Kon Paano Kita Ginatuytuyan ni Jehova

“Tuytuyi ako sa matadlong nga banas.”​​—⁠SALMO 27:⁠11.

1, 2. (a) Paano ginatuytuyan ni Jehova ang iya katawhan karon? (b) Ano ang nalakip sa paghimulos sing bug-os sa mga miting?

SI Jehova amo ang Tuburan sang kapawa kag kamatuoran, subong sang natun-an naton sa nauna nga artikulo. Ang iya Pulong nagaiwag sang aton dalanon samtang nagalakbay kita sa matadlong nga banas. Si Jehova nagatuytoy sa aton paagi sa pagtudlo sa aton sang iya mga dalanon. (Salmo 119:105) Kaangay sang salmista sang una, mapasalamaton kita nga nagasunod sa mga pagtuytoy sang Dios kag nagapangamuyo: “Tudlui ako, O Jehova, sang imo dalanon, kag tuytuyi ako sa matadlong nga banas.”​—⁠Salmo 27:⁠11.

² Ang isa ka paagi nga si Jehova nagahatag sing panudlo sa karon amo ang paagi sa Cristianong mga miting. Ginahimuslan bala naton sing bug-os ining mahigugmaon nga aman paagi sa (1) pagtambong sing tayuyon, (2) pagpamati sing maayo sa programa, kag (3) pagkomento sa gilayon sa mga bahin nga nagakinahanglan sang pagpakigbahin sang tumalambong? Dugang pa, mapasalamaton bala kita nga nagasunod kon makabaton kita sing mga panugda nga magabulig sa aton sa pagpabilin “sa matadlong nga banas”?

Kamusta ang Imo Pagtambong sa mga Miting?

3. Paano napalambo sang isa ka bug-os tion nga alagad ang maayo nga batasan sang tayuyon nga pagtambong sa mga miting?

³ Ang iban nga mga manugbantala sang Ginharian nagatambong sa mga miting sing tayuyon sugod sa pagkabata. “Sang nagadinalagku kami sang akon mga magulang nga babayi sang dekada 1930,” hinumdom sang isa ka bug-os-tion nga ministro sang mga Saksi ni Jehova, “wala na namon ginapamangkot ang amon mga ginikanan kon bala matambong kami sa mga miting. Nahibaluan namon nga matambong kami luwas lamang kon nagamasakit kami. Ang amon pamilya wala gid nagapalya sa mga miting.” Kaangay sang  manalagna nga si Ana, ining utod nga babayi ‘wala gid nagapalya’ sa duog sang pagsimba kay Jehova.​—⁠Lucas 2:​36, 37.

4-6. (a) Ngaa ang pila ka manugbantala sang Ginharian nagapalya sa mga miting? (b) Ngaa importante gid ang pagtambong sa mga miting?

⁴ Lakip bala ikaw sa mga nagatambong sa mga miting sing tayuyon, ukon nangin di-tayuyon bala ikaw sa sini nga bahin? Namat-od ang pila ka Cristiano nga naghunahuna anay nga nagakaigo ang ila ginahimo nga pat-uron ini. Sa sulod sang pila ka semana, ginrekord nila ang tagsa ka miting nga gintambungan nila. Sang ginrepaso nila ang rekord pagkatapos sang gintalana nga tion, nakibot sila sa kadamuon sang mga miting nga wala nila matambungan.

⁵ ‘Indi katingalahan,’ mahimo isiling sang isa. ‘Ang mga tawo ginaipit gid karon amo nga indi mahapos para sa ila nga mangin tayuyon sa mga miting.’ Matuod gid nga nagakabuhi kita sa mahuol nga mga tion. Isa pa, ang pag-ipit pat-od gid nga magadugang. (2 Timoteo 3:13) Apang indi bala nga, bangod sini, labi pa ka kinahanglanon nga magtambong sing tayuyon sa mga miting? Kon wala nagakaon sing dalayon sang nagakaigo espirituwal nga kalan-on nga nagasakdag sa aton, indi naton mapaabot nga mabatuan ang mga pag-ipit nga ginapapas-an sining sistema sang mga butang. Aba, kon wala ang tayuyon nga pagpakig-upod mahimo kita masulay nga talikdan na lang ang “banas sang mga matarong”! (Hulubaton 4:18) Matuod, kon magpauli kita pagkatapos sang makakalapoy nga adlaw, mahimo nga wala kita pirme nagabatyag nga may gana sa pagtambong sa miting. Apang, kon magtambong gid man kita walay sapayan sang aton kakapoy, nagabenepisyo kita kag ginapalig-on naton ang aton mga masigka-Cristiano sa Kingdom Hall.

