“Pangitaa Ninyo si Jehova Kag ang Iya Kusog”

“Tuhoy kay Jehova, ang iya mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.”​—⁠2 CRONICA 16:⁠9.

1. Ano ang gahom, kag paano ini ginagamit sang mga tawo?

ANG gahom mahimo magkahulugan sing pila ka butang, subong sang pagtigayon sing kontrol, awtoridad, ukon impluwensia sa iban; ang ikasarang sa pagpanghikot ukon sa pagpatubas sing isa ka epekto; pisikal nga gahom (kusog); ukon ikasarang sa hunahuna ukon moral. Ang mga tawo wala sing maayo nga rekord kon tuhoy sa paggamit sing gahom. Si Lord Acton, isa ka istoryador, sa pagpamulong tuhoy sa gahom sa mga kamot sang mga politiko, nagsiling: “Ang gahom nagapalain kag ang bug-os nga gahom nagapalain sing bug-os.” Ang modernong maragtas may yara madamo nga halimbawa nga nagapakita sang kamatuoran sang pinamulong ni Lord Acton. Sa ika-20 nga siglo, “gingamhan sang tawo ang tawo sa iya kasamaran” subong sang wala pa gid anay mahanabo. (Manugwali 8:9) Ang garok nga mga diktador nag-abuso sing daku sang ila gahom kag nagkutol sang kabuhi sang minilyon. Ang gahom nga indi kontrolado sang gugma, kaalam, kag katarungan makatalagam.

2. Ipaathag kon paano ang iban pa nga diosnon nga mga kinaiya nagaapektar sang paggamit ni Jehova sa iya gahom.

² Indi kaangay sang madamo nga tawo, pirme ginagamit sang Dios ang iya gahom sa kaayuhan. “Tuhoy kay Jehova, ang iya mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.” (2 Cronica 16:9) Ginagamit ni Jehova ang iya gahom sa kontrolado nga paagi. Ang pagpailob nagapugong sang paglaglag sang Dios sa mga malauton agod hatagan sila sing kahigayunan sa paghinulsol. Ang gugma nagapahulag sa iya nga pasilakon ang adlaw sa tanan nga sahi sang tawo​—⁠sa matarong kag sa di-matarong. Ang katarungan magapahulag sa iya nga gamiton sa katapusan ang iya wala latid nga gahom sa paglaglag sa isa nga may ikasarang sa pagpahanabo sang kamatayon, si Satanas nga Yawa.​—⁠Mateo 5:​44, 45; Hebreo 2:​14; 2 Pedro 3:⁠9.

3. Ngaa ang labing gamhanan nga gahom sang Dios isa ka rason agod magsalig sa iya?

³ Ang makahalawhaw nga gahom sang aton langitnon nga Amay isa ka rason sa pagsalig kag sa pagkompiansia​—⁠sa iya mga saad kag sa iya pangamlig. Ang isa ka bata nagabatyag nga hilway sa peligro sa tunga sang mga estranghero kon nagauyat sia sa kamot sang iya amay, kay nakahibalo sia nga indi magatugot ang iya amay nga mahalitan sia. Subong man, ang aton langitnon nga Amay, ang isa nga “bugana sa gahom sa pagluwas,” magaamlig sa aton gikan sa bisan anong permanente nga halit kon maglakat kita upod sa iya. (Isaias 63:​1; Miqueas 6:8) Kag subong isa ka maayo nga Amay, pirme ginatuman ni Jehova ang iya mga saad. Ang iya wala latid nga gahom nagagarantiya nga ang iya ‘pulong pat-od nga magamadinalag-on sa butang nga ginpadalhan niya sini.’​—⁠Isaias 55:​11; Tito 1:⁠2.

4, 5. (a) Ano ang resulta sang nagsalig sing bug-os si Hari Asa kay Jehova? (b) Ano ang mahimo matabo kon magsandig kita sa tawhanon nga mga solusyon sa aton mga problema?

