpatindog sing maayo-sing-kalidad nga mga Kingdom Hall may subong sini nga positibo nga epekto sa kasilingan amo nga ang iban nga mga tawo nagapanikasog nga makaarkila ukon makapatindog sing mga balay sa mga lugar nga patindugan sang mga tilipunan.

9. Paano naghulag ang mga Saksi ni Jehova sang nanghalit ang mga kalamidad?

⁹ Kon kaisa, ang isa pa ka sahi sang maayong buhat kinahanglanon. Sang nagligad nga tuig sang pag-alagad madamong kadutaan ang nahalitan sang mga kalamidad, kag sing masunson ang nahauna nga nag-abot sa paghatag sing bulig amo ang mga Saksi ni Jehova. Halimbawa, ang daku nga bahin sang Honduras ginhapay sang Bagyo Mitch. Sing maabtik, nagporma ang sanga sing mga komite sa emerhensia sa pag-organisar sing mga panikasog sa pagbulig. Ang mga Saksi sa Honduras kag sa madamo pa nga kadutaan nagdonar sing mga panapton, pagkaon, bulong, kag iban pa nga pangunang mga kinahanglanon. Gingamit sang mga Regional Building Committee ang ila mga ikasarang sa pagpatindog liwat sang kabalayan. Wala madugay kag ang aton mga kauturan nga biktima anay sang kalamidad nabuligan nga makabalik sa ila kinaandan nga mga hilikuton. Sa Ecuador, ginbuligan sang mga Saksi ni Jehova ang ila mga kauturan sang ginguba sang malubha nga pagbaha ang pila ka kabalayan. Pagkatapos makita ang maayo nga paagi sang ila pag-atipan sa kahimtangan, ang isa ka opisyal sang gobierno nagsiling: “Kon makuha ko ini nga grupo, magahimo ako sing mga katingalahan! Ang mga tawo kaangay ninyo dapat makita sa tanan nga bahin sang kalibutan.” Ining maayong buhat nagahatag sing kadayawan kay Jehova nga Dios kag pamatuod sang aton “diosnon nga debosyon [nga] mapuslanon sa tanan nga butang.”​—⁠1 Timoteo 4:⁠8.

‘Nagalupad Sila Subong Sang Panganod’

10. Walay sapayan sang nagadiutay nga kadamuon sang mga hinaplas, ngaa ang ngalan ni Jehova ginapahayag subong sang wala pa gid anay matabo?

¹⁰ Si Jehova karon nagapamangkot: “Sin-o bala ini nga nagalupad subong sang panganod, kag subong sang mga salampati sa ila mga talambuan? Kay sa akon ang kapuluan padayon nga magalaum, ang mga sakayan sang Tarsis subong man sang una, agod dalhon ang imo mga anak gikan sa malayo . . . Ang mga dumuluong magapatindog sang imo mga kuta, kag ang ila mga hari magaalagad sa imo.” (Isaias 60:​8-10) Ang una nga naghulag sa ‘pagsilak’ ni Jehova amo ang iya “mga anak,” ang hinaplas nga mga Cristiano. Nian yara ang “mga dumuluong,” ang dakung kadam-an, nga mainunungon nga nagaalagad sa ila hinaplas nga mga kauturan, nga nagasunod sang ila pagpanguna sa pagbantala sing maayong balita. Sa amo, bisan pa ang kadamuon sang mga hinaplas nagadiutay, ang ngalan ni Jehova ginapahayag sa bug-os nga duta subong sang wala pa matabo sang nagligad.

11. (a) Ano pa ang nagapadayon kag ano ang resulta sang 1999? (b) Ano nga mga pungsod ang may tumalagsahon nga kadamuon sang bawtismo para sa 1999? (Tan-awa ang tsart sa pahina 17-20.)

