Kita ang Sahi nga may Pagtuo

Pagpaambit sang Cristianong Paglaum sa Senegal

ANG isda nangin panguna na nga pagkaon sugod sang dumaan nga mga tion. Sa sulod sang linibo ka tuig, nangisda ang mga tawo sa mga kadagatan, mga linaw, kag mga suba. Ang pila sang mga apostoles ni Jesucristo mga mangingisda sa Dagat sang Galilea. Apang, gintudluan sila ni Jesus sing isa pa ka sahi sang pagpangisda. Espirituwal ini nga pagpangisda nga makabenepisyo indi lamang ang mga mangingisda kundi ang mga isda man.

Tuhoy sa sini, ginsilingan ni Jesus ang mangingisda nga si Pedro: “Kutob karon magadakop ka na sang buhi nga mga tawo.” (Lucas 5:10) Ginahimo ini karon nga sahi sang pagpangisda sa kapin sa 230 ka kadutaan, lakip na sa Senegal. (Mateo 24:14) Maisugon nga ginapaambit diri sang modernong adlaw nga “mga mangingisda sang mga tawo” ang ila Cristianong paglaum sa iban.​—⁠Mateo 4:⁠19.

Nahamtang ang Senegal sa pinakakatundan nga punta sang Aprika. Nagalab-ot ini halin sa balasbalason nga mga duog sa desyerto sa dulunan sang Sahara sa aminhan pakadto sa mahun-og nga mga kagulangan sang Casamance nga rehiyon sa bagatnan. Ang Senegal isa ka duog nga ginaagyan sang makapalaso nga mga hangin sang desyerto kag subong man sang mabugnaw, makaparepresko nga dupoydupoy sang Atlantiko. Nagapuyo diri ang kapin sa siam ka milyon ka tawo. Bantog ang mga pumuluyo sang Senegal tungod sa ila pagkamaabiabihon. Ang kalabanan wala nagapangangkon nga mga Cristiano. Madamo ang mga manugbantay sang karnero, samtang ang iban mga bakero sang mga baka, mga kamelyo, kag mga kanding. May mga mangunguma man nga nagatanom sing mani, algodon, kag humay. Huo, kag may mga mangingisda, nga nagapangisda sa Dagat Atlantiko kag gikan sa pila ka dalagku nga mga suba sa bug-os nga pungsod. Ang pagpangisda amo ang panguna nga palangabuhian sa Senegal. Sa katunayan, ang bantog nga pagkaon sa pungsod nga ceebu jën, isa ka manamit nga pagkaon sang kan-on, isda, kag mga utan.

“Mga Mangingisda Sang mga Tawo”

May 863 ka makugi nga mga manugbantala sang Ginharian sang Dios sa Senegal. Nagsugod diri ang espirituwal nga pagpangisda sang maaga nga bahin sang dekada1950. Ginbuksan ang sanga talatapan sang Watch Tower Society sa Dakar, ang kapital, sang 1965. Ang misyonero nga “mga mangingisda” nag-abot gikan sa madamong malayo nga mga pungsod. Ang “pagpangisda” nagsugod, kag ang pagpaambit sang Cristianong paglaum sa Senegal padayon nga nag-uswag. Sang ulihi, ang bag-o nga mga pasilidad gintukod sa Almadies, sa naguwa nga bahin sang Dakar, kag gindedikar ini kay Jehova sang Hunyo 1999. Isa gid ini ka tion sa pagkalipay!

Ang Hangkat Sang Pagbaton sa Kamatuoran

Regular nga ginapakig-angutan ang katawhan nga may lainlain nga ginhalinan, kag ang pila nagbaton sang mensahe sang paglaum nga masapwan sa Pulong sang Dios. Bisan pa madamo ang wala sing ihibalo sa Biblia, nalipay sila sa paghibalo nga ang mga saad ni Jehova nga Dios sa matutom nga mga propeta sang una matuman sa dili madugay.

Masami nga kinahanglan ang kaisog agod magtindog sing malig-on sa Cristianong mga prinsipio, ilabi na kon nadalahig ang mga tradisyon kag mga kinabatasan sang pamilya. Halimbawa, lapnag nga ginabuhat ang poligamya sa Senegal. Talupangda ang kaso sang isa ka tawo nga may duha ka asawa sang nagsugod sia sa pagtuon sa Biblia. May kaisog bala sia nga batunon ang Cristianong kamatuoran kag sundon ang Makasulatanhon nga sugo nga mangin bana sang isa lamang ka asawa? (1 Timoteo 3:⁠2) Kag huptan bala niya ang asawa sang iya pagkapamatan-on, ang babayi nga una niya ginpakaslan? Amo sini ang iya ginhimo, kag nagaalagad sia karon subong isa ka makugi nga gulang sa isa sang dalagku nga mga kongregasyon sa duog sang Dakar. Ang iya una nga asawa nagbaton man sing kamatuoran upod sa tanan niya nga 12 ka kabataan, 10 gikan sa iya una nga asawa kag 2 gikan sa iya anay ikaduha nga asawa.