⁴ Ngaa importante gid nga mangin determinado kita nga mahibaluan ang pag-amlig sang aton langitnon nga Amay? Bangod posible nga madaug kita sang mga sirkunstansia kag malipat sa kon diin nasandig ang aton matuod nga kalig-unan. Makita ini sa halimbawa ni Hari Asa, ang tawo nga kinaandan na nga nagsalig kay Jehova. Sang nagagahom si Asa, ginsalakay sang isa ka milyon ka kasuldadusan sang mga Etiopiahanon ang Juda. Sa paghibalo nga mas madamo ang kasuldadusan sang iya mga kaaway, si Asa nangamuyo: “O Jehova, kon tuhoy sa pagbulig, indi importante sa imo kon bala may madamo ukon yadtong wala sing kusog. Buligi kami, O Jehova nga amon Dios, kay sa imo nagasalig  kami, kag sa imo ngalan nagakari kami batok sa sining kadam-an. O Jehova, ikaw ang amon Dios. Dili pagtuguti nga mahuptan sang mamalatyon nga tawo ang kusog batok sa imo.” (2 Cronica 14:11) Ginhatag ni Jehova ang pangabay ni Asa kag ginpadaug sia.

⁵ Apang, pagkatapos sang madamong tinuig sang matutom nga pag-alagad, ang pagsalig ni Asa sa gahom ni Jehova sa pagluwas nagluya. Agod likawan ang pamahog militar gikan sa naaminhan nga ginharian sang Israel, nangayo sia sing bulig sa Siria. (2 Cronica 16:​1-3) Bisan pa nga ang iya hamham kay Hari Ben-hadad sang Siria nagresulta sa pag-untat sang pagpamahog sang Israel sa Juda, ang pagpakigkatipan ni Asa sa Siria isa ka pagpakita sing kakulang sing pagsalig kay Jehova. Si Hanani nga manalagna mamulayon nga namangkot sa iya: “Dili bala ang mga Etiopiahanon kag ang mga Libyahanon isa gid ka daku nga kusog militar sa kadam-an, sa mga kangga kag sa mga manugkabayo; kag bangod sang pagsalig mo kay Jehova indi bala nga gintugyan niya sila sa imo kamot?” (2 Cronica 16:​7, 8) Walay sapayan sina, ginsikway ni Asa ini nga pagsabdong. (2 Cronica 16:​9-12) Kon nagaatubang sing mga problema, indi kita magsalig sa tawhanon nga mga solusyon. Sa baylo, magpakita kita sing pagsalig sa Dios, kay ang pagsalig sa gahom sang mga tawo di-malikawan nga magadul-ong sa kabang-awan.​—⁠Salmo 146:​3-5.

Pangitaa ang Gahom nga Ginahatag ni Jehova

6. Ngaa dapat naton ‘pangitaon si Jehova kag ang iya kusog’?

⁶ Si Jehova sarang makahatag sing gahom sa iya mga alagad kag makaamlig man sa ila. Ang Biblia nagalaygay sa aton nga ‘pangitaon si Jehova kag ang iya kusog.’ (Salmo 105:4) Ngaa? Bangod kon ginahimo naton ang mga butang sa kusog sang Dios, ang aton gahom magamit para sa kaayuhan, sa baylo nga sa kahalitan, sang iban. Wala na kita sing liwan pa nga makita nga mas maayo nga halimbawa sa sini sangsa kay Jesucristo, nga naghimo sing madamong milagro sa “gahom ni Jehova.” (Lucas 5:17) Ginhugod kuntani ni Jesus ang iya kaugalingon nga magmangin manggaranon, bantog, ukon labing gamhanan pa gani nga hari. (Lucas 4:​5-7) Sa baylo, gingamit niya ang gahom nga ginhatag sang Dios sa iya sa paghanas kag sa pagtudlo, sa pagbulig kag sa pagpang-ayo. (Marcos 7:​37; Juan 7:46) Daw ano kaayo nga halimbawa para sa aton!

7. Anong kinahanglanon nga kinaiya ang ginapalambo naton kon ginahimo naton ang mga butang sa kusog sang Dios sa baylo sang aton kaugalingon?

⁷ Dugang pa, kon ginahimo naton ang mga butang sa “kusog nga ginaaman sang Dios,” magabulig ini sa aton nga magpabilin nga mapainubuson. (1 Pedro 4:11) Ang mga tawo nga nagahimud-os sing gahom para sa ila kaugalingon mangin matinaastaason. Ang isa ka halimbawa amo si Hari Esar-hadon sang Asiria, nga matinaastaason nga nagsiling: “Gamhanan ako, gamhanan gid ako, baganihan ako, makusog ako, daku ako.” Sa kabaliskaran, “ginpili [ni Jehova] ang maluya nga mga butang sa kalibutan, agod mapakahuy-an niya ang makusog nga mga butang.” Sa amo, kon ang isa ka matuod nga Cristiano magpabugal, nagapabugal sia kay Jehova, kay nahibaluan niya nga ang iya nahimo wala niya ginhimo sa kaugalingon nga kusog. ‘Ang pagpaubos sang aton kaugalingon sa gamhanan nga kamot sang Dios’ magahatag sing matuod nga pagbayaw.​—⁠1 Corinto 1:​26-31; 1 Pedro 5:⁠6.