⁶ Ang Hebreo 10:25 nagapanugyan sing isa pa ka importante nga rason kon ngaa dapat kita mangin tayuyon sa pagtambong sa mga miting. Didto ginlaygayan ni apostol Pablo ang mga masigka-Cristiano sa pagtipon sing tingob ‘labi na gid samtang ginatan-aw nila nga nagapalapit ang adlaw.’ Huo, indi  naton dapat kalimtan ang katunayan nga ang “adlaw ni Jehova” nagapalapit. (2 Pedro 3:12) Kon maghinakop kita nga ang katapusan sining sistema malayo pa, basi ginatugutan naton nga buslan sang personal nga mga paghimud-os ang kinahanglanon espirituwal nga mga hilikuton, subong sang pagtambong sa mga miting. Nian, subong sang ginpaandam ni Jesus, ‘yadto nga adlaw magaabot sa aton sing hinali.’​—⁠Lucas 21:⁠34.

Mangin Maayo nga Tagpalamati

7. Ngaa importante para sa mga kabataan nga magpamati sa mga miting?

⁷ Ang pagtambong sa mga miting indi tuman. Dapat kita magpamati sing maayo, nagahatag sing igtalupangod sa kon ano ang ginasiling didto. (Hulubaton 7:24) Nagalakip ini sa aton mga kabataan. Kon ang isa ka bata nagaeskwela, ginapaabot sa iya nga magpamati sia sa manunudlo, bisan pa nga wala niya maluyagan ukon daw indi niya maintiendihan ang isa ka partikular nga subject. Nahibaluan sang manunudlo nga kon ang bata magatinguha sa pagpamati, sa di-magkubos makapanginpulos sia gikan sa leksion. Kon amo, indi bala makatarunganon nga magpamati ang nagaeskwela nga mga kabataan sa mga panudlo sa mga miting sa kongregasyon sa baylo nga pabay-an sila nga magtulog sa gilayon nga magsugod na ang miting? Matuod, lakip sa hamili nga mga kamatuoran nga masapwan sa Kasulatan amo ang “pila ka butang nga mabudlay mahangpan.” (2 Pedro 3:16) Apang indi naton dapat pakadiutayon ang ikasarang sang isa ka bata sa pagtuon. Ang Dios wala nagapakadiutay sini. Sang panahon sang Biblia, ginsugo niya ang iya lanubo nga mga alagad ‘sa pagpamati kag sa pagtuon kag sa pagkahadlok kay Jehova kag sa mahalungon nga pagtuman sa tanan nga mga tinaga sining kasuguan,’ ang pila sini wala duhaduha nga mabudlay mahangpan sang mga kabataan. (Deuteronomio 31:12; ipaanggid ang Levitico 18:​1-30.) Kubos bala sa sini ang ginapaabot ni Jehova sa mga kabataan karon?

8. Ano nga mga tikang ang ginahimo sang pila ka ginikanan agod buligan ang ila mga kabataan sa pagpamati sing maayo sa mga miting?