¹¹ Subong resulta, minilyon ang nagadugok “subong sang mga salampati sa ila mga talambuan,” nakasapo sing dalangpan sa sulod sang Cristianong kongregasyon. Ginatos ka libo ang ginadugang kada tuig, kag ang dalan bukas para sa madamo pa. Si Isaias nagasiling: “Ang imo mga gawang magapabilin nga bukas sing dalayon; indi ini pagtakpan sa adlaw ukon sa gab-i, agod dalhon sa imo ang manggad sang mga pungsod.” (Isaias 60:11) Sang nagligad nga tuig 323,439 ang ginbawtismuhan subong simbulo sang ila dedikasyon kay Jehova, kag wala pa niya gintakpan ang mga gawang. “Ang kalahamut-an nga mga butang sang tanan nga pungsod,” ang mga katapo sang dakung kadam-an, nagaginutok gihapon pasulod sa sini. (Hageo 2:7) Wala sing isa nga luyag maghalin sa kadudulman ang ginasikway. (Juan 12:46) Kabay nga indi pagdulaon sang tanan nga subong sini ang ila apresasyon sa kapawa!

 Wala Kahadlok Walay Sapayan Sang Pagpamatok

12. Paano gintinguhaan sang mga nagahigugma sang kadudulman nga palungon ang kapawa?

¹² Ang mga nagahigugma sang kadudulman indi maluyag sang kapawa ni Jehova. (Juan 3:19) Ginatinguhaan pa gani sang iban nga palungon ina nga kapawa. Ginapaabot ini. Bisan si Jesus, “ang matuod nga kapawa nga nagahatag sing kapawa sa tanan nga sahi sang tawo,” ginyaguta, ginpamatukan, kag sang ulihi ginpatay sang iya kasimanwa. (Juan 1:9) Sa bug-os nga ika-20 nga siglo, ang mga Saksi ni Jehova man gin-uliga, ginbilanggo, gindumilian, ginpatay pa gani, samtang makugi nila nga ginapaiwag ang kapawa ni Jehova. Sining ulihi nga tinuig, ang mga kaaway nagpalapnag sing kabutigan sa media tuhoy sa mga nagaiwag sang kapawa sang Dios. Luyag sang iban papatihon ang mga tawo nga ang mga Saksi ni Jehova makatalagam kag dapat dumilian. Nagmadinalag-on bala ining mga manugpamatok?

13. Ano ang resulta bangod sang mainandamon nga pagpresentar sing mga katunayan may kaangtanan sa aton hilikuton sa media?

¹³ Wala. Kon diin nagakaigo, ang mga Saksi ni Jehova nagpalapit sa media agod ipaathag ang mga kamatuoran. Subong resulta, ang ngalan ni Jehova ginpakilala sing lapnag sa mga pamantalaan kag mga magasin kag sa radyo kag telebisyon. May maayong mga resulta ini sa pagbantala nga hilikuton. Sa Denmark, halimbawa, ang isa ka programa sa telebisyon sang gobierno naghinun-anon sang topiko “Kon ngaa ang pagtuo sang mga Danes nagluya.” Lakip sa mga tiglawas sang iban pa nga mga relihion, ang mga Saksi ni Jehova gin-interbyu. Pagkatapos sina, ang isa ka babayi nga nakatan-aw sang programa nagkomento: “Tuman kaathag kon sin-o ang may espiritu sang Dios.” Isa ka pagtuon ang ginsugdan upod sa iya.

14. Sa ila kahuluy-an, ano ang mapilitan nga batunon sang mga manugpamatok sa dili madugay?

¹⁴ Nahibaluan sang mga Saksi ni Jehova nga madamo sa sining kalibutan ang magapamatok sa ila. (Juan 17:14) Apang, ginapalig-on sila sang tagna ni Isaias: “Magakadto sa imo ang mga anak nga lalaki sang mga nagapapiot sa imo, nga nagayaub; kag ang tanan sang mga nakig-angot sa imo sing di-matinahuron magahapa sa dapadapa sang imo mga tiil, kag tawgon ka nila nga siudad ni Jehova, ang Sion sang Isa nga Balaan sang Israel.” (Isaias 60:14) Sa ila kahuluy-an, kilalahon sa dili madugay sang mga manugpamatok nga sila, sa katunayan, nagapakig-away batok sa Dios mismo. Sin-o ang makadaug sa sina nga inaway?