8. Ano anay ang dapat naton himuon agod mabaton ang gahom ni Jehova?

⁸ Paano kita makakuha sing kusog sang Dios? Una sa tanan, dapat naton ini pangabayon sa pangamuyo. Ginpasalig ni Jesus ang iya mga disipulo nga ihatag sang iya Amay ang balaan nga espiritu sa mga nagapangabay sini. (Lucas 11:​10-13) Binagbinaga kon paano sini ginpuno sing gahom ang mga disipulo ni Cristo sang namat-od sila nga tumanon  ang Dios sa baylo sang relihioso nga mga lider nga nagsugo sa ila nga mag-untat sa pagpanaksi tuhoy kay Jesus. Sang nangayo sila sing bulig ni Jehova paagi sa pangamuyo, ang ila hanuot nga pangamuyo ginsabat, kag ang balaan nga espiritu naghatag sa ila sing kusog nga magpadayon sa pagbantala sing maayong balita nga may kasidla.​—⁠Binuhatan 4:​19, 20, 29-31, 33.

9. Ihatag ang ikaduha nga ginhalinan sang espirituwal nga kusog, kag maghinambit sing Makasulatanhon nga halimbawa sa pagpakita sang epekto sini.

⁹ Ikaduha, makakuha kita sing espirituwal nga kusog gikan sa Biblia. (Hebreo 4:12) Ang gahom sang pulong sang Dios ginpadayag sang panahon ni Hari Josias. Bisan pa ginkuha na sining Judeano nga hari ang pagano nga mga idolo gikan sa duta, ang wala ginapaabot nga pagkatukib sang Kasuguan ni Jehova sa templo nagpahulag sa iya nga pabaskugon ining programa sa pagpaninlo.⁠ * Sa tapos mabasa sing personal ni Josias ang Kasuguan sa katawhan, ang bug-os nga pungsod nakigkatipan kay Jehova, kag ginsugdan ang ikaduha kag mas mabaskog nga kampanya batok sa idolatriya. Ang maayo nga resulta sang reporma ni Josias amo nga “sa bug-os niya nga mga adlaw wala sila magtalikod sa pagsunod kay Jehova.”​—⁠2 Cronica 34:⁠33.

10. Ano ang ikatlo nga paagi sa pagkuha sing kusog gikan kay Jehova, kag ngaa kinahanglanon ini?

¹⁰ Ikatlo, makakuha kita sing kusog gikan kay Jehova paagi sa Cristianong paghiliupod. Ginpalig-on ni Pablo ang mga Cristiano nga magtambong sing regular sa mga miting agod “pukawon sa gugma kag sa maayong mga buhat” kag sa pagpalig-on sa isa kag isa. (Hebreo 10:​24, 25) Sang si Pedro ginbuy-an sing milagruso gikan sa bilangguan, luyag niya nga mangin kaupod sang iya mga kauturan, gani nagdiretso sia sa balay sang iloy ni Juan Marcos, diin “ang pila nagtipon kag nagpangamuyo.” (Binuhatan 12:12) Sa pagkamatuod, mahimo kuntani nga sila tanan nagpabilin na lamang sa balay kag nangamuyo. Apang ginpakamaayo nila nga magtipon sa pagpangamuyo kag sa pagpalig-on sa isa kag isa sa sadtong mabudlay nga tion. Sang malapit na matapos ang malawig kag makatalagam nga paglakbay ni Pablo sa Roma, nakigsapol sia sa pila ka kauturan sa Puteoli kag sang ulihi sa iban pa nga naglakbay sa pagpakigkita sa iya. Ang iya reaksion? “Sang makita sila [ang naulihi], nagpasalamat si Pablo sa Dios kag nagpakaisog.” (Binuhatan 28:​13-15) Ginpabakod sia paagi sa pagpakig-upod liwat sa mga masigka-Cristiano. Makakuha man kita sing kusog gikan sa pagpakig-upod sa mga masigka-Cristiano. Tubtob hilway kita kag makasarang sa pagpakig-upod sa isa kag isa, indi naton dapat pagtinguhaan nga maglakat sing isahanon sa makitid nga dalan padulong sa kabuhi.​—⁠Hulubaton 18:​1; Mateo 7:⁠14.