Ang isa pa ka balagbag sa pagbaton sa Cristianong paglaum mahimo amo ang indi pagkahibalo magbasa kag magsulat. Nagakahulugan bala ini nga ang tawo nga indi makahibalo magbasa kag magsulat indi makabaton kag makabuhat sang kamatuoran? Indi. Binagbinaga ang halimbawa ni Marie, isa ka mapisan nga iloy nga may walo ka lamharon nga kabataan. Nakita niya dayon ang importansia sang pagbinagbinag sang isa ka teksto sang Biblia upod sa iya lamharon nga mga bata kada adlaw antes sila magkadto sa eskwelahan  kag sia sa iya trabaho. Apang paano niya ginahimo ini kay indi man sia makahibalo magbasa? Temprano kada aga, ginadala niya ang pulyeto nga Pag-usisa sa Kasulatan sa Adlaw-adlaw kag nagatindog sa balason nga kalye sa atubangan sang iya balay. Samtang nagalabay ang mga tawo, ginapamangkot niya sila kon makahibalo sila magbasa. Kon makasapo sia sang isa nga makahibalo magbasa, ginatunghol niya ang pulyeto kag hanuot nga nagasiling: “Indi ako makahibalo magbasa, mahimo bala nga basahon mo sa akon ini nga bahin karon?” Nagapamati sia sing maayo sa pagbasa. Ginapasalamatan niya dayon ang naglabay kag nagasulod dayon sa iya balay agod ipakighambal sing mapagsik ang teksto upod sa iya kabataan antes sila maglakat sa eskwelahan!

Ang Tanan nga Sahi Sang Tawo Nagahulag

Sa Senegal, makita ang mga tawo nga nagapungko sa mga kalye nga nagabaligya sing isda, mga utanon, ukon mga prutas sa tiendahan ukon nagapungko sa matahom nga baobab nga kahoy nga nagainom sing ataya, isa ka mapait nga berde nga tsa. Bangod determinado nga ipaambit ang maayong balita sa tanan nila nga masugilanon, nakighambal ang duha ka utod sa isa ka inutil nga nagapakilimos sa dalan. Sa tapos matamyaw sia, sila nagsiling: “Madamo nga tawo ang nagahatag sa imo sing kuwarta apang wala nagadulog sa pagpakighambal sa imo. Nagkari kami agod ipakighambal sa imo ang tuhoy sa isa ka butang nga tuman ka importante may kaangtanan sa imo palaabuton.” Nakibot ang manugpakilimos. “Luyag ka namon pamangkuton,” padayon sang mga utod. “Sa banta mo, ngaa daku ang pag-antos sa kalibutan?” “Kabubut-on ini sang Dios,” sabat sang manugpakilimos.

Nangatarungan dayon sa iya ang mga utod gikan sa Kasulatan kag ginpaathag ang Bugna 21:⁠4. Natandog gid ang manugpakilimos sa sini nga mensahe sang paglaum kag sa kamatuoran nga may isa nga interesado gid sa iya nga nagdulog kag nagbinagbinag sang Biblia. Naghibi sia. Sa baylo nga mangayo sing kuwarta, nakitluoy sia sa mga utod nga kuhaon ang tanan nga sensilyo nga yara sa iya lata nga ginabutangan sing limos! Namilit gid sia amo nga nakakuha ini sang igtalupangod sang tanan nga nag-alagi. Nabudlayan gid ang mga kauturan sa paghaylo sa iya nga taguon ang kuwarta. Nagsugot sia sang ulihi apang namilit nga duawon sia liwat.

Ang daku nga unibersidad sa Dakar nagadugang man sa nadakop sa espirituwal nga pukot. Didto isa ka estudyante sa pagkadoktor nga si Jean-Louis ang nagsugod sa pagtuon sa Biblia. Ginbaton niya dayon ang kamatuoran, nagdedikar sang iya kabuhi kay Jehova, kag ginbawtismuhan. Ang iya handum amo ang alagaron ang Dios sa bug-os tion nga pag-alagad subong payunir, apang nalipay man sia sa iya pagtuon sang medisina. Bangod sang isa ka kontrata sa iya tumandok nga pungsod, naobligar sia nga tapuson ang iya pagtuon. Apang, nagsugod sia sa pag-auxiliary payunir sa amo man nga tion. Wala madugay pagkatapos mabaton ang iya diploma subong isa ka kalipikado nga manugbulong, gin-agda sia nga mag-alagad sa daku nga puluy-an Bethel sa Aprika subong doktor sang pamilya. Ang isa pa ka pamatan-on nga lalaki nga napakig-angutan sa Unibersidad sang Dakar nagaalagad man karon sa pamilya Bethel sa iya tumandok nga pungsod.

Ang espirituwal nga pagpangisda sa Senegal makapaladya gid. Ginaapresyar gid ang mga literatura sa Biblia sang mga Saksi ni Jehova kag ginaimprinta na karon sa lokal nga lenguahe nga Wolof. Madamo nga tawo nga bunayag sing tagipusuon ang napalig-on sa paghulag sing mapinasalamaton bangod sa pagkabati sang maayong balita sa ila mismo pinulungan. Upod ang mga pagpakamaayo ni Jehova, walay duhaduha nga madamo pa nga simbuliko nga isda ang madakop, samtang padayon nga ginapaambit sang makugi nga “mga mangingisda sang mga tawo” sa Senegal ang Cristianong paglaum sing matutom kag maisugon.

[Mapa/Retrato sa pahina 31]

(Para sa aktual nga pormat, tan-awa ang publikasyon)

SENEGAL

[Retrato]

Pagpaambit sang Cristianong paglaum sa Senegal

[Credit Line]

Mountain High Maps® Copyright © 1997 Digital Wisdom, Inc.