15. Paano ‘ginsuso [sang mga Saksi ni Jehova] ang gatas sang mga pungsod,’ kag paano ini makita sa ila panudlo kag hilikuton sa pag-ebanghelyo?

¹⁵ Si Jehova dugang nga nagasaad: “Himuon ko pa gani ikaw nga isa ka butang nga ipabugal tubtob sa tion nga wala pat-od . . . Susuhon gid nimo ang gatas sang mga pungsod, kag ang suso sang mga hari susuhan mo; kag pat-od nga makilala mo nga ako, si Jehova, ang imo Manluluwas.” (Isaias 60:​15, 16) Huo, si Jehova amo ang Manluluwas sang iya katawhan. Kon magsalig sila sa iya, magapadayon sila tubtob sa “tion nga wala pat-od.” Kag ‘susuhon nila ang gatas sang mga pungsod,’ nagagamit sing matigayon nga mga paagi para mapauswag ang matuod nga pagsimba. Halimbawa, ang maalamon nga paggamit sing kompyuter kag teknolohiya sa komunikasyon nagapahapos sang dulungan nga pagbalhag sang Ang Lalantawan sa 121 ka hambal kag sang Magmata! sa 62. Ang isa ka espesipiko nga computer software program gindesinyo sa pagbulig nga mabadbad ang New World Translation sa madamo pa nga hambal, kag ini nga mga badbad naghatag sing daku nga kalipay. Sang ang Croatian nga bersion sang Cristianong Griegong Kasulatan ginpaguwa sang 1999, linibo ang nakahibi sa kalipay. Ang isa ka tigulang nga utod nga lalaki nagsiling: “Madugay ko na nga ginhulat ini nga Biblia. Karon mahimo na ako mapatay sing malinong!” Ang sirkulasyon sang New World Translation, sa kabug-usan ukon sing bahin, naglampas sa 100 milyones sa 34 ka hambal.

Mataas nga mga Talaksan sa Moral

16, 17. (a) Bisan pa mabudlay, ngaa importante nga huptan ang mataas nga mga talaksan ni Jehova? (b) Anong eksperiensia ang nagailustrar nga malikawan sang mga pamatan-on ang pagdagta sang kalibutan?

¹⁶ Si Jesus nagsiling: “Sia nga nagabuhat sing  malaut nga mga butang nagadumot sa kapawa.” (Juan 3:20) Sa pihak nga bahin, ang mga nagapabilin sa kapawa nagahigugma sang mataas nga mga talaksan ni Jehova. Si Jehova, paagi kay Isaias, nagsiling: “Tuhoy sa imo katawhan, sila tanan mangin matarong.” (Isaias 60:​21a) Mangin isa ka hangkat nga huptan ang matarong nga mga talaksan sa kalibutan diin ang seksuwal nga imoralidad, pagbutig, kakagod, kag bugal lapnag kaayo. Halimbawa, sa iban nga kadutaan, ang pangabuhi nagauswag kag madali maglisa padulong sa determinado nga paghingamo sing manggad. Apang, si Pablo nagpaandam: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.” (1 Timoteo 6:9) Daw ano kasubo kon ang isa mawili sing daku sa negosyo amo nga ginasakripisyo niya ang importante gid nga mga butang, subong sang Cristianong pagpakig-upod, sagrado nga pag-alagad, mga prinsipio sa moral, kag mga responsabilidad sa pamilya!