⁸ Nahibaluan sang Cristianong mga ginikanan nga ang espirituwal nga mga kinahanglanon sang ila mga kabataan ginapun-an sing bahin sang ila natun-an sa mga miting. Gani, ang iban nga mga ginikanan nagahimo sing kahimusan nga makatulog sa makadali ang ila mga kabataan antes sang mga miting agod magaabot sila sa Kingdom Hall nga nakapahuway kag handa sa pagtuon. Ang pila ka ginikanan mahimo maglatid sing estrikto ukon maalamon nga magdumili sang pagtan-aw sing telebisyon sang ila mga kabataan sa mga gab-i nga may miting. (Efeso 5:​15, 16) Kag ginahuptan sining mga ginikanan ang pinakadiutay gid nga mga tublag, nagapalig-on sa ila mga kabataan sa pagpamati kag sa pagtuon, suno sa ila edad kag ikasarang.​—⁠Hulubaton 8:⁠32.

9. Ano ang mahimo makabulig sa aton sa pagpalambo sang aton ikasarang sa pagpamati?

⁹ Si Jesus nagapamulong sa mga hamtong sang nagsiling sia: “Hatagi ninyo sing igtalupangod kon paano kamo nagapamati.” (Lucas 8:18) Sa karon, masunson nga mas madali ini hambalon sangsa himuon. Matuod, ang pagpamati sing maayo isa ka paghimakas, apang ang ikasarang sa pagpamati sarang mapalambo. Samtang imo ginapamatian ang isa ka pamulongpulong sa Biblia ukon ang isa ka bahin sa miting, tinguhai nga ihamulag ang panguna nga mga ideya. Pakta ang masunod nga ihambal  sang humalambal. Pangitaa ang mga punto nga sarang mo magamit sa imo ministeryo ukon maaplikar sa imo kabuhi. Repasuha sa hunahuna ang mga punto samtang ginabinagbinag ini. Magkuha sing malip-ot nga mga nota.

10, 11. Paano ginbuligan sang pila ka ginikanan ang ila mga kabataan nga mangin maayo nga mga tagpalamati, kag ano nga mga paagi ang nasapwan mo nga mabuligon?

¹⁰ Ang maayo nga batasan sa pagpamati matun-an sing labing maayo samtang bata pa. Bisan antes sila makatuon sa pagbasa kag sa pagsulat, ang pila ka kabataan nga wala pa nagaeskwela ginapalig-on sang ila mga ginikanan sa pagkuha sing “mga nota” sa tion sang mga miting. Ginamarkahan nila sa isa ka panid sang papel kon ang pamilyar nga mga tinaga subong sang “Jehova,” “Jesus,” ukon “Ginharian” ginagamit. Sa sining paagi, ang mga kabataan sarang makatuon sa pagkonsentrar sa kon ano ang ginasiling sa plataporma.

¹¹ Bisan ang mas magulang nga mga kabataan nagakinahanglan kon kaisa sing pagpalig-on agod magpamati. Bangod natalupangdan niya nga nagalagaw ang hunahuna sang iya 11-anyos nga anak nga lalaki sa tion sang isa ka Cristianong kombension, gindaho sang isa ka ulo sang pamilya ang Biblia sa bata kag ginpangabay sia sa pagpangita sang mga kasulatan nga ginasambit sang mga humalambal. Ang amay, nga nagakuha sing mga nota, nagatan-aw samtang ginauyatan sang iya anak ang Biblia. Pagkatapos sadto, ginsundan na sang bata ang programa sang kombension sing mas mapagsik.

Tuguti ang Imo Tingog nga Mabatian

12, 13. Ngaa importante ang pagpakigbahin sa pag-amba sang kongregasyon?

¹² Si Hari David nag-amba: “Magalibot ako sa imo halaran, O Jehova, agod nga mapabati ko sing mabaskog ang pagpasalamat.” (Salmo 26:​6, 7) Ang mga miting sang mga Saksi ni Jehova nagahatag sing labing maayo nga mga kahigayunan agod mapabutyag naton ang aton pagtuo sing mabaskog. Ang isa ka paagi nga mahimo naton ini amo ang pagpakigbahin sa pag-amba sang kongregasyon. Isa ini ka importante nga bahin sang aton pagsimba, apang mahimo ini madali patumbayaan.

