Gamay sing Panglawason, Maalwan ang mga Tagipusuon

ANO ang mangin balatyagon mo sa pagpakighambal sa mga estranghero tuhoy sa Ginharian sang Dios kon 76 sentimetros lamang ang imo kataason? Makasugid sa imo si Laura. Sa edad nga 33 anyos, amo sina ang iya kataason, 76 sentimetros lamang. Sila sang iya utod, si Maria, nga 24 anyos kag 86 sentimetros ang kataason, nagapuyo sa Quito, Ecuador. Tuguti sila sa pagpaathag sang mga balagbag nga ila ginaatubang sa ila Cristianong ministeryo.

“Sa pagkadto sa amon teritoryo sa pagbantala kag sa Cristianong mga miting, nagalakat kami sing mga tunga sa kilometro agod makasakay sa bus. Gikan sa amon ginapanaugan, nagalakat kami sing tunga pa sa kilometro agod makasakay sa ikaduha nga bus. Sing makapasubo, sa sining banas may yara lima ka mabaris nga ido. Nahadlok gid kami sa mga ido bangod daw subong sila ka daku sa mga kabayo. Agod bugawon sila kon kinahanglanon, nagadala kami sing malaba nga lipak, nga ginatago namon malapit sa karsada antes magsakay sa bus agod magamit ini sa paglakat namon pauli.

“Ang pagsaka sa bus literal nga isa ka daku nga paglak-ang para sa amon. Nagatindog kami sa ibabaw sang isa ka tumpok sang higko sa pulunduhan sang bus agod mas mahapos ang pagsakay. Ang iban nga mga drayber nagadulog malapit sa tumpok sang higko, apang ang iban wala. Sa amo nga kahimtangan, ginabuligan sang mas mataas sa amon ang isa nga mas manubo sa pagsakay. Agod makasakay sa ikaduha nga bus kinahanglan nga magtabok kami sa isa ka madamo-sing-salakyan nga haywey​—⁠nga mabudlay gid bangod sang amon malip-ot nga mga batiis. Bangod putot kami, ang mabug-at nga bag para sa mga libro isa pa ka kabudlayan. Agod magmulumag-an ang bag, nagagamit kami sing magamay nga Biblia kag ginalimitehan ang kadamuon sang literatura nga dala namon.

“Kutob sa pagkabata, hipuson gid kami. Nahibaluan sang amon mga kaingod nga ang pagpakighambal sa mga estranghero pirme makakululba para sa amon. Gani nakibot kag nagdayaw gid sila nga makita kami nga nagapanuktok sa ila mga ganhaan, kag sa masami nagapamati sila sa amon. Apang sa mga lugar nga indi kami tanto kilala, ang mga tawo masunson lamang nagatamod sa amon subong mga inano; sa amo, wala nila pirme ginahatagan sing serioso nga igtalupangod ang amon mensahe. Walay sapayan sina, ang pagbatyag sang gugma ni Jehova naghatag sa amon sing kaisog nga magpadayon sa ebanghelyo nga hilikuton. Ang pagpamalandong sa Hulubaton 3:​5, 6 naghatag man sa amon sing kaisog.”

Subong sang ginapakita nanday Laura kag María, ang pagpadayon walay sapayan sang pisikal nga mga kasablagan makahimaya sa Dios. Si apostol Pablo nagpangamuyo nga ang iya “ungon sa unod,” ayhan isa ka pisikal nga balatian, kuhaon sa iya. Apang ang Dios nagsiling sa iya: “Ang akon di-bagay nga kaayo tuman na sa imo; kay ang  akon gahom ginahimpit sa kaluyahon.” Huo, ang pisikal nga mga sablag indi kinahanglan nga kuhaon agod makaalagad kita sa Dios. Ang bug-os nga pagsalig sa Dios makabulig sa aton nga mahimo ang labing maayo sa aton mga kahimtangan. Bangod gintamod ni Pablo ang iya “ungon sa unod” sa sining paagi, nakasiling sia: “Kon maluya ako, nian gamhanan ako.” (2 Corinto 12:​7, 9, 10) Pila ka tuig sang ulihi si Pablo nagsulat: “Sa tanan nga butang may kusog ako bangod sa iya nga nagahatag sing gahom sa akon.”​—⁠Filipos 4:⁠13.

Sa modernong mga tion, ang Dios nagahimo sing gamhanan nga buhat paagi sa mga lalaki, mga babayi, kag mga kabataan nga debotado sing bug-os sa iya. Madamo sa ila ang may sablag sa lawas sa pila ka paagi. Bisan pa nga sila tanan nagalaum nga ayuhon sang Dios sa idalom sang Ginharian sang Dios, wala sila nagahulat nga ayuhon anay sila sang Dios antes magtinguha nga maghimo sing pila ka butang sa pag-alagad sa iya.

Nagaantos ka bala bangod sang pila ka pisikal nga kaluyahon? Magpakaisog! Paagi sa imo pagtuo mahimo ka mangin kaangay nanday Pablo, Laura, kag María. Tuhoy sa ila masiling ini, subong sang kahimtangan anay sang mga lalaki kag mga babayi sang pagtuo sang dumaan nga mga tion: “Gikan sa kaluyahon nagbakod” sila.​—⁠Hebreo 11:⁠34.

[Retrato sa pahina 8]

Si María

Si Laura

[Retrato sa pahina 9]

Ginabuligan ni María si Laura nga makasakay sa bus

[Mga retrato sa pahina 9]

“Nahadlok gid kami sa mga ido bangod daw subong sila ka daku sa mga kabayo”

Sa ubos: Sanday Laura kag María kag ang mga nagatuon sing Biblia upod sa ila