¹⁷ Ang paghupot sa matarong nga mga talaksan mahimo mangin mabudlay ilabi na sa mga pamatan-on, kon tuman  kadamo sang ila mga katubotubo ang nagaabuso sa droga kag nagahimo sing imoralidad. Sa Suriname, ang 14-anyos nga dalagita ginpalapitan sang maambong nga solterito sa eskwelahan kag ginhagad nga maghuliray. Nangindi sia, nagapaathag nga ginadumili sang Biblia ini nga mga butang sa mga indi kasal. Ginyaguta sia sang iban nga mga dalagita sa eskwelahan kag gintinguhaan nga ipiton sia agod magbag-o ang iya pensar, nagasiling nga ang tanan luyag maghulid sa sinang partikular nga solterito. Apang, ang dalagita nagtindog sing malig-on. Pagligad sang pila ka semana, ang solterito nasayasat nga HIV positive kag nagmasakit sing malubha. Ang dalagita nalipay nga gintuman niya ang sugo ni Jehova nga ‘maglihi sa pakighilawas.’ (Binuhatan 15:​28, 29) Ginapabugal gid sang mga Saksi ni Jehova ang mga pamatan-on sa tunga nila nga nagatindog sing malig-on sa kon ano ang husto. Ang ila pagtuo, kag ang pagtuo sang ila mga ginikanan, ‘nagapatahom’​—⁠nagahatag sing kadungganan​—⁠sa ngalan ni Jehova nga Dios.​—⁠Isaias 60:​21b.

Ginhatag ni Jehova ang Pag-uswag

18. (a) Anong daku nga butang ang ginahimo ni Jehova para sa iya katawhan? (b) Ano ang pamatuod nga ang pag-uswag magapadayon, kag anong mahimayaon nga mga paglaum ang nagahulat sa mga nagapabilin sa kapawa?

¹⁸ Huo, si Jehova nagahatag sing kapawa sa iya katawhan, nagapakamaayo sa ila, nagatuytoy sa ila, kag nagapabakod sa ila. Sa ika-20 nga siglo, nakita nila ang katumanan sang pinamulong ni Isaias: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.” (Isaias 60:22) Halin sa pila lamang sang 1919, “ang diutay” nangin kapin sa “isa ka libo.” Kag indi pa ina ang katapusan sina nga pag-uswag! Sang nagligad nga tuig 14,088,731 ang nagtambong sa pagsaulog sang Memoryal sang kamatayon ni Jesus. Madamo sa ila ang indi aktibo nga mga Saksi. Nalipay kita nga nagtambong sila sa sadtong importante nga selebrasyon, kag ginaagda naton sila nga magpadayon sa paglakat padulong sa kapawa. Si Jehova nagasilak gihapon sing masanag sa iya katawhan. Ang ganhaan sang iya organisasyon bukas sa gihapon. Kon amo, mangin determinado ang tanan nga magpabilin sa kapawa ni Jehova. Daw ano nga mga pagpakamaayo ang resulta sini para sa aton karon! Kag daw ano nga kalipay ang ihatag sini sa palaabuton kon ang tanan nga tinuga magadayaw kay Jehova kag magakasadya sa pagkahalangdon sang iya himaya!​—⁠Bugna 5:​13, 14.

Mapaathag Mo Bala?

• Sin-o ang nagapabanaag sang himaya ni Jehova sa sining katapusan nga mga adlaw?

• Ano ang nagapakita nga ang kakugi sang katawhan ni Jehova wala mag-ugdaw?

• Sa anong pila ka maayong mga buhat masako ang mga Saksi ni Jehova?

• Walay sapayan sang mapintas nga pagpamatok, sa ano kita nagasalig?

[Mga pamangkot sa Pagtinuon]

 [Tsart sa pahina 17-20]

1999 NGA REPORT SANG PAG-ALAGAD SANG MGA SAKSI NI JEHOVA SA BUG-OS KALIBUTAN

 (Tan-awa ang publikasyon)

[Retrato sa pahina 15]

Ang katawhan nagadugok gihapon sa organisasyon ni Jehova

[Retrato sa pahina 16]

Nalipay kita nga ginbilin ni Jehova nga bukas ang ganhaan para sa mga nagahigugma sang kapawa