¹³ Ang pila ka kabataan nga indi pa makabasa nagasaulo sang liriko sang mga ambahanon sang  Ginharian nga gamiton sa mga miting kada semana. Nakunyag sila sa pag-amba upod sa mga hamtong. Apang, samtang nagadaku ang mga kabataan, mahimo nga nagabuhin ang ila huyog sa pagbuylog sa pag-amba sing mga ambahanon sang Ginharian. Ang pila ka hamtong nagapangalag-ag man sa pag-amba sa mga miting. Apang, ang pag-amba bahin sang aton pagsimba, subong nga ang pag-alagad sa latagon bahin sang aton pagsimba. (Efeso 5:19) Ginahimo naton ang aton bug-os nga masarangan sa pagdayaw kay Jehova sa ministeryo sa latagon. Indi bala naton sia himayaon man paagi sa pagbayaw sang aton mga tingog​—⁠matahom man ukon indi​—⁠sa tinagipusuon nga mga ambahanon sang pagdayaw?​—⁠Hebreo 13:⁠15.

14. Ngaa ang materyal nga ginatun-an naton sa mga miting sa kongregasyon takus sang mahalungon nga abanse nga paghanda?

¹⁴ Ginadayaw man naton ang Dios kon nagakomento kita sing makapalig-on sa tion sang mga bahin sa aton mga miting nga nagakinahanglan sang pagpakigbahin sang tumalambong. Nagakinahanglan ini sing paghanda. Nagakinahanglan sing tion agod pamalandungan ang mas madalom nga mga bahin sang Pulong sang Dios. Si apostol Pablo, nga isa ka maukod nga estudyante sang Kasulatan, nakahibalo sini. Sia nagsulat: “O pagkadalom sang kamanggaran kag kaalam kag ihibalo sang Dios!” (Roma 11:33) Mga padre-de-pamilya, importante gid nga buligan ninyo ang tagsa ka katapo sang inyo pamilya sa pagpangita sang kaalam sang Dios, suno sa ginapahayag sa Kasulatan. Magpain sing tion agod mapaathag ang mabudlay nga mga punto kag agod mabuligan ang inyo pamilya sa paghanda para sa mga miting sa tion sang pangpamilya nga pagtuon sa Biblia.

15. Anong mga panugda ang mahimo magbulig sa isa sa pagkomento sa mga miting?

¹⁵ Kon luyag mo magkomento sing mas masunson sa mga miting, ngaa indi mo handaan sing abanse ang mga butang nga luyag mo ihambal? Indi kinahanglan ang detalyado gid. Ang isa ka nagakaigo nga teksto sa Biblia nga ginabasa nga may pagtuo ukon ang pila ka ginpili-sing-maayo nga mga tinaga nga ginahambal sing tinagipusuon ginaapresyar. Ang iban nga mga manugbantala nagapangabay sa konduktor sang pagtinuon nga itigana sa ila ang nahauna nga komento sa isa ka espesipiko nga parapo, agod indi nila mawasi ang kahigayunan nga mapabutyag ang ila pagtuo.

Ang mga Indi Eksperiensiado Mangin Maalam

16, 17. Ano nga laygay ang ginhatag sang isa ka gulang sa isa ka ministeryal nga alagad, kag ngaa epektibo ini?

¹⁶ Sa mga miting sang mga Saksi ni Jehova, masunson kita ginapahanumdom nga basahon adlaw-adlaw ang Pulong sang Dios. Ang paghimo sini nagapapagsik. Nagabulig man ini sa aton sa paghimo sing maalamon nga mga desisyon, sa pagtadlong sang mga kaluyahon sa personalidad, sa pagpamatok sa mga pagsulay, kag sa pagpasag-uli sang aton espirituwal nga pagkabalanse kon nakahimo kita sing sayop nga tikang.​—⁠Salmo 19:⁠7.

