Nagakadula Na Bala ang Kahulugan sang Tinaga nga “Cristiano”?

ANO ang kahulugan sang mangin isa ka Cristiano? Paano mo ini sabton? Walay pili nga ginpamangkot ang mga tawo sa nanuhaytuhay nga pungsod sina gid nga pamangkot, kag yari ang mga halimbawa sang ila mga sabat:

“Pagsunod kay Jesus kag pag-ilog sa iya.”

“Mangin isa ka maayo nga tawo kag magbulig sa iban.”

“Pagbaton kay Cristo subong Ginuo kag Manluluwas.”

“Pagtambong sa Misa, pag-Rosaryo, kag Pagpangalawat.”

“Wala ako nagapati nga kinahanglan nga magkadto ka sa simbahan agod mangin isa ka Cristiano.”

Bisan ang mga diksionaryo nagahatag sing makalilibog nanuhaytuhay nga mga kahulugan. Ang isa ka reperensia, sa katunayan, naghatag sing napulo ka kahulugan para sa tinaga nga “Cristiano,” halin sa “pagtuo ukon pagmiembro sa relihion ni Jesucristo” tubtob sa “isa ka disente ukon kalahamut-an nga tawo.” Indi katingalahan nga madamo ang ginabudlayan sa pagpaathag kon ano ang kahulugan sang mangin isa ka Cristiano.

Isa ka Liberal nga Huyog

Sa karon, sa tunga sang nagapangangkon nga mga Cristiano​—⁠bisan sa tunga sang mga nagapungko sa isa lamang ka bangko sa simbahan​—⁠masapwan sang isa ang nanuhaytuhay nga pagtamod sa mga topiko subong sang pag-inspirar sang Dios sa Biblia, teoriya sang ebolusyon, pagkanadalahig sang simbahan sa politika, kag pagpaambit sang pagtuo sang isa sa iban. Ang mga hulusayon sa moralidad, tuhoy sa mga topiko subong sang aborsion, homoseksuwalidad, kag mga mag-asawa nga nagapuyuay nga indi kasal, masunson nga nangin buluaran sang binais. Ang maathag nga huyog amo ang pagkaliberal.

Ang isa ka hukmanan sa simbahan sang Protestante, halimbawa, nagpabor sining karon lang sa pagsakdag sa kinamatarong sang simbahan “sa pagpili sa isa ka agi nga gulang sa nagadumala nga talapuanan sini,” report sang magasin nga Christian Century. Nagsiling pa gani ang pila ka teologo nga ang pagtuo kay Jesus indi importante sa kaluwasan. Nagapati sila nga ang mga Judiyo, mga Muslim, kag ang iban pa “mahimo man nga makasulod sa langit [subong sang mga Cristiano],” siling sang isa ka report sa The New York Times.

Hunahunaa lamang kon masarangan mo, ang isa ka Marxist nga nagasakdag sing kapitalismo ukon isa ka demokrata nga nagatib-ong sang diktatoryal ukon isa ka environmentalist nga nagasakdag sang pagkalbo sa kagulangan. “Ina nga tawo indi gid mahimo nga mangin isa ka Marxist ukon demokrata ukon isa ka environmentalist,” siling mo​—⁠kag mahimo nga husto ikaw. Apang, kon binagbinagon mo ang nanuhaytuhay nga pagtamod sang nagapangangkon nga mga Cristiano karon, makita mo ang mga pagtuluuhan nga magkatuhay gid kag masunson nga nagasumpakil sa gintudlo sang Tagtukod sang Cristianismo, si Jesucristo. Ano ang ginasiling sini tuhoy sa ila sahi sang Cristianismo?​—⁠1 Corinto 1:⁠10.

Ang handum nga bag-uhon ang Cristianong mga panudlo agod magsanto sa karon nga huyog may malawig nga maragtas, subong sang makita naton. Ano ayhan ang balatyagon sang Dios kag ni Jesucristo sa sining mga pagbag-o? Matawag bala sang mga simbahan nga nagasakdag sang mga panudlo nga wala maghalin kay Cristo ang ila kaugalingon nga Cristiano? Ini nga mga pamangkot binagbinagon sa masunod nga artikulo.