11. Sambita ang pila ka sirkunstansia diin ang “gahom nga labaw sa kinaandan” ilabi na nga kinahanglanon.

¹¹ Paagi sa regular nga pagpangamuyo, pagtuon sang Pulong sang Dios, kag pagpakig-upod sa mga masigkatumuluo, “padayon [kita] nga makatigayon sing gahom sa Ginuo kag sa kabaskugon sang iya kusog.” (Efeso 6:10) Kita tanan wala duhaduha nga nagakinahanglan sing “gahom sa Ginuo.” Ang pila nagaantos sing makapaluya nga mga balatian, ang iban naman sing mga halit sang katigulangon ukon sing kamatayon sang tubtob-buhi nga kaupod. (Salmo 41:3) Ang iban nagabatas sing pagpamatok sang di-tumuluo nga tiayon. Mahimo masapwan sang mga ginikanan, ilabi na sang nagasolo nga mga ginikanan, nga ang pagtrabaho sing bug-os tion samtang ginabuhi ang isa ka pamilya isa gid ka mahago nga responsabilidad. Ang pamatan-on nga mga Cristiano nagakinahanglan sing kusog agod pamatukan ang pag-ipit sang mga katubotubo kag pangindian ang droga kag imoralidad. Wala sing isa ang dapat magpangalag-ag sa pagpangayo kay Jehova sing “gahom nga labaw sa kinaandan” agod malandas ini nga mga hangkat.​—⁠2 Corinto 4:⁠7.

“Nagahatag Sia Sing Gahom sa Ginakapoy”

12. Paano kita ginasakdag ni Jehova sa Cristianong ministeryo?

¹² Dugang pa, si Jehova nagahatag sing gahom sa iya mga alagad kon ginahimo nila ang ila ministeryo. Aton mabasa sa tagna ni Isaias: “Nagahatag sia sing gahom sa ginakapoy; kag sa isa nga wala sing dinamiko nga kusog ginapabugana niya sa bug-os nga kusog. . . . Ang mga nagalaum kay Jehova magabag-o sang ila kusog. Magatimbuok sila nga may mga pakpak subong sang mga agila. Magadalagan sila kag indi paglapyuon; magalakat sila kag indi pagpunawon.” (Isaias 40:​29-31) Si apostol Pablo personal nga nakabaton sing gahom sa paghimo sang iya ministeryo. Subong resulta, ang iya ministeryo epektibo. Sa mga Cristiano sa Tesalonica, sia nagsulat: “Ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa gahom man kag paagi  sa balaan nga espiritu.” (1 Tesalonica 1:5) Ang iya pagbantala kag pagtudlo may gahom sa pagpaluntad sing dakung mga pagbalhin sa mga kabuhi sang mga nagpamati sa iya.

13. Ano ang nagpabakod kay Jeremias nga magpadayon walay sapayan sang pagpamatok?

¹³ Kon nagaatubang sing espiritu sang di-pagsapak sa aton teritoryo​—⁠sa isa ka teritoryo nga ayhan pirme na naton ginabantalaan sa sulod sang mga tinuig nga may diutay lamang nga reaksion⁠—​mahimo kita maluyahan sing buot. Naluyahan man sing buot si Jeremias bangod sang pagpamatok, pagyaguta, kag di-pagsapak nga nasumalang niya. “Indi na gid ako maghinambit sa [Dios], kag indi ako magpamulong pa sa iya ngalan,” siling niya sa kaugalingon. Apang indi sia makahipos. Ang iya mensahe “subong sang kalayo nga nagadabdab nga natakpan sa [iya] mga tul-an.” (Jeremias 20:9) Ano ang naghatag sa iya sing bag-o nga gahom walay sapayan sang daku nga pag-antos? “Si Jehova upod sa akon kaangay sang isa ka makakulugmat nga gamhanan,” siling ni Jeremias. (Jeremias 20:11) Ang apresasyon ni Jeremias sa pagkaimportante gid sang iya mensahe kag sang iya hatag-Dios nga asaynment nagbulig sa iya nga magpanghikot sa pagpalig-on ni Jehova.