¹⁷ Ang eksperiensiado nga mga gulang sang kongregasyon nakahanda pirme sa paghatag sing Makasulatanhon nga laygay nga ginapasibu sa aton mga kinahanglanon. Ang himuon lamang naton amo ang ‘pagsag-ub sini’ paagi sa pagpangayo sang ila pasad-sa-Biblia nga laygay. (Hulubaton 20:⁠5) Isa ka adlaw ang isa ka makugi nga lamharon nga ministeryal nga alagad nagpangayo sing mga panugda sa isa ka gulang kon paano sia mangin mas mapuslanon sa kongregasyon. Ang gulang, nga nakakilala sing maayo sa pamatan-on, nagbukas sang iya Biblia sa 1 Timoteo 3:​3, nga nagasiling nga ang gintangdo nga mga lalaki dapat mangin “makatarunganon.” Ginpaathag niya sing malulo ang mga paagi nga sarang mapakita sang pamatan-on ang pagkamakatarunganon sa iya kaangtanan sa iban. Nasaklaw bala ang pamatan-on nga utod sa tampad nga laygay nga nabaton niya? Wala gid! “Gingamit sang gulang ang Biblia,” paathag niya, “gani nahangpan ko nga ang laygay naghalin kay Jehova.” Mapasalamaton nga gin-aplikar sang ministeryal nga alagad ang laygay kag naghimo sing maayo nga pag-uswag.

18. (a) Ano ang nagbulig sa isa ka pamatan-on nga Cristiano nga mabatuan ang pagsulay sa eskwelahan? (b) Anong mga teksto sa Biblia ang madumduman mo kon nagaatubang sing pagsulay?

¹⁸ Ang Pulong sang Dios sarang man makabulig sa mga pamatan-on sa ‘pagpalagyo sa mga kailigbon nga pinamatan-on.’ (2 Timoteo 2:22) Napamatukan sang isa ka lamharon nga Saksi ni Jehova nga kasan-o lang nakatapos sing hayskul ang pagsulay sa bug-os nga tinuig nga nagaeskwela sia paagi sa pagpamalandong kag sa pag-aplikar sa pila ka teksto sa Biblia. Masunson niya gindumdom ang laygay nga narekord sa Hulubaton 13:20: “Sia nga nagalakat upod sa maalam nga mga tawo magaalam.” Sing nahisuno, naghalong sia nga magpakig-abyan lamang sa mga nagatahod sing tudok sang mga  prinsipio sang Kasulatan. Nangatarungan sia: “Pareho lang ako sa iban. Kon makig-upod ako sa sayop nga kadam-an, pahamut-an ko lang ang akon mga abyan, kag makadul-ong ina sa problema.” Ang laygay ni Pablo nga narekord sa 2 Timoteo 1:8 nakabulig man sa iya. Sia nagsulat: “Indi mo ikahuya ang panaksi tuhoy sa aton Ginuo, . . . kundi makig-ambit ka sa pag-antos sang kalainan para sa maayong balita.” Nahisanto sa sina nga laygay, maisugon niya nga ginpaambit ang iya mga pagtuluuhan pasad sa Biblia sa iya mga kabutho sa tanan nagakaigo nga higayon. Kada ginatangdo sia sa paghatag sing oral nga report sa klase, ginapili niya ang isa ka topiko nga makahatag sia sing mataktikanhon nga panaksi may kaangtanan sa Ginharian sang Dios.

19. Ngaa wala mabatuan sang isa ka pamatan-on ang mga pag-ipit sining kalibutan, apang ano ang naghatag sa iya sing espirituwal nga kusog?

¹⁹ Kon maglisa gid man kita gikan sa “banas sang mga matarong,” ang Pulong sang Dios makabulig sa aton sa pagtadlong sang aton mga tikang. (Hulubaton 4:18) Natun-an mismo ini sang isa ka pamatan-on nga taga-Aprika. Sang ginduaw sia sang isa sang mga Saksi ni Jehova, ginbaton niya ang pagtuon sa Biblia. Naluyagan niya ang iya ginatun-an apang wala magdugay nakig-upod sia sa malain nga mga kaupdanan sa eskwelahan. Sang ulihi, nangin imoral ang iya pagkabuhi. “Pirme ako ginatublag sang akon konsiensia, gani nag-untat ako sa pagtambong sa mga miting,” ginabaton niya. Sang ulihi, nagtambong liwat sia sa mga miting. Ang pamatan-on nagkomento sing subong sini: “Natukiban ko nga ang panguna nga rason sini tanan amo nga ginagutom ako sa espirituwal. Wala ako sing personal nga pagtuon. Amo ina kon ngaa indi ko mabatuan ang pagsulay. Nian nagsugod ako sa pagbasa sing Ang Lalantawan kag Magmata! Sing amat-amat, natigayon ko liwat ang akon espirituwal nga kusog kag gintinluan ang akon kabuhi. Isa ini ka maayong panaksi sa mga nakatalupangod sang mga pagbag-o nga ginhimo ko. Nabawtismuhan ako, kag malipayon na ako karon.” Ano ang naghatag sing kusog sa sining pamatan-on nga madaug ang iya undanon nga mga kaluyahon? Natigayon niya liwat ang iya espirituwal nga kusog paagi sa tayuyon, personal nga pagtuon sa Biblia.