Ang Gahom sa Paghalit kag ang Gahom sa Pag-ayo

14. (a) Daw ano ka gamhanan nga instrumento ang dila? (b) Maghatag sing mga halimbawa agod ipakita ang halit nga mahimo sang dila.

¹⁴ Indi tanan nga gahom nga yari sa aton naghalin sing direkta sa Dios. Ang dila, halimbawa, may gahom sa paghalit subong man sa pag-ayo. “Ang kamatayon kag kabuhi yara sa gahom sang dila,” paandam ni Solomon. (Hulubaton 18:21) Ang mga resulta sang malip-ot nga pagpakighambal ni Satanas kay Eva nagapakita kon daw ano ka daku nga halit ang sarang mahimo sang mga pulong. (Genesis 3:​1-5; Santiago 3:5) Daku man nga halit ang sarang naton mahimo paagi sa dila. Ang matinamayon nga mga komento tuhoy sa katambukon sang isa ka dalagita mahimo magtiklod sa iya sa dalan padulong sa anorexia. Ang patarasak nga pagsulitsulit sang pila ka pasipala mahimo maghalit sang madugay na nga pag-abyanay. Huo, ang dila dapat punggan.

15. Paano naton magamit ang aton dila sa pagpabakod kag sa pag-ayo?

¹⁵ Apang, ang dila sarang makapalig-on kag makahalit man. Ang hulubaton sa Biblia nagasiling: “May isa nga nagapamulong sing di-mapatugsilingon kaangay sang mga pagbuno sang espada, apang ang dila sang mga maalam nagabulong.” (Hulubaton 12:18) Ginagamit sang maalam nga mga Cristiano ang gahom sang dila sa paglugpay sa mga napung-awan kag mga namatyan. Ang mahinuklugon nga mga pulong makabulig sa mga tin-edyer nga nagapakigsumpong sa makahalalit nga pag-ipit sang mga katubotubo. Ang madinumdumon nga dila makapasalig liwat sa tigulang nga mga kauturan nga sila ginakinahanglan kag ginahigugma gihapon. Ang mainayuhon nga mga pulong makapahalipay sang adlaw sang mga nagamasakit. Labaw sa tanan, magamit naton ang aton dila sa pagpaambit sa may daku sing puwersa nga mensahe sang  Ginharian sa tanan nga magapamati. Ang pagwali sing Pulong sang Dios masarangan naton kon yara ini sa aton tagipusuon. Ang Biblia nagasiling: “Indi pagpunggi ang maayo gikan sa ila nga nagakadapat sa sini, kon ini yara sa gahom sang imo kamot nga himuon ini.”​—⁠Hulubaton 3:⁠27.

Ang Nagakaigo nga Paggamit sa Gahom

16, 17. Kon nagagamit sang ila hatag-Dios nga awtoridad, paano mailog sang mga gulang, mga ginikanan, mga bana, kag mga asawa si Jehova?

¹⁶ Bisan pa nga sia labing gamhanan, ginagamhan ni Jehova ang kongregasyon nga may gugma. (1 Juan 4:8) Sa pag-ilog sa iya, ang Cristianong mga manugtatap nagaatipan sang panong sang Dios sing mahigugmaon​—⁠nga nagagamit, wala nagaabuso, sang ila awtoridad. Matuod, kon kaisa ang mga manugtatap kinahanglan “magsabdong, magbadlong, maglaygay,” apang ginahimo ini nga “may bug-os nga pagbatas kag kalantip sa pagpanudlo.” (2 Timoteo 4:2) Gani dalayon nga ginapamalandungan sang mga gulang ang mga pulong nga ginsulat ni apostol Pedro sa mga may awtoridad sa kongregasyon: “Tatapa ninyo ang panong sang Dios nga yara sa inyo pag-atipan, indi sa pilit, kundi sing kinabubut-on; indi tungod sa gugma sa di-bunayag nga daug, kundi sing malangkagon; indi nga nagapakaginuo sa mga palanublion sang Dios, kundi mangin mga huwaran sa panong.”​—⁠1 Pedro 5:​2, 3; 1 Tesalonica 2:​7, 8.

¹⁷ Ang mga ginikanan kag mga bana may awtoridad man nga ginhatag sa ila ni Jehova, kag ini nga gahom dapat gamiton sa pagbulig, sa paghanas, kag sa pagpalangga. (Efeso 5:​22, 28-30; 6:4) Ginapakita sang halimbawa ni Jesus nga ang awtoridad sarang mapadapat sing epektibo sa mahigugmaon nga paagi. Kon ang disiplina balanse kag mapinadayunon, ang mga kabataan indi maluyahan sing buot. (Colosas 3:21) Ang pag-asawahay ginapabakod kon mahigugmaon nga ginahimo sang Cristianong mga bana ang ila pagkaulo kag tudok nga ginatahod sang mga asawa ang ila ulo nga bana sa baylo nga labawan ang ila hatag-Dios nga impluwensia sa paggahom ukon sa pagtigayon sang ila luyag.​—⁠Efeso 5:​28, 33; 1 Pedro 3:⁠7.

18. (a) Paano naton dapat ilugon ang halimbawa ni Jehova sa pagpugong sa aton kaakig? (b) Ano ang dapat tinguhaan sadtong may awtoridad nga mapatudok sa mga yara sa idalom sang ila pag-atipan?

¹⁸ Yadtong may awtoridad sa pamilya kag sa kongregasyon dapat ilabi na nga maghalong nga punggan ang ila kaakig, kay ang kaakig nagapatudok sang kahadlok sa baylo sang gugma. Si manalagna Nahum nagsiling: “Si Jehova makuli sa pagpangakig kag daku sa gahom.” (Nahum 1:​3; Colosas 3:19) Ang pagpugong sa aton kaakig isa ka tanda sang kusog, samtang ang pagsilabo sa sini pamatuod sang kaluyahon. (Hulubaton 16:32) Sa pamilya kag sa kongregasyon, ang tulumuron amo ang pagpatudok sang gugma​—⁠gugma kay Jehova, gugma sa isa kag isa, kag gugma sa matarong nga mga prinsipio. Ang gugma amo ang pinakamabakod nga higot sang paghiusa kag ang pinakamabakod nga pangpapagsik sa paghimo kon ano ang husto.​—⁠1 Corinto 13:​8, 13; Colosas 3:⁠14.

19. Anong makalulugpay nga pasalig ang ginahatag ni Jehova, kag ano ang dapat nga reaksion naton?

¹⁹ Agod makilala si Jehova, ang iya gahom dapat kilalahon. Paagi kay Isaias, si Jehova nagsiling: “Wala bala kamo makahibalo ukon wala bala kamo makabati? Si Jehova, ang Manunuga sang mga ukbong sang duta, isa ka Dios tubtob sa tion nga wala sing latid. Wala sia ginalapyo ukon ginaluyahan.” (Isaias 40:28) Ang gahom ni Jehova wala nagakaubos. Kon magsalig kita sa iya kag indi sa aton kaugalingon, indi sia magasikway sa aton. Nagapasalig sia sa aton: “Dili ka mahadlok, kay ako nagaupod sa imo. Dili ka manghulonghulong, kay ako ang imo Dios. Palig-unon ko ikaw. Buligan ko gid ikaw. Alay-ayon ko gid ikaw sang akon tuo nga kamot sang pagkamatarong.” (Isaias 41:10) Paano kita magpanghikot sa iya mahigugmaon nga pag-atipan? Kaangay ni Jesus, gamiton naton pirme ang bisan ano man nga gahom nga ginahatag ni Jehova sa aton sa pagbulig kag sa pagpalig-on. Kabay nga punggan naton ang aton dila agod nagapaayo ini sa baylo nga nagahalit. Kag kabay nga pirme kita magpabilin nga nagamata sa espirituwal, malig-on sa pagtuo, kag mabaskog sa gahom sang aton Dakung Manunuga, si Jehova nga Dios.​—⁠1 Corinto 16:⁠13.

[Nota]

Mapaathag Mo Bala?

• Paano ginagamit ni Jehova ang iya gahom?

• Sa anong mga paagi makakuha kita sing gahom ni Jehova?

• Paano dapat gamiton ang gahom sang dila?

• Paano ang hatag-Dios nga awtoridad mangin isa ka pagpakamaayo?

[Mga Pamangkot sa Pagtinuon]

[Retrato sa pahina 15]

Gingamit ni Jesus ang kusog ni Jehova sa pagbulig sa iban

[Mga retrato sa pahina 17]

Ang pagwali sang Pulong sang Dios masarangan naton kon ang aton tagipusuon yara sa sini