20. Paano mabatuan sang isa ka pamatan-on ang mga pagsalakay ni Satanas?

²⁰ Mga Cristianong pamatan-on, ginasalakay kamo karon! Agod mabatuan ninyo ang mga pagsalakay ni Satanas, dapat kamo magkaon sang espirituwal nga pagkaon sing tayuyon. Nahangpan ini sang salmista, nga maathag nga isa man ka pamatan-on. Nagpasalamat sia kay Jehova tungod sang pag-aman sang iya Pulong, agod ‘matinluan sang pamatan-on ang iya banas.’​—⁠Salmo 119:⁠9.

Kon Diin Man ang Dios Nagatuytoy, Sundon Naton

21, 22. Ngaa indi kita dapat maghinakop nga ang dalanon sang kamatuoran tuman kabudlay?

²¹ Gintuytuyan ni Jehova ang pungsod sang Israel pa guwa sa Egipto kag pasulod sa Ginsaad nga Duta. Ang ruta nga ginpili niya mahimo nga daw mabudlay kaayo gikan sa pagtamod sang tawo. Sa baylo sang daw mas mahapos, mas laktod nga ruta sa ubay sang Dagat Mediteraneo, gintuytuyan ni Jehova ang iya katawhan sa mabudlay nga ruta sa desyerto. Apang, pagkaayo gid ini sa bahin sang Dios. Bisan pa mas laktod, mahimo nga maglabay ang mga Israelinhon sa pungsod sang kaaway nga mga Filistinhon sa ruta sa dagat. Paagi sa pagpili sing lain nga ruta, ginluwas ni Jehova ang iya katawhan sa maaga nga pagpakig-away sa mga Filistinhon.

²² Sing kaanggid, ang banas nga ginapalaktan karon ni Jehova sa aton mahimo nga daw mabudlay kon kaisa. Kada semana, may yara kita masako nga iskedyul sang Cristianong mga hilikuton, lakip ang mga miting sa kongregasyon, personal nga pagtuon, kag pag-alagad sa latagon. Ang iban nga mga banas mahimo nga daw mas mahapos. Apang makalab-ot lamang kita sa kaladtuan nga ginapanikasugan naton nga kadtuan kon sundon naton ang panuytoy sang Dios. Busa, magpadayon kita sa pagkuha sing kinahanglanon gid nga instruksion gikan kay Jehova kag magpabilin sa “matadlong nga banas” sing dayon!​—⁠Salmo 27:⁠11.

Mapaathag Mo Bala?

• Ngaa ilabi na nga dapat kita magtambong sing tayuyon sa Cristianong mga miting?

• Ano ang sarang himuon sang mga ginikanan agod buligan ang ila mga kabataan sa pagpamati sing maayo sa mga miting?

• Ano ang nalakip agod mangin isa ka maayo nga tagpalamati?

• Ano ang makabulig sa aton agod makakomento sa mga miting?

[Mga Pamangkot sa Pagtinuon]

[Retrato sa pahina 16]

Ang pagtambong sa Cristianong mga miting nagabulig sa aton nga dumdumon pirme ang adlaw ni Jehova

[Retrato sa pahina 18]

May yara lainlain nga mga paagi sa pagdayaw kay Jehova sa Cristianong mga miting